لُوقا 2
2
والودة عِيسَى المسيح
1وَ فِي الْوَكِتْ دَا، أَغُسْطُسْ سُلْطَانْ الرَّوْمَانِيِّينْ شَالْ قَرَارْ أَشَانْ كُلَّ النَّاسْ الْفِي مَمْلَكَتَهْ يِسَجُّلُوا أَسَامَيْهُمْ. 2وَ دَا أَوَّلْ مَرَّةْ سَجَّلَوْا النَّاسْ وَ بِقِي وَكِتْ كِرِنِيُوسْ وَالِي هَنَا سُورِيَا. 3وَ أَيِّ نَادُمْ مَشَى فِي حِلِّتَهْ أَشَانْ يِسَجُّلُوهْ. 4وَ يُوسُفْ ذَاتَهْ قَمَّ مِنْ حِلَّةْ النَّاصِرَةْ الْقَاعِدَةْ فِي دَارْ الْجَلِيلْ وَ مَشَى فِي دَارْ الْيَهُودِيَّةْ فِي حِلَّةْ بَيْت لَحَمْ. وَ دِي مَدِينَةْ دَاوُدْ. وَ يُوسُفْ هُو مِنْ ذُرِّيَّةْ الْمَلِكْ دَاوُدْ وَ مِنْ عَايِلْتَهْ وَ أَشَانْ دَا بَسْ وَاجِبْ يَمْشِي فِي الْحِلَّةْ دِي أَشَانْ يِسَجُّلُوا أُسْمَهْ. 5وَ مَشَى مَعَ مَرْيَمْ الْكَرَبْ رَاسْهَا أَشَانْ يِسَجُّلُوهُمْ سَوَا. وَ هِي غَلْبَانَةْ.
6وَ وَكِتْ هُمَّنْ قَاعِدِينْ فِي بَيْت لَحَمْ، وَكِتْهَا التَّلْدَ فَوْقَهْ تَمَّ. 7وَ وِلْدَتْ وِلَيْدهَا الْبِكِرْ. وَ لَفَّتَهْ بِقِطْعَةْ وَ رَقَّدَتَهْ فِي الشَّايَةْ وَ دَا الْبَكَانْ الْيَاكُلُوا فَوْقَهْ الْبَهَايِمْ أَشَانْ مَا لِقَوْا بَكَانْ فِي بَيْت الضِّيفَانْ.
الرُعْيان و الملائِكة
8وَ فِي كَدَادَةْ الْحِلَّةْ دِي، فِي رُعْيَانْ. هُمَّنْ قَاعِدِينْ يَحْفَضَوْا غَنَمْهُمْ بِاللَّيْل. 9وَ وَاحِدْ مِنْ مَلَائِكَةْ اللّٰهْ بَانْ لَيْهُمْ وَ نُورْ مَجْد اللّٰهْ ضَوَّى فَوْقهُمْ وَ خَوْف شَدِيدْ كَرَبْهُمْ. 10وَ الْمَلَكْ حَجَّى لَيْهُمْ وَ قَالْ: «مَا تَخَافَوْا. أَسْمَعَوْا، نَنْطِيكُو خَبَرْ حَلُو هَنَا فَرْحَةْ كَبِيرَةْ التَّبْقَى لِكُلَّ النَّاسْ. 11الْيَوْم وِلْدَوْا لَيْكُو صَغِيرْ فِي مَدِينَةْ دَاوُدْ وَ هُو الْيِنَجِّي النَّاسْ وَ هُو الْمَسِيحْ وَ الرَّبّ. 12وَ دِي هِي الْعَلَامَةْ التَّعَرْفُوهْ بَيْهَا. تَلْقَوْا صَغِيرْ مَلْفُوفْ بِقِطْعَةْ وَ رَاقِدْ فِي الشَّايَةْ.»
13وَ طَوَّالِي، بَانَوْا مَعَ الْمَلَكْ دَا مَلَائِكَةْ كَتِيرِينْ بِلْحَيْن مِنْ جُنُودْ اللّٰهْ. وَ هُمَّنْ قَاعِدِينْ يَشْكُرُوا اللّٰهْ وَ يُقُولُوا: 14«مَجُّدُوا اللّٰهْ فِي الْأَعَالِي! وَ السَّلَامْ فِي الْأَرْض لِكُلَّ النَّاسْ، أَشَانْ اللّٰهْ رَاضِي بَيْهُمْ!»
15وَ وَكِتْ الْمَلَائِكَةْ خَلَّوْا الرُّعْيَانْ وَ قَبَّلَوْا فِي السَّمَاءْ خَلَاصْ، الرُّعْيَانْ حَجَّوْا أَمْبَيْنَاتْهُمْ وَ قَالَوْا: «خَلِّي نَمْشُوا فِي بَيْت لَحَمْ نِشِيفُوا الشَّيّءْ الْبِقِي، الْاللّٰهْ أَوْرَانَا بَيَّهْ.»
16وَ طَوَّالِي مَشَوْا وَ لِقَوْا مَرْيَمْ وَ يُوسُفْ وَ الصَّغِيرْ رَاقِدْ فِي الشَّايَةْ. 17وَ وَكِتْ شَافَوْه، هُمَّنْ قَمَّوْا يِحَجُّوا لِلنَّاسْ بِالْكَلَامْ الْاللّٰهْ قَالَهْ فِي الْوِلَيْد دَا بِخَشُمْ الْمَلَكْ. 18وَ كُلَّ النَّاسْ السِّمْعَوْا كَلَامْ الرُّعْيَانْ أَلْعَجَّبَوْا مِنَّهْ. 19وَ لَاكِنْ مَرْيَمْ كَرَبَتْ كُلَّ الْكَلَامْ دَا فِي قَلِبْهَا وَ قَاعِدَةْ تِفَكِّرْ فَوْقَهْ. 20وَ الرُّعْيَانْ قَبَّلَوْا فِي الْكَدَادَةْ. وَ قَاعِدِينْ يَشْكُرُوا اللّٰهْ بِغِنَيْ فِي شَانْ كُلَّ شَيّءْ الشَّافَوْه وَ سِمْعَوْه وَ بِقِي مِثِلْ الْمَلَكْ أَوْرَاهُمْ بَيَّهْ.
21وَ الصَّغِيرْ طَهَّرَوْه وَكِتْ عُمْرَهْ تَمَّ تَمَانَةْ يَوْم. وَ سَمَّوْه عِيسَى أَشَانْ دَا بَسْ الْأُسُمْ الْمَلَكْ أَنْطَاهْ لِأَمَّهْ قُبَّالْ مَا تَغْلَبْ بَيَّهْ.
قدِّمين عِيسَى في بيت اللّه
22وَ بَعَدَيْن الْوَكِتْ الْوَاجِبْ يِقَدُّمُوا فَوْقَهْ الضَّحِيَّةْ هَنَا الطِّهَارَةْ جَاءْ وَ دَا مِثِلْ مَكْتُوبْ فِي تَوْرَاةْ مُوسَى. وَ وَدَّوْا عِيسَى لِمَدِينَةْ الْقُدُسْ أَشَانْ يِقَدُّمُوهْ لِلّٰهْ. 23الْكَلَامْ الْمَكْتُوبْ فِي تَوْرَاةْ اللّٰهْ يُقُولْ: <كُلِّ وَلْد بِكِرْ الْوِلْدَوْه، هُو يَبْقَى خَاصّ لِلّٰهْ.>#2:23 الكلام دا تلقوه في خُروج 13:2. 24وَ قَدَّمَوْا لِلّٰهْ ضَحِيَّةْ مِثِلْ مَكْتُوبْ فِي تَوْرَاةْ اللّٰهْ. مَكْتُوبْ: <قَدِّمْ قِمْرِيْ إِتْنَيْن أَوْ حَمَامْ إِتْنَيْن.>#2:24 الكلام دا تلقوه في لاوِيِّين 12:8.
كلام سَمْعَان الشايِب
25وَ فِيَّهْ رَاجِلْ وَاحِدْ فِي مَدِينَةْ الْقُدُسْ أُسْمَهْ سَمْعَانْ وَ هُو نَادُمْ صَالِحْ وَ تَقِي. وَ هُو قَاعِدْ يَرْجَى بِعَشَمْ السَّلَامْ الْيِرَسِّلَهْ اللّٰهْ لِبَنِي إِسْرَائِيلْ. وَ الرُّوحْ الْقُدُّوسْ قَاعِدْ فَوْقَهْ. 26وَ أَوَّلْ الرُّوحْ الْقُدُّوسْ كَلَّمْ لَيَّهْ كَدَرْ مَا يُمُوتْ قُبَّالْ مَا يِشِيفْ الْمَسِيحْ الْيِرَسِّلَهْ اللّٰهْ.
