ዬሱሲ ኪቴዳዋንቱ ኦሱዋ 2

ዬሱሳ ካሊያዋንቱ ቦላ ጌሻ ኣያና ዎ

1ጴንፄቆስቴ #2፡1 ጴንፄቆስቴ፡ ኣዪሁዲያ ኣሳይ ፓሲጋ ባላ ቦንቾዴፔ ኢሻታሙ ጋላሳይ ኣ ሲሚና ቦንቼቲያ ዛርጋ ቆይቻ ባላ ጌቴቲያዋ። ጊያ ጋላሳይ ጋኬዳ ዎዴ፥ ኣማኒያዋንቱ ኡባቱ ኢቲፔ ጊዲዴ፥ ኢቲሳ ሺቂ ዴዒሺን፥ #ዎግ 23፡15-21፤ ዛር 16፡9-11 2ዎልቃማ ጎቱዋዳን ጉሚያ ጉንይ ዎዛና ኣናን ሳሉዋፔ ዪዴ፥ ኡንቱንቱ ኡቴዳ ጎሊያ ኡባ ኩሜዳ። 3ቃሲ ታማ ላጩዋዳን ፖዱጊያዌ ኡንቱንቶ ቤቲዴ፥ ሻኬቲ ሻኬቲ፥ ኡንቱንቱ ኡባ ቦላ ዎዳ። 4ኡንቱንቱ ኡባን ጌሻ ኣያናይ ኩሚዴ፥ ዱማ ዱማ ቃላን ሃሳያና ማላ፥ ኡንቱንታ ዳንዳዪሲና፥ ሃሳያ ዶሜዲኖ።

5ሳዓን ዴዒያ ኣሳ ዜሬ ኡባፔ ዪዴ፥ ፆሳው ያዪያ ኢቲፔ ዴዒያ ኣዪሁዳቱ ዬሩሳላሜን ዴዒኖ። 6ሃ ጉን ሲሴዳ ዎዴ፥ ኣሳይ ኡባይ ሺቄዳ፤ ኡንቱንቱ ባሬንቱ ቃላን ቃላን ሃሳዪሺን ሲሴዳ ዲራው፥ ጊያዋ ዬዲኖ።

7ኣሳይ ኡባይ ማላሌቲዴኔ ሃዌ ኦራባ ጊዴ፥ «ቤዒቴ፤ ሃ ሃሳዪያዋንቱ ኡባቱ ጋሊላ ኣሳቱዋ ጊዲኪኖ? 8ያቲና፥ ኑኒ ኑ ዬሌቴዳ ጋዴ ቃላን ኡንቱንቱ ሃሳዪሺን ዋኒዴ ሲሴቶ? 9ኑኒ ጳርቴ ኣሳቱ፥ ሜዶኔ ኣሳቱ፥ ኤላሜፄ ኣሳቱ፥ ላዑ ሻፋቱዋፔ ጊዱዋን ዴዒያዋንቱ፥ ዪሁዳን፥ ቃጳዶቂያን፥ ጳንፆሳን፥ ኢሲያን፥ 10-11ፒርጊያን፥ ጲኒፊሊያን፥ ጊብፄን፥ ቄሬና ባጋን ዴዒያ ሊቢያ ዎራዳቱዋን ዴዒያዋንቱ፥ ሮሜፔ ዬዳ ኢማቱ፥ ኣዪሁዳቱ፥ ኣዪሁዳቴው ላሜቴዳ ኑፔ ኣማሬዳዋንቱ፥ ቃሪፄሴ ኣሳቱኔ፥ ኣራቢያ ኣሳቱ፥ ፆሳይ ኦዳ ዎልቃማ ኦሱዋ ኑ ቃላን ኡንቱንቱ ሃሳዪሺን ሲሴዶ» ያጌዲኖ። 12ኡባይካ ማላሌቲዴ፥ ዬዉ ባሬንቶ ጌሌናን ኢፂና ባሬንቱ ጊዶን፥ «ላ ሃዌ ዋጊያዌ?» ያጌዲኖ። 13ሺን ሃራ ኣሳቱ ኣማኒያዋንቱ ቦላን ቂሊጪዴ፥ «ሃዋንቱ ኡሺዴ ማቴዲኖ» ያጌዲኖ።

