مَرْخُوس 11
11
دخول المسيح في المدينة
1وَ عِيسَى وَ تَلَامِيذَهْ قَرَّبَوْا لِمَدِينَةْ الْقُدُسْ وَ لِحْقَوْا حِلَّالْ بَيْت فَاجِي وَ بَيْت عَنْيَا الْفِي جَبَلْ الزَّيْتُونْ. وَ عِيسَى رَسَّلْ قِدَّامَهْ تَلَامِيذ إِتْنَيْن 2وَ قَالْ لَيْهُمْ: «أَمْشُوا فِي الْحِلَّةْ الْقِدَّامْنَا دِي. وَ فِي خَشُمْ الْحِلَّةْ تَلْقَوْا دَحَشْ وَاحِدْ مَرْبُوطْ. وَ الدَّحَشْ دَا نَادُمْ لِسَّاعْ مَا رِكِبْ فَوْقَهْ. حِلُّوهْ وَ جِيبُوهْ لَيِّ هِنِي. 3وَ كَنْ نَادُمْ يَسْأَلْكُو وَ يُقُولْ: ‹مَالَا إِنْتُو قَاعِدِينْ تِحِلُّوا الدَّحَشْ؟› قُولُوا لَيَّهْ: ‹الرَّبّ يِدَوْرَهْ وَ يِقَبِّلَهْ طَوَّالِي.›»
4وَ مَشَوْا وَ لِقَوْا الدَّحَشْ فِي الشَّارِعْ مَرْبُوطْ قِدَّامْ بَيْت وَاحِدْ. وَ حَلَّوْه. 5وَ النَّاسْ الْقَاعِدِينْ هِنَاكْ سَأَلَوْهُمْ وَ قَالَوْا: «قَاعِدِينْ تِسَوُّوا شُنُو؟ مَالَا حَلَّيْتُوا الدَّحَشْ؟» 6وَ رَدَّوْا لَيْهُمْ بِالْكَلَامْ الْعِيسَى قَالَهْ لَيْهُمْ وَ خَلَاصْ خَلَّوْهُمْ مَشَوْا بِالدَّحَشْ. 7وَ جَابَوْا الدَّحَشْ لِعِيسَى وَ فَرَّشَوْا خُلْقَانْهُمْ فَوْقَهْ وَ هُو رِكِبْ. 8وَ نَاسْ كَتِيرِينْ فَرَّشَوْا خُلْقَانْهُمْ فِي الشَّارِعْ الْعِيسَى جَايِ فَوْقَهْ لِيِجَمُّلُوهْ. وَ آخَرِينْ قَطَعَوْا وَرْشَالْ مِنْ الشَّدَرْ وَ فَرَّشَوْه فِي التُّرَابْ. 9وَ النَّاسْ الْجَايِينْ مَعَ عِيسَى قِدَّامَهْ وَ وَرَايَهْ كُلُّهُمْ شَكَرَوْا اللّٰهْ بِحِسّ عَالِي وَ قَالَوْا:
«الْحَمْدُ للّٰهْ!
<مَبْرُوكْ لِلنَّادُمْ
الْجَايِ بِأُسُمْ اللّٰهْ!>#11:9 الكلام دا تلقوه في زَبُور 118:25-26.
10مَمْلَكَةْ جِدِّنَا دَاوُدْ جَايَةْ
وَ الْحَمْدُ للّٰهْ!
<أَحْمُدُوا اللّٰهْ فِي الْعَالِي!>»#11:10 الكلام دا تلقوه في زَبُور 148:1.
11وَ عِيسَى دَخَلْ فِي مَدِينَةْ الْقُدُسْ وَ دَخَلْ فِي بَيْت اللّٰهْ وَ شَافْ كُلَّ شَيّءْ الْقَاعِدْ فَوْقَهْ. وَ الْوَكِتْ أَخَّرْ وَ أَشَانْ دَا، هُو مَرَقْ مِنْ الْمَدِينَةْ وَ مَشَى لِحِلَّةْ بَيْت عَنْيَا مَعَ تَلَامِيذَهْ الْأَتْنَا عَشَرْ.
الشدرة العِيسَى لعنها
12وَ أَمْبَاكِرْ، عِيسَى وَ تَلَامِيذَهْ جَايِينْ مِنْ حِلَّةْ بَيْت عَنْيَا وَ عِيسَى جِيعَانْ. 13وَ شَافْ قِدَّامَهْ شِيَّةْ بَعِيدْ شَدَرَةْ تِينْ مَلَانَةْ وَرْشَالْ. وَ مَشَى لَيْهَا أَشَانْ يَقْطَعْ مِنْهَا عِيَالْ. لَاكِنْ وَكِتْ لِحِقْهَا مَا لِقِي فَوْقهَا تِينْ، إِلَّا الْوَرْشَالْ بَسْ، أَشَانْ وَكِتْهَا لِسَّاعْ مَا تَمَّ. 14وَ عِيسَى حَجَّى لِلشَّدَرَةْ وَ قَالْ: «أَبَداً مَا يَاكُلُوا مِنْكِ بَتَّانْ!» وَ تَلَامِيذَهْ سِمْعَوْا كَلَامَهْ.
المسيح طرد التُجّار
15وَ وَصَّلَوْا فِي مَدِينَةْ الْقُدُسْ وَ عِيسَى دَخَلْ فِي بَيْت اللّٰهْ وَ قَمَّ يَطْرُدْ كُلَّ النَّاسْ الْقَاعِدِينْ يِسَاوُقُوا فِي الْفَضَايْ. وَ شَقْلَبْ طَرَابِيزْ النَّاسْ الْيِبَدُّلُوا قُرُسْ وَ بَنَابِرْ النَّاسْ الْيِسَاوُقُوا حَمَامْ. 16وَ فِي نَاسْ شَايْلِينْ خُمَامْهُمْ الْيِدَوْرُوا يُشُقُّوا فَضَايَةْ بَيْت اللّٰهْ وَ عِيسَى دَحَرَاهُمْ. 17وَ عِيسَى عَلَّمْ النَّاسْ وَ قَالْ: «فِي الْكِتَابْ، اللّٰهْ قَالْ: <بَيْتِي يِسَمُّوهْ بَيْت الصَّلَاةْ لِكُلَّ الشُّعُوبْ.>#11:17 الكلام دا تلقوه في إشَعْيا 56:7. <وَ لَاكِنْ إِنْتُو شِفْتُوهْ مِثِلْ كَرْكُورْ هَنَا سَرَارِيقْ!>»#11:17 الكلام دا تلقوه في إرْمِيا 7:11.
18وَ كُبَارَاتْ رُجَالْ الدِّينْ وَ الْعُلَمَاءْ سِمْعَوْا كَلَامَهْ وَ بَدَوْا يِشَّاوَرَوْا كِكَّيْف يَكْتُلُوهْ. وَ هُمَّنْ خَافَوْا مِنَّهْ أَشَانْ كُلَّ النَّاسْ قَاعِدِينْ يَسْمَعَوْا كَلَامَهْ وَ تَعْلِيمَهْ عَجَبَاهُمْ مَرَّةْ وَاحِدْ. 19وَ فِي الْمَغْرِبْ عِيسَى وَ تَلَامِيذَهْ مَرَقَوْا مِنْ الْمَدِينَةْ.
شدرة التين يبْست
20وَ أَمْبَاكِرْ فَجُرْ، هُمَّنْ مَاشِينْ فِي الدَّرِبْ وَ شَافَوْا بَتَّانْ شَدَرَةْ تِينْ. وَ هِي مَيْتَةْ وَ يِبْسَتْ مَرَّةْ وَاحِدْ لَحَدِّي عُرُوقْهَا. 21وَ بُطْرُسْ فَكَّرْ فِي الْكَلَامْ الْعِيسَى قَالَهْ. وَ حَجَّى لَيَّهْ وَ قَالْ: «سَيِّدْنَا، شِيفْ. الشَّدَرَةْ الْإِنْتَ لَعَنْتَهَا يِبْسَتْ.»
22وَ عِيسَى رَدَّ لَيْهُمْ وَ قَالْ: «آمُنُوا بِاللّٰهْ إِيمَانْ قَوِي. 23نُقُولْ لَيْكُو الْحَقّ، أَيِّ نَادُمْ الْيَامُرْ الْجَبَلْ دَا وَ يُقُولْ لَيَّهْ: ‹أَمْرُقْ مِنْ هِنِي وَ أَقَعْ فِي الْبَحَرْ› دَا بَسْ يُكُونْ، كَنْ هُو مَا شَكَّكْ فِي قَلْبَهْ وَ صَدَّقْ بِنِيَّةْ وَاحِدَةْ كَدَرْ الشَّيّءْ الْهُو قَالَهْ دَا يُكُونْ. 24أَشَانْ دَا، نُقُولْ لَيْكُو كُلَّ شَيّءْ التَّسْأَلَوْه مِنْ اللّٰهْ، صَدُّقُوا كَدَرْ لِقِيتُوهْ خَلَاصْ وَ تَلْقَوْه. 25وَ أَيِّ وَكِتْ تِدَوْرُوا تِصَلُّوا، سَامُحُوا أَيِّ نَادُمْ الْخِطِي فَوْقكُو أَشَانْ أَبُوكُو اللّٰهْ يِسَامِحْ لَيْكُو خَطَايَاكُو. 26وَ كَنْ إِنْتُو مَا سَامَحْتُوا النَّاسْ الْخِطَوْا فَوْقكُو، أَبُوكُو اللّٰهْ مَا يِسَامِحْ لَيْكُو خَطَايَاكُو.»
المسيح سألوه ياتو الأنْطاه إذِن
27وَ عِيسَى وَ تَلَامِيذَهْ وَصَّلَوْا بَتَّانْ فِي مَدِينَةْ الْقُدُسْ. وَ وَكِتْ عِيسَى رَايِغْ فِي فَضَايَةْ بَيْت اللّٰهْ، كُبَارَاتْ رُجَالْ الدِّينْ وَ الْعُلَمَاءْ وَ الشُّيُوخْ جَوْا لَيَّهْ. 28وَ سَأَلَوْه وَ قَالَوْا: «طَرَدْت التُّجَّارْ بِإِذِنْ يَاتُو؟ وَ يَاتُو أَنْطَاكْ إِذِنْ؟» 29وَ عِيسَى رَدَّ لَيْهُمْ وَ قَالْ: «وَ أَنَا كُلَ عِنْدِي سُؤَالْ نَسْأَلْكُو. رُدُّوا لَيِّ وَ أَنَا كُلَ نِخَبِّرْكُو يَاتُو الْأَنْطَانِي إِذِنْ أَشَانْ نِسَوِّي الْخِدْمَةْ دِي. 30يَحْيَى غَطَّسْ النَّاسْ بِإِذِنْ اللّٰهْ وَلَّا بِإِذِنْ النَّاسْ؟ رُدُّوا لَيِّ!»
31وَ أَشَّاوَرَوْا أَمْبَيْنَاتْهُمْ وَ قَالَوْا: «كَنْ قُلْنَا يَحْيَى عِنْدَهْ إِذِنْ مِنْ اللّٰهْ، عِيسَى يُقُولْ لَيْنَا: ‹وَ مَالَا مَا آمَنْتُوا بَيَّهْ؟› 32لَاكِنْ مَا نَقْدَرَوْا نُقُولُوا عِنْدَهْ إِذِنْ مِنْ النَّاسْ.» وَ حَجَّوْا مِثِلْ دَا أَشَانْ هُمَّنْ خَافَوْا مِنْ الشَّعَبْ وَ مَا دَوَّرَوْا يِزَعُّلُوهُمْ. أَشَانْ فِي فِكِرْ كُلَّ الشَّعَبْ، أَكِيدْ يَحْيَى نَبِي. 33وَ هُمَّنْ رَدَّوْا لِعِيسَى وَ قَالَوْا: «دَا مَا نَعَرْفُوهْ.» وَ عِيسَى رَدَّ لَيْهُمْ وَ قَالْ: «خَلَاصْ، أَنَا كُلَ مَا نِأَوْرِيكُو يَاتُو الْأَنْطَانِي إِذِنْ أَشَانْ نِسَوِّي الْخِدْمَةْ دِي.»
Currently Selected:
مَرْخُوس 11: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
