Nɔŋba 8
8
Lâŋpo-ŋai see-mɛni
1Nya ƃe Yâwɛɛ è mò Mose ma ǹyɛɛi, 2“M̀ó Eelɔŋ ma à lâŋpo-see-wurii tɔ̀ɔ, fɛ̂ɛ lâŋpo lɔ́ɔlu mɛi feerɛ léŋ é lâŋpo see-wurii túɛ pono.” 3Eelɔŋ è gɛ̀ tí. È lâŋpo-ŋai sèe a gɛɛ dí léŋ é lâŋpo-see wurii túɛ pòno yɛ̂ɛ berei Yâwɛɛ è mò la Mose mai. 4Berei lâŋpo-see wurii è kɛ̀ a gbɛtɛɛ lai ǹya ká. È kɛ̀ a gbɛtɛɛ a gôo ɣaleɛ a kpɔ́kpɔ é síɣe gwára é tɛ́ meɣêŋ-ŋai dîa. Dí ŋ̀ale nɔ́ a berei Yâwɛɛ è nɛ̀ la Mose mai.
Livai-ŋai díwaa-mɛni da dítɛɛ mɛni Ɣâla pɔ́
5Nya ƃe Yâwɛɛ è mò Mose mà ǹyɛɛi, 6“Livai-ŋai kúla Eezuɛ-ŋai sáma í dímaa wáa. 7Berei ƃa pɔ̂ri dímaa waâi lai ǹyaa ká ŋí. Zɔnyɔ̂ŋ su-mɛni-lɛɛ-yai kpɛ́mɛŋ dîa, dí díkɔlɔ-leɣa pú, dí díseɣe-ŋai wáa, dí díkpîŋ maa waa. 8Nàa pôlu ma dí niŋa naɣa kɛ́tɛɛ síɣe da kpólo-sala kula felaƃa wúlɔ púɔɔ mà. Niŋa naɣa sirɛi síɣe sɔnyɔ̂ŋ su-mɛni-lɛɛ sala mɛni ma. 9Nyíŋi pôlu ma Eezuɛ-ŋai kélee ŋá tɛ́ díkîe ma í Livai-ŋai kɛ́ dí tɔ́ɔ Zua kɔlɔ seɣe pɛrɛ maa waai ŋɛ́i-tuɛ. 10Ƃa Livai-ŋai tɔ̀ɔ Yâwɛɛ ŋɛ́i-tuɛ, fɛ̂ɛ Eezuɛ-ŋai dí díyee pɛ́lɛ dîa. 11Gɛ̀ ní Eelɔŋ a pɔ̂ri Livai-ŋai tɛɛ̂i ḿbɔ yɛ̂ɛ soŋ-nyee-ŋa sama-sɛŋ nyii kula Eezuɛ-ŋai yêei a gɛɛ dí tíi kɛ́ mî. 12Livai-ŋai dí díyee láa niŋa-sirɛ-ŋai ŋûa, í dɔnɔ kula a sɔnyɔ̂ŋ su-mɛni-lɛɛ sala í gbéli kúla a kéreŋ-sala Livai-ŋai dísɔnyɔ̂ŋ-ŋai su-mɛni-lɛɛ mɛni ma.
