ዬሱሲ ኪቴዳዋንቱ ኦሱዋ 4
4
ጴፂሮሲኔ ዮሃኒሲ ኣዪሁዳቱዋ ሻንጋቱዋ ሲን ሺቄዲኖ
1ጴፂሮሲኔ ዮሃኒሲ ኣሳሲ ኦዲሺን፥ ቄሳቱዋ ካፓቱ፥ ጌሻ ጎሊያ ዎታዳራቱዋ ኣዛዚያዌኔ ሳዱቃዋናቱ፥ 2ኡንቱንቱ ኣሳ ታማሪሲያ ዲራዉኔ ሃራ ኣሳቱ ሃይቁዋፔ ዴንዳናዎ ማርካ ጊዳና ማላ፥ ዬሱሲ ሃይቁዋፔ ዴንዴዳዋ ኦዴዳ ዲራው፥ ዳሪ ዪሎቲዴ፥ ኡንቱንቱኮ ዬዲኖ። 3ኡንቱንታ ኦይቂዴ፥ ሳዓይ ኦማርሲዲጎ ዲራው ዎንታናሲ ቃሾ ጎሌ ጌሊሴዲኖ። 4ሺን ቃላ ሲሴዳዋንቱፔ ጮራቱ ኣማኔዲኖ፤ ኣቱማ ኣሳ ፓይዱ ኢቼሹ ሻዓ ኬና ጊዴዳ።
5-6ዎንቴ ጋላሲ፥ ኡንቱንታ ሞዲያዋንቱ፥ ኣዪሁዳ ኣሳ ጪማቱ፥ ሙሴ ሂጊያ ታማርሲያዋንቱ፥ ቄሳቱዋ ኡባቱዋ ካፓቱ ሃኒ፥ ቃያፊ፥ ዮሃኒሲ ኢስኪንዲሪኔ ቄሳቱዋ ኡባቱዋ ካፓቱዋ ዳባቱ ኡባይ ዬሩሳላሜን ሺቄዲኖ። 7ዬሱሲ ኪቴዳዋንታ ባሬንቱ ጊዱዋን ኤሲዴ፥ «ኣያ ዎልቃን ዎይ ኦ ሱንን ሃዋ ሂንቴንቱ ኦዲቴ?» ያጊዴ ኦቼዲኖ።
8ሄ ዎዴ ጴፂሮሲ ባሬናን ጌሻ ኣያናይ ኩሚና፥ ኡንቱንታ ሃዋዳን ያጌዳ፤ «ኣሳ ካሌያዋንቶ፥ ኣዪሁዳ ኣሳ ጪማቶ፥ 9ሃቼ ሃ ሃርጋንቻ ቢታኒያሲ ኦሴቴዳ ሎዖ ኦሱዋባኔ ኢ ዋኒ ፓፄዴንቶ፥ ሂንቴንቱ ኑና ኦቾፔ፥ 10ማስቃሊያ ቦላ ሚሲማሪያን ሂንቴንቱ ሺዴ ካቂና፥ ፆሳይ ሃይቁዋፔ ዴንዳ ናዚሬቲያ ዬሱሲ ኪሪስቶሳ ሱንን ሃ ቢታኒ ፓፂዴ፥ ሂንቴንቱ ሲንን ኤቄዳዌ ሂንቴንቱ ኡባሲኔ ኢስራዔሊያ ኣሳ ኡባው ኤሬቶ። 11ጎሊያ ኬፂያዋንቱ ሂንቴንቱ ካዴ ኢፄዳ ቱሳይ ጎሊያ ኡባ ቶኪያ ኮሺያ ቱሳ ጊዴዳ። #ማዝ 118፡22 12ኣሳይ ኣቶቴ ዬሱሳ ባጋና ዴማናፔ ኣቲን፥ ሃራ ኦ ባጋናኔ ዴሜና፤ ኑኒ ኣ ሱንን ኦናው ቤሴ፤ ኣዪሲ ጎፔ፥ ፆሳይ ሳሉዋፔ ጋርሳን ኣሳሲ ኢሜዳ ሃራ ሱንይ ባዋ» ያጌዳ።
13ሺቁዋ ኣሳይ ጴፂሮሲኔ ዮሃኒሲ ፃሌዳ ፃላ ቤዔዳ ዎዴ፥ ኡንቱንቱ ታማሪቤና ጮ ኣሳ ጊዴዳዋ ኣኬኪዴ ማላሌቴዲኖ፤ ኡንቱንቱ ዬሱሳና ዴዒያዋካ ኤሬዲኖ። 14ቃሲ ፓፄዳ ቢታኒ ጴፂሮሳናኔ ዮሃኒሳና ኤቄዳዋ ኣሳይ ቤዒዴ፥ ጊያዋ ዬዲኖ። 15ሺን ጴፂሮሲኔ ዮሃኒሲ ሺቁዋፔ ካሬ ኬሳና ማላ ኣሳይ ኣዛዚዴ፥ ባሬ ጊዶን ዞሬቲዴ፥ 16«ሃ ኣሳቱዋ ኣያ ኡዳኔ? ኣዪሲ ጎፔ፥ ኡንቱንቱ ኩሺያን ኦሴቴዳ ዎልቃማ ማላታቱ ዬሩሳላሜን ዴዒያ ኡባው ቤቴዳ። ኑኒ ሄዋ ኤሮኮ ጋናው ዳንዳዮኮ። 17ሺን ዬዉ ኣሳው ላሌቴና ማላ፥ ሃዋፔ ሲንው ሃ ኣሳቱ ዬሱሳ ሱን ኦሲኔ ኦዴናዳን፥ ሚኒሲዴ ኡንቱንታ፥ ‹ሂንቴና ኤሪቴ› ጎይቴ» ያጌዲኖ።
18ኡንቱንቱ ፄሲዴ፥ ዬሱሳ ሱን ሙሌካ ዴንናዳኒኔ ኣባ ታማሪሴናዳን ኣዛዜዲኖ። 19ሺን ጴፂሮሲኔ ዮሃኒሲ ዛሪዴ፥ «ፆሳው ኤኖ ጊያዋ ኣጊዴ፥ ሂንቴንቶ ኤኖ ጊያዌ ፆሳ ሲንን ሎዔንቶኔ ኣኔ ሂንቴ ፒርዲቴ። 20ኣዪሲ ጎፔ፥ ኑኒ ቤዔዳባኔ ሲሴዳባ ኦዴናን ኣጋናው ዳንዳዮኮ» ያጊዴ ሺቄዳ ኣሳው ኦዴዲኖ።
21ሺቄዳ ኣሳይ ኡንቱንታ ሙራናው ጋሶቲያባይ ዪና፥ ላዔዋ ዳሪሲ ፓሉሜቲዴ፥ ሃኔዳባው ኣሳይ ኡባይ ፆሳ ጋላቲያ ዲራው፥ ኡንቱንታ ቢሊዴ ዬዴዲኖ። 22ሄ ሃርጊያፔ ፓያ ማላታቱ ኣው ኦሴቴዳ ቢታኒ ዬሌቶዴፔ ላይይ ኣው ኦይታሙዋፔ ኣዳ።
ዬሱሲ ኪቴዳዋንቱኔ ሃራ ኣማኒያ ኣሳቱ ማ ዎዴ ዎሴዳ ዎሳ
23ጴፂሮሲኔ ዮሃኒሲ ቢሌቲዴ፥ ባሬንቱ ዳባቱዋኮ ቢዴ፥ ቄሳቱዋ ካፓቱኔ ኣዪሁዳ ጪማቱ ባሬንታ ጌዳባ ኡባ ኡንቱንቶ ኦዴዲኖ። 24ኡንቱንቱ ሄዋ ሲሴዳ ዎዴ፥ ኢቲ ዎዛና ጊዲዴ፥ ፆሳ ሃዋዳን ያጊዴ ዎሴዲኖ፤ «ኡባ ሞዲያ ጎዳው፥ ሳሉዋ፥ ሳዓ፥ ኣባኔ ኡንቱንቱ ጊዶን ዴዒያ ኡባባ ሜዳዎ፥ #ኬስ 20፡21፤ ናህ 9፡6፤ ማዝ 146፡6 25ኔኒ ኔው ኦያ ኑ ኣዉዋ ዳዊቴ ዶናን ጌሻ ኣያናን ሃሳያዴ፥
‹ኣዪሁዳ ጊዴና ኣሳይ ኣዪሲ ዪሎቴዴ?
