ዬሱሲ ኪቴዳዋንቱ ኦሱዋ 3

ኢቲ ዎባ ቢታኒ ፓፄዳ

1ኢቲ ጋላሲ፥ ጴፂሮሲኔ ዮሃኒሲ ፆሳ ዎሳናው ኡዱፑ ሳቲያን ጌሻ ጎሊያ ቤዲኖ። 2ዬሌቶዴፔ ዶሚዴ፥ ጉንዳ ጊዲዴ ዴዒያ ኢቲ ቢታኒ ጌሻ ጎሊያ ጌሊያ ኣሳፔ ሚሻ ዎሳናው፥ ኡባ ጋላሲ ዳሪ ሎዓ ጊያ ጌሻ ጎሊያ ፔንጊያን ኣሳይ ኣፊዴ ዎያዌ ዴዔ። 3ሄ ዎባ ቢታኒ፥ ጴፂሮሲኔ ዮሃኒሲ ጌሻ ጎሊያ ጌላና ሃኒሺን ቤዒዴ፥ ሚሻ ኡንቱንታ ዎሴዳ።

4ጴፂሮሲ ዮሃኒሳና ኣ ጫዲ ፄሊዴ፥ «ኑኮ ሃ ፄላ» ያጌዳ። 5ዎባ ቢታኒ ኡንቱንቱፔ ኢቲባ ኣካናው ኮዪዴ፥ ኡንቱንቱኮ ፄሌዳ። 6ሺን ጴፂሮሲ ኣ፥ «ታው ሚሻይ ባዋ፤ ሺን ታው ዴዒያባ ታኒ ኔው ኢማና፤ ናዚሬቲያ ዬሱሲ ኪሪስቶሳ ሱንን ዴንዳዴ ሃሜታ» ያጌዳ።

7ያቲዴ፥ ዎባ ቢታኒያ ባሬ ኡሼቻ ኩሺያን ኦይቂዴ፥ ፑዴ ዴንዳ፤ ኤሌካ ኣ ጌዲኔ ሜሺ ሜቄይ ሚኒ ኣጌዳ። 8ቢታኒ ፑዴ ጉፒዴ፥ ዴንዲ ኤቄዳ፤ ያኔ ሃኔ ሃሜታ ዶሜዳ። ሄዋፔ ጉዪያን ሃሜቲዴ፥ ጉፒዲኔ ፆሳ ጋላቲዴ፥ ኡንቱንቱና ኢቲፔ ጌሻ ጎሊያ ጌሌዳ።

9ኢ ሃሜቲሺናኔ ፆሳ ጋላቲሺን፥ ኣሳይ ኡባይ ኣ ቤዔዳ። 10ያቲዴ፥ ሚሻ ዎሳናው ዳሪ ሎዓ ጊያ ጌሻ ጎሊያ ፔንጊያን ኡቴዳዌ ኣ ጊዴዳዋ ኣኬኬዲኖ፤ ኢ ሃኔዳዋ ቤዒዴ ማላሌቴዲኖ።

ጴፂሮሲ ጌሻ ጎሊያን ሃሳዬዳ ሃሳያ

11ቢታኒ ጴፂሮሳኔ ዮሃኒሳ ኦይቂ ኡቴዳ ዎዴ፥ ኣሳይ ኡባይ ማላሌቲዴ፥ ሶሎሞኔ ባራንዳ #3፡11 ሶሎሞኔ ባራንዳ፡ ጌሻ ጎሊያ ኣዋይ ዶሊያ ሲን ባጋና ጮራ ኣሳይ ሺቂያ ኣዱሳኔ ኣኮ ሳዓ። ጊያሳን ኢቲፔ ኡንቱንቱኮ ዎፄዲኖ። 12ጴፂሮሲ ኣሳ ቤዔዳ ዎዴ ኡንቱንቶ ያጌዳ፤ «ኢስራዔሊያ ኣሳቶ፥ ኣዪሲ ሃዎ ማላሌቲቴ? ዎይ ኣዪሲ ኑና ጫዲ ፄሊቴ? ኑኒ ኑ ዎልቃን ዎይ ፆሳ ማላቲያዋን ሃ ቢታኒያ ሃሜዳዋ ሂንቴንቶ ማላቲ? 13ኣብራሃሞ ፆሳይ፥ ዪሳቃ ፆሳይ፥ ያዪቆባ ፆሳይ፥ ኑ ኣዋቱዋ ፆሳይ፥ ሂንቴንቱ ኣ ኢሜዳዋ ጲላፆሲ ቢላናው ቆፒ ኡቴዳ ዎዴ፥ ሂንቴንቱ ኣ ሲንን፥ ‹ኑኒ ኣ ኤሮኮ› ጌዳ ባሬ ናዓ ዬሱሳ ቦንቼዳ። 14ሺን ሂንቴንቱ ጌሻኔ ፂሉዋ፥ ‹ኑኒ ኣ ኤሮኮ› ጊዴ፥ ሼምፑዋ ዎዳዋ ኣ ዲራ ሂንቴንቶ ቢላናው ጲላፆሳ ዎሴዲታ። 15ዴዑዋ ኢሚያዋ ሂንቴንቱ ዎዲታ፤ ሺን ፆሳይ ሃይቁዋፔ ኣ ዴንዳዋሲ ኑኒ ማርካ። 16ሃ ዎባ ቢታኒያ ዬሱሳ ሱን ዎልቃይ ሚኒሴዳ፤ ሂንቴንቱ ቤዒያዌኔ ኤሪያዌካ ኢ ኣ ሱንን ኣማኒያዋን ኦሴቴዳ፤ ሃ ሂንቴንቱ ኡባ ሲንን ኣ ሃዋዳን ሎይዳዌ፥ ዬሱሳ ኢ ኣማኒያዋ።

17«ሃዒካ ታናዳን ኣማኒያዋንቶ፥ ሂንቴንቱካ ሂንቴንታ ካሊያዋንቱዳን፥ ኤሬናን ኦዳዋ ታኒ ኤራይ። 18ሺን ፆሳይ ቤኒ፥ ናባቱዋ ኡባቱዋ ዶናን፥ ‹ኪሪስቶሲ ዋዬታና ቤሴ› ያጊዴ ኦዴዳ፤ ባሬ ኦዴዳዋካ ሄዋዳን ፖሌዳ። 19-20ሲሚ ፆሳይ ሂንቴንቱ ናጋራ ማራናዳን፥ ጎዳ ማታፔ ኣያና ሚኖቴ ዎዲ ሂንቴንቶ ያናዳኒኔ ፆሳይ ዬሱሲ ኪሪስቶሳ ካሴ ሂንቴንቶ ኦዴቶዋዳን ዬዳናዳን፥ ሂንቴንቱ ናጋራ ፓፂዴ ፆሳኮ ሲሚቴ። 21ፆሳይ ጌሻ ጊዴዳ ባሬ ናባቱዋ ዶናን ቤኒፔ ዶሚዴ ሃሳዬዳዋዳን፥ ኡባባይ ኦራፂያ ዎዲ ጋካናው፥ ዬሱሲ ሳሉዋን ጋሚዓናው ቤሴ። 22ሙሴ፥ ‹ጎዳይ ፆሳይ፥ ሂንቴንቱ ዛሪያ ጊዶፔ ሂንቴንቶ ታናዳን ናቢያ ዴንና፤ ሂንቴንቱ ኢ ጊያዋ ኡባ ሲሲቴ። #ዛር 18፡15፣ 18 23ሄ ናቢ ኦዲያዋ ሲሴና ኣሳይ ኦኒኔ ኣሳ ጊዶፔ ሻኬቲ ዮ› ያጌዳ። #ዛር 18፡19

24«ቃሲ ሳሜላፔ ዶሚዴ፥ ኣፔ ካላ ዴንዴዳ ናባቱ ኡባቱ፥ ሃ ዎዲያባ ኦዴዲኖ። 25ሂንቴንቱ ናባቱዋ ናና፤ ቃሲ ፆሳይ ኣብራሃሞሲ፥ ‹ሳዓን ዴዒያ ኣሳ ኡባ ታኒ ኔ ዜሬ ባጋና ኣንጃና› ያጊዴ ኑ ኣዋቱዋና ጫቄዳ ጫቁዋ ላቲያ ናና። #ዶም 22፡18 26ፆሳይ ሂንቴንታ ኡባቱዋ ሂንቴንቱ ኢታ ኦሱዋፔ ዛሪዴ ኣንጃና ማላ፥ ባሬ ቆማ #3፡26 ቆማ፡ ፆሳ ኣዉዋን ዶሬቴዳ ናዓ። ዴንዴ፥ ሂንቴንቶ ኮይሮ ዬዴዳ» ያጌዳ።

Currently Selected:

ዬሱሲ ኪቴዳዋንቱ ኦሱዋ 3: dwrENT

Highlight

Copy