13“Livai-ŋai kɛ́ dí tɔ́ɔ Eelɔŋ da ǹônii túɛ-pere í dítɛɛ ḿbɔ yɛ̂ɛ soŋ nyee-ŋa sama-sɛŋ. 14Livai-ŋai kúla Eezuɛ-ŋai sáma a bere sîi tí a gɛɛ Livai-ŋai dí kɛ́ a ḿbɔɔ. 15Tãi ƃa Livai-ŋai maa wàa lai í dítɛɛ ḿbɔ yɛ̂ɛ soŋ-nyee-ŋa sama-sɛŋ, gɛ̀ ní da pɔ̂ri nâa tíi kɛ̂i Zua-kɔlɔ pere maa waai mu. 16Ŋa dísiɣe Eezuɛ ǹônii-sinaai maa-ŋuŋ-ŋai pɔ́ɔ ŋá. Ǹyaŋ díkaa a ḿbɔɔ. 17Kpɛni fêi, Eezuɛ ǹônii-sinaai maa-ŋuŋ-ŋai kélee díkaa a ḿbɔɔ. Vóloi ŋá Ize-ŋai dílônii-sinaai maa-ŋuŋ-ŋai kélee pàa la Ize lɔii sui, ŋá Eezuɛ-ŋai dílônii-sinaai maa-ŋuŋ-ŋai da dítaa-tulɛ-ŋai dílônii maa-ŋuŋ-ŋai sìɣe a ḿbɔɔ. 18Ǹyaŋ ŋa Livai-ŋai síɣe Eezuɛ-ŋai dílônii-sinaai maa-ŋuŋ-ŋai kélee pɔ́ɔ ŋá. 19Ŋa Livai-ŋai kúla Eezuɛ-ŋai sáma ŋa dítɛɛ Eelɔŋ pɔ́ da ǹônii a gɛɛ dí tíi kɛ́ Eezuɛ-ŋai dîɛ Zua kɔlɔ seɣe pɛrɛ maa waai mu, a gɛɛ ŋɔ́nɔ dí sâla kula Eezuɛ-ŋai dísɔnyɔ̂ŋ su-mɛni-lɛɛ mɛni ma, a gɛɛ da lɛ̀ɣɛ Zua kɔlɔ pɛrɛ maa waai kɔlɛ mɛni nyɔ́mɔɔ fé díkɛ̀.”
20Nya ƃe Mose da Eelɔŋ é pɛ́lɛ Eezuɛ-ŋai kélee dîa dí Livai-ŋai tɛ̀ɛ Ɣâla pɔ́ yɛ̂ɛ berei Yâwɛɛ è mò la Mose mai. 21Nya ƃe Livai-ŋai dí díkpîŋ maa waa sɔnyɔ̂ŋ yêei dí díseɣe-ŋai wáa. Eelɔŋ è dítɛ̀ɛ Yaâwɛ pɔ́ a soŋ-nyee-ŋa sama-sɛŋ é sâla kula dísɔnyɔ̂ŋ su-mɛni lɛɛ mɛni ma. 22Nàa pôlu ma, Livai-ŋai dí lì Zua kɔlɔ seɣe pɛrɛ maa waai mu a gɛɛ dí dítii-ŋai kɛ́ naa Eelɔŋ da ǹônii-sinaai yée mu. Eezuɛ-ŋai dí mɛnii kélee kɛ̀ Livai-ŋai dîɛ yɛ̂ɛ berei Yâwɛɛ è mò la Mose mai.
23Nya ƃe Yâwɛɛ è mò Mose ma ǹyɛɛi, 24“Livai-ŋai dítii kɛ́-pere ká ŋí. Livai-nuu kélee nyii ŋɔpɔlɔ-pɔlɔ laa káa é síɣe kóraŋ buu feerɛ káo lɔ́ɔlu ma é lí tuɛ-pere, fɛ̂ɛ é tíi kɛ́ ŋásua kɔlɔ seɣe pɛrɛ maa waai mu. 25Ŋɔpɔlɔ-pɔlɔ-laai à sèri kóraŋ buu lɔ́ɔlu ma, fɛ̂ɛ é kúla díi su é sée. 26Nàa pôlu ma a pɔ̂ri kpɔnîi m̀arâai dîa kɛ́lɛ vé a sɛŋ é tíi da kélee kɛ́ naa gbɔ́ɔi yee ma. Berei ká ŋí fɛ̂ɛ í Livai-ŋai dítii lɛ́ la dîa.”
Currently Selected:
Nɔŋba 8: KWB
Highlight
Copy
Compare
Share
Want to have your highlights saved across all your devices? Sign up or sign in
© 2012 Bible Society in Liberia