Nɔŋba 32
32
Eezuɛ-ŋai dísuu-ŋai sèe Zɔdiŋ Ya-leei vóloi kulâi-perei
(Dutɛrɔnome 3:12-22)
1Lubiŋ da Gâa dísuui su-ƃelai, taa-tûlɛ támaa è kɛ̀ díyêei. Tãi dí Zazɛ da Gilia lɔii kàa la a lɔii lɛ́lɛɛ taa-tulɛ tɔɔ-mɛni mai, 2dí lì Mose da zâla láa-soŋ-nuui Ilieza pɔ́ é pɛ́lɛ Eezuɛ-ŋai túɛ ƃelai kpéli-ŋai dîa. 3Dí mò dîa dîyɛɛi, “Atalo, Dibɔŋ, Zazɛ, Nimela, Ɛsibɔŋ, Ilealɛ, Sibaŋ, Nebo da Beɔŋ lɔii, 4nyii Yâwɛɛ è ǹɛɛ naa a gɛɛ Eezuɛ-ŋai dí sée mai, gáa a lɔii lɛ́lɛɛ taa-tulɛ tɔɔ mɛni ma. Ǹyaŋ taa-tulɛ káa kúyêei kúai a íyee-mu-ƃelai. 5À kɛ̀ ílii lâai kúmaa mɛni ma, ǹɔii ŋí tɛ́ɛ íyee mu-ƃelai pɔ́ é kɛ́ a dípɔɔ. Ífe ǹɛɛ naa kwa káa-ni kú Zɔdiŋ Ya-leei tíyeŋ.”
6Kɛ́lɛ Mose è mò Gâa da Lubiŋ dísuui su-ƃelai dîa ǹyɛɛi, “Ka ŋ̀wɛ̂lii ka lɛ́ɛ ƃɛ́ kánûai kpéli-ŋai dí lí gɔ́i ma ǹyái pôlu? 7Lé mɛni ƃé ka ŋ̀wɛ̂lii ká Eezuɛ-ŋai líi tóo la pôlu a gɛɛ dí ǹyái tíyeŋ dí ǹɔii síɣe nyii Yâwɛɛ è dɛ̀ɛ dípɔi? 8Bere ƃé kanâŋ-ni dí gɛ̀ la tãi ŋá dítɛ̀ɛ la é síɣe Kedɛ Bania a gɛɛ dí lí dí ǹɔii su káa. 9Tãi dí sèri la Ɛsekɔ tiŋ-tiŋ sui dí ǹɔii káai, dí Eezuɛ-ŋai líi tòo pôlu a gɛɛ dífe lì ǹɔii su Yâwɛɛ è dɛ̀ɛ dípɔi. 10Maa ɣelei tí ƃé Yâwɛɛ líi è ŋwàna là é vóo ǹyɛɛi, 11‘Tɔ̃yâ ma, diai kùla Ize lɔii su díkoraŋ káa é síɣe kóraŋ buu feerɛ ma é lí túɛ-perei, dítɔnɔ kpîŋ fé pâi ǹɔii kâai nyii ŋá ŋ́gono tèe la Eberaɣɛ̃ɛ yêei da Aise é pɛ́lɛ Zeeka ma a gɛɛ ŋa pâi dɛ̂ɛi dípɔi. Kpɛni fêi, dífe láa ní a ńyãa a dílii kélee.’ 12Fɛ̂ɛ nɔ́ Kɛŋ-nuui Zefunɛ ǹóŋ Kelɛ da Nuŋ ǹóŋ Zasua. Kpɛni fêi, dí Yâwɛɛ wóo mɛ̀ni a ǹɛ́lɛɛ. 13Yâwɛɛ líi è ŋwàna Eezuɛ-ŋai dîa é díkɛ dí sía vɛ̃ɛ-kpâlaŋ su a kóraŋ buu náaŋ é lɛ́ɛ la zu diai kélee sɔnyɔ̂ŋ kɛ̀ Yâwɛɛ ŋ̀ɛ́i-tuɛi dí sáa. 14Káai a goi nyɔŋ-ƃela nina-ŋai ká kánâŋ-ni tua-perei sìɣe a gɛɛ Yâwɛɛ ŋɔlii-ŋwanai su é kɛ́tɛ Eezuɛ-ŋai dîa. 15À kɛ̀ kà kápôlu fè mì, gɛ̀ ní a pâi têei ŋɔ́nɔ ǹûai ŋí kélee dîa vɛ̃ɛ-kpâlaŋ su. Ǹyaŋ díŋuŋ-la-piliɛ a pâi kɛ̂i a kásɔŋ.”