ቃሲ ኣሳይ ኣዪሲ ዳንቤናባው ማቄቴዴ?
26ሳዓ ካታቱ ጊጌቴዲኖ፤
ጋዲያ ሞዲያዋንቱ ጎዳ ቦላኒኔ
ኢ ኦኬዳ ኪሪስቶሳ ቦላ ኢቲፔ ዴንዴዲኖ›
ያጋዴ ሃሳያዳ። #2፡1-2
27«ኣዪሲ ጎፔ፥ ሄሮዲሲኔ ጴንፄናዊያ ጲላፆሲ ኣዪሁዳ ጊዴና ኣሳናኔ ኢስራዔሊያ ኣሳና፥ ኔኒ ኦኬዳ ኪሪስቶሳ ኔ ጌሻ ናዓ ዬሱሳ ቦላ ዴንዳናው፥ ሃ ካታማን ሺቄዳዌ ቱማ። 28ቃሲ ኔኒ ኔ ዎልቃኒኔ ኔ ሼኒያን ሃናና ጋዴ ቆፓ ኡቴዳባ ኡባ ኦናው ሺቄዲኖ። 29ሃዒካ ጎዳው፥ ኡንቱንቱ ናሲያ ፄላ፤ ኑኒ ኔና ካሊያዋንቱ፥ ኔ ቃላ ኩሜን ቆንጬቴን ኦዳናዳን፥ ኑና ዳንዳዪሳ። 30ፓናው ኔ ዎልቃ ቤሳ፤ ቃሲ ኔ ጌሻ ናዓ ዬሱሳ ሱንን ኦራባኔ ማላታ ኦሲሳ» ጊዴ ዎሴዲኖ።
31ኡንቱንቱ ፆሳ ዎሴዳዋፔ ጉዪያን፥ ሄ ኡንቱንቱ ሺቄዳሳይ ቃፄዳ። ኡንቱንቱ ኡባን ጌሻ ኣያናይ ኩሚና፥ ፆሳ ቃላ ቆንጬቴን ኦዴዲኖ።
ኮይሮ ኣማኔዳ ኣሳቱዋ ኢቲፔቴ ዴዑዋ
32ኣማኒያዋንቱ ኡባቱ ቆፋኒኔ ዎዛናን ኢቱዋ ጊዴዲኖ። ኡንቱንቱ ሜሂ ኡባይ ኢቲፔ ዴዒያዋፔ ኣቲን፥ ባሬው ዴዔዳባ ኦኒኔ ባሬንቱባ ጊቤና። 33ዬሱሲ ኪቴዳዋንቱ ጎዳ ዬሱሲ ሃይቁዋፔ ዴንዴዳዋ ዎልቃማ ዎልቃን ማርካቲኖ፤ ቃሲ ፆሳይ ኡንቱንቶ ኡባው ኣ ኬካቴ ዳሪሲዴ ኢሜዳ። 34ኣማኒያዋንቱ ጊዶን ሜቶታንቻይ ኢቱኔ ባዋ፤ ኣዪሲ ጎፔ፥ ቢታይ ዎይ ጎሊ ዴዒያዋንቱ ኡባቱ ዛሊዒዴ፥ ኣኬዳ ሚሻ ኣሂዴ፥ 35ዬሱሲ ኪቴዳዋንቱሲ ኢሚኖ፤ ሄ ሚሻይ ኣሳው ኮሺያዋዳን ሻኬቲ፥ ሁጲያን ሁጲያን ኢሜቴ።
36ቆጲሮሳ ጌቴቲያ ሳን ዬሌቴዳ ዮሴፋ ጊያ ሌዊያ ዛሪ ኢቱ ዴዔ፤ ኣ ሱን ዬሱሲ ኪቴዳዋንቱ ባርናባሳ ጌዲኖ። ሄዋ ቢሌይ «ሜንያ ናዓ» ጊያዋ። 37ባርናባሲ ባሬው ዴዒያ ጋዲያ ዛሊዔዳ ሚሻ ኣሂዴ፥ ዬሱሲ ኪቴዳዋንቱሲ ኢሜዳ።
Currently Selected:
ዬሱሲ ኪቴዳዋንቱ ኦሱዋ 4: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa