Tel tura Godndu 12
12
Tel tura godnduje gə ndukunje
1Aa ooje, godnduje gə ndukunje gə́ seḭ a kaaje dɔ dee kər-kər gə mba ra née, mba kar sí síje ne kəmba mee ɓee gə́ Njesigənea̰ Ala lə bɔ síje-je ar sí gə́ né ka̰ sí-seḭ lé ɓa nee:
2Seḭ a tujije looje lai gə́ ginkoji dəwje gə raŋg gə́ seḭ a gə tuba deeje lé ra né keneŋ d’ar magəje lə dee dɔ sém mbalje’g ləm, gə dɔdərlooje’g ləma, gə gel kagje gə́ rara gə́ təb gə́ to rigim ləm tɔ. 3Seḭ a tɔsje loo-nékinjanéməsje lə dee tilaje ləm, seḭ a tɔje néndajije lə dee pɔs-pɔs ləm, seḭ a rooje magəje lə dee ləm, seḭ a tədje magəje gə́ deḛ tɔl dee gə́ néndajije lé ləma, seḭ a tujije ri dee dɔ looje’g neelé ləm tɔ#TtG 7.5. 4Seḭ a ndajije kəm dee raje togə́bè gə Ala lə sí gə́ Njesigənea̰ el. 5Nɛ seḭ a sa̰geeje loo-siée’g loo gə́ Ala lə sí gə́ Njesigənea̰ a mbər mbuna ginkojije’g lə sí lai gə mba kunda ria dɔ’g lé ləm tɔ. 6Lée gə́ neelé ɓa seḭ a reeje keneŋ gə nékinjanéməsje lə sí gə́ ka̰ roo ləm, gə nékinjanéməsje lə sí gə́ raŋg ləm, gə néje lə sí gə́ dɔg kun təa kára kar lé ləm, gə dɔ koje lə sí gə́ doŋgɔr ləm, gə nékarje gə́ ka̰ tɔl ne ta ndukun bém lé ləm, gə nékar gə́ ka̰ kḭ gə mee kar ləma, gə ŋgandər nékulje lə sí gə́ boi-boi əsé gə́ lam-lam ləm tɔ. 7Lée gə́ neelé ɓa seḭ a ko̰je muru no̰ Njesigənea̰ Ala’g lə sí keneŋ, seḭje gə njémeekəije lə sí lai a raje rɔlel mbata némeemajije lai gə́ Ala lə sí gə́ Njesigənea̰ ar sí, loo gə́ yeḛ tɔr ne ndia dɔ sí’g lé. 8Né gə́ jeḛ n’raje loo gə́ nee ɓogənè, loo gə́ nana kara ra né to gə́ mée ndigi lé seḭ a raje togə́bè el ŋga 9mbata seḭ teḛje loo-kwa-rɔ gə́ Ala lə sí gə́ Njesigənea̰ ar sí gə́ nédɔji lə sí lé el ɓəi. 10Nɛ seḭ a gaŋgje baa gə́ Jurdɛ̰ ndá seḭ a síje mee ɓee gə́ Ala lə sí gə́ Njesigənea̰ a kar sí gə́ né ka̰ sí lé, yeḛ a kar sí loo gə́ yeḛ a kɔr sí ji njéba̰je’g lə sí gə́ gugu dɔ sí lé ndá seḭ a síje keneŋ gə meekulɔm ya. 11Bèe ɓa, lé gə́ neelé Ala lə sí gə́ Njesigənea̰ a kɔr kəm loo keneŋ mba kar ria ɓar dɔ’g. Lée gə́ neelé ɓa seḭ a reeje gə néje lai gə́ ma m’un ndum