Néra Njékaḭkulaje 1
1
Ndukun gə́ wɔji dɔ ree lə Ndilmeenda lé
1Ǝi, Teopil, ta gə́ ma m’ulai mee maktub ləm gə́ kédé lé m’wɔji ne dɔ né gə́ Jeju un kudu ra ləm, gə dɔ né gə́ yeḛ ndoo dee ləm tɔ un kudee ndɔ gə́ dɔtar#Lug 1.1-4 2saar ndɔ gə́ d’unee d’aw ne səa dara. Ndəa neelé yeḛ un ndia gə goo siŋgamoŋ lə Ndilmeenda ar njékaḭkulaje ləa gə́ yeḛ ɔr dee unda dee gə kəmee lé d’oo né gə́ yeḛ ndigi kar dee ra. 3Loo gə́ yeḛ ula rəa ndubu saar yeḛ wəi ne ndá yeḛ tel teḛ kəm dee’g wai kəmba tɔɓəi yeḛ nai sə dee ndəa rɔ-sɔ riba sə dee dɔ rəa’g gɔl bula ar loo maḭyee godo ləm, tɔji dee ta néje gə́ wɔji dɔ ɓeeko̰ lə Ala lé ləm tɔ. 4Loo gə́ yeḛ wa sə dee dɔ na̰ lé ndá yeḛ un ndia ar dee gə mba kar dee d’uba Jerusalem d’ya̰ el nɛ d’a si keneŋ ŋgina ne né gə́ Bɔ neḛ un ne ndia ar dee kédé gə́ to né gə́ neḛ kara m’pa taree n’ar dee kédé mba̰ lé to#Lug 24.49: 5mbata Ja̰ lé ra dəwje batɛm gə mán nɛ ndɔ nai bula bəl ndá d’a ra sí batɛm gə Ndilmeenda ya#Mat 3.11, Mar 1.8, Lug 3.16, Ja̰ 1.33.
Kḭ kaw dara lə Jeju lé
6Yen ŋga njékaḭkulaje mbo̰ na̰ rəa’g dəjee pana: Mbaidɔmbaije, see ndəa neelé nja ɓa i a kar ɓeeko̰ lə Israɛl lé tel to lée’g gogo wa.
7Yeḛ tel ila dee keneŋ pana: Bɔm nja wɔji ndəa gə kàree to gə́ mée ndigi ɓó to ta lə sí-seḭ ɓa gə mba gər ndəa əsé kàree el. 8Nɛ seḭ a kiŋgaje siŋgamoŋ loo gə́ Ndilmeenda a dəb dɔ sí’g ndá seḭ a toje ne njékɔrgootaje ləm mee ɓee gə́ Jerusalem ləm, gə ɓeeje lai gə́ wɔji dɔ Jude ləm, gə Samari ləma, gə kɔr ne rudu naŋg nee njal ləm tɔ#Mat 28.19, Mar 15.16, Lug 24.47-48.
9Loo gə́ yeḛ pata neelé mba̰ ndá né unee dan dee’g ar dee d’ée njal mum on dəa ar dee d’ée el saar#Mar 16.19, Lug 24.50-51. 10Loo gə́ d’aar d’aa gée gə́ dara sɔmɔmo̰ ndá dəwje joo gə́ d’ula kubu gə́ nda rɔ dee’g d’uba dee naŋg bus 11ndá dəji dee pana: Seḭ dəwje gə́ Galile, see ban ɓa aar aaje loo gə́ dara sɔmɔmo̰ bèe wa. Jeju lé gə́ d’unee dan sí’g d’aw səa dara gə́ seḭ éeje lé pia gə́ a gə kḭ dara tel ree nja to kən.
12Yen ŋga deḛ d’ḭ dɔ mbal gə́ d’aar keneŋ ria lə Koiyoje lé d’ɔs tel d’aw Jerusalem, gə kuree rəgəsə ba bèe d’wɔji ne boa-loo-kaw gə́ ndɔ-kwa-rɔ’g. 13Loo gə́ deḛ teḛ ɓée ndá deḛ d’al d’aw mee kəi gə́ tar gə́ rɔd dɔ maree’g loo gə́ d’wa dɔ na̰ keneŋ ta-ta, deḛje neelé to Piɛrə, gə Ja̰, gə Jak, gə Andre, gə Pilibə, gə Tomas, gə Bartelemi, gə Matiyo, gə Jak ŋgolə Alpe, gə Simo̰ gə́ to Jelotə, gə Jude ŋgolə Jak tɔ#Mat 10.2-4, Mar 3.16-19, Lug 6.14-16. 14Deḛ lai neelé d’ɔm meḛ dee na̰’d sad ləm, d’ai meḛ dee sam-sam gə mba ra tamaji ləm tɔ ar denéje gə́ na̰je ləm, gə Mari, ko̰ Jejuje ləma, gə ŋgako̰ Jejuje ləm tɔ lé d’isi sə dee na̰’d tɔ.
Deḛ d’ɔr Matias mba karee taa tor Judas
15Mee ndəa’g neelé ŋgako̰ na̰je gə́ mbo̰ dɔ na̰ lé d’aḭ tɔl gə dɔ dee rɔ-joo. Piɛrə uba naŋg ḭta dan dee’g ula dee pana: 16Ŋgakɔmje gə́ dəwje, ta gə́ Dabid pa gə torndu Ndilmeenda mee maktub gə́ to gə kəmee gə́ wɔji dɔ Judas, yeḛ gə́ njekɔrno̰ deḛ gə́ d’wa Jeju lé taree aw lée’g béréré ya. 17Yeḛ neelé deḛ turá sə sí na̰’d ləm, yeḛ si sə sí na̰’d loo kula ra sí’g ləm tɔ.
18(Diŋgam neelé odo lar-kaiya ləa ndogo ne ndɔ ndá yeḛ ɔd oso unda siŋga dunee naŋg təd ar mée inja wuguju ar ŋgan siḭyee ɔm naŋg tɔ. 19Taree neelé oso mbi dəwje lai gə́ d’isi Jerusalem ar dee d’unda ri loo neelé gə ta koji dee Hakeldama, tel ta koji sí lé ndá pana: Ndɔ məs.) #Mat 27.3-8
20Nɛ ta gə́ deḛ ndaŋg mee maktub Pakɔs’g lé pa pana:
Maji kar ɓee ləa to nduba piu-piu ləm,
Maji kar dəw kára kara ra ɓee keneŋ el ləm tɔ. Tɔɓəi pa tɔɓəi pana:
Maji kar dəw gə́ raŋg taa toree loo-kula’g ləa#Pak 69.25, 119.8.
21Bèe ndá ar sí j’ɔrje dəw kára mbuna deḛ gə́ to njéboalookawje lə síjeḛ loo gə́ Mbaidɔmbaije Jeju nai ne sə sí gə kəmee ɓəi lé 22un kudee batɛm’g lə Ja̰ saar teḛ ne ndɔ gə́ d’unee ne dan sí’g, maji kar sí j’undá debee neelé sə sí na̰’d mba karee to njekɔrgoota teḛ dɔkumbwa’g lə Jeju to gə́ jeḛ bèe tɔ#Mat 3.16, Mar 1.9, 16.19, Lug 3.21, 24.51.
23Deḛ d’ɔr dəwje joo d’unda dee no̰ dee’g, yeḛ gə́ kára ria lə Jisəb gə́ d’unda ria lə Barsabas gə́ deḛ ɓaree Justus ləm, yeḛ gə́ kára ria lə Matias ləm tɔ. 24Tɔɓəi deḛ ra tamaji pana: Mbaidɔmbaije, i gə́ gər meḛ dəwje lai lé maji kari tɔji sí yeḛ gə́ i nja ɔree mbuna dəwje joo’g neelé 25gə mba karee to gə́ njeboakula ləi sə sí ləm, gə mba karee to sə sí njekaḭkula ləi ləm tɔ mbata Judas lé uba sí ya̰ sí ɔd aw loo ləa mba̰.
26Deḛ ra né asəna gə téen bèe dɔ dee’g ndá téen lé oso dɔ Matias’g ndá Matias lé ɓa d’ulá mbuna njékaḭkulaje gə́ dɔg-gir-dee-kára’g lé tɔ.
Currently Selected:
Néra Njékaḭkulaje 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