16Nya ƃe dí pà Mose pɔ́ díyɛɛ mai, “Kwa ŋ̀wɛ̂lii kú siɣãŋ-ŋa tɔɔ ƃɛ́ kútaa-tuɛ-ŋai mɛni ma da taa-ŋa kúnûai mɛni ma. 17Gɛ̀ ní kwa pâi kɛ̂i a kúkpɛtɛɛ a gɛɛ kú lí gɔ́i ma Eezuɛ-ŋai túɛ é lɛ́ɛ la zu kú pá a dia ǹɔii ma nyii pâi kɛ̂i a dípɔɔi. Kúnûai diaŋ da pâi lɛɛ̂i ƃɛ́ daa-ŋai su nyii-ŋai kú siɣãŋ tɔɔ dîa kúnɛyâai da kúlônii mɛni mai. 18Kúfe pâi penêi pôlu kúpɔ-taai é lɛ́ɛ la zu Eezuɛ-ŋai kélee dí díkpɔɔi lɔii sɔlɔ ƃó tɛi-tɛi. 19Kúfe pâi lɔii da kpɛ́ni kélee siɣêi kwa dîa-ni Zɔdiŋ Ya-leei pôlu-pere da naa túɛ-pere. Kpɛni fêi, kwa kúkpɔɔi lɔii sɔlɔ ƃô ƃɛ́ Zɔdiŋ Ya-leei m̀élai ŋí ma-pere vóloi kulai-pere.”
20Nya ƃe Mose è mò dîa ǹyɛɛi, “À kɛ̀ ka pâi gɛ̂i tí, gɛ̀ ní ka kákpîŋ kpɛtɛ gɔ́i mɛni ma Yâwɛɛ ŋɛ́i-tuɛ. 21Fɛ̂ɛ ká kɔ́ kɔ́-ƃelai kélee dí Zɔdiŋ Ya-leei tíyeŋ Yâwɛɛ ŋɛ́i-tuɛ dí kɔ́ kúkpɔara-ƃelai pɔ́ é lɛ́ɛ la zu Yâwɛɛ é díyee mɛi ɣále, 22é ǹɔii síɣe. Naa pôlu ma ka pɔ̂ri penêi pôlu. Gɛ̀ ní ka nâa kákono-tee wooi ŋa-see kɛ́ Yâwɛɛ ŋɛ́i-tuɛ da Eezuɛ-ŋai. Gɛ̀ ní Yâwɛɛ a pâi fâai ma a gɛɛ ǹɔii ŋí é kɛ́ a kápɔɔ. 23Kɛ́lɛ à kɛ̀ káfe pâi gɛ̂i tí, gɛ̀ ní ka sɔnyɔ̂ŋ kɛ́ a Yâwɛɛ. Gɛ̀ ní tɔ̃yâ ma ka pâi tɔ̂ŋ-kpɛ-maa sɔlɔ ƃôi kásɔnyɔ̂ŋ mɛni ma. 24Ka kátaa-ŋai tɔ́ɔ kánûai mɛni ma da siɣãŋ-ŋa káƃala-ŋai mɛni ma. Kɛ́lɛ ka kákono-tee wooi ŋa-see kɛ́.”
25Nya ƃe Lubiŋ da Gâa dísuui su-ƃelai dí mò Mose ma dîyɛɛi, “Iyee-mu-ƃelai da pâi gɛ̂i yɛ̂ɛ berei í mò la diai. 26Kúnîa-pɛlɛɛi, kúnɛyâai da kúƃala-ŋai da kúniŋa-ŋai da pâi lɛɛ̂i ƃɛ́ Gilia taa-lee-ŋai su. 27Kɛ́lɛ kúai a íyee mu-ƃelai kélee kú kpɛtɛ̂ɛi gɔ́i mɛni mai, kwa pâi Zɔdiŋ Ya-leei tíyenîi Yâwɛɛ ŋɛ́i-tuɛ a gɛɛ kú gɔ́i kɔ́ yɛ̂ɛ berei í mò la kûai.”
