Nɔŋba 27
27
Zɛlofɛya ǹônii-nɛyãai
1Zɛlofɛya ǹônii-nɛyãai dílaa ƃɛ́ kɛ̀ a Mala, Nôa, Oga, Maka é pɛ́lɛ Taza ma. Ǹyaŋ Zɛlofɛya è kɛ̀ a Ɛfɛ ǹóŋ, Ɛfɛ kɛ́ ƃò a Gilia ǹóŋ, Gilia kɛ́ ƃò a Makiɛ ǹóŋ, Makiɛ kɛ́ ƃò a Manasɛ ǹóŋ, ǹyaŋ Manasɛ è kɛ̀ a Zosɛ ǹóŋ. 2Ɣele tɔnɔ da nɛyãai ŋí dí pà dí tɔ́ɔ Mose ŋɛ́i-tuɛ da zâla láa-soŋ-nuui Ilieza da ǹúu túɛ-ƃelai é pɛ́lɛ Eezuɛ-ŋai kélee dîa Yâwɛɛ ŋɔsua kɔlɔ seɣe pɛrɛ maa waai lá, dí m̀ó Mose ma dîyɛɛi, 3“Kúnâŋ fé kɛ́ ní diai sáma da Koa-ni dí tɔ̀ɔ Yâwɛɛ mai. È sàa vɛ̃ɛ-kpâlaŋ su gbɔ́ɔi sɔnyɔŋ mɛni ma. Vé lóŋ-surɔ̂ŋ maa sɔlɔ ƃó ní. 4Kúnâŋ láa a pɔ̂ri lânii lé mɛni ma, a gɛɛ vé lóŋ-surɔ̂ŋ maa sɔlɔ ƃó ní? Lɔii tɛ́ɛ kúpɔ kúnâŋ ŋɔnûai sáma.”
5Nya ƃe Mose è dímɛnii pù Yâwɛɛ ŋɛ́i. 6Yâwɛɛ è mò mà ǹyɛɛi, 7“Zɛlofɛya ǹônii-nɛyãai wóo káa a tɔ̃yâ. Lɔii tɛ́ɛ dípɔ dínâŋ ŋɔnûai sáma. Dínâŋ ŋɔpɔɔ-sãai é lɛ́ɛ díyêei. 8M̀ó Eezuɛ-ŋai dîa a gɛɛ núu à wàla lóŋ-surɔ̂ŋ maa sɔlɔ ƃó, à sàa ka gɔ̂liŋ tɛɛ ǹóŋ-nɛnii pɔ́. 9À kɛ̀ vé lóŋ-nɛni maa sɔlɔ ƃó ní fɛ̂ɛ ká gɔ̂liŋ tɛɛ ǹîa-surɔ̂ŋ pɔ́ da neɣe-surɔ̂ŋ. 10À kɛ̀ ǹîa-surɔŋ da ǹêɣe-surɔŋ dífe mà, fɛ̂ɛ ká gɔ̂liŋ tɛɛ ǹâŋ ǹîa-surɔŋ da ǹêɣe-surɔŋ pɔ́. 11À kɛ̀ ǹâŋ ǹîa-ni da ǹêɣe-ni dífe mà, fɛ̂ɛ ká gɔ̂liŋ tɛɛ ǹâŋ ŋɔsuui su-ƃelai kpîŋ-ŋai dɔnɔ pɔ́. Fɛ̂ɛ Eezuɛ-ŋai dí dɔ̂ŋ ŋí mɛi káa yɛ̂ɛ berei ńyãa Yâwɛɛ ŋá mò la Mose mai.”
Mose è Zasua sèe bɔ́ɔ ŋá
(Dutɛrɔnome 31:1-8)
12Nya ƃe Yâwɛɛ è mò Mose mà ǹyɛɛi, “Tɛ́ Abariŋ Yeei ma í ǹɔii káa ŋá dɛ̀ɛ Eezuɛ-ŋai pɔ́i. 13Ƃà gàa naa pôlu ma ƃà pâi saâi yɛ̂ɛ berei Eelɔŋ è sàa lai. 14Kpɛni fêi, ká ŋ́oo kàra Ziŋ vɛ̃ɛ-kpâlaŋ su. Tãi Eezuɛ-ŋai dí kɛ̀ díŋuŋ su-woo sâai la é pîlaŋ ḿâi, káfe ŋámaa-waa-laai ŋɔwála-walai maa-mɛni ƃó ní Eezuɛ-ŋai dîa ǹyái kɔlɛ.” (Mɛliba Yai ká ŋí Kedɛ kɔlɛ ma Ziŋ fɛ̃ɛ-kpalaŋ su.) 15Nya ƃe Mose è mò Yâwɛɛ mà ǹyɛɛi, 16“Óo Yâwɛɛ, ƃái íkaa a vúlu-laa kpɛtɛ-ɣalai, núu lɛ́ nyíi a pɔ̂ri kɛ̂i Eezuɛ-ŋai mɛi, 17nyii pâi siâi a dia é lí a dia ƃɛ́i kélee da liî naa é pá pôlu a diai, a gɛɛ dínûai dífe kɛ̀ yɛ̂ɛ ƃála-ŋa nyii-ŋai dítuɛ-nuu fé mai.” 18Nya ƃe Yâwɛɛ è mò Mose mà ǹyɛɛi, “Nuŋ ǹóŋ Zasua siɣe nyii Ɣâla ŋɔmɔ̂leŋ káa gbonôi, í íyee pɛ́lɛ ŋ̀ûa. 19Dɔɔ zâla láa-soŋ-nuui Ilieza ŋɛ́i-tuɛ da Eezuɛ-ŋai kélee í ǹɛ́ ǹûai kélee dîa a gɛɛ ǹyaa ƃé pâi kɛ̂i ípɔɔ ŋá. 20Í íwala-wala-laai da tɛɛ bɔ́ a gɛɛ Eezuɛ-ŋai kélee dí ŋ̀oo mɛ́ni. 21A pâi gíli kɛ̂i zâla láa-soŋ-nuui Ilieza ma nyii pâi ínîa-mɛnii maa kɔ̂rii Uliŋ da Tumiŋ sârai. Berei sîi ŋí ƃé Ilieza a pâi Zasua téniŋ tɔɔ̂i la da Eezuɛ-ŋai kélee dítii maa-mɛni kélee su.” 22Mose è gɛ̀ yɛ̂ɛ berei Yâwɛɛ è mò la mai. È pà a Zasua é dɔɔ zâla láa-soŋ-nuui Ilieza ŋɛ́i-tuɛ da Eezuɛ-ŋai kélee. 23È ǹyée pɛ̀lɛ ŋ̀ûa é ǹɛ́ a gɛɛ ǹyaa ƃé pâi lɛɛ̂i bɔ́ɔ ŋá, yɛ̂ɛ berei Yâwɛɛ è mò la ǹyaa Mose mai.
Currently Selected:
Nɔŋba 27: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia