مَرْخُوس 10

الزواج و الطلاق

1وَ عِيسَى قَمَّ مِنْ الْبَكَانْ دَا وَ مَشَى فِي دَارْ الْيَهُودِيَّةْ وَ قَطَعْ بَحَرْ الْأُرْدُنْ. وَ بَتَّانْ نَاسْ كَتِيرِينْ لَمَّوْا فَوْقَهْ وَ هُو عَلَّمَاهُمْ مِثِلْ فِي عَادْتَهْ. 2وَ نَاسْ وَاحِدِينْ مِنْ الْفَرِيزِيِّينْ مَشَوْا لَيَّهْ وَ دَوَّرَوْا يَكُرْبُوهْ فِي شَانْ كَلَامَهْ الْيُقُولَهْ. وَ أَشَانْ دَا، سَأَلَوْه وَ قَالَوْا: «كَنْ الرَّاجِلْ يِطَلِّقْ مَرْتَهْ، دَا حَلَالْ وَلَّا؟» 3وَ عِيسَى رَدَّ لَيْهُمْ وَ قَالْ: «وَ مُوسَى أَمَرَاكُو بِشُنُو؟» 4وَ قَالَوْا: «مُوسَى أَنْطَى إِذِنْ لِلرَّاجِلْ أَشَانْ يَكْتِبْ مَكْتُوبْ هَنَا طَلَاقْ وَ يِطَلِّقْ مَرْتَهْ.»

5وَ عِيسَى رَدَّ لَيْهُمْ وَ قَالْ: «مُوسَى كَتَبْ لَيْكُو الْوَصِيَّةْ دِي أَشَانْ رُوسَيْكُو قَوِيِّينْ. 6وَ لَاكِنْ فِي الْأَوَّلْ، وَكِتْ اللّٰهْ خَلَقْ الْأَرْض، هُو خَلَقَاهُمْ رَاجِلْ وَ مَرَةْ.#10‏:6 الكلام دا تلقوه في تكوين 1‏:27. 7وَ بِسَبَبْ دَا، أَيِّ رَاجِلْ يِخَلِّي أَمَّهْ وَ أَبُوهْ وَ يِلِمّ مَعَ مَرْتَهْ 8وَ النَّاسَيْن يَبْقَوْا جِسِمْ وَاحِدْ.#10‏:8 الكلام دا تلقوه في تكوين 2‏:24. وَ بِمِثِلْ دَا، هُمَّنْ مَا نَاسَيْن بَتَّانْ أَشَانْ بِقَوْا جِسِمْ وَاحِدْ. 9اللّٰهْ بَسْ رَبَطَاهُمْ وَ مَا وَاجِبْ الْإِنْسَانْ يِفَرِّقْهُمْ.»

10وَ بَعَدَيْن، عِيسَى قَاعِدْ فِي الْبَيْت وَ تَلَامِيذَهْ سَأَلَوْه فِي الْكَلَامْ دَا. 11وَ عِيسَى قَالْ: «أَيِّ نَادُمْ الْيِطَلِّقْ مَرْتَهْ وَ يَاخُدْ مَرَةْ آخَرَةْ يِسَوِّي لَيْهَا خَطَا وَ قَاعِدْ يَزْنَى. 12وَ بَتَّانْ أَيِّ مَرَةْ الطَّلَّقَتْ رَاجِلْهَا وَ أَخَدَتْ رَاجِلْ آخَرْ، هِي زَانِيَةْ.»

المسيح بارك العيال

13وَ النَّاسْ قَاعِدِينْ يِوَدُّوا عِيَالْهُمْ لِعِيسَى أَشَانْ هُو يَلْمَسْهُمْ لِيِبَارِكْهُمْ. وَ تَلَامِيذَهْ هَرَجَوْهُمْ. 14وَ عِيسَى سِمِعْ كَلَامْهُمْ وَ زِعِلْ. وَ حَجَّى لَيْهُمْ وَ قَالْ: «خَلُّوا الْعِيَالْ يَجُوا لَيِّ وَ مَا تَدْحَرَوْهُمْ أَشَانْ مَمْلَكَةْ اللّٰهْ هَنَا النَّاسْ الْمِثِلْهُمْ. 15وَ نُقُولْ لَيْكُو الْحَقّ، نَادُمْ أَبَداً مَا يَدْخُلْ فِي مَمْلَكَةْ اللّٰهْ كَنْ مَا يَقْبَلْهَا مِثِلْ وِلَيْد صَغَيَّرْ.» 16وَ هُو حَضَنَاهُمْ لِلْعِيَالْ وَ خَطَّ إِيدَيْنَهْ فَوْقهُمْ وَ بَارَكَاهُمْ.

النادم الغني

17وَكِتْ عِيسَى قَمَّ مَاشِي فِي دَرْبَهْ، نَادُمْ وَاحِدْ جَرَى لَيَّهْ وَ سَجَدْ قِدَّامَهْ وَ سَأَلَهْ وَ قَالْ: «يَا الْمُعَلِّمْ الْعَدِيلْ! وَاجِبْ نِسَوِّي شُنُو أَشَانْ نَلْقَى الْحَيَاةْ الْأَبَدِيَّةْ؟» 18وَ عِيسَى رَدَّ لَيَّهْ وَ قَالْ: «مَالَا تُقُولْ أَنَا عَدِيلْ؟ وَاحِدْ بَسْ عَدِيلْ وَ هُو اللّٰهْ. 19أَكِيدْ تَعَرِفْ الْوَصَايَا: <مَا تَكْتُلْ دِمَّةْ وَ مَا تَزْنَى وَ مَا تَسْرِقْ وَ مَا تَشْهَدْ بِكِدِبْ وَ مَا تُغُشّ النَّاسْ وَ كَرِّمْ أَمَّكْ وَ أَبُوكْ.>»#10‏:19 الكلام دا تلقوه في خُروج 20‏:12‏-16.

20وَ النَّادُمْ قَالْ: «يَا سَيِّدْنَا، مِنْ وَكِتْ أَنَا صَغَيَّرْ نِتَابِعْ كُلَّ الْوَصَايَا دَوْل.» 21وَ عِيسَى شَافَهْ عَدِيلْ بِمَحَبَّةْ وَ قَالْ: «شُغُلْ وَاحِدْ لِسَّاعْ قَصَّرْ لَيْك. بِيعْ كُلَّ شَيّءْ الْعِنْدَكْ وَ أَنْطِي تَمَنَهْ لِلْمَسَاكِينْ وَ مِثِلْ دَا، تَلْقَاهْ قِدَّامَكْ. وَ تَعَالْ تَابِعْنِي.»

22وَ وَكِتْ الْغَنِيْ سِمِعْ الْكَلَامْ دَا، هُو كَرَبْ وِجْهَهْ. وَ قَمَّ مِنْ هِنَاكْ وَ مَشَى حَزْنَانْ أَشَانْ هُو عِنْدَهْ مَالْ كَتِيرْ. 23وَ عِيسَى أَنْلَفَتْ وَ حَجَّى لِتَلَامِيذَهْ وَ قَالْ: «الدَّخُولْ فِي مَمْلَكَةْ اللّٰهْ يَبْقَى قَاسِي لِلنَّاسْ الْعِنْدُهُمْ مَالْ كَتِيرْ.»

24وَ تَلَامِيذَهْ عَجَّبَوْا بِلْحَيْن مِنْ كَلَامَهْ دَا. وَ عِيسَى حَجَّى لَيْهُمْ بَتَّانْ وَ قَالْ: «يَا عِيَالِي، أَكِيدْ الدَّخُولْ فِي مَمْلَكَةْ اللّٰهْ يَبْقَى قَاسِي. 25دَخُولْ الْجَمَلْ فِي قَدّ الْإِبْرَةْ هَيِّنْ مِنْ دَخُولْ سِيدْ الْمَالْ فِي مَمْلَكَةْ اللّٰهْ.»

26وَ أَلْعَجَّبَوْا مَرَّةْ وَاحِدْ مِنْ كَلَامَهْ. وَ أَسَّاءَلَوْا أَمْبَيْنَاتْهُمْ وَ قَالَوْا: «كَنْ مِثِلْ دَا، يَاتُو يَقْدَرْ يَنْجَى؟» 27وَ عِيسَى شَافَاهُمْ عَدِيلْ وَ قَالْ: «دَا قَاسِي مَرَّةْ وَاحِدْ لِلنَّاسْ لَاكِنْ مَا قَاسِي لِلّٰهْ أَشَانْ مَا فِي شَيّءْ قَاسِي لِلّٰهْ.»

28وَ بُطْرُسْ قَمَّ يِحَجِّي وَ قَالْ: «وَ أَنِحْنَ خَلَّيْنَا كُلَّ شَيّءْ الْعِنْدِنَا أَشَانْ نِتَابُعُوكْ.» 29وَ عِيسَى قَالْ: «نُقُولْ لَيْكُو الْحَقّ، أَيِّ نَادُمْ الْقَمَّ فِي شَانِي وَ فِي شَانْ الْبِشَارَةْ وَ خَلَّى بَيْتَهْ أَوْ أَخْوَانَهْ أَوْ أَخْوَاتَهْ أَوْ أَمَّهْ أَوْ أَبُوهْ أَوْ عِيَالَهْ أَوْ زِرَاعْتَهْ، 30هُو يَلْقَى فِي الْوَكِتْ الْحَالِي 100 مَرَّةْ بُيُوتْ وَ أَخْوَانْ وَ أَخْوَاتْ وَ أَمَّهَاتْ وَ عِيَالْ وَ زِرَاعَةْ وَ مَعَاهُمْ ضِيقَةْ شَدِيدَةْ. وَ فِي الْآخِرَةْ، يَلْقَى الْحَيَاةْ الْأَبَدِيَّةْ. 31وَ لَاكِنْ نَاسْ كَتِيرِينْ الْقَاعِدِينْ وَرَاءْ، يَبْقَوْا قِدَّامْ وَ نَاسْ كَتِيرِينْ الْقَاعِدِينْ قِدَّامْ كَمَانْ، يَبْقَوْا وَرَاءْ.»

تالِت مرّة المسيح حجّى بمَوْته

32وَ عِيسَى وَ تَلَامِيذَهْ مَاشِينْ فِي دَرِبْ هَنَا مَدِينَةْ الْقُدُسْ. وَ عِيسَى رَايِغْ قِدَّامْهُمْ وَ تَلَامِيذَهْ قَاعِدِينْ يِلْعَجَّبَوْا فَوْقَهْ. وَ النَّاسْ الْمَاشِينْ وَرَاهُمْ خَايْفِينْ. وَ عِيسَى طَرَّفْ التَّلَامِيذ الْأَتْنَا عَشَرْ وَ حَجَّى لَيْهُمْ وِحَيْدهُمْ. وَ بَدَا يِحَجِّي لَيْهُمْ بِالتَّعَبْ الْيَجِي فَوْقَهْ قَرِيبْ. 33وَ عِيسَى قَالْ: «أَسْمَعَوْا. أَنِحْنَ مَاشِينْ لِمَدِينَةْ الْقُدُسْ. وَ هِنَاكْ يِسَلُّمُوا إِبْن الْإِنْسَانْ لِكُبَارَاتْ رُجَالْ الدِّينْ وَ لِلْعُلَمَاءْ. وَ هُمَّنْ يَحْكُمُوا لَيَّهْ بِالْمَوْت وَ يِسَلُّمُوهْ لِلْمَا مُؤمِنِينْ. 34وَ يِشَّمَّتَوْا لَيَّهْ وَ يِبَزُّقُوا فَوْقَهْ وَ يَجْلُدُوهْ وَ يَكْتُلُوهْ. وَ لَاكِنْ فِي تَلَاتَةْ يَوْم هُو يَبْعَثْ.»

طلب يَعْقُوب و يُوحَنَّا

35وَ يَعْقُوبْ وَ يُوحَنَّا أَوْلَادْ زَبَدِي مَشَوْا لِعِيسَى وَ قَالَوْا: «سَيِّدْنَا، نِدَوْرُوا إِنْتَ تِسَوِّي لَيْنَا الشَّيّءْ النَّطُلْبُوهْ مِنَّكْ.» 36وَ عِيسَى قَالْ لَيْهُمْ: «تِدَوْرُوا نِسَوِّي لَيْكُو شُنُو؟» 37وَ رَدَّوْا لَيَّهْ وَ قَالَوْا: «أَنْطِينَا إِذِنْ أَشَانْ نَحْكُمُوا مَعَاكْ فِي مَمْلَكَتَكْ الْمَجِيدَةْ، وَاحِدْ مِنِّنَا بِإِيدَكْ الزَّيْنَةْ وَ وَاحِدْ مِنِّنَا بِإِيدَكْ الْإِسْرَةْ.»

38وَ عِيسَى رَدَّ لَيْهُمْ وَ قَالْ: «إِنْتُو مَا فِهِمْتُوا الشَّيّءْ التِّدَوْرُوهْ. تَقْدَرَوْا تَشَرْبَوْا مِنْ كَاسْ التَّعَبْ الْأَنَا نَشْرَبْ مِنَّهْ وَلَّا؟ تَحْمَلَوْا الْغَطِّسِينْ الْيِغَطُّسُونِي بَيَّهْ وَلَّا؟» 39وَ رَدَّوْا لَيَّهْ وَ قَالَوْا: «أَيْوَى، نَقْدَرَوْا.» وَ عِيسَى قَالْ لَيْهُمْ: «خَلَاصْ، إِنْتُو تَشَرْبَوْا مِنْ الْكَاسْ الْأَنَا أَكِّدْ نَشْرَبْ مِنَّهْ. وَ يِغَطُّسُوكُو بِالْغَطِّسِينْ الْيِغَطُّسُونِي بَيَّهْ. 40لَاكِنْ أَنَا مَا نَقْدَرْ نَعَزِلْ النَّاسْ الْيَقْعُدُوا فِي إِيدِي الزَّيْنَةْ وَ فِي إِيدِي الْإِسْرَةْ. اللّٰهْ جَهَّزْ الْبَكَانَاتْ دَوْل لِلنَّاسْ الْهُو بَسْ عَزَلَاهُمْ.»

41وَ التَّلَامِيذ الْعَشَرَةْ سِمْعَوْا الْكَلَامْ دَا وَ زِعِلَوْا مِنْ يَعْقُوبْ وَ يُوحَنَّا. 42وَ عِيسَى نَادَى كُلَّ تَلَامِيذَهْ وَ قَالْ لَيْهُمْ: «تَعَرْفُوا كَدَرْ أَمْبَيْن النَّاسْ الْمَا مُؤمِنِينْ، أَيِّ نَادُمْ الْجَعَلَوْه حَاكِمْهُمْ يَمْلُكْ بِشِدَّةْ فِي شَعَبَهْ. وَ كُبَارَاتْهُمْ كُلَ يِتْمَلَّكَوْا فِي النَّاسْ. 43وَ لَاكِنْ إِنْتُو مَا وَاجِبْ تَبْقَوْا مِثِلْهُمْ. أَيِّ نَادُمْ مِنْكُو الْيِدَوْر يَبْقَى كَبِيرْ خَلِّي يَبْقَى خَدَّامْكُو. 44وَ أَيِّ نَادُمْ الْيِدَوْر يَبْقَى كَبِيرْكُو خَلِّي يَبْقَى عَبِدْكُو. 45أَشَانْ أَنَا إِبْن الْإِنْسَانْ، أَنَا ذَاتِي مَا جِيتْ أَشَانْ النَّاسْ يَخْدُمُوا لَيِّ لَاكِنْ أَشَانْ أَنَا نَخْدِمْ لِلنَّاسْ. وَ جِيتْ أَشَانْ نَفْدَى نَاسْ كَتِيرِينْ بِرُوحِي.»

المسيح داوى نادم عمْيان

46وَ عِيسَى وَ تَلَامِيذَهْ وِصْلَوْا فِي حِلَّةْ أَرِيحَا. وَكِتْ عِيسَى وَ تَلَامِيذَهْ مَارْقِينْ مِنْ أَرِيحَا، نَاسْ كَتِيرِينْ مَرَّةْ وَاحِدْ جَايِينْ وَرَايَهْ. وَ عَمْيَانْ وَاحِدْ قَاعِدْ تِحِتْ جَنْب الشَّارِعْ أَشَانْ يَسْأَلْ صَدَقَةْ مِنْ النَّاسْ. وَ أُسْمَهْ بَارْتِمَاوِي وِلَيْد تِمَاوِي. 47وَ هُو سِمِعْ كَدَرْ عِيسَى مِنْ النَّاصِرَةْ مَاشِي بِالشَّارِعْ دَا. وَ هُو عَاطْ وَ قَالْ: «يَا عِيسَى! يَا إِبْن دَاوُدْ! أَرْحَمْنِي!» 48وَ نَاسْ كَتِيرِينْ هَرَجَوْه وَ قَالَوْا لَيَّهْ «أَسْكُتْ!» لَاكِنْ الْعَمْيَانْ قَمَّ يِعِيطْ بِزِيَادَةْ وَ يُقُولْ: «يَا إِبْن دَاوُدْ، أَرْحَمْنِي!»

49وَ عِيسَى وَقَفْ وَ قَالْ: «نَادُوهْ. خَلِّي يَجِي لَيِّ.» وَ نَادَوْا الْعَمْيَانْ وَ قَالَوْا لَيَّهْ: «شِدّ حَيْلَكْ وَ قُمّ فَوْق. هُو قَاعِدْ يِنَادِيكْ.» 50وَ الْعَمْيَانْ رَمَى غِطَايَهْ وَ نَطَّ فَوْق وَ مَشَى لِعِيسَى. 51وَ عِيسَى سَأَلَهْ وَ قَالْ: «تِدَوْر نِسَوِّي لَيْك شُنُو؟» وَ الْعَمْيَانْ قَالْ: «سَيِّدْنَا، نِدَوْر نِشِيفْ.» 52وَ عِيسَى قَالْ: «خَلَاصْ، شِيفْ! إِنْتَ لِقِيتْ الْعَافَيْ بِسَبَبْ إِيمَانَكْ.» وَ طَوَّالِي عُيُونَهْ أَنْفَتَحَوْا وَ قَمَّ يِتَابِعْ عِيسَى.

Currently Selected:

مَرْخُوس 10: ع.د.ت19

Highlight

Copy