ዬሱሲ ኪቴዳዋንቱ ኦሱዋ 8

ሳዖሊ ኣማኒያ ኣሳ ዬዴርሴዳ

1ሳዖሊ ኢስፂፋኖሴ ሃይቁ ሎዓ ጊ ኣኬዳ። ሄ ጋላሲ ዬሩሳላሜን ዴዒያ ኣማኒያዋንቱ ቦላ ዎልቃማ ዬዴርሱ ዴንዴዳ፤ ዬሱሲ ኪቴዳዋንቱፔ ኣቲን፥ ኣማኒያዋንቱ ኡባቱ ዪሁዳ ጋዲያኒኔ ሳማሪያ ጋዲያን ላሌቴዲኖ። 2ፆሳ ኣሳቱ ኢስፂፋኖሳ ሞጌዲኖ፤ ቃሲ ኣው ዳሮ ዬኬዲኖ። 3ሺን ሳዖሊ ኣማኒያ ኣሳ ዪሳናው ባፄቴ፤ ኡባ ጎሊያ ጌሊ ጌሊዴ፥ ኣቱማ ኣሳኔ ማጫ ኣሳ ጎቺ ጎቺዴ፥ ቃሾ ጎሌ ዬዴ።

ዎንጋላ ሚሺራቹ ሳማሪያን ኦዴቴዳ

4ላሌቴዳ ኣማኒያዋንቱ ቃላ ኦዲዴ፥ ኡባሳ ቤዲኖ። 5ፒሊጶሲ ሳማሪያ ካታማ ዎዴ፥ ኪሪስቶሳባ ኣሳሲ ኦዴዳ። 6ጮራ ኣሳይ ፒሊጶሲ ጌዳዋ ዳሪሲ ኣኬኪዴ ሲሴዳ፤ ኢ ኦያ ማላታካ ቤዔዳ። 7ኣዪሲ ጎፔ፥ ኢታ ኣያናቱ ኮሻ ቁ ኦ ሃሳዪዴ፥ ጮራ ኣሳፔ ኬሴዲኖ፤ ቃሲ ጮራ ሲሌዳዋንቱኔ ዎባቱ ፓፄዲኖ። 8ሄ ካታማን ኣሳይ ዳሮ ናሼቴዳ።

9ሺን ሲሞና ጌቴቲያ ኢቲ ቢታኒ ካሴ፥ ባሬና ዎልቃማ ጊ ካዪዲ፥ ሳማሪያ ኣሳ፥ «ላ ሃዌ ኣይቤ ኦራቤ» ጊሲዴ ሄ ካታማን ዴዔዳ። 10ጉቴፔ ዶሚዴ፥ ዎጋቴ ጋካናው፥ ኣሳይ ኡባይ፥ «ፆሳ ዎልቃይ ዳሮ ዎልቃማይ ሃዋ» ጊዴ ኣባ ሲሴ። 11ዳሮ ዎዲያፔ ዶሚዴ፥ ካዩዋን ሳማሪያ ኣሳ «ላ ሃዌ ኣይባ ኦራቤ» ጊሴዳ ዲራው፥ ኣሳይ ኣባ ሲሴ። 12ሺን ፒሊጶሲ ፆሳ ካዉቴባኔ ዬሱሲ ኪሪስቶሳ ሱንባ ኣቱማዋንቱሲኔ ማጫዋንቱሲ ሚሺራቹዋ ኦዲዴ፥ ኡንቱንቱ ኣባ ኣማኒዴ ፃማቄቴዲኖ። 13ቃሲ ሲሞኒካ ባሬ ሁጴው ኣማኒዴ ፃማቄቴዳዋፔ ጉዪያን፥ ፒሊጶሳና ኢቲፔ ዴዒዴ፥ ኦሴቲያ ማላታኔ ፆሳይ ኦዳ ዎልቃማ ማላታ ቤዒዴ ማላሌቴዳ።

14ዬሱሲ ኪቴዳ ዬሩሳላሜን ዴዒያዋንቱ፥ ሳማሪያ ኣሳይ ፆሳ ቃላ ኣኬዳዋ ሲሴዳ ዎዴ፥ ጴፂሮሳኔ ዮሃኒሳ ኡንቱንቱኮ ዬዴዲኖ። 15ጴፂሮሲኔ ዮሃኒሲ ዎዴ፥ ኣማኒያዋንቱ ጌሻ ኣያና ኣካና ማላ፥ ኡንቱንቶ ፆሳ ዎሴዲኖ፤ 16ኣዪሲ ጎፔ፥ ሳማሪያ ኣሳቱ ጎዳ ዬሱሳ ሱንን ፂንቃታ ፃላላ ፃማቄቴዳዋፔ ኣቲን፥ ኡንቱንቱፔ ኢቱዋ ቦላኒኔ ጌሻ ኣያናይ ዎቤና። 17ሄ ዎዴ ጴፂሮሲኔ ዮሃኒሲ ባሬንቱ ኩሺያ ኡንቱንቱ ቦላ ዎዋፔ ጉዪያን ኡንቱንቱ ጌሻ ኣያና ኣኬዲኖ።

18ዬሱሲ ኪቴዳዋንቱ ባሬንቱ ኩሺያ ኡንቱንቱ ቦላ ዎና፥ ኡንቱንቶ ጌሻ ኣያናይ ኢሜቴዳዋ ሲሞኒ ቤዔዳ ዎዴ፥ ጴፂሮሳሲኔ ዮሃኒሳሲ ሚሻ ኣሂዴ፥ 19«ታኒካ ታ ኩሺያ ዎያ ኡባይ ጌሻ ኣያና ኣካና ማላ፥ ሃ ማታ ታዉካ ኢሜሪኪቴ» ያጌዳ።

20ሺን ጴፂሮሲ ኣው ሃዋዳን ያጌዳ፤ «ኔኒ ፆሳ ኢሞታ ሚሻን ሻማናው ቆፔዳ ዲራው፥ ኔ ሚሻይ ኔናና ጮ ዮ። 21ኔ ዎዛናይ ፆሳ ሲንን ሱሬ ጊዴና ዲራው፥ ኔው ሃዋን ጊሹ ባዋ። 22ያቶዋፔ ጉዪያን ሃ ኔ ዎዛና ኢታ ቆፋ ዲራው፥ ናጋራፔ ሲማ፤ ኦኒ ኤሪ ኔ ዎዛናን ዴዒያ ኢታ ቆፋ ፆሳይ ኣቶ ጋኔንቶኔ ፆሳ ዎሳ። 23ኣዪሲ ጎፔ፥ ኔኒ ዳሮ ቃናቲያ ኦይቃዴ ናጋራ ቃሹዋን ዴዒያዋ ታኒ ቤዓይ» ያጌዳ።

24ሄዋፔ ጉዬ ሲሞኒ ጴፂሮሳሲኔ ዮሃኒሳሲ ዛሪዴ፥ «ሂንቴንቱ ጌዳዋፔ ኢቲባይኔ ታና ጋኬና ማላ፥ ሂንቴ ታው ፆሳ ዎሲቴ» ያጌዳ።

25ጴፂሮሲኔ ዮሃኒሲ ማርካቴዳዋፔኔ ጎዳ ቃላ ኦዴዳዋፔ ጉዪያን፥ ጉዬ ዬሩሳላሜ ሲሜዲኖ፤ ያቲዴ ሳማሪያን ዴዒያ ዳሮ ቄሪ ካታማቱዋን ሚሺራቹዋ ቃላ ኦዴዲኖ።

ፒሊጶሲ ቶጲያ ኣሳ ጊዴዳ ሹፋ ፃማቄዳ

26ጎዳ ኪታንቻይ ፒሊጶሳ፥ «ዴንዳዴ ዬሩሳላሜፔ ጋዛ ኣፊያ ኣሲ ባይና ሜላ ሳዓ ኦጊያኮ ባ፤ ሄ ኦጊ ኣዋይ ኬሲያሳ ፄሊያ ዎዴ ኡሼቻ ዱጌሃ ባጋና ዴዔ» ያጌዳ። 27ፒሊጶሲ ዴንዲዴ ቤዳ። ሂንዴኮ ጌቴቲያ ቶጲያ ካታቲሲ ቢታ ሞዲያ ኢ ሚሻ ኡባካ ናጊያ ቶጲያ ኣሳ ጊዴዳ ኢቲ ሹፋይ ዴዒያዌ ጎዪናናው ዬሩሳላሜ ቤዳ። 28ፓራይ ጎቺያ ጋሪያን ኡቲዴ፥ ዬሩሳላሜፔ ጉዬ ሲሚዴ፥ ናቢያ ኢሲያሳ ማፃፋ ናባቤ።

29ጌሻ ኣያናይ ፒሊጶሳ፥ «ሄ ጋሪያኮ ሺቃዴ ኢቲፔ ጊዳ» ያጌዳ።

30ፒሊጶሲ ዎፂ ዪዴ፥ ናቢያ ኢሲያሳ ማፃፋ ሹፋይ ናባቢሺን ሲሲዴ ኣ፥ «ኔኒ ናባቢያዋ ኣኬካይ?» ያጌዳ።

31ሹፋይ፥ «ታው ኦዲዴ ኣኬኪሲያ ኣሳይ ባይናን ዋኒዴ ኣኬኬቲ?» ያጌዳ፤ ቃሲ ባሬናና ጋሪያን ኬሲዴ ኡታና ማላ፥ ፒሊጶሳ ዎሴዳ። 32ሹፋይ ናባቢያ ማፃፋይ

«ዶርሳዳን ኢ ሹኬታናው ላጌቴ።

ዶርሳ ማራይ ባሬ ኢሲኪያ

ቃንፂያዋ ሲንን ጮዑ ጊያዋዳን፥

ኢካ ባሬ ዶና ፖኪቤና።

33ኢ ካዉሼዳዋዳን ኣው ፂሎ ፒርዳይ ዬዳ።

ዬሱሳ ዴዑ ሃ ሳዓፔ ፑዴ ኣኬቲዲጌዳ ዲራው፥

ኣ ዛሪያባ ኦኔ ኦዳናዌ?»

ያጌዳ።#ኢሳ 53፡7-8

34ሹፋይ ዛሪዴ ፒሊጶሳው፥ «ናቢ ሃዋ ኦዋ ኦዲ? ባሬባ ኦዲዬ ዎይ ሃራ ኣሳባ ኦዲ? ታው ኦዳሪኪ» ያጌዳ። 35ፒሊጶሲ ዛሪዴ፥ ፆሳ ማፃፋ ኢ ናባቢያሳፔ ዶሚዴ፥ ዬሱሳባ ሚሺራቹዋ ቃላ ኣው ኦዴዳ።

36ኡንቱንቱ ኦጊያ ኦይቂ ቢዴ፥ ሃይ ዴዒያሳ ጋኬዲኖ፤ ሹፋይ፥ «ሃ ሃዋ ቤዓ፤ ፃማቄቲያዋ ታና ዲጊያዌ ኣዬ?» ያጌዳ።

37ፒሊጶሲ ኣ፥ «ኔኒ ኔ ኩሜን ዎዛናፔ ኣማኖፔ፥ ዳንዳያ» ያጌዳ።

ኢ ዛሪዴ፥ «ዬሱሲ ኪሪስቶሲ ፆሳ ናዓ ጊዲያዋ ታኒ ኣማናይ» ያጌዳ።

38ጋሪ ኤቃና ማላ ሹፋይ ኣዛዚና፥ ኢኔ ፒሊጶሲ ላዓቱ ዱጌ ዎዴ፥ ሃን ጌሊና ፒሊጶሲ ኣ ፃማቄዳ። 39ኡንቱንቱ ሃፔ ጋፃ ኬሴዳ ዎዴ፥ ጎዳ ኣያናይ ፒሊጶሳ ሊጲ ኡዲዴ፥ ኣፊ ኣጌዳ፤ ላዔዋ ሹፋይ ፒሊጶሳ ቤዒቤና፤ ሺን ባሬ ኦጊያ ናሼቲዴ ቤዳ። 40ፒሊጶሲ ባሬ ሁጴው ኣዞፆሳን ዴዒያዋ ኤሬዳ፤ ቃሲ ቂሳሪያ ያና ጋካናዉካ፥ ካታማ ኡባን ዩዪዴ ሚሺራቹዋ ቃላ ኦዴ።

Currently Selected:

ዬሱሲ ኪቴዳዋንቱ ኦሱዋ 8: dwrENT

Highlight

Copy