ዬሱሲ ኪቴዳዋንቱ ኦሱዋ 9
9
ሳዖሊ ኪሪስቶሳን ኣማኔዳ
(ኪት 22፡6-16፤ 26፡12-18)
1ሺን ሳዖሊ ጎዳ ካሊያዋንታ ዎናው ማንዲዴ፥ ቄሳቱዋ ኡባቱዋ ካፑዋኮ ቤዳ። 2ያቲዴ ጎዳ ኦጊያ ካሊያ ኣሳቱዋ ማጫዋንታኔ ኣቱማዋንታ ዴሞፔ፥ ቃቺዴ ዬሩሳላሜ ኣሃናው፥ ዳማስቆን ዴዒያ ኣዪሁዳ ዎሳ ጎሌቶ ዳቢዳቢያ ፃፋናው ኣ ዎሴዳ።
3ኢ ቢዴ፥ ዳማስቆ ካታማ ጋካና ማቶዴ፥ ቆፔናን ሳሉዋፔ ዎልቃማ ፖዑ ኣ ዩሹዋ ኡባኒ ፖዔዳ። 4ሳዖሊ ሳዓን ኩንዲ ኡቲና፥ «ሳዖላ ሳዖላ፥ ኣዪሲ ታና ዋዪሳይ?» ጊያ ቃላ ሲሴዳ።
5ሳዖሊ፥ «ታ ጎዳው፥ ኔኒ ኦኔ?» ያጊዴ ኦቼዳ።
ዬሱሲካ፥ «ታኒ ኔኒ ዬዴርሳዴ ዴዒያ ዬሱሳ።» ያጌዳ።
6ሺን ሳዖሊ ኮኮሪዲኔ ማላሌቲዴ፥ «ታ ጎዳው፥ ታኒ ኣያ ኦናዳን ኮያይ?» ያጌዳ።
ጎዳይ ኣ፥ «ዴንዳዴ ካታማ ጌላ፤ ኔኒ ኦናው ቤሲያባይ ኔው ያኒ ኦዴታናዋ» ያጌዳ።
7ሳዖላና ኦጊያን ቢያ ኣሳቱ ኣይኔ ሃሳዬናን ኤቂ ኣጊዴ፥ ኮሻ ሲሲኖ፤ ሺን ኦናኔ ቤዒቤይኪኖ። 8ሳዖሊ ሳዓፔ ዴንዲና፥ ኣ ኣይፊ ዶዬቴዳ ዎዴ፥ ኣይኔ ፄላናው ዳንዳዪቤና፤ ሄዋ ዲራው፥ ኡንቱንቱ ኣ ኩሺያ ኦይቂ ጎቺዴ፥ ዳማስቆ ጌሊሴዲኖ። 9ሄዙ ጋላሳ ጋካናዉካ ኢ ፄሊቤና፤ ኣይኔ ሚቤና፤ ኣያኔካ ኡሺቤና።
10ዳማስቆን ኢቲ ሃናኒያ ጊያ ካሊያዌ ዴዔ፤ ጎዳይ ሳፃን ኣ፥ «ሃናኔው» ያጌዳ።
ሃናኒ፥ «ታ ጎዳው፥ ሃዋን ዴዓይ» ያጌዳ።
11ጎዳይ ኣ፥ «ዴንዳዴ ሱሬ ጌቴቲያ ኦጊያ ባዴ፥ ዪሁዳ ሶዪን ኢቲ ሳዖላ ጊያ ፄርሴሴፔ ዬዳ ቢታኒያ ኮያ፤ ኣዪሲ ጎፔ፥ ኢ ዎሴ። 12ቃሲ ሃናኒያ ጊያ ቢታኒ ጌሊዴ፥ ሳዖሊ ላዔንዋ ፄላናዳን፥ ባሬ ኩሺያ ኣ ቦላ ዎያዋ ሳፃን ቤዔዳ» ያጌዳ።
13ሃናኒ ዛሪዴ፥ «ታ ጎዳው፥ ዬሩሳላሜን ኔ ጌሻ ኣሳ ቦላ ሄ ቢታኒ ኣይ ኬና ኢታባ ኦዴንቶ፥ ታኒ ዳሮ ኣሳፔ ሲሳዲ። 14ቃሲ ዳማስቆን ኔ ሱን ፄሲያዋንታ ኡባ ቃቻናው፥ ቄሳቱዋ ካፓቱ ኣው ማታ ኢሜዲኖ» ያጌዳ።
15ሺን ጎዳይ ኣ፥ «ሳዖሊ ኣዪሁዳ ጊዴና ኣሳ ሲንን፥ ካታቱዋ ሲንኒኔ ኢስራዔሊያ ኣሳ ሲንን፥ ታ ሱን ኤሪሳናዉኔ ታው ኦናዳን ዶሬቴዳ ሚሻ ጊዲያ ዲራው፥ ኔኒ ባ። 16ኣዪሲ ጎፔ፥ ታ ሱን ዲራው፥ ኢ ኣዪኬና ዋዬታናው ቤሲንቶ፥ ታኒ ኣ ቤሳና» ያጌዳ።
17ሃናኒ ቢዴ፥ ሶይ ጌሊዴ፥ ባሬ ኩሺያ ሳዖላ ቦላ ዎዴ፥ «ታ ኢሻው ሳዖላ፥ ኔኒ ዪያ ኦጊያን ኔው ቤቴዳ ዬሱሲ፥ ኔኒ ፄላና ማላኔ ጌሻ ኣያናይ ኔናን ኩማና ማላ፥ ታና ኪቴዳ» ያጌዳ። 18ኤሌካ፥ ኣዬንቶ ፖቁዋ ማላይ ሳዖላ ኣይፊያፔ ዎና፥ ሳዖሊ ላዔንዋ ፄሌዳ፤ ቃሲ ዴንዲዴ ፃማቄቴዳ። 19ቁማ ሚዴ ሚኔቲ፥ ዳማስቆን ዴዒያ ካሊያዋንቱና ኣማሬዳ ጋላሳ ጋሚዔዳ።
ሳዖሊ ዳማስቆን ታማሪሴዳ
20ኤሌካ፥ «ዬሱሲ ኪሪስቶሲ ፆሳ ናዓ» ያጊዴ፥ ኣዪሁዳ ዎሳ ጎሌቱዋን ቃላ ኦዴዳ።
21ሄዋ ሲሴዳ ኡባይ ማላሌቲዴ፥ «ሃዌ ዬሩሳላሜን ዬሱሳ ሱን ፄሲያዋንታ ዪሲያዋ ጊዴኔ? ቃሲ ኡንቱንታ ቃቺዴ፥ ቄሳቱዋ ካፓቱዋ ሲን ኣፋናው ዪቤኔዬ?» ያጌዲኖ።
22ሺን ሳዖሊ ቃላ ኦዲያ ኦዱ ሚኒ ሚኒ ቤዳ፤ ዬሱሲ ቃሲ ኪሪስቶሳ ጊዲያዋካ ኢ ኣኬኪሲዴ ኦዴዳ ዲራው፥ ዳማስቆን ዴዒያ ኣዪሁዳቱ ኣው ዛሪያዋ ዬዲኖ።
23ጮራ ጋላሳፔ ጉዪያን፥ ኣዪሁዳቱ ሺቂዴ፥ ሳዖላ ዎናው ዞሬቴዲኖ። 24ሺን ኣዪሁዳቱ ባሬና ዎናው ቆፖዋ ሳዖሊ ሲሴዳ፤ ኡንቱንቱ ኣ ዎናው ቃማኔ ጋላሲ ካታማ ፔንጊያ ናጊኖ። 25ሺን ካሊያዋንታ ኣ ቃማ ኣፊዴ፥ ዲርሳ ሁጲያና ታዪያን ዱጌ ዎዲኖ።
ሳዖሊ ዬሩሳላሜን ታማሪሴዳ
26ሳዖሊ ዬሩሳላሜ ጋኬዳ ዎዴ፥ ካሊያዋንቱና ኢቲፔ ጋኬታናው ሺቂ ቤዔዳ፤ ሺን ካሊያዋ ኢ ጊዴዳዋ ኡባይ ኣማኔናን ኢፂዴ፥ ኣው ያዬዲኖ። 27ሺን ባርናባሲ ሳዖላ ዬሱሲ ኪቴዳዋንቱኮ ኣፌዳ፤ ኦጊያን ጎዳ ኢ ዋኒዴ ቤዔዴንቶ፥ ኣው ጎዳይ ዎቲ ሃሳዬዴንቶኔ ቃሲ ሳዖሊ ዳማስቆን ዬሱሳ ሱንን ያዬናን ዎቲ ቃላ ኦዴዴንቶ፥ ኡንቱንቶ ጌሺዴ ኦዴዳ። 28ሳዖሊ ዬሩሳላሜን ዩዪዴኔ ጎዳ ዬሱሳ ሱንን ያዬናን ቃላ ኦዲዴ፥ ዬሱሲ ኪቴዳዋንቱና ኢቲፔ ዴዔዳ። 29ቃሲ ሳዖሊ ጊሪኬ ቃላ ሃሳዪያ ኣዪሁዳቱዋና ሃሳዬኔ ፓሉሜቴ፤ ሺን ኡንቱንቱ ኣ ዎናው ኮዬዲኖ። 30ኢሻቱ ሄዋ ሲሲዴ፥ ሳዖላ ዱጌ ቂሳሪያ ኣፊዴ፥ ፄርሴሴ ዬዴዲኖ።
31ዪሁዳን፥ ጋሊላኒኔ ሳማሪያን ኡባን ዴዒያ ኣማኒያ ኣሳቱ ሳሮቴን ዴዔዲኖ፤ ቃሲ ሚኔዲኖ፤ ጎዳሲ ያዪያዋኒኔ ጌሻ ኣያና ማዱዋን ጌሜቲዴ፥ ፓይዱዋንካ ዳሪ ዳሪ ቤዲኖ።
ጴፂሮሲ ሊዲያኒኔ ዮጴን ታማሪሴዳ
32ጴፂሮሲ ኡባሳን ዩዪዴ፥ ሊዳን ዴዒያ ጌሻ ኣሳቱዋኮ ቃሲ ዎዳ። 33ያቲዴ ሄዋን ሆስፑን ላይ ሲሊዴ፥ ኣርሳን ጊሲዴ ዴዒያ ኢቲ ኤኒያ ጊያ ቢታኒያ ዴሜዳ። 34ጴፂሮሲ ኤኒያ፥ «ኤናው፥ ዬሱሲ ኪሪስቶሲ ኔና ፓ፤ ዴንዳዴ ኔ ሂፃ ዬጋ» #9፡34 ሂፃ ዬጋ፡ ሃዋ ጉሳይ ሜቴቲያባ ጊጊሳ ጉሳ። ያጌዳ። ሄዋፔ ጉዬ ኤሌካ ዴንዲ ኤቄዳ። 35ሊዳኒኔ ሳሮናን ዴዒያ ኣሳይ ኡባይ ኤኒያ ቤዒዴ፥ ጎዳኮ ሲሜዲኖ።
36ዮጴ ካታማን ኢቲ ፃቢቶ ጌቴቲያ ኣማኔዉና ዴዓው፤ ፃቢቶ ጉሳይ ጊሪኬ ቃላን ዶርቆ ጊያዋ። ኢዛ ባሬ ዴዔዳ ዎዲያ ኡባን ሎዖባ ኦዴኔ ሂዬሳ ማዳዴ ዴዓው። 37ሄ ዎዴ ኢዛ ሃርጋዴ ሃይቂና፥ ኣሳይ ኢዚ ኣኃ ሜጪዴ፥ ፖቂያ ፑዴ ኬሲዴ ጊሲሴዳ። 38ሊዳይ ዮጴሲ ማታ፤ ካሊያዋንቱ ጴፂሮሲ ሊዲያን ዴዒያዋ ዮጴን ሲሲዴ፥ «ሃያና ኑኮ ኤሌካ ያሪኪ» ያጊያ ኪታ ላዑ ኣሳቱዋ ቦላ ኣኮ ኪቴዲኖ።
39ሄዋፔ ጉዬ ጴፂሮሲ ዴንዲዴ፥ ኡንቱንቱና ቢ ጋኪና፥ ፖቂያ ፑዴ ኣ ኬሲዴ፥ ኪፊሊያ ጌሊሴዲኖ። ኣሲኒ ባይና ኣምዔ ማጫዋንቱ ኡባይ ዬኪዴኔ ዶርቃ ኡንቱንቱና ዴዒያ ዎዴ ኦዳ ቃሚሻቱዋኔ ማያቱዋ ኡባ ጴፂሮሳ ቤሲዴ፥ ኣ ዩሹዋን ዩዪ ኣዴ ኤቄዲኖ። 40ጴፂሮሲ ኡንቱንታ ኡባ ካሬ ኬሲዴ፥ ጉልባቲ ፆሳ ዎሴዳ፤ ቃሲ ኣኃኮ ሲሚዴ፥ «ፃቢቴ፥ ዴንዳ» ያጌዳ፤ ፃቢታካ ባሬ ኣይፊያ ዶያ ጴፂሮሳ ቤዓዴ፥ ቃ ኡታዱ። 41ጴፂሮሲ ኢዞ ባሬ ኩሺያን ማዲዴ፥ ዴን ኤሴዳ፤ ሄዋፔ ጉዪያን፥ ኣማኒያዋንታኔ ኣሲኒ ባይና ኣምዔ ማጫዋንታ ፄሲዴ፥ ፓፄዳዉኖ ኡንቱንቶ ኢሜዳ።
42ሃ ዬዉ ዮጴ ካታማ ኡባን ላሌቲና ጮራ ኣሳይ ጎዳ ኣማኔዲኖ። 43ጴፂሮሲ ዮጴን ኢቲ ሲሞና ጊያ ጋልባ ቃጪያዋና ዳሮ ዎዲያ ጋሚዔዳ።
Currently Selected:
ዬሱሲ ኪቴዳዋንቱ ኦሱዋ 9: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa