Nɔŋba 15
15
Dɔ̂ŋ-ŋai bîlaŋɔɔi sâla kuláa mai
1Yâwɛɛ è mò Mose ma ǹyɛɛi, 2“M̀ó Eezuɛ-ŋai dîa yɛ̂ɛi, ‘Tãi ká pâi liî la ǹɔii su, Yâwɛɛ è dɛ̀ɛ kápɔ a gɛɛ ká sée mai, 3ka pâi sâla kulâi naa Yâwɛɛ ma a niŋa, ƃála kpaa máŋ ƃoli a kéreŋ-sala kpaa máŋ lii-see sala, kakono-teei mɛni ma kpaa máŋ zâlai nyii a kula kálii sui, kpaa máŋ nyii ka gùla a káɣele kɛ́tɛ-ŋai maa-tãi. Zâla-ŋai ŋí kúŋ lɛ̂lɛɛi a Yâwɛɛ nîa. 4Ǹúui pâi ƃála kulâi Yâwɛɛ ma a kéreŋ-sala kpaa máŋ lii-see salai, fɛ̂ɛ é mii-sɛŋ sala kula a felaƃa paŋ feerɛ sumoɔ a ɔle wúlɔ sane tɔnɔ. 5Fɛ̂ɛ é kpele-sɛŋ-sala kula máŋ a ŋwãai sane tɔnɔ ƃála tɛi-tɛi kélee mɛni ma. 6À kɛ̀ a ƃála-sirɛ fɛ̂ɛ é mii-sɛŋ sala kula a felaƃa paŋ náaŋ sumoɔ a ɔle wúlɔ sane tɔnɔ da gbura. 7Fɛ̂ɛ é kpele-sɛŋ sala kula máŋ a ŋwãai sane tɔnɔ da gbura. Géreŋ sâla-ŋai ŋí kéreŋ kuŋ lɛ̂lɛɛi a Yâwɛɛ nîa. 8Ƃa niŋa-sirɛ kùla Yâwɛɛ ma a kéreŋ-sala kpaa máŋ zâlai nyii gáa kákono-teei mɛni mai, kpaa máŋ a lii-see-sala, 9fɛ̂ɛ é mii-sɛŋ-sala kula a felaƃa pãŋ lɔ́ɔlu mɛi da zumoɔ a ɔle wúlɔ sane feerɛ. 10Fɛ̂ɛ í kpele-sɛŋ-sala kula máŋ a ŋwãai sane feerɛ. Zâla-ŋai ŋí kéreŋ kuŋ lɛ̂lɛi a Yâwɛɛ nîa.’
11“Ǹyaŋ bere nɔ́ ƃé fɛ̂ɛ é kɛ́ la a niŋa-sirɛ tɛi-tɛi kélee, kpaa máŋ ƃála-sirɛ, kpaa máŋ ƃála-loŋ da ƃoli loŋ tɛi-tɛi kélee. 12Berei zâla kula taa-tulɛi támaai lai, bere nɔ́ ƃé fɛ̂ɛ mii-sɛŋ-salai da gbele-sɛŋ-salai díkɛ̀ a dítamaa la. 13Fɛ̂ɛ Eezuɛ-ŋai kpîŋ-kpiŋ kélee dí kéreŋ-sala kula a bere-sii ŋí. Zâla-ŋai ŋí kéreŋ kuŋ lɛ̂lɛi a Yâwɛɛ nîa. 14À kɛ̀ ǹyaŋ ŋɔ̃ya-ŋa díkaa kásama a tãi kpua kpaa máŋ a tãi su-koyaa, nyii-ŋai ŋ̀wɛ̂lii dí kéreŋ-sala kula nyii ǹɛ̂lɛi a Yâwɛɛ nîai, fɛ̂ɛ dí gula yɛ̂ɛ berei ka gùla lai. 15Dɔ̂ŋ tɔnɔi tí káa nɔ́ kákelee kámɛni ma ka ŋɔ̃ya-ŋai a tãi kélee. Ka dîa-ni kákaa nɔ́ a kapɔ̂riɛ Yâwɛɛ ŋɛ́i. 16Dɔ̂ŋ nɔnɔi káa nɔ́ kámɛni ma ka ŋɔ̃ya-ŋai nyii-ŋai díkaa kásamai.”
17Yâwɛɛ è mò Mose mà ǹyɛɛi, 18“M̀ó Eezuɛ-ŋai dîa Yâwɛɛ ǹyɛɛ, ‘Tãi ka pâ la ǹɔii ma ŋa pâi dɛɛ̂i kápɔi, 19ka kɛ̀ ǹɔii su miî, ka maa mii-sãai da tɛɛ ḿbɔ a sama-sɛŋ. 20Kà káfelaƃai maa-ŋuŋ kpɛ̀tɛ a kpólo, fɛ̂ɛ ka gbóloi maa-ŋuŋ tɛ́ɛ ḿbɔ a sama-sɛŋ yɛ̂ɛ berei ká kámii-sɛŋ maa-ŋuŋ tɛ̀ɛ la ḿbɔ a kámii-sãai kula tãi. 21Fɛ̂ɛ ká kákpoloi maa-ŋuŋ ŋí tɛ́ɛ ḿbɔ a sâla-sɛŋ káfulu-laai su wɔlɔ-wɔlɔ da wɔlɔ-wɔlɔ.’
22“Kɛ́lɛ à kɛ̀ ka pɔara-mâ kɛ̀ kà wàla dɔ̂ŋ ŋí mɛi káa ŋá dítɛ̀ɛ Mose pɔ́i, 23Dɔ̂ŋ-ŋai ŋa dítɛɛ kápɔ Mose sârai nyii-ŋai díkaa kásuui mɛni ma wɔlɔ-wɔlɔi, 24gɛ̀ ní à kɛ̀ káfe gíri ní ká díkara, fɛ̂ɛ kákelee ká pá a niŋa-naɣa, kéreŋ-sala mɛni ma nyii ǹɛ̂lɛi a ńîai. Ka pa la da mii-sɛŋ-sala kula-sãai é pɛ́lɛ gbele-sɛŋ-sala kula-sãai dîa yɛ̂ɛ berei dɔ̂ŋ láa-wooi káa lai, ká tela pá a ƃoli-sirɛ kásɔnyɔ̂ŋ su-mɛni lɛɛ maa-sala kula mɛni ma. 25Fɛ̂ɛ zâla láa soŋ-nuui é zâla-ŋai ŋí kúla mâ Eezuɛ-ŋai kélee mɛni ma. Gɛ̀ ní ŋa pâi dísɔnyɔ̂ŋ su-mɛni lɛɛ̂i. Kpɛni fêi, dí pɔara-maa kɛ̀. Ǹyaŋ da pá a kéreŋ-sala da dísɔnyɔ̂ŋ su-mɛni lɛɛ̂ maa-sala ḿbɔ dípɔara-mai mɛni ma. 26Gɛ̀ ní Eezuɛ-ŋai da díŋɔ̃ya-ŋai kélee dísɔnyɔ̂ŋ-ŋai pôlu a pâi fêi. Kpɛni fêi, díkelee dí kɛ̀ bɔara-maa kɛ́ɛi su.
27“Núu a wàla gíri é sɔnyɔ̂ŋ kɛ́, fɛ̂ɛ é pá a kóraŋ-tɔnɔ ƃoli-saa ŋɔsɔnyɔ̂ŋ su-mɛni lɛɛ-sala kula mɛni ma. 28Zâla-laa soŋ-nuui ƃa núu ŋɔsɔnyɔ̂ŋ su-mɛni lɛɛ maa-sala kùla, nyii vé gíri ní é zɔnyɔ̂ŋ kɛi. Gɛ̀ ní ŋɔsɔnyɔ̂ŋ pôlu a fé. 29Zɔnyɔ̂ŋ núu fa giri é gɛ́i, maa tɔ̂ŋ tɔnɔi tí káa nɔ́ ǹɔii-lonii mɛni ma da ŋɔ̃ya-ŋai.
30“Kɛ́lɛ ǹúui a giri é sɔnyɔ̂ŋ kɛ́i, a nɛ̃ɛ ma é kɛ́ a Eezuɛ-nuu, kpaa máŋ ŋɔ̃ya, gɛ̀ ní a tɛ-ŋɛi kɛ́ a Yâwɛɛ. Ǹyaŋ fɛ̂ɛ dí maa-nuui tí kúla ŋɔnûai sáma. 31Fɛ̂ɛ dí maa-nuui tí kúla ŋɔnûai sáma ŋɔsɔnyɔ̂ŋ maa-mɛni é lɛ́ɛ gbîŋ ma, kpɛ́ni fêi, è Yâwɛɛ wóo pìli é ŋɔtɔ̂ŋ kara.”
Nalôŋ tɔnɔ è Vii-Tɔɔ-Ɣelei maa tɔ̂ŋ kàra
32Ɣele tɔnɔ da Eezuɛ-ŋai kɛ́ɛ vɛ̃ɛ-kpâlaŋ sui, dí nalôŋ tɔnɔ kàa gɛ́ kɔi ŋá tɛ̂i mà a Vii-tɔɔ-ɣelei. 33Diai gàai dí pà la Mose da Eelɔŋ pɔ́ é pɛ́lɛ Eezuɛ-ŋai kélee dîa. 34Dí bù ŋɛ́i-gao kpɔnɔ ŋá, kpɛ́ni fêi, dífe niî kɛ̀ mɛnii kpɛtɛ ní da pɔ̂ri gɛ̂i lai. 35Nya ƃe Yâwɛɛ è mò Mose mà ǹyɛɛi, “Fɛ̂ɛ nɔ́ nalôŋ é sáa. Tɔɔ Eezuɛ-ŋai kélee dí zɔɔ a kɔni m̀ûui pôlu-pere.” 36Nya ƃe Eezuɛ-ŋai kélee dí kùla la m̀ûui su dí zɔɔ a kɔni dí baa yɛ̂ɛ berei Yâwɛɛ è mò la Mose mai.
Fíli sɛ̂lɛŋɔɔ ǹyokpo-ŋai dîa mɛni
37Yâwɛɛ è mò Mose mà ǹyɛɛi, 38“M̀ó Eezuɛ-ŋai dîa a gɛɛ dí fíli sɛ̂lɛŋ díyokpo-ŋai wóoŋ lá dí yee bûluŋ kɛ́ɛ pú ma. Dí gɛ́ tí dísuui su-ƃelai kélee mɛni ma pâi pâi dípôlu mai. 39Vílii ŋí a pâi kɛ̂i a kili-too-ŋa kámɛni ma. Tãi kà gàa lai, ŋa-tɔ̂ŋ-ŋai maa-mɛni a pâi toôi kákili ŋa ká dímɛi káa. Gɛ̀ ní káfe pâi kápôlu tɔɔ̂i ḿâ ká pîlaŋ kánîa-mɛni-ŋa pôlu yɛ̂ɛ berei ka ŋ̀wɛ̂lii ká gɛ́ lai. 40Gɛ̀ ní ŋátɔ̂ŋ-ŋai kélee maa mɛni a pâi lɛɛ̂i kákili ŋá ká dímɛi káa, kámaa é wáa ŋ́ɛi-tuɛ. 41Ńyãa ƃa Yâwɛɛ Ɣâla, nyii ká kùla Ize lɔii su a gɛɛ ŋá kɛ́ a Káɣâlai. Ńyãa ƃa Yâwɛɛ Káɣâlai.”
Currently Selected:
Nɔŋba 15: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia