Los Hechos 4

Allempo anmet Pedro ñamha Juan alloꞌtsaꞌyen aꞌmhchaꞌtarethneshaꞌ

1Allempoña serrpareꞌtatenanet Pedro epoet Juanpaꞌ machayotha waxhaꞌtoña aꞌmhchaꞌtarethneshaꞌ. Oꞌ wapa kornaneshaꞌ, wapa ñamha guardia paꞌmhchaꞌtarether ñeñth kowampeneꞌ Parets paꞌpakëll. Oꞌ wapoña ñamha saduceoneshaꞌ ñeñth otets eꞌñe ñet pokthaphñothpaꞌ amach errothenoth yetanterro. 2Oꞌ waxhaꞌtetpaꞌ xha eꞌmoñeꞌtoset, tharroꞌmar Pedro ñamha Juanpaꞌ añ serrpareꞌtatenan acheñeneshaꞌ attho ñerraꞌm eꞌñe yameꞌñera Cristo amaꞌt yerroma, yameꞌñeñothpaꞌ yetanterrach. 3Paꞌtsrreꞌmoeñothetpaꞌ oꞌ arrmarethtet epsheñoꞌmaret, abeꞌtharethtet cárcelo. Allempopaꞌ oꞌ ellerren ñeñthoꞌmarña tsapathach aꞌphthoꞌtyesarethtet errothenoththeꞌ serrpareꞌtenet ateth. 4Tharraña amaꞌt ateth apharethtetpaꞌ añña ñeñth eꞌmoeꞌ ateth serrpareꞌtatanetpaꞌ shonteꞌ ameꞌñyet. Allempoña ñeñth ameꞌñetsa awañowenpaꞌ oꞌ xhap allempo amnaroch mil ñeñth ameꞌñatsa.

5Tsapathñapaꞌ oꞌ apxha amhchaꞌtarethneshaꞌ amaꞌt ñamha ñeñth pomporneshaꞌ penet amaꞌt ñamha ñeñth etsoteneꞌ ñoñets ñeñth ateth anareth. Ñeñthpaꞌ arr apxhet eꞌñe alla Jerusaléño. 6Allempopaꞌ alloꞌtsen ñamha korneshaꞌ ñeñth nanak amhchaꞌtareth ñeñth paꞌsoꞌcheñ Anás. Alloꞌtsen ñamha Caifás, ñamha Juan, ñamha Alejandro ñamha poꞌpoñexhno amhchaꞌtarethneshaꞌ ñeñth eꞌñe pamoꞌtsnaꞌtarekma korneshaꞌ ñeñth nanak amhchaꞌtareth. 7Allempoña eꞌñe apxhaꞌwetpaꞌ wapachet Pedro ñamha Juan eꞌñe all apxhena amhchaꞌtarethneshaꞌ. Allempoñapaꞌ aꞌphthoꞌtarethtet epsheñoꞌmaret. Ateth otanet amhchaꞌtareth:

—Sapaꞌ ¿eseshoꞌtña poꞌwamenkoth oꞌ saꞌkrraterña acheñ? ¿Eseshaꞌtña sapoeneꞌña llesens atthoth ateth sepena?

8Allempoña Pedro eꞌñe awamenkath poepeñoth Parets Poekamkëñpaꞌ ateth otanet:

—Amhchaꞌtarethneshachaꞌ ñamha ñeñthes pomporneshaꞌ penet, theꞌpaꞌ oꞌch notas: 9Sapaꞌ attho saꞌphthoꞌteney errothenoththeꞌ oꞌ yepha ya kowen añekop ñeñth moeroxhtetsa, ñamha attho saꞌphthoꞌteney errothenoththeꞌ oꞌ yaꞌkrrater, 10ñewa, theꞌpaꞌ oꞌch seꞌmhñoten atthoch neñotatas sa amaꞌt ñamha allowen israelneshaꞌ. Eꞌñe añ Jesucristo ñeñth nazaretoꞌmarneshaꞌ, ñeñthña ña poꞌwamenkoth theꞌpaꞌ arr then eꞌñe womech, ñeñth awaña xha echarrtena. Añ ñeñthara Jesús sañapaꞌ xhaña sekorsoꞌtampes atthoch rroma. Tharraña Pomporpaꞌ oꞌ tantater amaꞌt rroma. 11Sapaꞌ xha sottena ateth ñerraꞌm acheñ ñeñth thomateneꞌ pokoll. Ñeñthña acheñ ñeñth thomateneꞌ pokollpaꞌ xha waporeꞌtan mapoeꞌ ñeñth nanak sherbets, tharroꞌmar ama es xhapaweto poeyoxhro. Tharraña Jesúspaꞌ amaꞌt attheñ ñerraꞌm mapoeꞌ ñeñth awaporeꞌtareth ñeñthara Jesús ñeñthña nanak sherbets ateth ñerraꞌm mapoeꞌ alloch orratet pokoll nanak echarr. 12Poꞌpsheñeñpaꞌ ama eñalle alloch yekeshperra, tharroꞌmar ama eñalle poꞌpsheñeñ ñeñth anareth ñeñthchaꞌ yexhoreꞌt atthoch oꞌch aꞌkeshphatey. Amaꞌt ora errakmañen añe patsro ama eñalle atthoch yekeshperra, ñapthaña Jesús. Ñeñthpaꞌ allowa ateth otanet Pedro.

13Añña Pedro ñamha Juanpaꞌ ama poemhchaꞌnañotheyeꞌ eñoseto. Amaꞌt mameshapaꞌ ama mechaꞌteneto. Allempoña amhchaꞌtarethexhnopaꞌ oꞌ eñochet ama poemhchaꞌnañotheyeꞌ eñenetopaꞌ ñetpaꞌ ateth otet:

—Errothenothwakaꞌye eñenetña ateth. Yapaꞌ yeñotenanet ñetpaꞌ ama ayxhatarethteto atthoch eñotet kellek womenk. Ñetpaꞌ attheta ñerraꞌm poꞌpotantañ acheñeneshaꞌ ñeñth ama tama es eñotetso. Errothenothwañakaꞌye eñenetña ateth ñerraꞌm ayxhatarethet.

Allempoñapaꞌ oꞌ xhapanet poeyoxhro attho Pedro ñamha Juanpaꞌ awaña xhokma chopeñeꞌcheꞌth epoet Jesús. 14Añña ñeñth korrerrtsapaꞌ ñapaꞌxhoꞌ eꞌñe alla then allameꞌtets. Ñeñthoꞌmarña amhchaꞌtarethneshaꞌpaꞌ ama errothenoth cheꞌptareꞌtaneto. 15Allempoñapaꞌ moeñerranet aꞌyeneth. Allempoña amhchaꞌtarethneshaꞌpaꞌ serrpareꞌtatannaꞌtet eꞌñe ñañeñeta. 16Ateth otannaꞌtyeset:

—Errothenwachñakaꞌ yephanetña theꞌtheꞌ. Amaꞌt arr ora Jerusaléñopaꞌ oꞌ eꞌñe eñotwarethtet attho ñetpaꞌ orrtatet ñeñth amaꞌt yapaꞌ ama yentare. Ñeñthoꞌmarña theꞌ yapaꞌ amach errotheno yaꞌnasochoñaꞌ, eꞌñe poꞌñoxh ateth. 17Tharraña amaꞌtchaꞌ ama erroth yephanetopaꞌ theꞌpaꞌ añ poktetsa oꞌch yecheꞌptareꞌtyesanet oꞌch yotanet amach alloꞌna serrpareꞌtnenetoña ñeñth ateth pena Jesús. Tharroꞌmar yapaꞌ ama yemno allowen acheñeneshaꞌ oꞌch eꞌmareꞌtarethetwet ñeñth ateth penet theꞌ ñet arr. Oꞌch yotanet amaꞌt poesheñarra acheñ amach serrpareꞌtatatscheto.

18Allempoñapaꞌ alla agotarethterret. Ateth otarethtapoerret eꞌñe echeꞌxharro, ateth otet:

—Theꞌpaꞌ amach seserrpareꞌtatatsto ñeñth ateth pena Jesús, amaꞌt eꞌñe mamesha. Ñamha amach seyxhatatsto amaꞌt mamesha ateth yexhateꞌth Jesús awaña.

19Allempoña Pedro ñamha Juanpaꞌ ateth otanet:

—Ñewa, theꞌpaꞌ oꞌch sokthapeꞌch sa, allothpaꞌ oꞌch sotey, erraꞌtsentheꞌ pokteꞌ enten Yompor, ñatoꞌ oꞌch yameꞌñasa sa amapaꞌ oꞌch yameꞌñya Yompor. 20Yapaꞌ amach errothenoth yemmo. Añña pokteꞌ xhokmach yaꞌpotha ñeñth oꞌ yentwa ñamha ñeñth oꞌ yeꞌmwa.

21Allempoñapaꞌ attha cheꞌptareꞌtwapoenanet poꞌpocheño, allothñapaꞌ aꞌrroyarethtenet. Amhchaꞌtarethneshaꞌpaꞌ amaꞌt moeneñetañ oꞌch castiganetañpaꞌ tharraña ama errotheno, tharroꞌmar allowen acheñeneshaꞌpaꞌ eꞌñe pokteꞌ enteñet. Acheñeneshaꞌpaꞌ nanak ayeꞌchoxhtatoñet Yompor añekop ñeñth oꞌ entwet attho Yompor orrtatanet poꞌpartsoña. 22Tharroꞌmar añ yakma ñeñth oꞌ korrerrapaꞌ ñapaꞌ oꞌ paꞌtatsoch xharraꞌ poꞌcharña.

Ñeñth ameꞌñetsapaꞌ ateth pet allempo enamet Yompor poꞌwamenk

23Allempoña aꞌrroyeret Pedro ñamha Juanpaꞌ awanmoet alloꞌtsen ñeñth parro ameꞌñenet. Allempoña xhapoet allpaꞌ serrpareꞌtatosanet ateth otanet ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar ñamha ñeñth pomporneshaꞌ penet. 24Allempoña serrpareꞌtatwosetpaꞌ ñetña allowenet parropaꞌ oꞌ maꞌyocheret Yompor. Poemaꞌyocheñothpaꞌ ateth otet:

—Yompore, ñeñtheph nanak Partsoph, pha ñeñtheph yexhkatweꞌ enet ñamha amaꞌt añ pats, ñamha ora errakmañen saꞌp pha yexhkatweꞌ, ñamha amaꞌt ora esokmañen ñeñth yentyen eꞌñe alla eꞌñe phokma peyexhkatwar. 25Awath yatañ Davidpaꞌ nanak sherbhapeꞌth. Eꞌñe Pekamkëñoth peꞌñoracheꞌth, ñeñthoꞌmar ateth oteꞌth ña awath:

Errothenotheꞌ atsrreꞌmoenaña poꞌpoñ acheñeneshaꞌ ñeñth ama ameꞌñetso. Errothenotheꞌ oꞌpateñetña amaꞌt Parets, ñeñthpaꞌ eꞌñe orrena ateth penet.

26Ñeñth amhchaꞌtarethtetsa arr patsro ñetpaꞌ apxhet atthoch oꞌpachet Yompor, oꞌpachet ñamha ñeñth llesensaꞌ ñeñthara Cristo. Añpaꞌ allowa ateth oteꞌth David awath.

