NAI VAKATEKIVU 9
9
Sa vosavakalougatataki Noa ko Jiova, sa vakatabui na dra ni manumanu, kei na veivakamatei, 1-7. Sa kaya na Kalou me kakua tale na waluvu, 8-17. Sa tea na vaini, a sa mateni e na waini, ko Noa, 20-24; a sa cudruvi Kenani, 25-27. Sa mate ko Noa, 28,29.
1A sa vosavakalougatataki Noa kei iratou na luvena na Kalou, a sa kaya vei iratou, Dou luvea, ka tubu me lewe vuqa mai, ka vakatawai vuravura. 2Ia na rerevaki kemudou, kei na domobula e na vukumudou, ena kani ira na manumanu kecega ni vanua, kei na manumanu vuka kecega, io, na ka kecega sa oso kina na vanua, kei na ika kecega ni wasawasa; era sa soli ki na ligamudou. 3A ka bula kecega sa lako rawa sa na kemudou kakana; me vaka na kau drokadroka ka'u sa solia vei kemudou na ka kecega: 4ia na lewena ga sa tiko kina na vu ni bula, io, na kena dra, mo dou kakua ni kania. 5Ia ka'u na taroga vakaidina na nomudou dra na vu ni nomudou bula; au na taroga kina na manumanu kecega, kei na liga ni tamata; io, au na taroga na mate ni tamata yadua mai vua na tamata kadua: 6ko koya sa vakadavea na dra ni tamata, ena vakadavea talega na nona dra ko ira na tamata: ni sa bulia na tamata na Kalou me sai tovo vata kaya. 7Ia koi kemudou, dou vakaluveni, ka tubu me lewe vuqa mai; mo dou vakatubura vakalevu e vuravura, ka mo dou lewe vuqa mai kina.
8A sa vosa vei Noa na Kalou, vei iratou talega na luvena, a sa kaya, 9Raica, koi au, ka'u na vakataudeitaka na noqu veiyalayalati vei kemudou, kei ira na nomudou kawa emuri: 10kei na ka bula kecega sa tiko kei kemudou, na manumanu vuka, kei na manumanu e yavai va, kei na manumanu kecega e sega ni lasa e vanua era sa tiko kei kemudou; vei ira kecega sa lako tani e na waqa, kei na manumanu kece talega ena tiko e vuravura. 11Ia ka'u na vakataudeitaka na noqu veiyalayalati kei kemudou; ka ni na sega tale ni muduki laivi na ka bula kecega e na waluvu; ia ena sega tale na waluvu me kawa boko kina ko vuravura.
12A sa kaya na Kalou, Oqo nai vakatakilakila ni veiyalayalati ka'u sa lesia vei keda, kei na ka bula kecega sa tiko kei kemudou, e nai tabatamata kecega: 13Au sa lesia na noqu drodrolagi me tu e na o, ia sa na kenai vakatakilakila ni noqu veiyalayalati kei vuravura. 14Ia, ena yaco ni'u sa kauta na o me vakarurugi vuravura, ena qai raici na drodrolagi e na o; 15ka'u na qai nanuma na noqu veiyalayalati au sa ia vei kemudou, kei na ka bula kecega e na mataqali manumanu kecega; ia ena sega ni yaco tale na wai me waluvu, me vakawabokotaka na manumanu kecega. 16Ia ena tiko e na o na drodrolagi; ka'u na qai raica, me'u nanuma kina na veiyalayalati sa tawa mudu, sa cakava na Kalou kei na ka bula kecega e na mataqali manumanu kecega sa tiko e vuravura. 17A sa kaya vei Noa na Kalou, Oqo nai vakatakilakila ni veiyalayalati, ka'u sa vakataudeitaka vei au kei na ka bula kecega sa tiko e vuravura.
18Ia ko iratou na luve i Noa ka lako tani e na waqa, ko Semi, kei Ame, kei Jefeca: ia ko Ame, na tama i Kenani. 19Ko iratou na lewe tolu oqo na luve i Noa: a sa tawa vei iratou ko vuravura taucoko.
20A sa vakatekivu ko Noa me tamata dauteitei, a sa tea e dua na loga ni vaini: 21a sa gunuva na kena waini; a sa mateni, a sa luvawale tu e loma ni nona vale laca. 22A sa kunea ko Ame na tama i Kenani ni sa luvawale ko tamana, a sa tukuna vei rau na tuakana ki tautuba. 23Ia ko Semi kei Jefeca, erau a taura e dua nai tutuvi, a sa tauca ki dakudrau, ka lako vakanadaku, ka ubia na luvawale i tamadrau; a sa rai ki muri na matadrau, a rau a sega ni kunea na nona luvawale na tamadrau. 24A sa yadra ko Noa mai na nona mateni, a sa kila na ka ka cakava vua ko koya sa gone vei iratou na luvena: 25a sa kaya,
Ena cudruvi ko Kenani;
Ena tamata kaisi botoboto vei ira na wekana.
26A sa kaya tale,
Sa vakavinavinakataki ko Jiova na Kalou i Semi;
Ia ko Kenani, me sa nona tamata wale:
27Me vakalevutaki Jefeca na Kalou,
Ia ena tiko e na vale i Semi;
Ia me nona tamata talega ko Kenani.
28A sa bula ko Noa, ni sa oti na waluvu, ka tolu na drau ka limasagavulu na yabaki. 29Ia na yabaki kecega sa bula kina ko Noa sa ciwa na drau ka limasagavulu na yabaki: a sa qai mate.
Currently Selected:
NAI VAKATEKIVU 9: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
