Yuuhanna 13

Al-Masiih khassal rijileen talaamiizah

1Wa gubbaal iid al-Fisha ma yabda, Isa irif kadar waktah tamma wa laabudda yamrug min al-dunya wa yigabbil le abuuh. Wa min al-bidaaya, hu yihibb naasah al-gaaʼidiin fi l-dunya wa yihibbuhum hubb chadiid.

2Wa Isa wa talaamiizah gaaʼidiin fi l-acha. Wa fi l-wakit da, khalaas Ibliis dassa niiyit al-khiyaana fi galib Yahuuza wileed Simʼaan al-Iskhariyooti achaan yukhuun Isa. 3Wa Isa yaʼarif kadar hu ja min Allah wa yigabbil le Allah wa yaʼarif kadar abuuh antaah gudra fi kulla cheyy. 4Wa wakit gaaʼidiin yaakulu, Isa gamma foog wa salla khalagah al-barraani wa chaal al-gitʼe al-buguchchu beeha wa rabat beeha sulbah. 5Wa sabba almi fi maaʼuun wa bada yikhassil rijle talaamiizah. Wa gachchaahum be l-gitʼe al-rabat beeha sulbah.

6Wa ja le Simʼaan Butrus. Wa Simʼaan Butrus gaal : «Sayyidna, tidoor tikhassil rijileeni walla ?» 7Wa Isa radda leyah wa gaal : «Inta lissaaʼ ma fihimt al-cheyy al-ana gaaʼid nisawwiih laakin baʼadeen tafhamah.» 8Wa Simʼaan Butrus gaal : «Abadan ma tikhassil rijileeni !» Wa Isa radda leyah wa gaal : «Kan ana ma nikhassilak, inta ma indak hagg maʼaayi.» 9Wa Simʼaan Butrus gaal : «Sayyidna, kan yabga misil da, ma tikhassil rijileeni bas. Khassil iideeni wa raasi kula !» 10Wa Isa gaal : «Kan naadum albarrad khalaas, al-khasuul ma waajib leyah illa fi rijileenah. Hu nadiif marra waahid. Wa intu nudaaf laakin ma kulluku.» 11Wa Isa irif al-naadum al-yidoor yukhuunah wa achaan da gaal : «Ma kulluku nudaaf.»

12Wa wakit Isa khassal rijleehum khalaas, hu libis khalagah wa gabbal fi bakaanah wa hajja leehum wa gaal : «Taʼarfu al-cheyy al-ana sawweetah leeku walla ? 13Intu tuguulu ana muʼallimku wa sayyidku wa kalaamku sahiih. 14Wa kan ana sayyidku wa muʼallimku wa ana khassalt rijleeku, waajib ayyi waahid minku yikhassil rijle al-aakhariin. 15Al-cheyy al-ana sawweetah da masal leeku achaan intu kula tisawwu misil ana sawweetah leeku. 16Asmaʼo nuguul leeku al-hagg, al-abid ma akbar min siidah wa l-mursaal ma akbar min al-rassalah. 17Wa khalaas, taʼarfu al-kalaam da wa mabruuk leeku kan tisawwuuh.

18«Wa l-kalaam al-gultah da, ma leeku intu kulluku. Naʼarif al-naas al-ana azaltuhum. Wa laakin al-kalaam al-maktuub fi l-Kitaab laabudda yitimm. Maktuub : <Al-yaakul maʼaayi khubziti, hu angalab diddi.>#13:18 Al-kalaam da talgooh fi Zabuur 41:9. 19Niʼooriiku hassaʼ be l-cheyy al-yidoor yabga gubbaal ma yabga. Achaan da, wakit bigi khalaas, intu tiʼaamunu beyi kadar ana hu. 20Asmaʼo nuguul leeku al-hagg, ayyi naadum al-yakhbal mursaali, yakhbalni ana. Wa l-naadum al-yakhbalni ana, yakhbal Allah al-rassalaani.»

Al-Masiih hajja be Yahuuza al-khaayin

21Wa wakit Isa gaal al-kalaam da, hu hizin marra waahid. Wa hajja leehum wa gaal : «Asmaʼo nuguul leeku al-hagg, naadum waahid minku yukhuunni.» 22Wa l-talaamiiz alʼajjabo wa ma irfo al-naadum al-minhum al-Isa hajja beyah. Wa kulluhum gaaʼidiin yichchaawafo ambeenaathum. 23Wa naadum waahid min talaamiizah muntaki jamb Isa fi nussah al-zeenaay wa hu al-tilmiiz al-Isa yihibbah bilheen. 24Wa Simʼaan Butrus sawwa leyah ichaara achaan yasʼal Isa yaatu al-naadum al-hajja beyah. 25Wa l-tilmiiz takka wara lahaddi lihig sadur Isa wa saʼalah wa gaal : «Sayyidna, hajjeet be yaatu ?»

26Wa Isa radda leyah wa gaal : «Chiif, nichiil lugma wa nimallihha wa nantiiha le naadum waahid. Wa da bas hu.» Wa chaal lugma wa mallahaaha wa antaaha le Yahuuza wileed Simʼaan al-Iskhariyooti. 27Wa Yahuuza chaal al-lugma wa khalaas Ibliis dakhal fi galbah. Wa Isa hajja leyah wa gaal : «Al-cheyy al-tidoor tisawwiih, sawwiih ajala.»

28Wa kulluhum al-gaaʼidiin yaakulu simʼo al-kalaam al-Isa gaalah le Yahuuza, laakin ma irfo maʼanaatah. 29Yahuuza hu masʼuul hana sanduug al-gurus wa fi fikir waahidiin, Isa gaal leyah khalli yamchi yachri al-khumaam al-waajib le l-iid. Wa fi fikir waahidiin, Isa gaal leyah khalli yamchi yanti sadakha le l-masaakiin. 30Wa Yahuuza chaal al-lugma wa tawwaali marag. Wa l-leel gaaʼid wa l-wata dalma.

31Wa wakit Yahuuza marag khalaas, Isa hajja leehum wa gaal : «Hassaʼ majd Ibn al-Insaan yibiin. Wa beyah hu, majd Allah yibiin. 32Wa kan beyah hu majd Allah yibiin, akiid Allah yimajjid Ibn al-Insaan maʼaayah wa yimajjidah tawwaali.

Al-wasiiye al-jadiide

33«Ya iyaali, ana nagood maʼaaku wakit chiyya bas. Intu tifattuchuuni wa laakin nuguul leeku nafs al-kalaam al-gultah le l-Yahuud. Al-bakaan al-namchi leyah intu ma tagdaro tamchu leyah. 34Wa nantiiku wasiiye jadiide wa l-wasiiye hi arraayado ambeenaatku. Arraayado misil ana niriidku. 35Wa misil da bas, kulla l-naas yaʼarfu intu talaamiizi kan intu tirraayado ambeenaatku.»

36Wa Simʼaan Butrus gaal : «Sayyidna, inta maachi ween ?» Wa Isa radda leyah wa gaal : «Hassaʼ inta ma tagdar titaabiʼni fi l-bakaan al-ana namchi leyah. Laakin fi wakit aakhar, tagdar titaabiʼni.» 37Wa Butrus saʼalah wa gaal : «Sayyidna, maala ma nagdar nitaabiʼak hassaʼ ? Ana jaahiz nitaabiʼak lahaddi nafdaak be ruuhi !» 38Wa Isa radda leyah wa gaal : «Hal sahiih tidoor tafdaani be ruuhak walla ? Asmaʼ nuguul leek al-hagg, gubbaal al-diik ma yiʼooʼi, inta tankurni talaata marraat.»

Currently Selected:

Yuuhanna 13: ADT19

Highlight

Copy