لُوقا 9
9
خِدْمة الرُسُل الأتنا عشر
1وَ عِيسَى نَادَى تَلَامِيذَهْ الْأَتْنَا عَشَرْ وَ أَنْطَاهُمْ سُلْطَةْ وَ قُدْرَةْ أَشَانْ يَطُرْدُوا أَيِّ شَيْطَانْ وَ يَشْفُوا الْمَرْضَانِينْ. 2وَ رَسَّلَاهُمْ لِيِبَشُّرُوا النَّاسْ بِمَمْلَكَةْ اللّٰهْ وَ يَشْفُوا الْمَرْضَانِينْ. 3وَ قَالْ لَيْهُمْ: «مَا تِشِيلُوا مَعَاكُو شَيّءْ لِلسَّفَرْ وَ لَا عَصَاةْ وَ لَا مُخْلَاةْ وَ لَا أَكِلْ وَ لَا قُرُسْ. وَ مَا تِشِيلُوا مَعَاكُو خُلْقَانْ هَنَا غِيَارْ. 4وَ أَيِّ بَيْت التِّدَلُّوا فَوْقَهْ، أَقْعُدُوا فَوْقَهْ لَحَدِّي تَمُرْقُوا مِنْ الْحِلَّةْ. 5وَ أَيِّ بَكَانْ الْمَا يَقْبَلَوْكُو فَوْقَهْ، أَمُرْقُوا مِنَّهْ وَ حِتُّوا الْعَجَاجْ مِنْ رِجْلَيْكُو وَ دَا يَبْقَى لَيْكُو شَهَادَةْ.»
6وَ خَلَاصْ، هُمَّنْ قَمَّوْا يُرُوغُوا فِي كُلَّ الْحِلَّالْ وَ يِبَلُّغُوا الْبِشَارَةْ فِي أَيِّ بَكَانْ وَ يَشْفُوا الْمَرْضَانِينْ.
برْجال أفْكار هِرُودُس
7وَ هِرُودُسْ مُحَافِظْ دَارْ الْجَلِيلْ سِمِعْ خَبَرْ هَنَا كُلَّ شَيّءْ الْعِيسَى قَاعِدْ يِسَوِّيهْ وَ هُو أَلْعَجَّبْ بِلْحَيْن. أَشَانْ نَاسْ وَاحِدِينْ قَاعِدِينْ يُقُولُوا يَحْيَى بَعَثْ مِنْ أُسْط الْمَيْتِينْ. 8وَ آخَرِينْ قَاعِدِينْ يُقُولُوا النَّبِي إِلِيَاسْ بَانْ وَ آخَرِينْ بَتَّانْ يُقُولُوا نَادُمْ مِنْ أَنْبِيَاء الزَّمَانْ بَعَثْ. 9وَ هِرُودُسْ قَالْ: «يَحْيَى دَا، أَنَا قَطَعْت رَاسَهْ. وَ لَاكِنْ دَا يَاتُو الْأَنَا نَسْمَعْ مِنَّهْ خَبَرْ مِثِلْ دَا؟» وَ هُو دَوَّرْ يِشِيفْ عِيسَى.
المسيح أنْطى أكِل لـ 5 000 ناس
10وَ الرُّسُلْ قَبَّلَوْا لِعِيسَى وَ خَبَّرَوْه بِكُلَّ شَيّءْ السَّوَّوْه. وَ هُو شَالَاهُمْ مَعَايَهْ. وَ عِيسَى وَ تَلَامِيذَهْ قَمَّوْا مَشَوْا وِحَيْدهُمْ فِي حِلَّةْ بَيْت صَيْدَا. 11وَ نَاسْ كَتِيرِينْ سِمْعَوْا الْخَبَرْ وَ مَشَوْا وَرَايَهْ. وَ هُو لَاقَاهُمْ عَدِيلْ وَ حَجَّى لَيْهُمْ بِمَمْلَكَةْ اللّٰهْ وَ شَفَى أَيِّ نَادُمْ الْيِدَوْر هُو يَشْفِيهْ.
12وَ الْمَغْرِبْ قَرَّبَتْ وَ الرُّسُلْ الْأَتْنَا عَشَرْ جَوْا لَيَّهْ وَ قَالَوْا: «خَلِّي النَّاسْ يَمْشُوا فِي الْحِلَّالْ وَ الْفُرْقَانْ الْمُجَاوِرِينْ لِيَلْقَوْا بَكَانْ يَرُقْدُوا فَوْقَهْ وَ يَلْقَوْا أَكِلْ. أَشَانْ الْبَكَانْ الْأَنِحْنَ قَاعِدِينْ فَوْقَهْ دَا خَلَاءْ.» 13لَاكِنْ عِيسَى رَدَّ لَيْهُمْ وَ قَالْ: «لَا. إِنْتُو بَسْ أَنْطُوهُمْ أَكِلْ.» وَ هُمَّنْ قَالَوْا لَيَّهْ: «عِنْدِنَا خَمْسَةْ خُبْزَةْ وَ حُوتْ إِتْنَيْن بَسْ. بَتَّانْ إِنْتَ تِدَوْر أَنِحْنَ نَمْشُوا نَشْرُوا أَكِلْ لِكُلَّ النَّاسْ دَوْل وَلَّا؟»
14وَ فِي مَعَاهُمْ قَرِيبْ 5 000 رُجَالْ. وَ عِيسَى قَالْ لِتَلَامِيذَهْ: «قَعُّدُوهُمْ خَمْسِينْ خَمْسِينْ.» 15وَ هُمَّنْ قَعَّدَوْا النَّاسْ مِثِلْ هُو قَالَهْ لَيْهُمْ. 16وَ عِيسَى شَالْ الْخُبْزَةْ الْخَمْسَةْ وَ الْحُوتْ الْإِتْنَيْن. وَ رَفَعْ رَاسَهْ عَلَيْ السَّمَاءْ وَ شَكَرْ اللّٰهْ. وَ كَسَّرْ الْخُبْزَةْ وَ الْحُوتْ وَ أَنْطَاهُمْ لِتَلَامِيذَهْ أَشَانْ يِقَسُّمُوهُمْ لِلنَّاسْ. 17وَ كُلَّ النَّاسْ أَكَلَوْا لَحَدِّي شِبْعَوْا. وَ خَلَاصْ التَّلَامِيذ لَمَّوْا الْأَكِلْ الْفَضَّلْ وَ مَلَوْا بَيَّهْ 12 قُفَّةْ.
بُطْرُس شهد لعِيسَى
18وَ يَوْم وَاحِدْ، عِيسَى قَاعِدْ يِصَلِّي وِحَيْدَهْ. وَ تَلَامِيذَهْ مَعَايَهْ. وَ عِيسَى سَأَلَاهُمْ وَ قَالْ: «النَّاسْ قَاعِدِينْ يُقُولُوا أَنَا يَاتُو؟» 19وَ رَدَّوْا لَيَّهْ وَ قَالَوْا: «نَاسْ وَاحِدِينْ يُقُولُوا إِنْتَ يَحْيَى الْمُغَطِّسْ. وَ نَاسْ آخَرِينْ يُقُولُوا إِنْتَ النَّبِي إِلِيَاسْ وَ نَاسْ آخَرِينْ بَتَّانْ يُقُولُوا كَدَرْ إِنْتَ نَادُمْ وَاحِدْ مِنْ الْأَنْبِيَاء الْفَاتَوْا وَ بَعَثْت مِنْ أُسْط الْمَيْتِينْ.» 20وَ بَتَّانْ سَأَلَاهُمْ وَ قَالْ: «وَ لَاكِنْ إِنْتُو، تُقُولُوا شُنُو؟ تُقُولُوا أَنَا يَاتُو؟» وَ بُطْرُسْ رَدَّ لَيَّهْ وَ قَالْ: «إِنْتَ الْمَسِيحْ الْاللّٰهْ رَسَّلَهْ.»
21لَاكِنْ عِيسَى أَمَرَاهُمْ وَ حَذَّرَاهُمْ بِتَحْذِيرْ شَدِيدْ أَشَانْ مَا يِأَوْرُوا بَيَّهْ أَيِّ نَادُمْ. 22وَ قَالْ: «أَكِيدْ، إِبْن الْإِنْسَانْ يَتْعَبْ تَعَبْ شَدِيدْ. الشُّيُوخْ وَ كُبَارَاتْ رُجَالْ الدِّينْ وَ الْعُلَمَاءْ يَابَوْه. وَ إِبْن الْإِنْسَانْ يَكْتُلُوهْ وَ اللّٰهْ يَبْعَثَهْ مِنْ أُسْط الْمَيْتِينْ فِي الْيَوْم التَّالِتْ.»
