مَرْخُوس 13

بيت اللّه يخرُّبوه

1وَ وَكِتْ عِيسَى مَارِقْ مِنْ بَيْت اللّٰهْ، نَادُمْ وَاحِدْ مِنْ تَلَامِيذَهْ حَجَّى لَيَّهْ وَ قَالْ: «سَيِّدْنَا، بَيْت اللّٰهْ عَجِيبْ! شِيفْ الْحُجَارْ دَوْل! شِيفْ بُيُوتَهْ دَوْل!» 2وَ عِيسَى قَالْ: «إِنْتَ شِفْت كُلَّ الْبُيُوتْ الْكُبَارْ دَوْل وَلَّا؟ مَا يِخَلُّوا حَجَرْ يَقْعُدْ فَوْق حَجَرْ. يَرْمُوهُمْ كُلُّهُمْ.»

3وَكِتْ عِيسَى قَاعِدْ وِحَيْدَهْ فِي جَبَلْ الزَّيْتُونْ مُقَابِلْ بَيْت اللّٰهْ، بُطْرُسْ وَ يَعْقُوبْ وَ يُوحَنَّا وَ أَنْدَرَيَّسْ مَشَوْا لَيَّهْ. وَ سَأَلَوْه 4وَ قَالَوْا: «أَوْرِينَا دَا يَبْقَى مَتَى؟ وَ شُنُو الْعَلَامَةْ التِّوَصِّفْ كَدَرْ كُلَّ الْكَلَامْ دَا يِتِمّ؟» 5وَ عِيسَى قَمَّ يِحَجِّي لَيْهُمْ وَ قَالْ: «أَوْعُوا بَالْكُو. مَا تِخَلُّوا نَادُمْ يُغُشُّكُو. 6نَاسْ كَتِيرِينْ يَجُوا بِأُسْمِي وَ يُقُولُوا: ‹أَنَا بَسْ الْمَسِيحْ.› وَ يُغُشُّوا نَاسْ كَتِيرِينْ.

7«وَ وَكِتْ إِنْتُو تَسْمَعَوْا خَبَرْ هَنَا حُرُوبْ قَرِيبْ وَ حُرُوبْ بَعِيدْ، مَا تِبَرْجُلُوا. أَشَانْ دَا وَاجِبْ يُكُونْ. وَ لَاكِنْ دَا لِسَّاعْ مَا كُمَالَةْ الدُّنْيَا. 8نَاسْ هَنَا بَلَدْ وَاحِدَةْ يَهْجُمُوا نَاسْ هَنَا بَلَدْ آخَرَةْ وَ مَمْلَكَةْ تَهْجِمْ مَمْلَكَةْ. وَ فِي دِيَارْ كَتِيرِينْ يُكُونْ زِلْزَالْ. جُوعْ كَتِيرْ يَنْزِلْ فِي الْأَرْض. وَ لَاكِنْ التَّعَبْ دَا، دِي الْبِدَايَةْ بَسْ. هُو مِثِلْ الطَّلَقَةْ الْأَوَّلَانِيَّةْ هَنَا الْمَرَةْ التِّدَوْر تَلْدَ.

9«وَ إِنْتُو، أَوْعُوا بَالْكُو. أَكِيدْ يَكُرْبُوكُو وَ يِوَدُّوكُو لِلشَّرِيعَةْ وَ يَفُرْشُوكُو فِي بُيُوتْ الصَّلَاةْ. وَ فِي شَانِي أَنَا، تَحْضَرَوْا قِدَّامْ الْحُكَّامْ وَ الْمُلُوكْ. وَ فِي الْبَكَانْ دَا، تَشْهَدَوْا لَيِّ. 10وَ أَوَّلْ شَيّءْ، لَابُدَّ الْبِشَارَةْ يِبَلُّغُوهَا لِكُلَّ الْأُمَمْ. 11وَ وَكِتْ يَكُرْبُوكُو وَ يِوَدُّوكُو لِلشَّرِيعَةْ، مَا تِهِمُّوا لِلْكَلَامْ التُّقُولُوهْ. فِي الْبَكَانْ دَا، قُولُوا الْكَلَامْ الْيَجِي لَيْكُو أَشَانْ الْكَلَامْ التُّقُولُوهْ يَجِي مِنْ الرُّوحْ الْقُدُّوسْ وَ مَا مِنْ نُفُوسْكُو. 12وَ فِي الْوَكِتْ الْجَايِ دَا، نَادُمْ يِسَلِّمْ أَخُوهْ لِلْمَوْت وَ أَبُو عِيَالْ يِسَلِّمْ وِلَيْدَهْ لِلْمَوْت وَ الْعِيَالْ يَبْقَوْا عَاصِيِينْ لِوَالْدَيْنهُمْ وَ يِسَبُّبُوا لَيْهُمْ الْمَوْت. 13وَ فِي شَانْ أُسْمِي، كُلَّ النَّاسْ يَكْرَهَوْكُو. وَ لَاكِنْ النَّادُمْ الْقَاعِدْ ثَابِتْ لَحَدِّي الْكُمَالَةْ، يَنْجَى.

14«وَ وَكِتْ تِشِيفُوا الْحَرَامْ الْيِجِيبْ الْخَرَابْ وَاقِفْ فِي الْبَكَانْ الْأَبَداً مَا وَاجِبْ لَيَّهْ#13‏:14 الْحَرَامْ الْيِجِيبْ الْخَرَابْ: الكلام دا تلقوه في دَنْيال 9‏:27. (خَلِّي النَّادُمْ الْيَقْرِي الْكَلَامْ دَا يَفْهَمَهْ)، فِي الْوَكِتْ دَاكْ، خَلِّي النَّاسْ الْقَاعِدِينْ فِي دَارْ الْيَهُودِيَّةْ يِعَرُّدُوا فِي الْحُجَارْ. 15وَ أَيِّ نَادُمْ الْقَاعِدْ يِنْجَمَّ فِي رَاسْ بَيْتَهْ، خَلِّي مَا يِدَلِّي لِيَدْخُلْ فِي بَيْتَهْ يِشِيلْ خُمَامَهْ. 16وَ أَيِّ نَادُمْ الْقَاعِدْ فِي الزَّرَعْ، خَلِّي يَجْرِي وَ مَا يِقَبِّلْ يِشِيلْ خَلَقَهْ. 17وَ فِي الْوَكِتْ دَا، يَبْقَى قَاسِي مَرَّةْ وَاحِدْ لِلْعَوِينْ الْغَلْبَانَاتْ وَ الْيِرَضِّعَنْ. 18أَسْأَلَوْا اللّٰهْ أَشَانْ دَا مَا يَبْقَى فِي الشِّتَاءْ. 19أَشَانْ فِي الْوَكِتْ دَاكْ، التَّعَبْ يَبْقَى شَدِيدْ بِلْحَيْن. وَ مَا فِي تَعَبْ مِثْلَهْ مِنْ اللّٰهْ خَلَقْ الدُّنْيَا لَحَدِّي الْيَوْم. وَ تَعَبْ شَدِيدْ مِثِلْ دَا أَبَداً مَا يُكُونْ بَتَّانْ. 20وَ كَنْ اللّٰهْ مَا نَقَصْ عَدَدْ أَيَّامْ التَّعَبْ دَا، نَادُمْ وَاحِدْ مَا يَنْجَى. وَ لَاكِنْ اللّٰهْ فَكَّرْ فِي نَاسَهْ الْعَزَلَاهُمْ وَ فِي شَانْهُمْ هُو نَقَصْ عَدَدْ أَيَّامْ التَّعَبْ دَا.

جيّة المسيح التانية

21«وَ فِي الْوَكِتْ دَاكْ، أَكُونْ نَادُمْ يُقُولْ لَيْكُو: ‹دَاهُو! الْمَسِيحْ هِنِي!› أَوْ يُقُولْ: ‹شِيفُوا! الْمَسِيحْ هِنَاكْ!› مَا تِصَدُّقُوا كَلَامَهْ. 22أَشَانْ نَاسْ كَتِيرِينْ يَجُوا وَ يُقُولُوا هُمَّنْ الْمَسِيحْ وَلَّا يُقُولُوا بِكِدِبْ هُمَّنْ أَنْبِيَاء. وَ يِسَوُّوا عَلَامَاتْ وَ عَجَايِبْ لِيُغُشُّوا، كَنْ مُمْكِنْ، حَتَّى النَّاسْ الْاللّٰهْ عَزَلَاهُمْ. 23أَيْوَى، أَوْعُوا بَالْكُو. أَنَا أَوْرَيْتكُو بِكُلَّ الْكَلَامْ دَا قُبَّالْ مَا يُكُونْ. 24وَ فِي الْوَكِتْ الْيَجِي بَعَدْ التَّعَبْ الشَّدِيدْ دَا، الْحَرَّايْ تَبْقَى ضَلْمَةْ وَ الْقَمَرْ مَا يِضَوِّي 25وَ النُّجُومْ يَقَعَوْا مِنْ السَّمَاءْ وَ قُوَّاتْ السَّمَاوَاتْ يِنْهَزَّوْا. 26وَ فِي الْوَكِتْ دَا، يِشِيفُوا إِبْن الْإِنْسَانْ جَايِ فِي سَحَابْ السَّمَاءْ#13‏:26 إِبْن الْإِنْسَانْ جَايِ فِي سَحَابْ السَّمَاءْ: الكلام دا تلقوه في دَنْيال 7‏:13‏-14. بِقُدْرَةْ عَظِيمَةْ وَ مَجِيدَةْ. 27وَ يِرَسِّلْ مَلَائِكَتَهْ فِي أَيِّ جِيهَةْ أَشَانْ يِلِمُّوا النَّاسْ الْعَزَلَاهُمْ مِنْ أَيِّ بَكَانْ فِي الْأَرْض.

