ሉቃሳ 17

ናጋራባ ዬሱሲ ኦዴዳ

(ማት 18፡6፣ 7፣ 21፣ 22፤ ማር 9፡42)

1ዬሱሲ ባሬና ካሊያዋንታ፥ «ኣሳ ባሌያዌ ዬናን ኣቴና፤ ሺን ባሌያዋ ኣሂያ ኡራው ኣው ኣዬ፤ 2ሄ ቢታኒ ሃ ጉቱዋፔ ኢቱዋ ባሌያዋፔ፥ ጋጪያ ዎፃ ባሬ ቆያን ቃሼቲዴ ኣባን ሚቴቲያዌ ኣው ሎዓ። 3ሂንቴ ሁጴው ናጌቲቴ።

«ኔ ኢሻይ ኔና ናቆፔ፥ ኣ ዞራ። ቃሲ ናጋራፔ ኢ ሲሞፔ፥ ኣው ኣቶ ያጋ። 4ኢቲ ጋላሲ ኢ ኔና ላፑ ጌዴ ናቂዴ፥ ላፑ ጌዴካ፥ ‹ኔና ታ ናቃዲ፥ ታና ማራ› ጊዴ ኔኮ ዮፔ፥ ኣው ኣቶ ጋ» ያጌዳ።

5ኪቴቴዳዋንቱካ ጎዳ፥ «ኑሲ ኣማኑዋ ጉጃ» ያጊዴ ኦቼዲኖ።

6ጎዳይካ፥ «ሂንቴው ሳናፊጪያ ኣይፊያ ኬና ኣማኑ ዴዒንቶ፥ ሂንቴንቱ ሃ ቦዒያ፥ ‹ሃዋፔ ሾዴታዴ፥ ኣባን ቶኬታ› ጊንቶ ሂንቴው ኤኖ ጋና» ያጌዳ።

ቆማይ ኦናው ቤሲያ ኦሱዋ

7ቃሲካ ዬሱሲ፥ «ሂንቴፔ ጎሺያዌ ዎይ ሚያ ሄሚያ ቆማይ ዴዒያ ኣሳይ ሃቄት ዴዖፔ፥ ጎሻ ጋዴፔ ዎይ ሚያ ጋዴፔ ሲሞ ዎዴ ኤሌካ፥ ‹ሃያ ሼምፓ ኣካ፥ ቁማ ማናው ኡታ› ያጊያዌ ኦኔ? 8ዬዉዋን ቃሲ፥ ‹ታ ማና ካዉዋ ጊጊሳ፤ ታ ማናኔ ኡሻና ጋካናው ሚናዴ ታና ኤቃዴ ሚዛ። ሄዋፔ ጉዬ ኔው ማ፥ ኡሻ› ያጊያዋ ጊዴኔ? 9ሄ ቆማይ ኪቴቴዳባ ኦዳ ዲራው፥ ሄ ቢታኒ ጋላታናው ቤሴኔ? 10ሄዋዳንካ ሂንቴ ቃሲ ኣሳይ ሂንቴና ኪቶ ኦሱዋ ኦዳ ዎዴ፥ ‹ኑኒ ማዴና ቆማቱዋ፤ ኑ ኦሶ ፃላላ ኦዶ› ያጊቴ» ያጌዳ።

ዬሱሲ ኦሉ ኦይቄዳ ታሙ ኣሳቱዋ ፓዳ

11ዬሱሲ ዬሩሳላሜ ቢዴ፥ ጋሊላፔኔ ሳማሪያ ጊያ ጋዳቱዋፔ ጊዱዋና ኣዳ። 12ኢ ኢቲ ጉ ካታማቶ ጌሊያ ዎዲያን፥ ሃኩዋን ኤቄዳ ታሙ ኦሉዋን ኦይቄቴዳዋንቱ ኣ ቤዔዲኖ። ኡንቱንቱካ ሃኩዋን ኤቂዴ፥ 13ባሬንቱ ኮሻ ቁ ኡዲዴ፥ «ዬሱሳ፥ ጎዳው፥ ሃያ ጎዶ ኑና ፓሪኪ!» ያጌዲኖ።

14ዬሱሲ ኡንቱንታ ቤዒዴ፥ «ቢዴ፥ ሂንቴንቱ ቦላ ቄሳቱዋ ቤሲቴ» ያጌዳ።

ኡንቱንቱካ ቄሳቱዋኮ ቢዴዒዴ ኦሉዋፔ ፓፄዲኖ። #ዎግ 14፡1-32

15ኡንቱንቱፔ ኢቱ ባሬ ሃርጊያፔ ፓፄዳዋ ቤዒዴ፥ ባሬ ኮሻ ቁ ኡዲዴ፥ ፆሳ ቦንቺዴ ሲሜዳ። 16ጋላቲዴካ ዬሱሳ ጌዲያ ማታን ጉልባቴዳ። ሄ ቢታኒ ሳማሪያ ኣሳ።

17ዬሱሲ ዛሪዴ፥ «ታሙ ፓፂቤይኪኖ? ያቲና ኡዱፑናቱ ሃቃን ዴዒኖ? 18ኣዪሁዳ ኣሳ ጊዴና ሳማሪያ ቢታኒያፔ ኣቲን፥ ፆሳ ቦንቻናው ሲሜዳዋንቱ ባዋ ጉሴ?» ያጌዳ። 19ዬሱሲ ኣ፥ «ዴንዳ ባ፤ ኔ ኣማኑ ኔና ፓዳ» ያጌዳ።

ፆሳ ካዉቴ ዩሳባ

(ማት 24፡23-28፣ 37-41)

20ፓሪሳዋቱ ኢቲ ጋላሲ፥ «ፆሳ ካዉቴይ ኣዉዴ ያኔ?» ጊዴ ኦቺና ዬሱሲ፥ «ፆሳ ካዉቴይ ሂንቴንቱ ናጊያ ኦጊያን ዬና» ያጊ ዛሬዳ። 21ቃሲካ፥ «ኦኒኔ፥ ‹ፆሳ ካዉቴይ ሃዋን ዴዔ›፥ ዎይ ‹ሄዋን ዴዔ› ጋናው ዳንዳዬና፤ ፆሳ ካዉቴይ ሂንቴንቱ ዎዛና ጊዶን ዴዔ» ያጌዳ።

22ዬሱሲ ባሬና ካሊያዋንቶ ኦዲዴ፥ «ኣሳ ናዓይ ቆንጪያ ጋላሳቱዋፔ ኢቱዋ ቤዓናው ሂንቴንቱ ኣሞቲያ ዎዲ ያና፤ ሺን ቤዒኪታ። 23ቃሲ ኡንቱንቱ ሂንቴና፥ ‹ሃዌኩ ሃዋና› ዎይ ‹ሄዋና› ያጋናዋንታ። ሺን ኡንቱንታ ካሊዴ፥ ኡንቱንቱና ቦፒቴ። 24ዋልቃንይ ሳሉዋን ዎልቃሚያ ዎዴ፥ ሃ ጋፃፔ ሂኒ ጋፃ ፖዑ ፖዒያዋዳን፥ ኣሳ ናዓ ዩሳይካ ሄዋዳን ሃናናዋ። 25ሺን ኮይሮቲዴ ኣሳ ናዓይ ዳሮ ሜቱዋ ሜቶታናዉኔ ሄ ዎዲያን ዴዒያ ዬሌታን ኢፄታናው ቤሴ።

26«ኖሄ ዎዲያን ሃኖዋዳንካ፥ ኣሳ ናዓይ ቆንጪያ ጋላሳንካ ሄዋዳን ሃናናዋ። #ዶም 6፡5-8 27ኖሄ ማርካቢያ ጌሎ ጋላሳይ ጋካናው ኡንቱንቱ፥ ሚዲኔ ኡሺዴ፥ ኣኪዲኔ ኣኬቲዴ ዴዒሺን፥ ባሻ ሃይ ዪዴ ኡባ ኣሳካ ባዪዜዳ። #ዶም 7፡6-24

28«ሄዋዳንካ፥ ሎፄ #17፡27፥ 28 ኖሄ … ሎፄ፡ ፆሳይ ቢታ ባሻ ሃን ባዪዜዳ ዎዴ፥ ኢ ኖሃኔ ኣ ጎሌ ኣሳ ኣሼዳ። ፆሳይ ሶዶማኔ ጋሞራ ካታማቱዋ፥ ኢዚን ዴዒያ ኢታ ኣሳቱዋ ኡባ ታማን ባዪዜዳ ዎዴ፥ ሎፃኔ ኣ ጎሌ ኣሳ ኣሼዳ (ዶም 19፡1-29 ፄሊቴ)። ዎዲያን፥ ኣሳይ ሚዲኔ ኡሺዴ፥ ዛሊዒዴ፥ ቶኪዲኔ ጎሊያ ኬፂዴ ዴዔዲኖ። 29ሺን ሎፄ፥ ሶዶማፔ ኬሶ ጋላሳን ቃሲ ሳሉዋፔ ታማይኔ ኤፂያ ቦንቆ ሹቻይ ቡኬዳ፤ ኡባባካ ሚዴ ዉርሴዳ። #ዶም 18፡20-19፡25

30«ኣሳ ናዓይ ቆንጪያ ጋላሳንካ ሃዋዳን ሃናናዋ። 31ሄ ጋላሳን፥ ጎሊያ ሁጲያን ዴዒያዌ፥ ጎሌ ጋርሳን ዴዒያ ሚሻ ኣካናው ዎፖ፤ ሃዋዳንካ ጎሻ ጋዴን ዴዒያዌ፥ ጉዬ ሲሞፖ። #ማት 24፡17፣ 18፤ ማር 13፡15፣ 16 32ኣኔ ሎፄ ማቻቲባ ቆፒቴ! #ዶም 19፡26 33ባሬ ሼምፑዋ ኣሻናው ኮዪያ ኡባይ፥ ባዪዜ፤ ባሬ ሼምፑዋ ባዪዚያ ኡባይ፥ ዴዑዋን ናጌ። #ማት 10፡39፤ 16፡25፤ ማር 8፡35፤ ሉቅ 9፡24፤ ዮህ 12፡25 34ታ ሂንቴው ኦዲያዌ ኣዬ ጎፔ፥ ሄ ቃማን ላዑ ኣሳቱ ኢቲ ጊሱዋን ጊሳናዋንታ፤ ኡንቱንቱፔ ኢቱ ኣኬቲና ላዔያዌ ኣታናዋ። 35ላዑ ማጫ ኣሳቱ ኢቲ ዎፃን ጋጫናዋንታ፤ ኢቲና ኣኬቲና፥ ኢቲና ኣታናዉኑ። 36ላዑ ኣሳቱ ጎሻ ጋርሳን ዴዒኖ፤ ኢቱ ኣኬታናዋ፥ ላዔያዌ ኣታናዋ» ያጌዳ። #ማት 24፡40

37ኣ ካሊያዋንቱ ዬሱሳ፥ «ጎዳው፥ ሄዌ ሃቃን ሃናናዌ?» ያጌዲኖ።

ኢካ ዛሪዴ፥ «ባኩታይ ዴዒያሳ ሾርቲ ሺቃናዋ» ያጌዳ።

Currently Selected:

ሉቃሳ 17: dwrENT

Highlight

Copy