28Nya ƃe Mose è mɛ̀ni-ŋai ŋí ƃò zâla láa-soŋ-nuui Ilieza ma da Nuŋ ǹóŋ Zasua é pɛ́lɛ Eezuɛ-ŋai dísuui láa-tuɛ-ƃelai dîa ǹyɛɛi, 29“À kɛ̀ Gâa da Lubiŋ dísuui su-ƃelai, diai kélee díkpɛtɛ̂ɛi gɔ́i mɛni ma Yâwɛɛ ŋɛ́i-tuɛi, ka dîa-ni ka ǹɔii sîɣe, gɛ̀ ní ka Gilia lɔii tɛ́ɛ dípɔ a dípɔɔ. 30Kɛ́lɛ à kɛ̀ ka dîa-ni kà wàla ǹyái tíyeŋ a gɛɛ ka dîa-ni ká gɔ́i kɔ́, gɛ̀ ní da pâi díwɔ lɔii sɔlɔ ƃôi Keena lɔii su kásama.” 31Nya ƃe Gâa da Lubiŋ dísuui su-ƃelai dí mò dîyɛɛi, “Kwa pâi gɛ̂i yɛ̂ɛ berei Yâwɛɛ è mò lai. 32Kwa pâi ǹyái tîyenii kú lí Keena lɔii su kú kɔ́ kɔ́ naa Yâwɛɛ ŋɛ́i-tuɛ a gɛɛ kwa pɔ̂ri kúwɔ̂ lɔii sɔlɔ ƃɔ̂i ƃɛ́ Zɔdiŋ Ya-leei vóloi kulai pere.”
33Nya ƃe Mose è Amora-ŋai díkâloŋ Siɔŋ da Basãŋ kaloŋ Oŋ dílɔii-ŋai su-taa-ŋai kélee tɛ̀ɛ Gâa da Lubiŋ dísuui su-ƃelai da Zosɛ ǹóŋ Manasɛ ŋɔsuui su-ƃelai méla tɔnɔ pɔ́. 34Gâa ŋɔsuui su-ƃelai dí daa-ŋai ŋí tɔ̀ɔ pôlu: Dibɔŋ, Atalo, Aloe, 35Ato-sofaŋ da Zazɛ da Yogbɛɣa, 36Bɛ-niŋla bɛ́lɛɛ Bɛ-Araŋ ma. Dí kɛ̀ a daa-ŋai nyii-ŋai siɣãŋ è kɛ̀ dîa da díƃala-siɣãŋ-ŋai. 37Lubiŋ ŋɔsuui su-ƃelai dí Ɛsibɔŋ tɔ̀ɔ pôlu da Ilealɛ, Kiriatiŋ, 38Nebo da Baa-Meoŋ (dí daai ŋí láa maa faleŋ) bɛ́lɛɛ Sima ma. Dí láa nina-ŋa sèe daa-ŋai dîa dí dɔ̀ɔi. 39Manasɛ ǹóŋ Makîi ŋɔnûai dí Gilia lɔii sìɣe gɔ́i su dí Amora-ŋai kpɛ́ ǹɔii ma dí sée naa. 40Nya ƃe Mose è Gilia tɛ̀ɛ Manasɛ ǹóŋ Makîi ŋɔsuui pɔ́. Nya ƃe è sèe naa. 41Manasɛ ŋɔsuui su-nuui Zaɛ è lì é kɔ́ pɛ́lɛ taa-ŋa da-ni ma é dí síɣe é dílaa sée a Zaɛ taa-ŋai. 42Nôba è lì é Kéna sìɣe da naa kɔlɛ maa taa pɛlɛ-pɛlɛɛi é gbɔ́ɔi laa see dîa a Nôba.
Currently Selected:
Nɔŋba 32: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia