Levetekɔ 7
7
Mɛni kpa kúlaa maa sâla sɛŋ
1Dɔ̂ŋ-ŋai ká ŋí bîlaŋɔɔi mɛni kpa kúlaa maa sâla sɛŋ ma, nyii maa waai. 2Ƃɛ́i da géreŋ sâla sɛŋ maa taa-tulɛi pâa naai, naa ƃé dí mɛni kpa kúlaa maa taa-tulɛi páa naa. Dí ŋãa kpɛ́mɛŋ ŋ̀âla-teƃelei ḿâ dí dínaŋ la. 3Dí ŋ̀úlɔ kélee tɛ́ɛ a sama-sɛŋ. Ŋ̀óŋ tɔɔi wulɔi da ŋ̀úlɔi kélee gáa goi pere sãai diai, 4goi kɔni káo feerɛi ḿâ wulɔi, zama diliŋ ma wulɔi da ŋɔba-pâi ma wulɔi. 5Zâla láa soŋ nuui a pâi díkerenii ŋ̀âla-teƃelei ma a kéreŋ sama-sɛŋ Yâwɛɛ mɛni ma. Gáa a mɛni kpa kúlaa ma sâla sɛŋ. 6Zinâai kélee díkaa zâla láa soŋ ƃelai samai da pɔ̂ri zâla sɛŋ ŋí da miî. Kɛ́lɛ fɛ̂ɛ dí mii gwaa ma waai ma. Gáa a sâla sɛŋ maa waa kɛ́tɛi.
7Dɔŋ-ŋai ŋí káa zɔnyɔ̂ŋ salai mɛni ma da mɛni kpa kúlaa maa sala. Zâla sãai ŋí kélee káa a zâla láa soŋ nuui pɔ́ɔ nyii a zâlai kula ǹûai mɛni mai. 8Daa-tulɛ̂i nyii kélee da gùla a kéreŋ sâlai, gɔlɔ káa a zâla láa soŋ nuui pɔ́ɔ nyii zâlai kúla ǹúui ŋɔsɔnyɔ̂ŋ mɛni mai. 9Ǹyaŋ m̀ii-sɛŋ sala sɛŋ nyii da gbɛ̀tɛ kpólo kpɛtɛ kwaa ma, kpaa máŋ da gbɛ̀tɛ kpólo kpɛtɛ pâne sui, kpaa máŋ dí ŋ̀ɔŋ gáa a zâla láa soŋ nuui pɔ́ɔ nyii zâlai kúla ǹúui ŋɔsɔnyɔ̂ŋ mɛni mai. 10Kɛ́lɛ m̀ii-sɛŋ sala sɛŋ nyii zumoɔôi a wúlɔ kpaa máŋ gbalaâi, gáa a Eelɔŋ ǹônii pɔ́ɔ, ǹyaŋ fɛ̂ɛ dí ŋáa kɔ́lɛ díloai a bɔriɛɛ.
Laoi-laa sama-sɛŋ
11Dɔŋ-ŋai ka ŋí bîlaŋɔɔi laoi-laa sala sɛŋ mɛni ma nyii núu a dɛ̀ɛ Yâwɛɛ pɔ́i. 12À kɛ̀ a sɛɣɛ-fei sala ƃé a gulâi, à kɛ̀ pâi a maa taa-tulɛi é bɛ́lɛ kpólo ma nyii tɛ́-sɛŋ fé zu, zumoɔɔ a ɔle-wúlɔ da kpólo kpala-ƃela ɔle-wulɔ siaa ma é pɛ́lɛ gbóloi ma nyii dí gbɛ̀tɛ a felaƃa fũa lɛ́lɛɛ zumoɔɔ a ɔle-wúlɔi. 13À kɛ̀ pâi a zâla sãai ŋí é kpólo pɛ́lɛ ma nyii dí gbɛ̀tɛ a tɛ́-sɛŋ. 14É gbólo-ŋai ŋí síɣe tɛi-tɛi yɛ̂ɛ berei díkpɛtɛ pere káa lai é dɛ́ɛ Yâwɛɛ pɔ́. Gáa a zâla láa soŋ nuui nyii a zâla taa-tulɛi ŋãa kpɛ̂mɛŋ ŋ̀âla-teƃelei mai pɔ́ɔ. 15Dí zâla suai kélee mii a ŋ̀elei da zâlai kùla lai. Da fé lɛ̀ɛ é lɛ́ɛ la zu ɣele é ƃɔ́.
16Kɛ́lɛ à kɛ̀ a kono-tee sala sɛŋ kpaa máŋ kili-kula sâla-sɛŋ, da pɔ̂ri da miî gbeli é lɛ́ɛ dí m̀ii a bôlu ma ɣelei. 17Kɛ́lɛ à kɛ̀ zuai da a lɛ̀ɛ ŋ̀ele kûui zaaƃai é seri, fɛ̂ɛ dí géreŋ. 18À kɛ̀ núu da à zuai da m̀ii a ŋ̀eɣe kûui zaaƃa ɣelei, Ɣâla fé pâi ǹyée seêi ǹúui mu dí zâlai kùla m̀ii da ŋɔsama-sɛŋ. Zama-sɛŋ ŋí maa fé pâi kɛ̂i a ŋ̀waa. Ǹúui kélee a da mii, a pâi maa tɔ̂ŋ kpɛ̀ maai sɔlɔ ƃôi. 19À kɛ̀ zuai ŋí a lɛ̀ɣɛ sɛŋ da ḿâ nyii maa fé waa níi, núu da fé m̀ii, kɛ́lɛ fɛ̂ɛ dí géreŋ.
Ǹúui nyii kélee maa waai a pɔ̂ri zuai ŋí da miî. 20Kɛ́lɛ à kɛ̀ nuui nyii maa fé waa ní a zuai ŋí da m̀ii, maa nuui fé pâi wɔ́lɔ kɛ̂i a Ɣâla ŋɔnûai da. 21À kɛ̀ núu a lɛ̀ɣɛ sɛŋ da ḿâ nyii m̀aa fé waa níi, é máŋ kɛ́ a, núu, fɛnɛ-sɛŋ, kpaa máŋ sɛŋ da kélee nyii maa fé waa nîi, é Yâwɛɛ ŋɔlii-see sala-sɛŋ ŋí zua da m̀ii, maa ǹúui tí fé pâi wɔ́lɔ kɛ̂i a Ɣâla ŋɔnûai da.
22Ǹyaŋ Yâwɛɛ è mò Mose ma ǹyɛɛi, 23“Ḿo Eezuɛ-ŋai dîa yɛ́ɛi, káfe sua wulɔ kélee da mii. A nɛ̃ɛ ma kpîŋ é kɛ́ a niŋa, ƃála kpaa ƃoli. 24Sua nyii kélee sàa gbɔɔ̂i yee mai da nyii kélee lɔɔ fɛnɛ-sɛŋ è baai, káfe ŋ̀úlɔ da mii. Ka pɔ̂ri tíi dá kpɛ́ni kélee kɛ̂i la. 25Ǹúui nyii kélee a zuai ŋ̀úlɔ da mii nyii dí gùla Yâwɛɛ ma a mii-sɛŋ sala sɛŋ, maa nuui fé pâi wɔ́lɔ kɛ̂i a Yâwɛɛ ŋɔnûai da. 26Káfe máŋ ŋɔni sîi kélee da ŋãa mii kpaa máŋ fɛnɛ-sɛŋ ŋãa ƃɛ̂i kélee ka kɛ̀ naai. 27Ǹúui kélee a sua ŋãa m̀ii, maa nuui máŋ fé pâi wɔ́lɔ kɛ̂i a Ɣâla ŋɔnûai da.”
28Yâwɛɛ è mò Mose ma a gɛɛ é mó Eezuɛ-ŋai dîa ǹyɛɛ 29ǹúui kélee a lii-see sala kùla Yâwɛɛ mai, fɛ̂ɛ maa nuui é pá a zâla sɛŋ da Yâwɛɛ pɔ́. 30É pá a kéreŋ sâla-sɛŋ Yâwɛɛ pɔ́ a gbɔɔ̂i yee. Maa sala sɛŋ é kɛ́ a daa-tûlɛi ŋ̀úlɔ da geŋe-la nyii gáa a ŋɔsama-sɛŋ gbîŋ-kpiŋ. 31Ǹyaŋ zâla láa soŋ nuui a pâi zua wulɔi kérenii ŋ̀âla-teƃelei ŋá. Zua keɣe-la káa a Eelɔŋ pɔ́ɔ da ǹônii. 32Daa-tulɛi láa mii-yee mɛi wɛrɛi tɛ́ɛ máŋ a ísâla sɛŋ gbîŋ-kpîŋ, 33zâla láa soŋ nuui pɔ́ nyii ílaoi-laa sala suai ŋãa da ŋ̀úlɔ láa serii. 34Zâla suai keɣe-la káa a zama-sɛŋ gbîŋ, ŋ̀wɛrɛ kɛ̀ ƃò a Eezuɛ-ŋai díwɔ tɛɛ-sɛŋ nyii Yâwɛɛ a gúla Eezuɛ-ŋai yêei a dɛɛ zâla láa soŋ-ƃelai pɔ́i. Zâla sɛŋ m̀ɛi-ŋai ŋí ƃe fɛ̂ɛ Eezuɛ-ŋai dí dɛ́ɛ zâla láa soŋ-ƃelai pɔ́ a tãi kélee. 35Géreŋ salai dí gùla Yâwɛɛ mai m̀ɛi-ŋai ŋí ƃé dí dɛɛ Eelɔŋ pɔ́ da ǹônii a tãi dí dísee la a sâla láa soŋ-ƃelai. 36Yâwɛɛ è mò a gɛɛ Eezuɛ ƃelai dí zâla sãai ŋí tɛ́ɛ dípɔ a tãi dí dísee lai. Gáa a sɛŋ Eezuɛ-ƃelai dí dɔ̂ŋ ŋí mɛi káa wɔlɔ-wɔlɔ da wɔlɔ-wɔlɔ.
37Dɔ̂ŋ-ŋai ká ŋí é pîlaŋ géreŋ sâlai mɛ̂ni ma, m̀ii-sɛŋ sâlai, zɔnyɔ̂ŋ salai, kpa kúlaa maa sâlai, núu seɛɛ ŋɔtíi mɛi maa sâlai, da ǹaoi-laa sâlai. 38Yâwɛɛ è dɔ̂ŋ-ŋai ŋí tɛ̀ɛ Mose pɔ́ Sana Yeei ḿâ vɛ̃ɛ-kpâlaŋ su a tãi è mò la Eezuɛ-ŋai dîa a gɛɛ dí dísama-sãai tɛɛi.
Currently Selected:
Levetekɔ 7: KWB
Highlight
Share
Compare
Copy
Want to have your highlights saved across all your devices? Sign up or sign in
© 2012 Bible Society in Liberia