27وَ فِي الْيَوْم دَا، الرُّوحْ الْقُدُّوسْ وَدَّى سَمْعَانْ فِي فَضَايَةْ بَيْت اللّٰهْ. وَ مَرْيَمْ وَ يُوسُفْ جَوْا بِصَغِيرْهُمْ عِيسَى أَشَانْ يِسَوُّوا لَيَّهْ الشَّيّءْ الْوَاجِبْ حَسَبْ شُرُوطْ التَّوْرَاةْ. 28وَ سَمْعَانْ شَالَهْ مِنْهُمْ وَ شَكَرْ اللّٰهْ وَ قَالْ:
29«يَا رَبّ، خَلِّينِي أَنَا عَبْدَكْ نُمُوتْ بِالسَّلَامْ
مِثِلْ إِنْتَ أَوَّلْ أَوْرَيْتنِي بَيَّهْ.
30أَشَانْ شِفْت بِعَيْنِي
النَّادُمْ التِّنَجِّي بَيَّهْ النَّاسْ.
31وَ دِي بَسْ النَّجَاةْ الْجَهَّزْتَهَا
أَشَانْ كُلَّ الْأُمَمْ يَعَرْفُوهَا.
32أَيْوَى، هُو النُّورْ
الْيِوَصِّفْ دَرِبْ اللّٰهْ لِلْأُمَمْ
وَ يِجِيبْ شُكُرْ كَتِيرْ
لِشَعَبَكْ بَنِي إِسْرَائِيلْ.»
33وَ أَبُوهْ وَ أَمَّهْ أَلْعَجَّبَوْا بِلْحَيْن مِنْ الْكَلَامْ الْقَالَهْ فِي عِيسَى. 34وَ سَمْعَانْ بَارَكَاهُمْ وَ كَلَّمْ لِمَرْيَمْ أَمّ عِيسَى وَ قَالْ: «أَكِيدْ مُقَدَّرْ لِلْوِلَيْد دَا، هُو يَبْقَى سَبَبْ هَلَاكْ لِنَاسْ كَتِيرِينْ مِنْ بَنِي إِسْرَائِيلْ وَ لِكَتِيرِينْ مِنْهُمْ يَبْقَى سَبَبْ نَجَاةْ. وَ هُو يَبْقَى لَيْهُمْ عَلَامَةْ وَ كَتِيرِينْ يَابَوْهَا. 35وَ بِسَبَبَهْ هُو، الْأَفْكَارْ الْفِي قُلُوبْ نَاسْ كَتِيرِينْ يِنْكَشْفُوا. وَ إِنْتِ ذَاتْكِ حِزِنْ شَدِيدْ يَجِي فَوْقكِ مِثِلْ طَعَنَوْكِ فِي قَلِبْكِ بِسَيْف.»
كلام العجوز حنّ
36وَ فِي مَرَةْ وَاحِدَةْ وَ هِي نَبِيَّةْ. أُسُمْهَا حَنَّ بِنْت فَنُوِيلْ مِنْ قَبِيلَةْ أَشِيرْ. وَ هِي مَرَةْ كَبِيرَةْ بِلْحَيْن فِي السِّنّ. مِنْ أَخَدَوْهَا، هِي قَعَدَتْ 7 سَنَةْ مَعَ رَاجِلْهَا. وَ بَعَدْ دَا، هُو مَاتْ. 37وَ بَتَّانْ مَا أَخَدَتْ رَاجِلْ وَ عِنْدَهَا 84 سَنَةْ وَ قَاعِدَةْ دَايْماً فِي فَضَايَةْ بَيْت اللّٰهْ. وَ قَاعِدَةْ تَعَبُدْ اللّٰهْ لَيْل وَ نَهَارْ بِالصَّلَاةْ وَ الصِّيَامْ.
38وَ وَكِتْ سِمْعَانْ قَاعِدْ يِحَجِّي مَعَاهُمْ، فِي نَفْس الْوَكِتْ، هِي كُلَ قَرَّبَتْ لَيْهُمْ وَ قَمَّتْ تَشْكُرْ اللّٰهْ. وَ تِحَجِّي بِالصَّغِيرْ لِكُلَّ النَّاسْ الْقَاعِدِينْ يَرْجَوْا الْيَوْم الْاللّٰهْ يَفْدَى فَوْقَهْ نَاسْ مَدِينَةْ الْقُدُسْ.
39وَ وَكِتْ يُوسُفْ وَ مَرْيَمْ سَوَّوْا كُلَّ شَيّءْ الْوَاجِبْ لَيْهُمْ حَسَبْ تَوْرَاةْ اللّٰهْ، هُمَّنْ قَبَّلَوْا فِي دَارْ الْجَلِيلْ وَ مَشَوْا حِلِّتْهُمْ النَّاصِرَةْ. 40وَ الْوِلَيْد كِبِرْ. وَ هُو بِقِي شَدِيدْ وَ مَلَانْ بِحِكْمَةْ وَ لِقِي رِضَى اللّٰهْ.
المسيح في بيت اللّه وكت هو صبي
41وَ كُلِّ سَنَةْ، أَهَلْ عِيسَى يَمْشُوا فِي مَدِينَةْ الْقُدُسْ أَشَانْ يِعَيُّدُوا عِيدْ الْفِصْحَ. 42وَ وَكِتْ عِيسَى عُمْرَهْ تَمَّ 12 سَنَةْ، مَشَوْا حَسَبْ عَادِتْهُمْ وَ وَدَّوْه مَعَاهُمْ. 43وَ وَكِتْ الْعِيدْ كَمَّلْ وَ هُمَّنْ مُقَبِّلِينْ، الْوِلَيْد عِيسَى قَعَدْ فِي الْمَدِينَةْ لَاكِنْ أَهَلَهْ مَا يَعَرْفُوا كَدَرْ هُو مَا مَعَاهُمْ. 44فِي فِكِرْهُمْ عِيسَى قَاعِدْ فِي لُبّ الْمُسَافِرِينْ. وَ بَعَدْ سَوَّوْا يَوْم وَاحِدْ هَنَا سَفَرْ، فَقَدَوْه وَ فَتَّشَوْه أَمْبَيْنَاتْ أَخْوَانْهُمْ وَ رُفْقَانْهُمْ.
45وَ وَكِتْ عِرْفَوْا هُو مَا فِيهْ، قَبَّلَوْا فِي الْمَدِينَةْ أَشَانْ يِفَتُّشُوهْ. 46وَ فِي الْيَوْم التَّالِتْ، لِقَوْه فِي فَضَايَةْ بَيْت اللّٰهْ. وَ هُو قَاعِدْ تِحِتْ فِي أُسْط الْعُلَمَاءْ وَ قَاعِدْ يَسْمَعْ كَلَامْهُمْ وَ يَسْأَلْهُمْ. 47وَ أَيِّ نَادُمْ السِّمِعْ كَلَامَهْ أَلْعَجَّبْ بِلْحَيْن مِنْ فِهِمَهْ وَ رَدَّهْ.
48وَ وَكِتْ شَافَوْه هِنَاكْ، أَلْعَجَّبَوْا مَرَّةْ وَاحِدْ. وَ أَمَّهْ حَجَّتْ لَيَّهْ وَ قَالَتْ: «يَا وِلَيْدِي! مَالَا تَعَّبْتِنَا مِثِلْ دَا! أَنَا وَ أَبُوكْ هَمَّيْنَا بِلْحَيْن وَكِتْ فَقَدْنَاكْ.» 49وَ قَالْ لَيْهُمْ: «مَالَا تِفَتُّشُونِي؟ مَا تَعَرْفُوا كَدَرْ وَاجِبْ نَقْعُدْ فِي بَيْت أَبُويِ وَلَّا؟» 50وَ مَا فِهْمَوْا الْكَلَامْ الْقَالَهْ دَا.
51وَ عِيسَى قَبَّلْ مَعَاهُمْ وَ وِصِلْ فِي النَّاصِرَةْ. وَ تَابَعْ كَلَامْهُمْ فِي كُلَّ شَيّءْ. وَ أَمَّهْ كَرَبَتْ كُلَّ الْكَلَامْ دَا فِي قَلِبْهَا. 52وَ عِيسَى قَاعِدْ يَكْبُرْ وَ حِكْمَتَهْ قَاعِدَةْ تِزِيدْ. وَ لِقِي رِضَى مِنْ اللّٰهْ وَ مِنْ النَّاسْ.
Currently Selected:
لُوقا 2: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