dɔ’g m’ar sí lé: nékinjanéməsje lə sí gə́ ka̰ roo ləm, gə nékinjanéməsje lə sí gə́ raŋg ləm, gə néje lə sí gə́ dɔg kun təa kára kar ləm, dɔ koje lə sí gə́ doŋgɔr ləma, gə nékarje lai gə́ seḭ a kɔrje kəmee gə mba karje Njesigənea̰ gə mba tɔl ne ta ndukunje lə sí bém ləm tɔ. 12Lée gə́ neelé ɓa seḭ a kalje rɔ sí keneŋ no̰ Njesigənea̰ Ala’g lə sí, seḭ ləm gə ŋgan síje gə́ diŋgam gə njé gə́ dené ləm, gə kuraje lə sí gə́ diŋgam gə njé gə́ dené ləma, gə Ləbije gə́ d’isi mbuna sí’g ləm tɔ, mbata deḛ lé d’a kiŋga néka̰ dee əsé nédɔji dee mbuna sí’g el. 13Meḛ sí dɔ rɔ sí’g nà a kinjaje nékinjanéməsje lə sí gə́ ka̰ roo dɔ looje lai gə́ seḭ a gə kooje lé. 14Nɛ seḭ a kinjaje nékinjanéməsje lə sí gə́ ka̰ roo mee loo gə́ Njesigənea̰ a mbər mbuna ginkojije’g lə sí ndá lé gə́ neelé ɓa seḭ a raje néje lai gə́ ma m’un ndum dɔ’g m’ar sí lé ya tɔ. 15Lé bèe kara loo gə́ mal sɔ naḭ ra sí ndá seḭ a kasjekəm tɔlje nékulje gə mba sɔ dakas dee tarəwkɔg’dje lə sí lai gə goo ndutɔr gə́ Ala lə sí gə́ Njesigənea̰ a tɔr dɔ sí’g, dəw gə́ mina̰ əsé yeḛ gə́ àr kara a sɔ to gə́ d’usɔ ne ndooi əsé arkas bèe tɔ. 16Nɛ né kára ba lé seḭ a sɔje məs el: seḭ a kɔmeje naŋg to gə́ mán bèe ya#Gn 9.4, Ləb 7.26-27, 17.10-14, 19.26, TtG 15.23 .
17Né gə́ dɔg kun təa kára kar gə́ to kó lə sí əsé mán-nduú lə sí əsé ubu lə sí əsé ŋgandər da-kulje lə sí gə́ boi-boi əsé dee gə́ lam-lam əsé né gə́ rara kara gə́ mbuna nékarje’g lə sí gə́ ka̰ tɔl ne ta ndukun lə sí bém əsé nékarje lə sí gə́ ka̰ kḭ gə mee kar əsé dɔ koje lə sí gə́ doŋgɔr lé seḭ a kasjekəm sɔje loo-si sí’g el. 18Nɛ no̰ Njesigənea̰ Ala’g lə sí ɓa seḭ a sɔje keneŋ, loo gə́ Ala lə sí gə́ Njesigənea̰ a mbər lé, seḭ ləm gə ŋgan síje gə́ diŋgam gə njé gə́ dené ləm, gə kuraje lə sí gə́ diŋgam gə njé gə́ dené ləm, gə Ləbije gə́ d’a si mbuna sí’g ləm tɔ ndá to no̰ Njesigənea̰ Ala’g lə sí ɓa seḭ a raje rɔlel keneŋ dɔ némajije lai gə́ seḭ a kiŋgaje lé ya. 19Gə ləbje lai gə́ seḭ a gə síje ne kəmba mee ɓee’g lə sí lé meḛ sí dɔ rɔ sí’g nà a kya̰je goo Ləbije.
20Loo gə́ Ala lə sí gə́ Njesigənea̰ a kila tad rəw-nim lə sí maree’g to gə́ yeḛ un ne ndia ar sí ne pana: ɓó lé mal sɔ da ra sí ɓa seḭ paje pana: Jeḛ ndiŋga rɔ sí gə mba sɔ da ndá seḭ a sɔje kaareeje as sí nag ya tɔ. 21Ɓó lé loo gə́ Ala lə sí gə́ Njesigənea̰ a mbər gə mba kar ria ɓar dɔ’g ɓa to əw sə sí ndá seḭ a kasjekəm tɔlje daje gə́ boi-boi əsé gə́ lam-lam to gə́ m’un ne ndum m’ar sí lé ndá seḭ a sɔje tarəwkɔgje’g lə sí gə goo malee gə́ ra sí lé ya. 22Seḭ a sɔ deeje to gə́ d’usɔ ne ndooi əsé arkas bèe, dəw gə́ mina̰ əsé dəw gə́ àr kara d’a sɔ ya joo bɔr. 23Nɛ né kára ba lé ɔgje rɔ sí dɔ sɔ məsee’g mbata məs lé to kəmee lə né ndá seḭ a sɔje dakasee gə kəmə ləa na̰’d el tɔ#Ləb 17.10-14. 24Seḭ a sɔje məsee el: seḭ a kɔmeje naŋg to gə́ mán bèe. 25Seḭ a sɔje el, bèe ɓa rɔ sí a lel sí ne, seḭ ləm gə ŋgan síje gə́ goo sí’g ləm tɔ, loo gə́ seḭ a raje né gə́ danasur kəm Njesigənea̰’g lé ya.
26Nɛ néje gə́ seḭ ndiŋgaje rɔ sí gə mba kundaje gə kəmee ləm, gə nékarje gə́ seḭ a karje gə mba tɔl ne ta ndukun bém ləm tɔ lé seḭ a kawje ne loo gə́ Njesigənea̰ a mbər’g lé ɓa. 27Seḭ a kunje nékinjanéməsje lə sí gə́ ka̰ roo ndá seḭ a kɔmje dakas dee ləm gə məs dee ləm tɔ dɔ loo-nékinjaməs’g lə Ala lə sí gə́ Njesigənea̰, mbuna nékinjanéməsje’g lə sí gə́ raŋg lé seḭ a kɔmje məs dee dɔ loo-nékinjaməs’g lə Ala lə sí gə́ Njesigənea̰ nɛ dakas dee ɓa seḭ a sɔje ya.
28Maji kar sí ooje ta néje neelé lai gə́ m’un ndum dɔ’g m’ar sí ləm, maji mba kar sí raje née ləm tɔ, yee ɓa seḭ a kiŋgaje ne rɔlel, seḭ ləm gə ŋgan síje gə́ goo sí’g ləm tɔ saar-saar gə no̰ loo gə́ seḭ raje ne né gə́ maji gə né gə́ taa kəm Ala lə sí gə́ Njesigənea̰ rəgm lé.
29Loo gə́ Ala lə sí gə́ Njesigənea̰ a tuji ginkoji dəwje gə raŋg gə́ seḭ a tuba deeje no̰ sí’g lé loo gə́ seḭ a tuba deeje mba̰ ɓa gə mba síje mee ɓeeje’g lə dee ɓəi ndá 30meḛ sí dɔ rɔ sí’g nà a ndajije kəm dee mbata a tel to gum kwa sí. Meḛ sí dɔ rɔ sí’g nà a dəjije goo magəje lə dee, paje ne meḛ sí’g pana: Ginkoji dəwje gə raŋg neelé see pole magəje lə dee to gə́ ban wa ɓa jeḛ kara j’a ra to gə́ deḛ ra tɔ, bèe el. 31Seḭ a raje né gə́ togə́bè el mbata lə Ala lə sí gə́ Njesigənea̰, mbata deḛ lé deḛ pole magəje lə dee, ra ne néje lai gə́ mina̰ gə to kḛji kəm Njesigənea̰’g, ŋgan deeje gə́ diŋgam gə́ njé gə́ dené ya kara deḛ roo dee mba kula ne rɔnduba dɔ magəje’g lə dee tɔ.
Currently Selected:
Tel tura Godndu 12: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.