23وَ عِيسَى قَالْ لَيْهُمْ كُلُّهُمْ: «كَنْ أَيِّ نَادُمْ يِدَوْر يِتَابِعْنِي، خَلِّي يِشِيفْ نَفْسَهْ رَخِيصَةْ لَيَّهْ وَ يِلْحَمَّلْ تَعَبْ الصَّلِيبْ كُلَّ يَوْم وَ يِتَابِعْنِي لِلْمَوْت. 24وَ أَيِّ نَادُمْ الْيِدَوْر يِنَجِّي نَفْسَهْ، يِوَدِّرْهَا. لَاكِنْ أَيِّ نَادُمْ الْيِوَدِّرْ نَفْسَهْ فِي شَانِي أَنَا، هُو دَا يَنْجَى. 25شُنُو الْفَايْدَةْ كَنْ نَادُمْ رِبِحْ كُلَّ الْمَالْ الْفِي الدُّنْيَا وَ لَاكِنْ وَدَّرْ نَفْسَهْ أَوْ هِلِكْ؟ 26وَ أَيِّ نَادُمْ الْيَنْكُرْنِي بِسَبَبْ الْعَيْب الْيَلْقَى مِنْ النَّاسْ، أَنَا إِبْن الْإِنْسَانْ نَنْكُرَهْ وَكِتْ نِقَبِّلْ بِقُدُرْتِي الْمَجِيدَةْ وَ بِقُدْرَةْ الْمَجِيدَةْ هَنَا أَبُويِ اللّٰهْ وَ مَلَائِكَتَهْ الْمُقَدَّسِينْ. 27وَ نُقُولْ لَيْكُو الْحَقّ، فِي نَاسْ وَاحِدِينْ الْقَاعِدِينْ هِنِي مَا يُمُوتُوا قُبَّالْ مَا يِشِيفُوا مَمْلَكَةْ اللّٰهْ.»
المسيح في نور المجْد
28وَ بَعَدْ قَرِيبْ تَمَانَةْ يَوْم مِنْ عِيسَى قَالْ الْكَلَامْ دَا، هُو طَلَعْ فِي رَاسْ حَجَرْ أَشَانْ يِصَلِّي. وَ شَالْ مَعَايَهْ بُطْرُسْ وَ يُوحَنَّا وَ يَعْقُوبْ. 29وَ وَكِتْ هُو قَاعِدْ يِصَلِّي، وِجْهَهْ أَلْغَيَّرْ قِدَّامْهُمْ وَ خَلَقَهْ بِقِي أَبْيَضْ كَرّ مِثِلْ نُورْ شَدِيدْ. 30وَ دَاهُو! نَاسَيْن بَانَوْا وَ بَدَوْا يِحَجُّوا مَعَايَهْ وَ هُمَّنْ النَّبِي مُوسَى وَ النَّبِي إِلِيَاسْ. 31وَ بَانَوْا فِي نُورْ مَجِيدْ وَ قَاعِدِينْ يِحَجُّوا لَيَّهْ بِمَرِقِينَهْ مِنْ الدُّنْيَا الْيِتِمّ فِي مَدِينَةْ الْقُدُسْ.
32وَ أَوَّلْ بُطْرُسْ وَ رُفْقَانَهْ، النَّوْم شَالَاهُمْ لَاكِنْ قَمَّوْا مِنْ النَّوْم وَ شَافَوْا عِيسَى فِي نُورْ مَجِيدْ وَ الرُّجَالْ الْإِتْنَيْن الْوَاقْفِينْ مَعَايَهْ. 33وَ وَكِتْ الرُّجَالْ الْإِتْنَيْن دَوْل دَوَّرَوْا يِنْفَرْقُوا مِنْ عِيسَى، بُطْرُسْ حَجَّى لَيَّهْ وَ قَالْ: «سَيِّدْنَا، بِقِي لَيْنَا سَمَحْ كَدَرْ أَنِحْنَ قَاعِدِينْ هِنِي. خَلِّينَا نِسَوُّوا لَقَادِيبْ تَلَاتَةْ، وَاحِدَةْ لَيْك وَ وَاحِدَةْ لِمُوسَى وَ وَاحِدَةْ لِإِلِيَاسْ.» وَ حَجَّى وَ مَا فَكَّرْ فِي كَلَامَهْ.
34وَ وَكِتْ قَاعِدْ يِحَجِّي الْكَلَامْ دَا، سَحَابَايْ وَاحِدَةْ جَاتْ غَطَّتْهُمْ. وَ هُمَّنْ خَافَوْا بِلْحَيْن. 35وَ حِسّ مِنْ لُبّ السَّحَابَايْ أَنْسَمَعْ وَ قَالْ: «دَا بَسْ إِبْنِي وَ أَنَا عَزَلْتَهْ. أَسْمَعَوْا كَلَامَهْ.»
36وَ وَكِتْ الْحِسّ دَا كَمَّلْ خَلَاصْ، شَافَوْا عِيسَى قَاعِدْ وِحَيْدَهْ. وَ تَلَامِيذَهْ قَعَدَوْا سَاكِتْ. وَ فِي الْوَكِتْ دَاكْ، مَا أَوْرَوْا نَادُمْ بِالشَّيّءْ الشَّافَوْه.
الوِلَيْد العِنْده أم فِتْفِت
37وَ أَمْبَاكِرْ، دَلَّوْا مِنْ الْحَجَرْ وَ نَاسْ كَتِيرِينْ لَاقَوْهُمْ. 38وَ نَادُمْ وَاحِدْ فِي أُسْط النَّاسْ عَاطْ لِعِيسَى وَ قَالْ: «يَا سَيِّدْنَا! نَشْحَدَكْ أَشَانْ تَجِي تِشِيفْ وِلَيْدِي. هُو وِلَيْدِي الْوَحِيدْ. آخَرْ مَا عِنْدِي. 39وَ فِي شَيْطَانْ وَاحِدْ الدَّايْماً يَكُرْبَهْ. عَجَلَةْ كَيْ يَجِي فَوْقَهْ وَ الْوِلَيْد يَصْرَخْ وَ أَمْ فِتْفِتْ تَرْمِيهْ لَحَدِّي رِغْوَةْ تَمْرُقْ مِنْ خَشْمَهْ. الشَّيْطَانْ مَا يِخَلِّيهْ، إِلَّا يِتَعِّبَهْ شَدِيدْ وَ قَاعِدْ يِعَذِّبَهْ بِلْحَيْن. 40وَ أَنَا شَحَدْت تَلَامِيذَكْ أَشَانْ يَطُرْدُوا مِنَّهْ الشَّيْطَانْ وَ لَاكِنْ هُمَّنْ مَا قِدْرَوْا.» 41وَ عِيسَى قَالْ: «يَا النَّاسْ الْعُوُجْ وَ مَا عِنْدُكُو إِيمَانْ! لَحَدِّي مَتَى نَقْعُدْ مَعَاكُو وَ نِلْحَمَّلْكُو؟ جِيبْ وِلَيْدَكْ هِنِي!»
42وَ وَكِتْ الْوِلَيْد قَاعِدْ يِقَرِّبْ لِعِيسَى، الشَّيْطَانْ رَمَاهْ تِحِتْ وَ سَوَّى لَيَّهْ أَمْ فِتْفِتْ. لَاكِنْ عِيسَى كَشَّ لِلشَّيْطَانْ وَ شَفَى الْوِلَيْد وَ قَبَّلَهْ لِأَبُوهْ. 43وَ كُلَّ النَّاسْ أَلْعَجَّبَوْا بِلْحَيْن لِقُدْرَةْ اللّٰهْ الْمَجِيدَةْ.
وَ لَاكِنْ وَكِتْ كُلَّ النَّاسْ قَاعِدِينْ يِحَجُّوا بِكُلَّ الْعَجَايِبْ الْعِيسَى قَاعِدْ يِسَوِّيهُمْ، هُو حَجَّى لِتَلَامِيذَهْ 44وَ قَالْ: «أَسْمَعَوْا كَلَامِي وَ أَكُرْبُوهْ فِي قُلُوبْكُو. بَعَدْ شِيَّةْ، اللّٰهْ يِسَلِّمْ إِبْن الْإِنْسَانْ لِلنَّاسْ.» 45لَاكِنْ مَا فِهْمَوْا كَلَامَهْ. مَعَنَى كَلَامَهْ مُلَبَّدْ لَيْهُمْ لَحَدِّي مَا عِرْفَوْه. وَ مَا سَأَلَوْه مِنَّهْ أَشَانْ هُمَّنْ خَايْفِينْ.
الصغيّر بس الكبير
46وَ تَلَامِيذ عِيسَى بَدَوْا يِلْغَالَطَوْا أَمْبَيْنَاتْهُمْ فِي يَاتُو مِنْهُمْ الْيَبْقَى كَبِيرْ. 47وَ عِيسَى عِرِفْ فِكِرْ قُلُوبْهُمْ وَ جَابْ لَيْهُمْ وِلَيْد صَغَيَّرْ وَ وَقَّفَهْ فِي جَنْبَهْ. 48وَ قَالْ لَيْهُمْ: «النَّادُمْ الْيَقْبَلْ الْوِلَيْد دَا بِأُسْمِي، هُو يَقْبَلْنِي أَنَا. وَ الْيَقْبَلْنِي يَقْبَلْ الرَّسَّلَانِي. أَشَانْ النَّادُمْ الصَّغَيَّرْ مِنْكُو كُلُّكُو، هُو بَسْ الْكَبِيرْ.»
49وَ يُوحَنَّا رَدَّ لَيَّهْ وَ قَالْ: «سَيِّدْنَا، شِفْنَا نَادُمْ وَاحِدْ الْقَاعِدْ يَطْرُدْ الشَّوَاطِينْ بِأُسْمَكْ. وَ دَوَّرْنَا نَدْحَرَوْه أَشَانْ هُو مَا قَاعِدْ يِتَابِعَكْ مَعَانَا.» 50وَ عِيسَى قَالْ: «مَا تَدْحَرَوْه. أَشَانْ النَّادُمْ الْمَا يِدَاوِسْكُو هُو يِسَاعِدْكُو.»
الحِلّة السامِريّة
51وَ الْوَكِتْ الْيِنْرَفِعْ فَوْقَهْ عِيسَى فِي السَّمَاءْ قَرَّبْ. وَ أَشَانْ دَا، هُو قَرَّرْ وَ شَالْ نِيَّةْ لِيِوَجِّهْ عَلَيْ مَدِينَةْ الْقُدُسْ. 52وَ رَسَّلْ مُرَسَّلِينْ قِدَّامَهْ أَشَانْ يِجَهُّزُوا لَيَّهْ كُلَّ شَيّءْ. وَ دَخَلَوْا فِي حِلَّةْ وَاحِدَةْ وَ هِي حِلَّةْ هَنَا سَامِرِيِّينْ. 53لَاكِنْ نَاسْهَا أَبَوْه لِعِيسَى أَشَانْ هُو مُوَجِّهْ عَلَيْ مَدِينَةْ الْقُدُسْ.
54وَكِتْ تَلَامِيذَهْ يَعْقُوبْ وَ يُوحَنَّا شَافَوْا كَدَرْ النَّاسْ دَوْل أَبَوْه لِعِيسَى، هُمَّنْ قَالَوْا: «يَا سَيِّدْنَا، نِنَادُوا نَارْ تَنْزِلْ مِنْ السَّمَاءْ تَاكُلْهُمْ وَلَّا؟» 55لَاكِنْ عِيسَى أَنْلَفَتْ لَيْهُمْ وَ هَرَجَاهُمْ. 56وَ مَشَوْا فِي حِلَّةْ آخَرَةْ.
الشُروط لليتابُعوه
57وَ وَكِتْ عِيسَى وَ جَمَاعْتَهْ مَاشِينْ فِي الدَّرِبْ، نَادُمْ وَاحِدْ جَاءْ حَجَّى لَيَّهْ وَ قَالْ: «نِتَابِعَكْ فِي أَيِّ بَكَانْ التَّمْشِي فَوْقَهْ.» 58وَ عِيسَى رَدَّ لَيَّهْ وَ قَالْ: «الْبَعَشَوْم عِنْدَهْ نُقْرَةْ وَ الطَّيْر عِنْدَهْ عُشّ وَ لَاكِنْ إِبْن الْإِنْسَانْ مَا عِنْدَهْ بَكَانْ يَرْقُدْ فَوْقَهْ.»
59وَ عِيسَى نَادَى نَادُمْ آخَرْ وَ قَالْ: «تَعَالْ تَابِعْنِي.» لَاكِنْ النَّادُمْ رَدَّ لَيَّهْ وَ قَالْ: «سَيِّدْنَا، أَنْطِينِي إِذِنْ أَشَانْ نَدْفِنْ أَبُويِ قُبَّالْ مَا نِتَابِعَكْ.» 60وَ عِيسَى رَدَّ لَيَّهْ وَ قَالْ: «خَلِّي الْمَيْتِينْ يَدْفُنُوا مَيْتِينْهُمْ. لَاكِنْ إِنْتَ دَا، أَمْشِي بَلِّغْ بِشَارَةْ مَمْلَكَةْ اللّٰهْ.»
61وَ بَتَّانْ نَادُمْ آخَرْ قَالْ: «يَا السَّيِّدْ، أَنَا نِدَوْر نِتَابِعَكْ. لَاكِنْ أَوَّلْ كَيْ أَنْطِينِي إِذِنْ أَشَانْ نِقَبِّلْ فِي بَيْتِي نِسَلِّمْ أَهَلِي.» 62وَ عِيسَى قَالْ لَيَّهْ: «كَنْ نَادُمْ بَدَا يَخْدِمْ بِالْحَرَّاتَةْ وَ يِشِيفْ وَرَايَهْ، هُو مَا جَاهِزْ لِمَمْلَكَةْ اللّٰهْ.»
Currently Selected:
لُوقا 9: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
