Tel tura Godndu 14

Ra rɔ siro lé Ala ɔg dee dɔ’g

1Seḭ toje ŋgalə Ala lə sí gə́ Njesigənea̰. Seḭ a tḭjaje rɔ sí pədərə-pədərə əsé a ndisaje dɔ sí ŋgori-ŋgori gə mbata lə kəmndooyoo el#Ləb 19.28, 21.5. 2Mbata seḭ toje koso-dəwje gə́ toje gə kəmee gə mbata lə Ala lə sí gə́ Njesigənea̰. Ala lə sí gə́ Njesigənea̰ mbər sí gə mba kar sí toje gə́ kea̰je ya mbuna koso-dəwje lai gə́ dɔ naŋg nee#Tr 19.5-6, TtG 4.20, 7.6, 26.18, Tit 2.14, 1Pi 2.9.

3Seḭ a sɔje né gə́ mina̰ kára kara el#Ləb 11.1-47. 4Aa ooje, daje gə́ seḭ a sɔ deeje lé ɓa nee: Maŋg, gə badə, gə bya̰, 5gə mbur, gə jal, gə tɔb, gə lulum, gə libi, gə bya̰ gə́ wala, gə pula-pula. 6Daje lai gə́ mèr gɔl dee tɔ ba̰ ləm, gə ŋgo gɔl dee tɔ ja̰-ja̰ ləma, gə yel mu ləm tɔ lé ɓa seḭ a sɔ deeje. 7Deḛ gə́ yel mu ba əsé dee gə́ mér gɔl dee tɔ ba̰ ba əsé dee gə́ ŋgo gɔl dee tɔ ja̰-ja̰ ba lé seḭ a sɔ deeje el. Togə́bè ɓa seḭ a sɔje jambal, gə əm, gə yəg-wuri el mbata dee yel mu ya nɛ mér gɔl dee tɔ ba̰ el, seḭ a koo deeje gə́ néje gə́ mina̰. 8Seḭ a sɔje bər el mbata mér gɔlee tɔ ba̰ ya nɛ mu ɓa yel el, seḭ a kéeje gə́ né gə́ mina̰. Seḭ a sɔje dakasee el ləm, seḭ a kɔrɔje rɔ yée el ləm tɔ. 9Aa ooje, daje lai gə́ seḭ a sɔ deeje mbuna deḛje gə́ d’aw mee

Manje’g lé ɓa nee: Seḭ a sɔje deḛ lai gə́ ŋgadŋgə dee gə ŋgwɔi dee to keneŋ. 10Nɛ dee gə́ ŋgadŋgə dee gə ŋgwɔi dee godo lé seḭ a sɔje kára kara el: seḭ a koo deeje gə́ néje gə́ mina̰ ya.

11Yelje lai gə́ d’àr lé seḭ a sɔ deeje. 12Nɛ aa ooje, dee gə́ seḭ a sɔ deeje el ɓa nee: magəra, gə mal, gə gira gə́ baa-boo-kad’g, 13gə əilə, gə gɛbɛ, gə mal, gə yelje gə́ raŋg gə́ d’as sə dee bèe tɔ, 14gə ga̰-ga̰, gə yelje gə́ raŋg gə́ d’as səa bèe tɔ, 15gə miru, gə kwɔi, gə ləbm-siri, gə niŋga, gə yelje gə́ raŋg gə́ d’as sə dee bèe tɔ, 16gə kwɔi-mbiam gə kwɔi-boo, gə ndab gə́ walá, 17gə ndab-ndororo, gə dogoro, gə baanoi, 18gə ndilili-woḭ, gə ndua, gə ŋgako̰, gə yelje gə́ raŋg gə́ d’as sə dee bèe ləm, ɓee-goom-joo, gə doo ləm tɔ.

19Néje lai gə́ d’ag naŋg ɓa d’ḭ gə bag dee lé seḭ a sɔ deeje el, seḭ a koo deeje gə́ néje gə́ mina̰. 20Seḭ a sɔje yelje lai gə́ d’àr ŋgad-ŋgad ɓa.

21Nékul gə́ wəi gə́ kwəi lé seḭ a sɔje kára kara el, seḭ a karje dəw-dɔ-ɓee gə́ a si mee ɓee’g lə sí ɓa gə mba karee sɔ əsé a karje dəw-dɔ-ɓee lé ndogo sə sí, mbata seḭ toje koso-dəwje gə́ toje gə́ kəmee mbata lə Ala lə sí gə́ Njesigənea̰. Seḭ a ndirije ŋgon bya̰ gə mbà kea̰ el#Tr 23.19, 34.26.

Né gə́ dɔg-kun-təa-kára kar

22Néje lai gə́ seḭ a kiŋgaje mee ndɔje’g lə sí mee ləbje’g kára-kára lai lé né gə́ dɔg ndá seḭ a kunje təa kára-kára karje#Ləb 27.30-33, BI 18.21. 23Seḭ a sɔje né neelé no̰ Njesigənea̰ Ala’g lə sí, mee loo gə́ yeḛ a mbər gə mba kar ria ɓar dɔ’g, né gə́ dɔg-kun-təa-kára kar gə́ to kó lə sí ləm, gə mán-nduú lə sí ləm, gə ubu lə sí ləma, gə ŋgandər nékulje lə sí gə́ boi-boi əsé dee gə́ lam-lam ləm tɔ, gə mba kar sí gərje né loo ɓəlje ne Ala lə sí gə́ Njesigənea̰ ta-ta. 24Banelə loo gə́ Ala lə sí gə́ Njesigənea̰ tɔr ndia dɔ sí’g mba̰ ndá loo gə́ yeḛ a mbər mba kar ria ɓar dɔ’g lé a kəw sə sí kar sí asjekəm kodoje né gə́ dɔg-kun-təa-kára kar lə sí lé kawje ne el. 25Bèe ndá ta néje neelé seḭ a mbélje ne lar ndá, lar neelé seḭ a kwaje ji sí’g kawje ne loo gə́ Ala lə sí gə́ Njesigənea̰ a gə kwɔji lé. 26Lée gə́ neelé ɓa seḭ a ndogoje néje lai gə́ seḭ awje ndòo dee asəna gə maŋgje, əsé badje, əsé mán-nduú, əsé nékai gə́ mḭ keneŋ, néje lai gə́ malee ra sí lé ndá seḭ a sɔ deeje no̰ Njesigənea̰ Ala’g lə sí, bèe ɓa seḭ a kalje ne rɔ sí-seḭ gə njémeekəije lə sí tɔ. 27Ləbije gə́ d’isi mbuna sí’g lé seḭ a kya̰ deeje el mbata deḛ d’iŋga sə sí né ka̰ dee əsé nénduba gə́ wɔji dɔ dee mbuna sí’g el. 28Loo gə́ rudu ləb gə́ njekɔm’g munda as mba̰ ndá, néje lai gə́ mee ndɔ’g lə sí mee ləb gə́ njekɔm’g munda gə́ kai loo dɔg ɓa kun təa kára-kára kar lé seḭ a kɔm deeje tarəwkɔg’d lə sí. 29Bèe ɓa Ləbije gə́ d’iŋga sə sí né ka̰ dee əsé nénduba el lé ləm, gə dəw-dɔ-ɓeeje ləm, gə ŋganalje ləma, gə njékəisiŋgaje ləm tɔ, gə́ d’isi mee ɓee’g lə sí lé d’a sɔ karee as dee nag-nag gə mba kar Ala lə sí gə́ Njesigənea̰ tɔr ne ndia dɔ sí’g gə dɔ kulaje lai gə́ seḭ raje gə ji sí lé tɔ.

Currently Selected:

Tel tura Godndu 14: SBA2015

Highlight

Copy

Compare

Want to have your highlights saved across all your devices? Sign up or sign in

Learn More About Maktub gə́ To gə Kəmee

Tel tura Godndu 14

Popular Bible Verses from
Tel tura Godndu 14

Listen to Tel tura Godndu 14

Bible:

Ngambay

Version: Maktub gə́ To gə Kəmee - SBA2015