Néra Njékaḭkulaje 4
4
Piɛrə gə Ja̰ d’aar no̰ njékaa dɔ ɓeeje’g
1Loo gə́ Piɛrə gə Ja̰ d’isi d’ula dəwje ta bèe-bèe ndá njékinjanéməsje gə njeŋgəm kəi-Ala gə Saduseḛje ree d’iŋga dee dɔ’g. 2Meḛ dee o̰ dee dɔ né gə́ deḛ ndoo koso-dəwje’g neelé mbata deḛ d’ula dee pana: Mbɔl dɔ Jeju ɓa dəwje d’a kunda ne loo teḛ dan njé gə́ d’wəi’g. 3D’ur dɔ dee’g d’wa dee ɓugu dee daŋgai’g saar bèlè mbata kàr godo ŋga. 4Nɛ njé gə́ na̰je bula gə́ d’oo ta lə dee lé d’ɔm meḛ dee dɔ’g ar bula lə diŋgamje aḭ tɔl-dɔg-loo-mi.
5Bèlè lookàree mbaije lə dəwje ləm, gə ŋgatɔg dəwje ləma, gə njéndaji-maktubje ləm tɔ lé mbo̰ na̰ kəmlə-kəmlə Jerusalem 6ar An gə́ to gə́ ŋgɔ-njekinjanéməs gə Kayipə gə Ja̰ gə Aleja̰drə gə deḛ lai gə́ to gə́ ɓee lə mbai dɔ njékinjanéməsje-je lé d’isi keneŋ ya tɔ. 7Deḛ d’ar Piɛrə gə Ja̰ d’ḭ d’aar dan dee’g, tɔɓəi deḛ dəji dee ta pana: See siŋgamoŋ gə́ ban əsé see ri na̰ ɓa seḭ raje ne né togə́bè wa.
8Yen ŋga Ndilmeenda rusu mee Piɛrə njḭ-njḭ aree ula dee pana: Seḭ mbai-ɓeeje gə ŋgatɔg Israɛlje lé 9to gə́ ɓogənè seḭ dəji síje ta dɔ noji gə́ jeḛ j’wa gə njerɔko̰ mba kar sí j’ula sí né gə́ ar rəa to ne kari lé 10maji kar sí-seḭ lai gərje gao ləm, kar koso-dəwje gə́ Israɛl lai kara gər gao ləm tɔ. Jeju Kristi gə́ Najaret gə́ seḭ ɗareeje ɓa Ala aree unda loo teḛ dan njé gə́ d’wəi’g ɓəi lé mbɔl dɔ ria-yeḛ nja ɓa rɔ dəw neelé tel to ne kari péd-péd kəm sí’g. 11Jeju neelé to gə́ Pil mbal gə́ seḭ njékṵdakəije mbadeeje iláje ne kɔrɔ lé. Nɛ yee nja tel to mbal kunda dɔ kum kəi gə́ gəd tɔ#Pak 118.22.
12Dəw gə́ raŋg rara kara gə́ kaji a kḭ rəa’g lé godo. Ɓó lé seḭ a kawje rara gin dara gə dɔ naŋg nee mbuna dəwje’g kara seḭ a kooje ri dəw gə́ raŋg gə mba kun kaji ne lé el.
13Loo gə́ deḛ d’oo Piɛrə gə Ja̰ pata gə́ gəd ya ndá kaar dee-deḛ dəwje neelé wa dee paḭ mbata deḛ d’oo dee gə́ dəwje gə́ mḭdé ba gə́ d’aw loo-ndoo-né’g el, nɛ deḛ tel gər dee gə́ njéboalookawje lə Jeju tɔ. 14Nɛ loo gə́ deḛ d’oo njerɔko̰ gə́ rəa tel to kari péd-péd aar sə dee na̰’d lée’g neelé ndá deḛ d’oo loo kila ta’g el. 15Deḛ d’un ndu dee gə mba kar dee d’unda loo teḛ loo-gaŋg-rəwta’g lə Jibje ndá deḛ dəji na̰ ta dɔ dee’g pana: See ɗi ɓa j’a ra gə dəwje neelé wa. 16Mbata némɔri gə́ boo gə́ deḛ ra lé to raga ndəgəsə kəm njé gə́ Jerusalem’g lai ɓó jeḛ j’a kaskəm maḭ el. 17Nɛ mba kar néra dee lé nea̰ oso gə loo mbidi-mbidi mbuna koso-dəwje’g el ndá maji kar sí j’ɔg dee rədədə kar dee pata gə ri dəw neelé d’ar nana kara gogo el ŋga.
18Deḛ tel ɓar dee gogo ndá d’ɔg dee loo pata gə loo ndoo dəwje ta gə́ ri Jeju rədədə ya. 19Piɛrə gə Ja̰ tel d’ila dee keneŋ pana: Ǝ̰jije maji ooje no̰ Ala’g ɓasinè ɓa, see ra torndu sí-seḭ ŋga ɓa maji unda ra ka̰ Ala wa. 20Mbata jeḛ lé j’askəm kəw rɔ sí dɔ pata né gə́ jeḛ j’oo gə kəm sí gə mbi sí lé el.
21Deḛ d’ḭ d’ɔg dee rədədə dɔ’g gɔl kára ɓəi ɓa tel d’ɔm dee tar, deḛ d’oo loo ra sə dee né el mbata koso-dəwje lai d’ula rɔnduba dɔ Ala’g wɔji dɔ né gə́ teḛ togə́bè’g lé. 22Mbata dəw gə́ d’ɔr rɔko̰ rəa’g gə mɔri neelé ləb kojee dum rɔ-sɔ ya.
Tamaji lə njétaamee-Kristije
23Loo gə́ d’ɔm dee tar mba̰ ndá d’ɔd d’aw rɔ njé’g lə dee, deḛ d’ɔr sor néje lai gə́ mbai dɔ njékinjanéməsje-je gə ŋgatɔgje d’ula dee lé. 24Loo gə́ d’oo bèe ndá d’unda ndu dee na̰’d bura d’ar Ala pana: Mbaidɔmbaije, i nja unda dara gə naŋg nee gə baa-boo-kad gə néje lai gə́ to keneŋ ləm#Tr 20.11, Neh 9.16, Pak 146.6, 25i nja ɓa pata gə goo Ndilmeenda ula ta bɔ síjeḛ Dabid gə́ to kura ləi ləm tɔ pana:
See ban ɓa ginkoji dəwje gə raŋg ra né birim-birim
D’ar kəsta ɓa wa meḛ koso-dəwje bèe wa.
26Mbaije gə́ dɔ naŋg nee d’wa dɔ gɔl rɔ dee ləm,
Njéko̰ɓeeje kara d’ɔm sə dee na̰’d ləm tɔ
D’ḭ ne gə Mbaidɔmbaije gə yeḛ gə́ wa dəa gə ubu lé#Pak 2.1-2.
27Tɔgərɔ ya Herɔdə gə Po̰sə Pilatə d’ɔm na̰’d téréré gə ginkoji dəwje gə raŋg gə Israɛlje gə́ mee ɓee’g neelé mba kḭ gə kura ləi Jeju gə́ i wa dəa gə ubu ɔree unda ne gə kəmee doi lé ya#Mat 27.1-2, Mar 15.1, Lug 23.1,7-11, Ja̰ 18.28-29 28mba kar néje lai gə́ i wɔji gə jii gə tai kédé par-par lé deḛ ra nja. 29Ɓasinè lé Mbaidɔmbaije, aa oo, loo kɔg gə́ d’ɔg sí rədədə lé ndá ar kuraje ləi d’ɔr ta ləi gə kəm ŋgon diŋgam ya ləm, 30ula jii ndiŋ ar dee gə mba kar dee d’ɔr ne rɔko̰je ləm, gə ra ne némɔrije ləma, gə ra ne néje gə́ dumkoo ləm tɔ gə ri Jeju, kura ləi gə́ i undá gə kəmee lé ya.
31Loo gə́ deḛ ra tamaji neelé mba̰ ndá kəi yə ula déréré-dèrèrè. Ndilmeenda taa meḛ dee pəl-pəl, ar dee d’ɔr ta lə Ala gə kəm ŋgon diŋgam tɔ.
Kɔm na̰’d, gə nojikwa lə njémeendaje
32Koso-dəwje gə́ d’un meḛ dee neelé d’ɔm meḛ dee na̰’d sad d’isi d’asəna gə dəw gə́ kára ba bèe. Dəw kára kara mbuna dee’g oo néje ləa gə́ né kea̰-yeḛ nja gə karee el, nɛ deḛ lai d’oo néje lə dee gə́ ka̰ na̰ ya#NNk 2.44-45. 33Njékaḭkulaje lé d’ɔr goo ta teḛ dɔkumbwa’g lə Mbaidɔmbaije Jeju d’aree ɓar mḭ yaa̰. Deḛ lai d’isi dan boo-meekulɔm’g. 34Dəw kára kara né lalee mbuna dee’g el, deḛ lai gə́ ndɔje lə dee gə kəije lə dee to keneŋ lé ndogo 35d’ya̰ d’odo laree d’aw d’ɔm no̰ njékaḭkulaje’g d’ar dee kai dee kára-kára lai d’wɔji ne dɔ né gə́ d’aw ndée lé.
36Jisəb, yeḛ gə́ njékaḭkulaje d’unda ria lə Barnabas (tel ta koji sí pana: Ŋgon lə njekula diŋgam meḛ dee’g lé) yeḛ to dəw gə́ Lébi gə́ ɓee-kojee to gə́ Siprə lé 37yeḛ ndogo ndɔ ləa ya̰ laree odo ree ɔm no̰ njékaḭkulaje’g tɔ.
Currently Selected:
Néra Njékaḭkulaje 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
