Levetekɔ 24
24
Laŋpo-ŋai mɛi káa mɛni
(Ɛsedɔ 27:20, 21)
1Yâwɛɛ è m̀o Mose ma ǹyɛɛi, 2“M̀ó ǹûai dîa dí pá a ɔle-wúlɔ maa waa lɛ́lɛɛ laŋpo-ŋai mɛni ma Ɣâla ŋɔsua-kɔlɔ seɣe pɛrɛi mu mɛni ma. 3Ɣele-wulii a kɛ̀ Eelɔŋ é laŋpo-ŋai ŋí tɔ́ɔ é dísee Gono-tee Gãlai seeni Gwaa ma Waai ma perêi seɣei ŋɛ́i-tuɛ. Nyiŋi káa a tɔ̂ŋ ǹyaŋ fɛ̂ɛ dí mɛi káa a tãi kélee. 4Fɛ̂ɛ Eelɔŋ é laŋpo-ŋai ŋí sée dísee wuru-ŋai ŋá nyii-ŋai díkpɛtɛ̂i a gôoi díɣɛli ma gɛ́ dímɛi kàa díkɛ soŋ Yâwɛɛ ŋɛ́i-tuɛ.
Gbóloi gáa Ɣâla mɛni mai
5“Felaƃa kɔpu buu feerɛ káo náaŋ síɣe í kpólo kpua buu feerɛ kpɛtɛ la. 6Díkpɛ̃yâŋ ɣɛli ma feerɛ-feerɛ teƃelei ŋá, ǹɔ́ɔlu mɛi da é kɛ́ ƃò ɣɛli tɔnɔ ma, m̀ɛi da kɛ́ ƃò gbeli ma. Dímɛi pɛ́lɛ a gôo Yâwɛɛ ŋɛ́i-tuɛ. 7Kúŋ sɛŋ kúŋ nɛ̃ɛ pú ma teƃelei ŋá a gɛɛ gɛ́ ƃò a kili too ŋ̀á sama-sɛŋ Yâwɛɛ mɛni ma. 8Fɛ̂ɛ gbóloi ŋí é kɛ́ teƃelei ŋá Yâwɛɛ ŋɛ́i-tuɛ a Vii-tɔ̂ɔ ɣelei kélee. M̀ɛnii ŋí ƃé Eezuɛ-ŋai díkɛ gɛ̂i wɔlɔ-wɔlɔ da wɔlɔ-wɔlɔ. 9Gbóloi ŋí káa a Eelɔŋ pɔ́ɔ da ǹônii, nyaŋ fɛ̂ɛ dí mii gwaa maa waai ma. Gáa a m̀ii-sɛŋ maa waa mɛni kpanaŋɔɔ da gùla Yâwɛɛ m̀a a sâla, zâla láa soŋ-ƃelai mɛni ma.”
Tɔŋ kpɛ́-maa sã̂a ŋɔkɔɔŋ-maa
10Tãi tɔnɔ è kɛ̀ naa Ize naloŋ tɔnɔ da ǹóŋ-surɔ̂ŋ nyii è maa sɔlɔ ƃò Eezuɛ nɛni tɔnɔ mai da Eezuɛ nyaŋkpa tɔnɔ da dí laa-sâa kɛ̀ m̀ûui su. 11Eezuɛ nɛnii ŋí ǹóŋ è Ɣâla làraŋ é ǹáɣaŋ. Dí ǹyaŋkpai ŋí sòŋ dí pá la Mose pɔ́. Ǹyaŋkpai ŋí ǹee láa ƃe kɛ̀ a Selomi. Selomi ǹâŋ láa ƃe kɛ̀ a Diburi. Diburi è kɛ̀ a Daŋ ŋɔsuui su nuui da. 12Dí dòo ŋɛi-gao kpɔnɔ ŋá m̀ûui su dí maa kpɛ̂ŋ kɛ́ dí gáa m̀ɛnii Yâwɛɛ a pâi m̀ôi dîa a gɛɛ dí gɛ́ lai.
13Nya ƃe Yâwɛɛ è m̀o Mose ma ǹyɛɛi, 14“M̀ó ǹûai dîa dí kúla la m̀ûui su dí lí la díkpɔŋ gîe ma kwaai ḿa, diai kélee ŋ̀óo mɛnii dí díyee pɛ́lɛ ŋ̀ûa dí fáa ma a gɛɛ bere ƃé è m̀o la. A kɛ̀ tí, gbɔŋ su-ƃelai kélee dí zɔɔ a kɔni é lɛ́ɛ la zu é sáa. 15M̀ó dîa a gɛɛ núu da a Ɣâla naɣaŋ bere ƃe da pâi gɛ̂i la a maa nuui. 16Ŋɔ̃ya kpaa máŋ Eezuɛ nuu da a Ɣâla ǹaɣaŋ ǹûai kélee da pâi maa nuui sɔɔ̂i a kɔni é lɛ́ɛ la zu é sáa.
17“Núu da a m̀arâŋ pàa dí baa ǹyaa máŋ. 18Núu da a m̀arâŋ nuu ŋɔtaa-tulɛi da pàa fɛ̂ɛ maa nuui é daa-tulɛi vela-fei kɛ́. Fúlu-laa pɔɔ-tooi ƃa fúlu-laa.
19“Núu da a mɛni ŋánaa kɛ̀ a m̀arâŋ nuu bere kpɔ́ nɔ́ è gɛ̀ tí lai dí gba kula nɔ́ tí ma ǹyaa máŋ. 20À kɛ̀ gao ƃe è ŋ̀ale, dí gao ɣále. À kɛ̀ è ŋ̀ɛ́i-gao dɔnɔ wòlo, dí ŋ̀ɛ́i-gao tɔnɔ wólo. A kɛ̀ è ǹyíŋ tɔnɔ ɣále dí ŋ̀ɔi dɔnɔ ɣále ǹyaa máŋ. Mɛni ŋánaa sii kélee a gɛ̀ a m̀arâŋ nuui dí gba kula nɔ́ tí maa nuui ma. 21Núu da a fɛnɛ-sɛŋ da pàa nyii vé a bɔ́ɔi a bɔɔ-too tɛɛ. Kɛ́lɛ núu a núu pàa dí maa nuui páa ǹyaa máŋ. 22Dɔ̂ŋ ŋí káa káai a Eezuɛ-ŋai kámɛni ma da ŋ̀ɔ̃ya-ŋai díkaa kásamai, kpɛni fêi, ńyãa ƃa Káɣâlai Yâwɛɛ.” 23Mose kɛ́ɛ a kpɛɛ dɔ̂ŋ tɛɛ̂i Eezuɛ-ŋai pɔ́i, dí kùla a ǹalôŋ m̀ûui su dí lɛ́ɛ zɔɔ̂i a kɔni é lɛ́ɛ la zu é sáa. Dɔ̂ŋ-ŋai Ɣâla è dɛ̀ɛ Eezuɛ-ŋai pɔ́ Mose sârai, dí ŋ̀aa-see kɛ̀.
Currently Selected:
Levetekɔ 24: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia