تكوين 27
27
إِسْحَاق بارك يَعْقُوب
1وَ إِسْحَاقْ بِقِي شَايِبْ وَ عُيُونَهْ مَا بِشِيفُوا. وَ خَلَاصْ، قَمَّ نَادَى وِلَيْدَهْ الْبِكِرْ عِيسُو وَ قَالْ: «يَا وِلَيْدِي!» وَ هُو قَالْ: «نَعَمْ!» 2وَ إِسْحَاقْ قَالْ لَيَّهْ: «شِيفْ أَنَا بِقِيتْ شَايِبْ وَ مَا نَعَرِفْ يَوْم مَوْتِي. 3هَسَّعْ دَا شِيلْ سِلَاحَكْ وَ نُبَّالَكْ وَ نُشَّابَكْ وَ أَمْشِي الْقَنِيصْ وَ جِيبْ لَيِّ صَيْدَةْ. 4وَ سَوِّي لَيِّ بَيْهَا أَكِلْ النِّرِيدَهْ وَ جِيبَهْ لَيِّ نَاكُلْ أَشَانْ نِبَارِكَكْ قُبَّالْ مَا نُمُوتْ.»
5وَ وَكِتْ إِسْحَاقْ قَاعِدْ يِحَجِّي لِوِلَيْدَهْ عِيسُو دَا، رِفْقَةْ قَاعِدَةْ تَسْمَعْ فِي كَلَامَهْ. خَلَاصْ عِيسُو مَرَقْ مَشَى فِي الْخَلَاءْ لِيَكْتُلْ صَيْدَةْ وَ يِجِيبْهَا.
6وَ بَعَدْ دَا، رِفْقَةْ قَالَتْ لِوِلَيْدهَا يَعْقُوبْ: «أَسْمَعْ! أَنَا سِمِعْت أَبُوكْ حَجَّى لِأَخُوكْ عِيسُو وَ قَالْ: 7‹جِيبْ لَيِّ صَيْدَةْ وَ سَوِّي لَيِّ أَكِلْ النِّرِيدَهْ أَشَانْ نِبَارِكَكْ قِدَّامْ اللّٰهْ قُبَّالْ مَا نُمُوتْ.› 8هَسَّعْ دَا، يَا وِلَيْدِي، أَسْمَعْ كَلَامِي وَ سَوِّي الشَّيّءْ النَّامُرَكْ بَيَّهْ. 9أَمْشِي فِي الزَّرِيبَةْ وَ جِيبْ لَيِّ سُخْلَانْ إِتْنَيْن سُمَانْ وَ أَنَا نِسَوِّي لِأَبُوكْ الْأَكِلْ الْحَلُو الْهُو يِرِيدَهْ. 10وَ إِنْتَ تِوَدِّي الْأَكِلْ دَا لِأَبُوكْ وَ هُو يَاكُلَهْ أَشَانْ يِبَارِكَكْ قُبَّالْ مَا يُمُوتْ.»
11لَاكِنْ يَعْقُوبْ قَالْ لِأَمَّهْ رِفْقَةْ: «أَخُويِ عِيسُو جِلْدَهْ كُلَّ صُوفْ وَ أَنَا جِلْدِي أَمْلَسْ. 12وَ أَكُونْ أَبُويِ يَلْمَسْنِي وَ يَعَرِفْنِي وَ يُقُولْ أَنَا غَشَّيْتَهْ وَ يُقُمّ يَلْعَنِّي وَ مَا يِبَارِكْنِي.» 13وَ أَمَّهْ قَالَتْ لَيَّهْ: «خَلِّي اللَّعَنَةْ دِي تَلْحَقْنِي أَنَا، يَا وِلَيْدِي. أَسْمَعْ كَلَامِي! أَمْشِي! جِيبْ لَيِّ السُّخْلَانْ.»
14وَ خَلَاصْ، يَعْقُوبْ مَشَى جَابْ السُّخْلَانْ لِأَمَّهْ وَ هِي قَمَّتْ سَوَّتْ الْأَكِلْ الْأَبُوهْ يِرِيدَهْ. 15وَ بَعَدْ دَا، رِفْقَةْ شَالَتْ خُلْقَانْ السَّمْحِينْ هَنَا عِيسُو وِلَيْدهَا الْكَبِيرْ، الْقَاعِدِينْ فِي بَكَانْهَا فِي الْبَيْت وَ لَبَّسَتْهُمْ لِيَعْقُوبْ وِلَيْدهَا الصَّغَيَّرْ. 16وَ بِالْفَرْوَةْ هَنَا السُّخْلَانْ، هِي لَبَّسَتْ إِيدَيْنَهْ وَ رَقَبَتَهْ بَكَانْ الْأَمْلَسْ. 17وَ رِفْقَةْ أَنْطَتْ لِوِلَيْدهَا يَعْقُوبْ الْأَكِلْ الْحَلُو وَ الْخُبْزَةْ الْهِي سَوَّتْهَا.
يَعْقُوب غشّ أبوه إِسْحَاق
18وَ خَلَاصْ، يَعْقُوبْ قَمَّ مَشَى لِأَبُوهْ وَ قَالْ: «يَا أَبُويِ.» وَ إِسْحَاقْ قَالْ: «نَعَمْ! إِنْتَ يَاتُو، يَا وِلَيْدِي؟» 19وَ يَعْقُوبْ قَالْ: «أَنَا عِيسُو وِلَيْدَكْ الْبِكِرْ. أَنَا سَوَّيْت الشَّيّءْ الْإِنْتَ طَلَبْتَهْ مِنِّي. مِنْ إِذْنَكْ، قُمّ وَ آكُلْ لَحَمْ الصَّيْدَةْ أَشَانْ إِنْتَ بِنَفْسَكْ تِبَارِكْنِي.» 20وَ إِسْحَاقْ قَالْ لَيَّهْ: «يَا وِلَيْدِي، دَا كِكَّيْف إِنْتَ لِقِيتْهَا عَجَلَةْ كَيْ؟» وَ يَعْقُوبْ قَالْ: «أَشَانْ اللّٰهْ إِلٰـهَكْ بَسْ جَابْ لَيِّ الصَّيْدَةْ.»
21وَ فِي الْبَكَانْ دَا، خَلَاصْ إِسْحَاقْ قَالْ لِيَعْقُوبْ: «تَعَالْ قَرِيبْ، يَا وِلَيْدِي، أَشَانْ نِلَمِّسَكْ وَ نَعَرِفْ كَدَرْ إِنْتَ بَسْ وِلَيْدِي عِيسُو وَلَّا لَا.» 22وَ يَعْقُوبْ قَرَّبْ لِأَبُوهْ إِسْحَاقْ وَ هُو لِمْسَهْ وَ قَالْ: «الْحِسّ، حِسّ هَنَا يَعْقُوبْ لَاكِنْ الْإِيدَيْن، إِيدَيْن هَنَا عِيسُو.» 23وَ بِمِثِلْ دَا، إِسْحَاقْ مَا عِرِفْ يَعْقُوبْ أَشَانْ إِيدَيْنَهْ عِنْدُهُمْ صُوفْ مِثِلْ أَخُوهْ عِيسُو. وَ خَلَاصْ، هُو بَارَكَهْ.
24وَ قُبَّالْ مَا يِبَارِكَهْ، هُو سَأَلَهْ بَتَّانْ وَ قَالْ: «صَحِيحْ كَيْ إِنْتَ وِلَيْدِي عِيسُو؟» وَ يَعْقُوبْ قَالْ: «أَيْوَى.» 25وَ خَلَاصْ، إِسْحَاقْ قَالْ لَيَّهْ: «يَا وِلَيْدِي، أَنْطِينِي نَاكُلْ اللَّحَمْ الْجِبْتَهْ أَشَانْ أَنَا بِنَفْسِي نِبَارِكَكْ.» وَ يَعْقُوبْ أَنْطَى الْأَكِلْ لِأَبُوهْ. وَ هُو أَكَلَهْ وَ جَابْ لَيَّهْ خَمَرْ وَ هُو شِرِبَهْ.
26وَ بَعَدْ دَا، إِسْحَاقْ أَبُوهْ قَالْ لَيَّهْ: «يَا وِلَيْدِي، تَعَالْ قَرِيبْ وَ حِبِّنِي.» 27وَ يَعْقُوبْ قَرَّبْ لَيَّهْ وَ حَبَّاهْ. وَ إِسْحَاقْ شَمَّ الرِّيحَةْ هِنْت خُلْقَانَهْ وَ قَمَّ بَارَكَهْ وَ قَالْ:
«أَيْوَى! الرِّيحَةْ دِي هِنْت وِلَيْدِي!
هِي مِثِلْ رِيحَةْ هِنْت زَرَعْ
الْاللّٰهْ بَارَكَهْ.
28خَلِّي الرَّبّ يَنْطِيكْ
كَرَنْج الْيَنْزِلْ مِنْ السَّمَاءْ
وَ إِنْتَاجْ الْأَرْض.
وَ يَنْطِيكْ قَمَحْ
وَ خَمَرْ جَدِيدْ بِكَتَرَةْ.
29خَلِّي الشُّعُوبْ يَخْدُمُوا لَيْك
وَ الْأُمَمْ يَسْجُدُوا قِدَّامَكْ.
وَ أَبْقَى سِيدْ أَخْوَانَكْ
وَ عِيَالْ أَمَّكْ يَسْجُدُوا قِدَّامَكْ!
الْيَلْعَنَكْ مَلْعُونْ
وَ الْيِبَارِكَكْ مُبَارَكْ.»
عِيسُو دوّر أبوه يبارِكه
30وَ وَكِتْ إِسْحَاقْ كَمَّلْ مِنْ مُبَارَكَةْ يَعْقُوبْ وَ يَعْقُوبْ مَرَقْ مِنْ بَكَانْ أَبُوهْ دَا، خَلَاصْ طَوَّالِي كَيْ أَخُوهْ عِيسُو جَاءْ مِنْ الْقَنِيصْ. 31وَ هُو كُلَ سَوَّى أَكِلْ حَلُو وَ جَابَهْ لِأَبُوهْ وَ قَالْ: «يَا أَبُويِ، قُمّ وَ آكُلْ لَحَمْ الصَّيْدَةْ الْأَنَا وِلَيْدَكْ جِبْتَهْ أَشَانْ إِنْتَ بِنَفْسَكْ تِبَارِكْنِي.» 32وَ أَبُوهْ إِسْحَاقْ قَالْ لَيَّهْ: «إِنْتَ يَاتُو؟» وَ هُو رَدَّ لَيَّهْ وَ قَالْ: «أَنَا وِلَيْدَكْ الْبِكِرْ عِيسُو.»
33وَ مِنْ سِمِعْ الْكَلَامْ دَا، إِسْحَاقْ قَمَّ يَرْجِفْ شَدِيدْ وَ قَالْ: «يَاتُو الْمَشَى الْقَنِيصْ وَ جَابْ لَيِّ لَحَمْ؟ وَ أَنَا أَكَلْت مِنَّهْ هَسَّعْ قُبَّالْ إِنْتَ مَا تَجِي وَ أَنَا بَارَكْتَهْ. وَ أَكِيدْ هُو يَبْقَى مُبَارَكْ!» 34وَ وَكِتْ عِيسُو سِمِعْ كَلَامْ أَبُوهْ، قَمَّ يِكَوْرِكْ كُرَوْرَاكْ شَدِيدْ هَنَا وَجَعْ قَلِبْ وَ قَالْ لِأَبُوهْ: «بَارِكْنِي أَنَا كُلَ، يَا أَبُويِ!»
35وَ إِسْحَاقْ قَالْ لَيَّهْ: «أَخُوكْ جَاءْ غَشَّانِي وَ أَنَا بَارَكْتَهْ فِي بَدَلَكْ.» 36وَ عِيسُو قَالْ: «أَشَانْ أُسْمَهْ يَعْقُوبْ (مَعَنَاتَهْ النَّجِيضْ)، دَا بَسْ غَشَّانِي مَرَّتَيْن! أَوَّلْ شَالْ بُكُورِيّتِي وَ هَسَّعْ دَاهُو شَالْ بَرَكَتِي!»
وَ قَالْ بَتَّانْ: «إِنْتَ مَا فَضَّلْت لَيِّ بَرَكَةْ وَاحِدَةْ كُلَ؟» 37وَ إِسْحَاقْ رَدَّ لَيَّهْ وَ قَالْ: «أَنَا سَوَّيْتَهْ سِيدَكْ وَ سَوَّيْت كُلَّ أَخْوَانَهْ يَبْقَوْا خَدَّامِينْ لَيَّهْ. وَ أَنْطَيْتَهْ قَمَحْ وَ خَمَرْ بِكَتَرَةْ. وَ بَتَّانْ أَنَا نَقْدَرْ نِسَوِّي لَيْك شُنُو، يَا وِلَيْدِي؟» 38وَ عِيسُو قَالْ لِأَبُوهْ: «يَا أَبُويِ، عِنْدَكْ بَرَكَةْ وَاحِدَةْ بَسْ؟ بَارِكْنِي أَنَا كُلَ، يَا أَبُويِ!» وَ عِيسُو قَمَّ يَبْكِي بَكِي شَدِيدْ.
39وَ إِسْحَاقْ أَبُوهْ قَالْ لَيَّهْ:
«إِنْتَ تَسْكُنْ فِي أَرْض الْمَا عِنْدَهَا إِنْتَاجْ
وَ مَا عِنْدَهَا كَرَنْج
الْيَنْزِلْ مِنْ السَّمَاءْ.
40وَ إِنْتَ تِعِيشْ بِسَيْفَكْ
وَ تَخْدِمْ لِأَخُوكْ.
لَاكِنْ فِي رُوَاغْتَكْ الْجَايْ وَ جَايْ،
تِدَلِّي تَقَلَتَهْ مِنْ كَتَافَيْك.»
يَعْقُوب عرّد
41وَ عِيسُو بِقِي خَصِيمْ لِيَعْقُوبْ أَشَانْ الْبَرَكَةْ الْأَبُوهْ إِسْحَاقْ بَارَكَهْ بَيْهَا. وَ عِيسُو قَالْ فِي قَلْبَهْ: «أَبُويِ قَرِيبْ يُمُوتْ. بَعَدْ أَيَّامْ الْحِزِنْ، نَكْتُلْ أَخُويِ يَعْقُوبْ.»
42وَ خَبَّرَوْا رِفْقَةْ بِكَلَامْ عِيسُو وِلَيْدهَا الْكَبِيرْ. خَلَاصْ هِي رَسَّلَتْ نَادَتْ يَعْقُوبْ وِلَيْدهَا الصَّغَيَّرْ وَ قَالَتْ لَيَّهْ: «دَاهُو أَخُوكْ عِيسُو يِدَوْر يِلْكَفَّى فَوْقَكْ وَ يَكْتُلَكْ. 43هَسَّعْ دَا، يَا وِلَيْدِي، أَسْمَعْ كَلَامِي. قُمّ عَرِّدْ أَمْشِي بَكَانْ أَخُويِ لَابَانْ فِي حَارَانْ. 44وَ أَقْعُدْ مَعَايَهْ أَيَّامْ هِنَاكْ، لَحَدِّي أَخُوكْ زَعَلَهْ يُفُوتْ. 45وَ كَنْ زَعَلَهْ فَاتْ وَ نِسِي الشَّيّءْ الْإِنْتَ سَوَّيْتَهْ لَيَّهْ دَا، خَلَاصْ أَنَا نِرَسِّلْ لَيْك، تَجِي. مَالَا أَنَا نِوَدِّرْكُو إِنْتُو الْإِتْنَيْن فِي نَفْس الْيَوْم؟»
46وَ بَعَدْ دَا، رِفْقَةْ قَالَتْ لِإِسْحَاقْ: «الْحَيَاةْ بَغَّضَتْ لَيِّ فِي شَانْ بَنَاتْ الْحِتِّيِّينْ دَوْل. وَ كَنْ يَعْقُوبْ كُلَ يَاخُدْ وَاحِدَةْ مِنْ بَنَاتْ الْحِتِّيِّينْ الْفِي الْبَلَدْ دِي، أَنَا حَيَاتِي مَا عِنْدَهَا فَايْدَةْ.»
Currently Selected:
تكوين 27: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
