ሉቃሳ 15

ባዬዳ ዶርሳ

(ማት 18፡12-14)

1ኢቲ ጋላሲ፥ ቃራፃ ሺሺያዋንቱኔ ናጋራንቻቱ ኡባይ ዬሱሳ ሲሳናው ኣኮ ሺቄዲኖ። 2ፓሪሳዋቱኔ ሙሴ ሂጊያ ታማሪሲያዋንቱ፥ «ሃ ቢታኒ፥ ናጋራንቻቱዋ ሺሺያዋኔ ኡንቱንቱና ቁማ ሚያዋ» ያጊዴ ዙዙሜዲኖ።#ሉቅ 5፡29-30 3ዬሱሲካ ሌሚሱዋን ዛሩዋ ሃዋዳን ያጊ ኦዴዳ፡

4«ፄቱ ዶርሳይ ዴዒያ ኡራይ ሂንቴንቱ ጊዶፔ ዴዒንቶ ሄዋፔ ኢቱ ባዪንቶ ኡዱፑ ታማኔ ኡዱፑኑዋ ዴንባን ኣጊዴ ባዬዳዋ ቤታና ጋካናው ኮዬናዌ ኦኔ? 5ዴሜዳ ዎዴ ናሼቻን ባሬ ሃሺያ ቦላን ዶርሳ ቶኪ፥ 6ባሬ ጎሌ ሲሚዴ፥ ባሬ ዶሲያዋንታኔ ሾራቱዋ ኢቲፔ ፄሲዴ፥ ‹ባዬዳ ታ ዶርሳ ዴሞ ዲራው፥ ታናና ኢቲፔ ናሼቲቴ› ያጊዴ ኦዴ። 7ሄዋዳንካ ናጋራ ፓፄ ኮሼና ኡዱፑ ታማኔ ኡዱፑ ፂላቱዋፔ ኣዴ ናጋራ ፓፂያ ኢቲ ናጋራንቻን ሳሉዋን ዳሮ ናሼቻይ ጊዳናዋ።

ባዪዴ ቤቴዳ ሳንቲሚያ

8«ቃይካ ታሙ ናሃሲያ ሳንቲሚ #15፡8 ናሃሲያ ሳንቲሚ፡ ግሪኬ ቃላ ቢሌኒ ኢቲና፥ ኢቲ ጋላሳ ሙሚያ ኦ ፔሼዳ ዎልቃ ኦሳንቻው ጪጌቲያ ሚሻ ኬና ጊዲያዋ ኦዴ። ዴዒያ ሚሺራታ ታሙዋፔ ኢቱ ባዪንቶ ዴማና ጋካናው ፆምፒያ ፆምፓዴ፥ ጎሊያ ፒታዴ ሎይ ኮዬናዉና ኢዛ ኦኔ? 9ኢዛካ ዴሜዳ ዎዲያን ባሬ ዶሲያዋንታኔ ባሬ ሾራቱዋ ኢቲፔ ፄሳዴ፥ ‹ታፔ ባዬዳ ሳንቲሚያ ዴሜዳ ዲራው፥ ታናና ኢቲፔ ናሼቲቴ› ያጋዴ ኦዳው። 10ሄዋዳንካ ናጋራ ፓፂያ ኢቲ ናጋራንቻ ጋሶቴን ፆሳ ኪታንቻቱዋ ሲንን ናሼቻይ ሃናናዋ» ያጌዳ።

ባያ ናዓ

11ጉጂዴ ዬሱሲ፥ «ላዑ ናናይ ዴዒያ ኢቲ ቢታኒ ዴዔ፤ 12ኡንቱንቱፔካ ቴፋ ናዓይ፥ ‹ኔ ማፁዋፔ ታና ጋኪያዋ ኢማ› ጌዳ። ኣዉካ ባሬ ማፁዋፔ ናናቶ ጊሼዳ። 13ጉ ዎዲያፔ ጉዪያን ቴፋ ናዓይ ባሬና ጋኬዳዋ ኡባ ሺሺ ኣኪዴ ሂኒ ሃኮ ጋዴ ቤዳ፤ ሄዋን ባሬ ኣኬዳ ሚሻ ኡባ ላሊ ዉርሲ ኣጌዳ። 14ኢካ ዴዒያዋ ኡባ ዉርሴዳዋፔ ጉዪያን ሄ ጋዴን ዎልቃማ ኮሻይ ጌሌዳ፤ ኢካ ሜቱዋን ኡንዔቱሳ ዶሜዳ። 15ሃዋ ዲራው ሄ ጋዴን ዴዒያዋንቱፔ ኢቱዋኮ ሺቂዴ፥ ‹ታና ኔው ቆማ ኦሪኪ?› ያጊና፥ ቢታኒካ ባሬ ጉዱን ዉዲያ ሄማና ማላ ኣ ዴምባ ዬዴዳ። 16ጉዱን ዉዲ ሚያ ሃልዑዋ ማናው ኣሞቴዳ፤ ሺን ሄዌንቶካ ኣው ኢሚያዌ ቤቲቤና።

17ባሬ ባዪዙዋ ኤሮ ዎዴ፥ ‹ቁማይ ፆኒዴ ሳዓን ኣቲያ ታ ኣቦ ኦያዋንቱ ኣፑኔ፤ ሺን ታኒ ሃዋን ኮሻን ሃይቃና ማታይታ? 18ዴንዳዴ ታ ኣቡኮ ባኔ› ሃዋዳን ያጋና፤ ‹ታ ኣቦ፥ ፆሳካ ኔናካ ናቃዲ፤ 19ሃኒፔ ጉዬ ኔ ናዓ ያጌታዴ ፄሴታናው ቤሲኬ፤ ኔው ኪቴቲያዋንቱፔ ኢቱዋዳን ታና ዎሪኪ ጋና› ጌዳ። 20ሄ ማንዒያንካ ዴንዲዴ ባሬ ኣቡኮ ዬዳ።

«ኢ ቢሮ ሃኩዋን ዴዒሺን፥ ኣዉ ቤዒዴ፥ ኣው ቃሬቴዳ፤ ኣኮ ዎፂ ቢዴ፥ ኣ ኢዲሚ ዬሬዳ።

21«ናዓይካ፥ ‹ታ ኣቦ፥ ታኒ ፆሳካ ኔናካ ናቃዲ፤ ሃኒፔ ጉዬ ኔ ናዓ ጌቴታዴ ፄሴታናው ቤሲኬ› ያጌዳ።

22ሺን ኣዉ ባሬ ኦሳንቻቱዋ፥ ‹ኤሌሊ ቢዴ፥ ኡባፔ ዶሬቴዳ ሎዖ ማዩዋ ኣሂዴ፥ ኣ ማዪዚቴ፤ ኣ ቢራያን ሚጊዱዋ፥ ኣ ጌዲያንካ ጫማ #15፡22 ሚጊዱዋ … ጫማ፡ ሃ ቃላቱ ናዓ ኣቡ፥ ኣ ፖሎ ዎዛናፔ ኣኮዋ ቤሲያዋንታ። ሚጊዱ፥ ሄ ናዓይ ጎሌን ዴዒያ ኣሳቱዋ ኡባፔ ሎዖ ፄሌቴዳዋ ቤሴ። ጫማይ ቃይ፥ ኢ ባሬ ኣቡሲ ኣይሌ ጊዴናዳን ናዓ ጊዲያዋ ቤሴ። ኣይላቱ ሄዎዴ ጫማ ዎኪኖ። ዎቴ። 23ሞዳ ኮሩማ ኣሂዴ ሹኪቴ፤ ሞይቴ፥ ናሼቶይቴ። 24ኣያው ጎፔ፥ ሃዌ ታ ናዓይ ሃይቄዳ፤ ሺን ሃዒ ፓፄዳ፤ ባዬዳ፤ ሺን ሃዒ ቤቴዳ› ያጊና፥ ናሼቻ ዶሜዲኖ።

25«ሄ ዎዲያን፥ ባይራ ናዓይ ጋዴን ዴዒያዌ ዪዴ ጎሌኮ ማቲያ ዎዴ፥ ዬኔ ዱሩዋ ኮሹንቻ ሲሴዳ። 26ኢካ ዬዉ ኣዬንቶ ኤራናው ኮዪዴ፥ ቆማቱዋፔ ኢቱዋ ፄሲዴ፥ ‹ሃዌ ኣዬ?› ጊዴ ኦቼዳ። 27ቆማቱካ፥ ‹ኔ ኢሻይ ሳሮ ዬዳ ዲራው፥ ኔ ኣቡ ሞ ኮሩማ ኣው ሹኬዳ› ያጊ ኦዴዲኖ።

28«ባይራ ናዓይ ሃንቄቲዴ ጎሌ ጌሊኬ ያጊ ኢፂና፥ ኣዉ ካሬው ኬሲዴ፥ ጌላናዳ ዎሴዳ። 29ሺን ኢ ዛሪዴ ባሬ ኣባ፥ ‹ሄኮ ሃዋ ኬና ዎዲያ ቆማዳን ኔው ኪቴታዲ፤ ኔ ኣዛዞዋፔ ኢቱዋኔካ ፓጪሳ ቤይኬ፤ ታ ላጌቱዋና ኢቲፔ ናሼታና ማላ ሃራይ ኣቶ ኢቲ ዴሻ ቡልዑዋኔ ታው ኢማ ቤይካ፤ 30ሺን ሃዌ ኔ ናዓይ ኔ ሚሻ ጫራቱዋና ኢቲፔ ዲፊሲዴ ዪና፥ ኮ ቦራ ሹካዳ› ያጌዳ።

31«ኣዉካ ኣ፥ ‹ታ ናዓው፥ ኔኒ ኡባ ጋላሳ ታናና ኢቲፔ ዴዓ፤ ታሳ ጊዴዳባይ ኡባይካ ኔዋ። 32ሺን ሃዌ ኔ ኢሻይ፥ ሃይቄዳዌ ፓፆ ዲራዉኔ ባዬዳዌ ቤቶ ዲራው፥ ኑኒ ሚዲኔ ኡሺዴ ናሼታናው ቤሴ› ያጌዳ» ጊዴ ኦዴዳ።

Currently Selected:

ሉቃሳ 15: dwrENT

Highlight

Copy