علامة شدرة التين

28«وَ فَكُّرُوا فِي مَثَلْ شَدَرَةْ التِّينْ. كَنْ فُرُوعْهَا يِدَوْرُوا يِخَضُّرُوا وَ وَرْشَالْهَا الْأَوَّلْ يَمْرُقْ، بَيْدَا تَعَرْفُوا الْوَكِتْ الْهِي تَلْدَ فَوْقَهْ قَرَّبْ. 29وَ سَوَا سَوَا مِثِلْ دَا، وَكِتْ تِشِيفُوا كُلَّ شَيّءْ الْأَوْرَيْتكُو بَيَّهْ قَاعِدْ يَبْقَى، خَلَاصْ تَعَرْفُوا جَيَّةْ الْمَسِيحْ قَرِيبْ. هُو قَرَّبْ لِبِيبَانْكُو. 30وَ نُقُولْ لَيْكُو الْحَقّ، نَاسْ هَنَا الْوَكِتْ دَا مَا يِكَمُّلُوا قُبَّالْ كُلَّ الْكَلَامْ دَا مَا يِتِمّ. 31السَّمَاءْ وَ الْأَرْض يَبْقَوْا مَا فِيهُمْ وَ لَاكِنْ كَلَامِي يَقْعُدْ دَايْماً.

اليوم الما معْروف

32«وَ الشَّيّءْ الْيَبْقَى بَعَدَيْن دَا، نَادُمْ وَاحِدْ مَا يَعَرِفْ يَوْمَهْ وَ لَا سَاعْتَهْ. الْمَلَائِكَةْ فِي السَّمَاوَاتْ كُلَ مَا يَعَرْفُوهْ وَ إِبْن اللّٰهْ مَا يَعَرْفَهْ، إِلَّا أَبُوهْ وِحَيْدَهْ بَسْ يَعَرْفَهْ.

33«أَوْعُوا بَالْكُو. أَقْعُدُوا وَاعِيِّينْ أَشَانْ إِنْتُو مَا تَعَرْفُوا مَتَى وَكْتَهْ يِتِمّ. 34أَيْوَى، دَا يَبْقَى مِثِلْ نَادُمْ وَاحِدْ الْيِدَوْر يِسَافِرْ. وَ قُبَّالْ مَا يُقُمّ مِنْ بَيْتَهْ هُو يِكَلِّفْ عَبِيدَهْ بِمَالَهْ وَ أَيِّ وَاحِدْ مِنْهُمْ عِنْدَهْ مَسْؤُولِيَّةْ. وَ سِيدْ الْبَيْت يَامُرَهْ لِحَارِسْ الْبَابْ أَشَانْ يَقْعُدْ وَاعِي فِي الْبَابْ. 35وَ أَشَانْ دَا، إِنْتُو كُلَ، أَقْعُدُوا وَاعِيِّينْ أَشَانْ مَا تَعَرْفُوا الْوَكِتْ السِّيدْ الْبَيْت يَجِي فَوْقَهْ. أَكُونْ يَجِي مَغْرِبْ وَلَّا فِي أُسْط اللَّيْل وَلَّا وَرَدَّيْ وَلَّا فَجُرْ. 36أَكُونْ يَجِي فَجْأَةً وَ يَلْقَاكُو نَايْمِينْ. 37وَ الْكَلَامْ النُّقُولَهْ لَيْكُو دَا، نُقُولَهْ لِكُلَّ النَّاسْ. نُقُولْ أَقْعُدُوا وَاعِيِّينْ.»

Currently Selected:

مَرْخُوس 13: ع.د.ت19

Highlight

Copy