NAI VAKATEKIVU 7
7
Sa vodo ki waqa ko Noa, kei na nona mataqali, kei na manumanu eso, ka ra bula, ni sa waluvu ko vuravura.
1A sa kaya vei Noa ko Jiova, Mo vodo ki na waqa, ko iko kei na nomu lewe-ni-vale kecega; ni'u sa raici iko ni ko sa yalododonu e mataqu e nai tabatamata oqo. 2Mo kauta vata kei iko na manumanu e yavai va sa savasava me yavitu, mai na mataqali kecega, na ka tagane kei na ka yalewa; kei na manumanu e yavai va sa sega ni savasava me yarua, mai na mataqali kecega, na ka tagane kei na ka yalewa; 3a manumanu vuka talega me yavitu, mai na mataqali kecega, na tagane kei na yalewa; me vakabulai na kedra kawa e vuravura: 4ni sa vo walega e vitu na bogi, ka'u na qai vakatauca tiko na uca ki na vuravura me vasagavulu na siga ka vasagavulu na bogi; ia ka'u na vakawabokotaka e vuravura na ka bula kecega ka'u a bulia.
5A sa kitaka ko Noa me vaka na ka kecega sa vakarota vua ko Jiova.
6A sa ono na drau na yabaki i Noa, ni sa luvuci vuravura na waluvu. 7A sa vodoka na waqa ko Noa, kei iratou vata kaya na luvena tagane, kei na watina, kei na watidratou na luvena, e na vuku ni waluvu. 8A manumanu e yavai va sa savasava, kei na manumanu e yavai va sa sega ni savasava, kei na manumanu vuka, kei na ka kecega sa qasi voli e vuravura, e na nodra mataqali kecega, 9era sa vodo yarua ki na waqa kivei Noa, na ka tagane kei na ka yalewa, me vaka ka vakarota vei Noa na Kalou. 10Ia sa bogi vitu, sa qai yaco na waluvu ki vuravura.
11E na kena i kaono na drau ni yabaki ni bula i Noa, e na kenai karua ni vula, e na kenai katinikavitu ni siga ni vula, io, e na siga dina ko ya, sa basuki kina nai vurevure kecega ni wai titobu, a sa tadola nai sogo kei lomalagi. 12A sa tau tiko na uca ki vuravura ka siga vasagavulu ka bogi vasagavulu. 13E na siga dina ko ya sa vodoka na waqa ko Noa, kei Semi, kei Ame, kei Jefeca, na luve i Noa, kei na wati i Noa, kei na watidratou na luvena tolutolu. 14Ko iratou, kei na manumanu sa sega ni lasa kecega e na kedra mataqali, kei na manumanu e yavai va kecega e na kedra mataqali, kei na ka kecega sa qasi voli e vuravura e na kedra mataqali, kei na manumanu vuka kecega e na kedra mataqali, io, na manumanu vuka e na kedra mataqali kecega. 15A ra sa vakavodoki vei Noa ki waqa me yarua e na mataqali manumanu kecega, sa tiko kina nai cegu ni bula. 16Ia ko ira era sa vakavodoki kina sa dua na ka tagane ka dua na ka yalewa, e na mataqali manumanu kecega, me vaka ka vakarota vua eliu na Kalou: a sa sogolati koya ki loma ni waqa ko Jiova.
17A sa bogi vasagavulu na waluvu e dela i vuravura; a sa vakalevutaki tiko na wai, a sa nawa na waqa, ka sa toro cake e dela i vuravura: 18a sa gumatua na wai, ka sa tubu vakalevu e dela i vuravura; ka sa ciri voli na waqa e dela ni wai. 19A sa gumatua vakalevu sara na wai e dela i vuravura; a sa dromu na veiulu-ni-vanua cecere kecega sa tiko e ruku i lomalagi. 20Sa gumatua na wai; ka sa lako cake ka tinikalima na kiupiti, na kena dromu na veiulu-ni-vanua.
21A sa mate na manumanu kecega sa bula voli e vuravura, io na manumanu vuka, kei na manumanu e yavai va, kei na manumanu e sega ni lasa, kei na ka kecega sa qasi voli e vuravura, kei na tamata kecega: 22sa mate na ka kecega sa tiko e ucuna nai cegu ni bula, io na ka kecega sa tiko e na vanua mamaca. 23Io, sa kawa boko na ka bula kecega sa tiko e dela ni vanua, na tamata, kei na manumanu e yavai va, kei na ka sa qasi voli, kei na manumanu vuka, io, sa kawa boko laivi mai vuravura: a sa vo duaduaga ko Noa, kei ira era tiko vata kaya e waqa. 24A sa gumatua tiko na wai e vuravura, ka bogi dua na drau ka limasagavulu.
Currently Selected:
NAI VAKATEKIVU 7: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