27-28Alla maꞌyochereterr Yompor, ateth oterreterr:

—Ñeñthoꞌmarña theꞌpaꞌ poꞌñoxh oꞌ etsota attho arr Jerusaléño oꞌ apxhet atthoch oꞌpatonapet Pechemer Jesús amaꞌt ñeñth eꞌñe kowen Parets penten pha, ñeñthña Jesús ñeñth eꞌñe kowen pesherbhayeꞌth ñeñth eꞌñe pho pellsensar. Ateth awathotheñ eꞌñe peñotwaneteꞌth ñetpaꞌ oꞌch etsotaterrnapet peñoñ ateth ñerraꞌm Herodes, ñamha Poncio Pilato, ñamha poꞌpoñexhno acheñ ñeñth ama ameꞌñetso, amaꞌt ñamha israelneshaꞌ. Tharraña ñeñth ateth oꞌpachetpaꞌ theꞌpaꞌ oꞌ etsotwerra peñoñ. 29Amaꞌt theꞌpaꞌ Yompore peñoteney ñetpaꞌ nanak moeneñet oꞌch yoreꞌtameꞌtyet yamha. Theꞌpaꞌ oꞌch yenamaph awamenkath pephaꞌyepaꞌch ñeñthey thorretsa phokop atthoch amach yemhchaꞌtatsto. Eꞌñepaꞌch womenkokma yeserrpareꞌtonaph peñoñ. 30Phorrtatonayepaꞌch pewamenk atthoch korraꞌwerra ñeñth atsnaꞌtyets. Eꞌñe yexhoreꞌteñoth Jesús phorrtatonayepaꞌch pepartsoña, ñamha ñeñth ama yentare phorrtatanetchaꞌ atthoch eñochet phapaꞌ ñeñtheph nanak Partsoph —eꞌñe yexhoreꞌteñoth Pechemer Jesús, ñeñth eꞌñe kowen Parets penten pha, ñeñth eꞌñe kowen pesherbeneꞌ. Añpaꞌ allowa ateth maꞌyochet.

31Allempoña maꞌyochwetpaꞌ allña apxhenetpaꞌ oꞌ pella ora all anorrxhenet. Allempokma allowenetpaꞌ oꞌ chorranet Parets Poekamkëñ, atthoch eꞌñe womenkokma oꞌch serrpareꞌtoñet Yompor poꞌñoñ.

Attho es apannaꞌtyeseteꞌth pameꞌñeñothet Yompor

32Allempotheñña ñet ñeñthet ameꞌñatseteꞌthpaꞌ oꞌ parrokmatwet eꞌñe kowen. Eꞌñe parra kothaphñats anmoeteꞌth poeyoxhreto ñeñth amoerañtetsa. Ama eseshayeꞌ otatseꞌthe ñeñthpaꞌ ñapthetach es oꞌpatet, añña xhokma apannaꞌtyeseteꞌth ñerraꞌm eseshaꞌ es palltatseꞌth. 33Jesús poellsensarneshaꞌpaꞌ eꞌñe poꞌwamenkokmañen aꞌpothoñeteꞌth attho tanterra Yepartseshar Jesús. Yomporpaꞌ nanak moeraneteꞌth, ñamha nanak awamenkath phaneteꞌth. 34Eꞌñe ñeshetopaꞌ ama eseshaꞌ es palltatseꞌthe. Añña ñeñth allpon echyeseteꞌth poꞌpatseñ, amapaꞌ paꞌpakëllpaꞌ oꞌch vendaꞌyeseteꞌth. Ñeñthña allpon ganaꞌyeseteꞌthpaꞌ oꞌch wapachet 35alloꞌtsen allsensareth. Allothñapaꞌ oꞌch aposet ñeñth allsensareth. Allsensarethñapaꞌ oꞌch apaꞌyesan ñeñth es palltatseꞌth. 36Añpaꞌ ñeñth ateth peꞌth poesheñarr añ paꞌsoꞌcheñ José, ñeñth chiproꞌmarneshaꞌ ñamha ñeñthara levitanaꞌtar. Añña ñeñth allsensarethneshaꞌpaꞌ oꞌ socheret José Bernabé. Añña soꞌchñets Bernabépaꞌ ñeñth otets yeñoño amoerañanaꞌtar. 37Ñañapaꞌ echaneꞌth allpon pats. Allempoñapaꞌ vendaꞌwepaꞌ oꞌ wapatan allpon kelle ñeñth ganapaꞌ oꞌ aposan ñeñth allsensarethneshaꞌ.

Currently Selected:

Los Hechos 4: ame

Highlight

Copy