لُوقا 3
3
خِدْمة النبي يَحْيَى
1تِبَارِي سُلْطَانْ الرَّوْمَانِيِّينْ حَكَمْ مُدَّةْ 15 سَنَةْ خَلَاصْ. وَ بِلَاطُسْ الْبُنْطِي بِقِي وَالِي هَنَا دَارْ الْيَهُودِيَّةْ. وَ هِرُودُسْ بِقِي مُحَافِظْ فِي دَارْ الْجَلِيلْ وَ أَخُوهْ فِلِبُّسْ بِقِي مُحَافِظْ فِي بُلْدَانْ إِطُورِيَةْ وَ تَرَخُونِيتُسْ. وَ لِسَنِيُوسْ بِقِي مُحَافِظْ فِي إِبِيلِينَةْ. 2وَ حَنَانْ وَ قَيَافَا بِقَوْا كُبَارَاتْ رُجَالْ الدِّينْ. وَ فِي وَكِتْهُمْ دَا بَسْ، كَلَامْ اللّٰهْ نَزَلْ لِيَحْيَى وِلَيْد زَكَرِيَّا الْقَاعِدْ فِي الْكَدَادَةْ. 3وَ هُو قَمَّ يُرُوغْ فِي كُلَّ الْكَدَادَةْ الْجَنْب بَحَرْ الْأُرْدُنْ. هُو قَاعِدْ يِنَادِي النَّاسْ أَشَانْ يُتُوبُوا. وَ يِغَطِّسْهُمْ فِي الْأَلْمِي وَ اللّٰهْ يَغْفِرْ لَيْهُمْ ذُنُوبْهُمْ. 4وَ دَا مِثِلْ الْكَلَامْ الْمَكْتُوبْ فِي كِتَابْ النَّبِي إِشَعْيَا. كَلَامَهْ يُقُولْ:
<فِي حِسّ قَاعِدْ يِعِيطْ فِي الْخَلَاءْ
وَ يُقُولْ:
«جَهُّزُوا دَرِبْ الرَّبّ
وَ عَدُّلُوا لَيَّهْ الطُّرُقْ!
5خَلِّي أَيِّ وَادِي يِنْدَفِنْ
وَ كُلِّ جَبَلْ وَ حَجَرْ يَبْقَى قِصَيِّرْ.
وَ الْبَكَانْ الْأَعْوَجْ يَبْقَى عَدِيلْ
وَ الدَّرِبْ الشَّيْن يِسْتَوِي.
6وَ كُلَّ النَّاسْ يِشِيفُوا
النَّجَاةْ الْاللّٰهْ يِجِيبْهَا.»>#3:6 الكلام دا تلقوه في إشَعْيا 40:3-5، حسب الترْجمة اليونانيّة.
7وَ نَاسْ كَتِيرِينْ مَارْقِينْ مِنْ حِلَّالْهُمْ وَ مَاشِينْ لَيَّهْ أَشَانْ هُو يِغَطِّسْهُمْ. وَ قَالْ لَيْهُمْ: «يَا عِيَالْ الدَّابِي! يَاتُو الْقَالْ لَيْكُو أَجْرُوا مِنْ الْعَذَابْ الْجَايِ؟ 8سَوُّوا الْعَمَلْ الْيِوَصِّفْ كَدَرْ إِنْتُو تُبْتُوا بِالصَّحِيحْ. وَ مَا تُغُشُّوا نُفُوسْكُو. مَا تُقُولُوا: ‹مَا عِنْدِنَا عَيْب أَشَانْ أَنِحْنَ عِيَالْ إِبْرَاهِيمْ.› نُقُولْ لَيْكُو اللّٰهْ يَقْدَرْ يِشِيلْ حُجَارْ مِنْ التُّرَابْ وَ يِسَوِّي مِنْهُمْ عِيَالْ لِإِبْرَاهِيمْ فِي بَدَلْكُو! 9شِيفُوا، الْفَاسْ جَاهِزَةْ لِتَقْطَعْ الشَّدَرَةْ مِنْ عِرِقْهَا. أَيِّ شَدَرَةْ الْمَا تَلْدَ عِيَالْ عَدِيلِينْ يَقْطَعَوْهَا وَ يَزْقُلُوهَا فِي النَّارْ!»