ጴፂሮሳ ሃሳያ

14ሺን ጴፂሮሲ፥ ዬሱሲ ኪቴዳ ሃራ ታማኔ ኢቲ ኪቴቶዋንቱና ዴንዲ ኤቂዴ፥ ባሬ ኮሻ ቁ ኦዴ፥ ኡንቱንቶ ሃዋዳን ያጊ ኦዴዳ፤ «ኣዪሁዳቶ፥ ቃሲ ዬሩሳላሜን ዴዒያ ኡባቶ፥ ታኒ ኦዲያዋ ሲሲቴ። ሃዌ ሂንቴንቶ ኤሬቶ፤ ሂንቴንቱ ቆፒያዋዳን፥ ሃዋንቱ ማቲቤይኪኖ። 15ኣዪሲ ጎፔ፥ ዎንታፔ ቢሮ ሄዙ ሳቴ ጊዴ። 16ሺን ሃዌ ናቢያ ኢዩዔል ሃሳዬዳዋ።

17«ኢ ሃሳዪዴ፥ ‹ፆሳይ ሃዋዳን ያጌዳ፤

ዎዲያ ዉርሴን ሃዋዳን ሃናናዋ።

ታኒ ኣሳ ኡባ ቦላን ታ ኣያና ጉሳና።

ሂንቴንቱ ኣቱማ ናናይኔ ሂንቴንቱ ማጫ ናናይ

ቲምቢቲያ ኦዳናዋንታ።

ሂንቴንቱ ዎዳላ ናናይካ ሳፃ ቤዓናዋንታ፤

ሂንቴንቱ ጪማቱካ ኣኩሙዋ ኣኩሜታናዋንታ። #ኢዩ 2፡28-32

18ሄ ጋላሳቱን ታ ኣቱማ ቆማቱዋ ቦላኒኔ

ታ ማጫ ኣሺካራቱዋ ቦላን

ታኒ ታ ኣያና ጉሳና።

ሄዋፔ ጉዬ ኡንቱንቱ ቲምቢቲያ ኦዳናዋንታ።

19ቃሲ ታኒ ቦላ ሳሉዋን ኦራባ፥

ጋርሳ ሳዓንካ ማላታ ቤሳና።

ሱይ፥ ታማይኔ ሻሪያዳን

ካሜዳ ጩዋይ ዴዓና።

20ዎልቃማኔ ቦንቾ ጊዴዳ ጎዳ ጋላሳይ

ጋካናፔ ካሴ ኣዋይ ማና፤

ኣጌናይካ ሱ ማላታና።

21ሄ ዎዴ ሃዋዳን ሃናናዋ፤

ጎዳ ሱን ፄሲያ ኦኒኔ ኣታና›

ያጌዳ።

22«ኢስራዔሊያ ኣሳቶ፥ ሃ ቃላ ሲሲቴ፤ ናዚሬቲያ ዬሱሲ ሂንቴንቱ ጊዶን ፆሳይ ባሬናን ኦዳ ዎልቃማ ኦሱዋን፥ ኦራባኒኔ ማላታን ሂንቴንቶ ሺሴዳ ኣሳ፤ ሄዋ ሂንቴንቱካ ኤሪታ። 23ዬሱሲ ሂንቴንቶ ኢሜታና ማላ፥ ፆሳይ ካሴ ባሬ ሼኒያኒኔ ባሬ ኤራን ባሬ ቆፋ ቃቺ ዎዳ፤ ያቲና፥ ኣ ሂንቴንቱ ናጋራንቻቱዋ ኩሺያን ማስቃሊያ ቦላ ሚሲማሪያን ሺሲዴ፥ ካቂሲ ዎሴዲታ። 24ሺን ሃይቁ ዬሱሳ ኦይቃናው ዳንዳዪቤና ዲራው፥ ፆሳይ ሃይቁዋ ሴላ ኣፔ ዪሲዴ፥ ኣ ዴንዳ። 25ኣዪሲ ጎፔ፥ ዳዊቴ ዬሱሳባ ሃዋዳን ያጌዳ፤

‹ታኒ ሜቶቴናዳን፥

ጎዳይ ታ ኡሼቻን ዴዒያ ዲራው፥

ታኒ ኡባ ዎዴ ጎዳ ታ ማታን ቤዓይ። #ማዝ 16፡8-11

26ሄዋ ዲራው፥ ታ ዎዛናይ ናሼቴዳ፤

ታ ኢንፃርሳንካ ናሼቻይ ኩሜዳ።

ቃሲ ታ ቦላይካ ሎዖ ዴዓና ጊዴ፥

ናሼቻን ናጌ።

27ኣዪሲ ጎፔ፥ ታ ሼምፑዋ

ሲዖሊያን ኣጋካ።

ቃሲ ኔ ጌሻ ናዓ ኣኃካ ዎቄካ።

28ኔኒ ታና ዴዑዋ ኦጊያ ኤርሳዳ።

ኔኒ ታናና ዴዒያዋን

ታኒ ዳሪ ናሼታይ›

ያጌዳ።

29«ኢሻቶ፥ ኑ ኣዋቱዋ ካፑዋ ዳዊቴባ ታኒ ሂንቴንቶ ጌሻዴ ኦዳናው ቤሴ፤ ዳዊቴ ሃይቂዴ ሞጌቴዳ፤ ኣ ዱፉ ሃቼ ጋካናዉካ ኑ ማታን ዴዔ። 30ዳዊቴ ናቢያ ጊዴዳ ዲራዉኔ ፆሳይ ኣ ናና ዜሬፔ ኢቱዋ ኣ ካዉቴ ኦይዲያን ኡቲሳናው ኣው ጫቄዳዋ ኤሬዳ ዲራው፥ #ማዝ 132፡11፤ 2ሳም 7፡12-13 31ኪሪስቶሳ ዴንዱዋ ሲንው ፄሊዴ፥ ‹ኣ ሼምፑ ሲዖሊያን ኣቲቤና፤ ኣ ቦላይካ ዎቂቤና› ጊዴ ኦዴዳ።

32«ፆሳይ ዬሱሳ ሃይቁዋፔ ዴንዳዋሲ ኑኒ ኡባይ ማርካ። 33ሄዋ ዲራው፥ ፆሳይ ባሬፔ ኡሼቻ ባጋን #2፡33 ኡሼቻ ባጋ፡ ጉሳይ ቦንቹዋኔ ዎልቃ ቤሲያ ሳዓ። ኣ ቁ ቁ ኡዲዴ፥ ኣው ጌሻ ኣያና ኢማና ጌዳዋዳን፥ ጌሻ ኣያና ኣኪዴ፥ ሃዋ ሂንቴንቱ ሃዒ ቤዒያዋኔ ሲሲያዋ ኑ ቦላ ጉሴዳ። 34-35ኣዪሲ ጎፔ፥ ዳዊቴ ባሬ ሁጴው ሳሉዋ ኬሲቤና፤ ሺን ያጌዳ፤

‹ጎዳይ ታ ጎዳ፤ «ታኒ ኔ ሞርኬቱዋ

ኔኒ ጌዲያን ዬ ኤቂያዋ ኦና ጋካናው

ሃዋን ታፔ ኡሼቻ ባጋና ኡታ» ጌዳ›

ያጌዳ። #ማዝ 110፡1

36«ሄዋ ዲራው፥ ፆሳይ ማስቃሊያ ቦላ ሚሲማሪያን ሃ ሂንቴንቱ ሺዴ ካቄዳ ዬሱሳ ጎዳኔ ኪሪስቶሳ ኦዳዋ ኢስራዔሊያ ኣሳ ዜሬይ ኡባይ ቱሙፔ ኤሮ» ያጌዳ።

37ኣሳይ ጴፂሮሲ ጌዳዋ ሲሴዳ ዎዴ፥ ኣሳው ዎዛናይ ዳሮፔ ቦሼቲና፥ ጴፂሮሳኔ ዬሱሲ ኪቴዳ ሃራቱዋ፥ «ኑ ኢሻቶ፥ ያቲና ኑኒ ኣያ ኡዳኔ?» ያጌዲኖ።

38ጴፂሮሲ ኡንቱንታ፥ «ሂንቴንቱ ናጋራይ ኣቶ ጌቴታና ማላ፥ ናጋራፔ ሲሚዴ፥ ሂንቴንቱ ሁጲያን ሁጲያን ዬሱሲ ኪሪስቶሳ ሱንን ፃማቄቲቴ። ፆሳይ ኢሚያ ጌሻ ኣያና ሂንቴንቱ ኣካና። 39ኣዪሲ ጎፔ፥ ፆሳይ ኢማና ጌዳ ቃላይ ሂንቴንቱሳ፥ ሂንቴንቱ ናናቱዋሳኔ ጎዳይ ኑ ፆሳይ ባሬኮ ፄሲያ ሃኩዋን ዴዒያዋንቱ ኡባሳ» ያጌዳ።

40ጴፂሮሲ ኡንቱንቶ ቃላ ሃራካ ጉጂ ማርካቲዴ፥ «ሃ ዎዲያ ጌላ ኣሳፔ ሂንቴንቱ ሁጲያ ኣሺቴ» ያጊዴ ዞሬዳ። 41ጴፂሮሲ ኦዴዳዋ ኣኬዳዋንቱ ፃማቄቴዲኖ፤ ሄ ጋላሲ ሄዙ ሻዓ ጊዲያ ኣሳይ ኣማኔዲኖ። 42ኡንቱንቱ ዬሱሲ ኪቴዳዋንቱ ቲሚርቲያን፥ ኢቲፔቴን ኡኪ ሜን ሚያዋኒኔ ፆሳ ዎሳን ጌንጪኖ።

ኣማኒያ ኣሳይ ኢሻቴኒኔ ኢቲፔቴን ዴዒያ ዴዑዋ

43ዬሱሲ ኪቴዳዋንቱ ኩሺያን ዳሮ ኦራባይኔ ማላታቱ ኦሴቲና፥ ኣሳ ኡባ ያሻይ ኦይቄዳ። 44ኣማኔዳ ኡባቱ ኢቲፔ ዴዒኖ፤ ቃሲ ባሬንቶ ዴዒያባ ኡባካ ኢቲፔ ሻኪ ኣኬዲኖ። 45ኡንቱንቱ ባሬንቱ ጋዲያኔ ባሬንቶ ዴዒያባ ዛሊዒ ዛሊዒዴ፥ ኦናኔ ኮሼዳ ኬና ሚሻ ኡባው ሻኬዲኖ። 46ቃሲ ኡባ ጋላሲ፥ ኢቲ ዎዛና ጊዲዴ፥ ጌሻ ጎሊያን ፓጬናን ጋኬቲዴ፥ ባሬንቱ ጎሌ ጎሌ ፄሴቲዴ ናሼቻኒኔ ፓሺካ ዎዛናን ቁማ ሚኖ። 47ፆሳ ጋላቲዴ፥ ኣሳ ኡባን ሳቤቴዲኖ። ቃሲ ጎዳይ ኣማኒ ኣቲያዋንታ ጋላሲ ጋላሲካ ኡንቱንቱ ቦላ ጉጄ።

Currently Selected:

ዬሱሲ ኪቴዳዋንቱ ኦሱዋ 2: dwrENT

Highlight

Copy