10وَ النَّاسْ قَاعِدِينْ يَسْأَلَوْا يَحْيَى وَ يُقُولُوا: «وَاجِبْ نِسَوُّوا شُنُو؟» 11وَ رَدَّ لَيْهُمْ وَ قَالْ: «النَّادُمْ الْعِنْدَهْ خُلْقَانْ إِتْنَيْن، خَلِّي يَنْطِي وَاحِدْ لِلْمَا عِنْدَهْ. وَ النَّادُمْ الْعِنْدَهْ أَكِلْ، خَلِّي يِسَوِّي نَفْس الشَّيّءْ.»
12وَ وَاحِدِينْ مِنْ النَّاسْ الْيِشِيلُوا الْمِيرِي كُلَ جَوْا لَيَّهْ أَشَانْ هُو يِغَطِّسْهُمْ. وَ سَأَلَوْه وَ قَالَوْا: «سَيِّدْنَا، أَنِحْنَ وَاجِبْ نِسَوُّوا شُنُو؟» 13وَ يَحْيَى قَالْ لَيْهُمْ: «مَا تِشِيلُوا زِيَادَةْ مِنْ الْأَمَرَوْكُو بَيَّهْ.»
14وَ عَسْكَرْ وَاحِدِينْ كُلَ سَأَلَوْه وَ قَالَوْا: «وَ أَنِحْنَ، وَاجِبْ نِسَوُّوا شُنُو؟» وَ رَدَّ لَيْهُمْ وَ قَالْ: «مَا تِشِيلُوا قُرُسْ مِنْ نَاسْ بِقُوءْ وَ لَا بِتُهْمَةْ بَاطْلَةْ. وَ أَبْقَوْا رَضْيَانِينْ بِقُرُسْ شَهَرْكُو.»
يَحْيَى ردّ للناس
15وَ النَّاسْ قَاعِدِينْ يَرْجَوْا جَيَّةْ الْمَسِيحْ. وَ أَيِّ وَاحِدْ قَاعِدْ يَسْأَلْ فِي نَفْسَهْ وَ فِي فِكِرْهُمْ أَكُونْ يَحْيَى ذَاتَهْ بَسْ الْمَسِيحْ. 16وَ يَحْيَى رَدَّ لَيْهُمْ كُلُّهُمْ وَ قَالْ: «أَنَا نِغَطِّسْكُو فِي الْأَلْمِي وَ لَاكِنْ فِي نَادُمْ قَادِرْ مِنِّي بِلْحَيْن جَايِ وَرَايِ وَ أَنَا مَا تَمَّيْت لَيَّهْ خَدَّامْ كُلَ. وَ هُو يِغَطِّسْكُو بِالرُّوحْ الْقُدُّوسْ وَ بِنَارْ. 17وَ عِنْدَهْ طَبَقْ فِي إِيدَيْنَهْ لِيِغَرْبِلْكُو مِثِلْ الْغَلَّةْ. وَ يِلِمّ غَلِّتَهْ مِنْ الْمَدَقّ وَ يُصُبَّهَا فِي دَبَنْقِتَهْ وَ لَاكِنْ الْأُتَّابْ يُتُشَّهْ فِي النَّارْ الْمَا تُمُوتْ أَبَداً.» 18وَ بِكَلَامْ كَتِيرْ مِثِلْ دَا، يَحْيَى وَصَّاهُمْ لِلنَّاسْ وَ بَلَّغْ لَيْهُمْ الْبِشَارَةْ.
19وَ فِي الْوَكِتْ دَا، هِرُودُسْ الْمُحَافِظْ أَخَدْ هِرُودِيَّةْ الْهِي أَوَّلْ مَرِةْ أَخُوهْ. وَ يَحْيَى هَرَجَهْ لِهِرُودُسْ فِي شَانْ الْأَخِيدَةْ دِي وَ فِي شَانْ كُلَّ الْفَسَالَةْ الْهُو سَوَّاهَا. 20وَ هِرُودُسْ كَرَبْ يَحْيَى فِي السِّجِنْ وَ مِثِلْ دَا، هُو زَادْ فِي ذُنُوبَهْ زِيَادَةْ.
المسيح غطّسوه
21وَ وَكِتْ يَحْيَى لِسَّاعْ قَاعِدْ يِغَطِّسْ النَّاسْ، عِيسَى جَاءْ وَ يَحْيَى غَطَّسَهْ. وَ وَكِتْ عِيسَى قَاعِدْ يِصَلِّي، السَّمَاوَاتْ أَنْفَتَحَوْا. 22وَ الرُّوحْ الْقُدُّوسْ جَاءْ لَيَّهْ فِي صُورَةْ حَمَامَةْ وَ نَزَلْ فَوْقَهْ. وَ حِسّ مِنْ السَّمَاءْ أَنْسَمَعْ وَ قَالْ: «إِنْتَ بَسْ إِبْنِي وَ أَنَا نِحِبَّكْ وَ أَنَا فَرْحَانْ بَيْك بِلْحَيْن.»
جُدود المسيح
23وَ عِيسَى بَدَا خِدِمْتَهْ وَكِتْ عُمْرَهْ مِثِلْ 30 سَنَةْ.
وَ فِي فِكِرْ النَّاسْ، هُو وِلَيْد يُوسُفْ وِلَيْد عَالِي.
24وَ عَالِي وِلَيْد مَتَّاتْ وِلَيْد لَاوِي وِلَيْد مَلْكِي وِلَيْد يَنَّا وِلَيْد يُوسُفْ.
25وَ يُوسُفْ وِلَيْد مَتَّتَايَا وِلَيْد عَمُوسْ وِلَيْد نَاحُومْ وِلَيْد حَسْلِي وِلَيْد نَقَّايْ.
26وَ نَقَّايْ وِلَيْد مَآتْ وِلَيْد مَتَّتَايَا وِلَيْد سِمْعِينْ وِلَيْد يُوسِخْ وِلَيْد يَهُوذَا.
27وَ يَهُوذَا وِلَيْد يُوحَنَّا وِلَيْد رِيسَا وِلَيْد زَرُبَابِلْ وِلَيْد شَلْتِيِيلْ وِلَيْد نِيرِي.
28وَ نِيرِي وِلَيْد مَلْكِي وِلَيْد أَدِّي وِلَيْد قُوصَمْ وِلَيْد أَلْمُودَامْ وِلَيْد عِيرْ.
29وَ عِيرْ وِلَيْد يَشُوعْ وِلَيْد أَلِعَازَرْ وِلَيْد يُورِيمْ وِلَيْد مَتَّاتْ وِلَيْد لَاوِي.
30وَ لَاوِي وِلَيْد شِمْعُونْ وِلَيْد يَهُوذَا وِلَيْد يُوسُفْ وِلَيْد يُونَانْ وِلَيْد أَلِيَاقِيمْ.
31وَ أَلِيَاقِيمْ وِلَيْد مَلَيَا وِلَيْد مَنَّا وِلَيْد مَتَّاتَا وِلَيْد نَاتَانْ وِلَيْد دَاوُدْ.
32وَ دَاوُدْ وِلَيْد يَسَّى وِلَيْد عُبَيْد وِلَيْد بُعَازْ وِلَيْد سَلْمُونْ وِلَيْد نَحْشُونْ.
33وَ نَحْشُونْ وِلَيْد عَمِنَدَابْ وِلَيْد أَدْمِي وِلَيْد عَرْنِي وِلَيْد حَصْرُونْ وِلَيْد فَارِصْ وِلَيْد يَهُوذَا.
34وَ يَهُوذَا وِلَيْد يَعْقُوبْ وِلَيْد إِسْحَاقْ وِلَيْد إِبْرَاهِيمْ وِلَيْد تَارَحْ وِلَيْد نَاحُورْ.
35وَ نَاحُورْ وِلَيْد سَرُوقْ وِلَيْد رَعُوْ وِلَيْد فَالَقْ وِلَيْد عِبَارْ وِلَيْد شَالَحْ.
36وَ شَالَحْ وِلَيْد قِنَانْ وِلَيْد أَرْفَكْشَادْ وِلَيْد سَامْ وِلَيْد نُوحْ وِلَيْد لَامَكْ.
37وَ لَامَكْ وِلَيْد مَتُوشَلَحْ وِلَيْد أَخْنُوخْ وِلَيْد يَارَدْ وِلَيْد مَهْلَلِيلْ وِلَيْد قِنَانْ.
38وَ قِنَانْ وِلَيْد أَنُوشْ وِلَيْد شِيتْ وِلَيْد آدَمْ الْهُو مِنْ اللّٰهْ.
Currently Selected:
لُوقا 3: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
