Tel tura Godndu 7
7
Ndukun gə́ ka̰ tuji Kana̰je gə magəje lə dee
1Loo gə́ Ala lə sí gə́ Njesigənea̰ a kar sí a̰dje mee ɓee gə́ seḭ a gə kaw taaje gə́ ne ka̰ sí gə goo tuba gə́ yeḛ a tuba ginkoji dəwje gə raŋg no̰ sí’g lé, deḛ gə́ to Hetje ləm, gə Girgasije ləm, gə Amɔrje ləm, gə́ Kana̰je ləm, gə Peresje ləm, gə Hebje ləma, gə Yebusje ləm tɔ, ginkojije gə́ siri neelé deḛ bula yaa̰ d’unda sí ləm, siŋga dee to yaa̰ ur dɔ ka̰ sí-seḭ’g ləm tɔ#NNk 13.19, 2loo gə́ Ala lə sí gə́ Njesigənea̰ a kɔm dee ji sí’g kar sí tuji deeje lai lé ndá seḭ a tuji deeje mbad-mbad ya ɓó seḭ a manje rɔ sí gə mba kɔmje sə dee na̰’d el ləma, seḭ a raje sə dee meemaji el ləm tɔ. 3Seḭ a taa deeje gə́ denéje el ləm, seḭ a karje ŋgan síje gə́ dené taa ŋgan deeje gə́ diŋgam el ləma, seḭ a taaje ŋgan deeje gə́ dené mbata lə ŋgan síje gə́ diŋgam el ləm tɔ, 4mbata d’a kar ŋgan síje gə́ diŋgam d’un kəm dee rəw dɔm’g mba ra ne né kar magəje lə dee ndá oŋg lə Njesigənea̰ a kḭ səa pu dɔ sí’g, karee tuji sí ne kalaŋ. 5Nɛ aa ooje, né gə́ seḭ a raje kaareeje to ɓəd kəm dee’g ɓa nee: Seḭ a tɔsje loo-nékinjanéməsje lə dee tilaje ləm, seḭ a tədje néndajije lə dee ləm, seḭ a tɔje magəje lə dee pɔs-pɔs ləma, seḭ a rooje magəje lə dee gə́ deḛ tɔl dee lé ləm tɔ#TtG 12.3. 6Mbata seḭ lé seḭ toje gə́ koso-dəwje gə́ toje gə kəmee mbata lə Ala lə sí gə́ Njesigənea̰, Ala lə sí gə́ Njesigənea̰ ɔr sí mba kar sí toje koso-dəwje gə́ toje kea̰-yeḛje mbuna koso-dəwje lai gə́ dɔ naŋg nee tɔ#Tr 19.5, TtG 4.20, 14.2, 26.18, Tit 2.14, 1Pi 2.9.
7To mbata bula gə́ seḭ bulaje urje dɔ koso-dəwje’g raŋg lai ɓa Njesigənea̰ ɔm ne sə sí na̰’d mbər sí ne gə mbəa el nɛ mbata to gə́ seḭ toje gə́ lam ba mbuna koso-dəwje’g lai ya. 8To mbata Njesigənea̰ unda sí dan kəmee’g ləm, yeḛ ndigi kaar njaŋg dɔ manrɔ’g ləa gə́ yeḛ man ne rəa ar bɔ síje-je ləm tɔ, yee ɓa Njesigənea̰ ar sí undaje ne loo teḛje ne gə ji siŋgamoŋ ləa gə́ ɓar mèr-mèr ləm, yeḛ ɔr sí ne mee kəi kula ɓər’g ləm, ji Parao̰, mbai’d gə́ Ejiptə ləm tɔ.
9Bèe ndá maji kar sí gərje gao to gə́ Ala lə sí gə́ Njesigənea̰ lé yeḛ nja to Ala gə́ gəd ya. Ginka dəwje gə́ d’undá dan kəm dee’g d’aa ne dɔ ndukunje ləa kər-kər lé, yeḛ to Ala gə́ aar njaŋg dɔ manrɔ’g ləa ləm oo kəmtondoo lə dee ləm tɔ saar loo tɔl-dɔg (1.000) ya#Tr 20.5-6, 34.6-7, BI 14.18, TtG 5.9-10. 10Nɛ yeḛ uga dɔ ji deḛ gə́ d’ə̰jee bəḭ-bəḭ aree wɔji dɔ dee ndá ar dee d’udu ne guduru, yeḛ gə́ ə̰jee bəḭ-bəḭ lé, yeḛ aree nékoga dɔ jia gə́ wɔji dəa njoroŋ ya. 11Bèe ndá, maji kar sí aaje dɔ tornduje, gə ndukunje gə́ m’ar sí ɓogənè gə mba kar sí raje née ya.
Ndutɔr gə́ wɔji dɔ Israɛlje
12Ɓó lé seḭ ilaje koji dɔ ndukunje’g nee ləm, ɓó lé seḭ aaje dɔ dee gə mba ra née ləm tɔ ndá Ala lə sí gə́ Njesigənea̰ a kaa dɔ manrɔ ləa kər-kər gə mbata lə sí ləm, gə dɔ koo kəmtondoo gə́ yeḛ man ne rəa ar bɔ síje-je lé ləm tɔ#TtG 11.13-17. 13Yeḛ a kunda sí dan kəmee’g ləm, yeḛ a tɔr ndia dɔ sí’g ləma, a kar sí ɔsje goo na̰ gə́ kédé-kédé ləm tɔ, yeḛ a tɔr ndia dɔ ŋgan síje gə́ meḛ sí’g ləm, gə dɔ kandə néje gə́ dɔ naŋg’d lə sí: kó ləm, mán-nduú ləma, gə ubu ləm tɔ, a tɔr ndia dɔ nékulje’g lə sí gə́ lam-lam əsé gə́ boi-boi kar dee d’oji na̰ mee ɓee gə́ yeḛ man ne rəa ar bɔ síje-je gə mba kar sí lé tɔ. 14Seḭ a kiŋgaje ndutɔr gə́ ur dɔ ka̰ koso-dəwje’g lai, loo gə́ mee kəi’g lə sí lé seḭ a kiŋgaje diŋgam əsé dené gə́ to kawkad keneŋ el ləm, əsé da gə́ a to kawkad kara mbuna koso-nékulje’g ləi el ləm tɔ. 15Njesigənea̰ a kɔs rɔko̰je gə́ gə ria-ria rəw rɔ sí’d gə́ raŋg, yeḛ a kar rɔko̰ kára kara mbuna rɔko̰je’g majel gə́ Ejiptə gə́ seḭ gər deeje lé ra sí el, nɛ yeḛ a kar dee tuji deḛje lai gə́ d’ə̰ji sí bəḭ-bəḭ lé ɓa.
16Seḭ a tɔlje koso-dəwje lai gə́ Ala lə sí gə́ Njesigənea̰ ɔm dee ji sí’g lé, seḭ a kunje kəm sí rəw dɔ dee’g lal koo ne kəmtondoo lə dee ləm, a raje né kar magəje lə dee el ləm tɔ mbata a tel to gum kwa sí ya.
17Banelə seḭ a paje meḛ sí’g pajena: Ginkoji dəwje gə raŋg neelé deḛ bula d’unda sí, nɛ see j’a kaskəm tuba dee to gə́ ban wa. 18Maji kar sí ɓəl deeje el. Arje meḛ sí olé dɔ né gə́ Ala lə sí gə́ Njesigənea̰ ra gə Parao̰ gə deḛ lai gə́ Ejiptə lé. 19Boo néje gə́ to ɓəl ləm, gə némɔrije gə nédumkooje ləma gə ji siŋgamoŋ lə Ala lə sí gə́ Njesigənea̰ gə́ ula ndiŋ loo gə́ yeḛ ar sí undaje ne loo mee ɓee gə́ Ejiptə teḛje lé seḭ ooje gao ya, yee ɓa Ala lə sí gə́ Njesigənea̰ a ra togə́bè ya to gə koso-dəwje lai gə́ seḭ ɓəl deeje lé. 20Ala lə sí gə́ Njesigənea̰ a kula gə kṵdarasje koma̰ ne sə dee saar a tuji ne ges deḛ gə́ nai gə́ d’aḭ d’iya rɔ dee no̰ sí’g lé. 21Maji kar sí undaje bala no̰ dee’g el, mbata Ala lə sí gə́ Njesigənea̰ si mbuna sí’g, yeḛ to Ala gə́ boo gə́ to ɓəl kədm-kədm. 22Ala lə sí gə́ Njesigənea̰ a tuba ginkoji dəwje gə raŋg neelé jan-jan no̰ sí’g kɔm dee əw, seḭ a kasjekəm tuji deeje kalaŋ el ɓəi, nà daje gə́ wala d’a kɔs dɔ na̰ gə́ kédé-kédé kḭ jɔg sí tɔ. 23Ala lə sí gə́ Njesigənea̰ a kɔm dee ji sí’g, yeḛ a kɔm ɓəl dɔ dee’g kar dee d’aḭ d’ila rima-rima saar kar dee d’udu ne guduru. 24Yeḛ a kɔm mbaije lə dee meḛ ji sí’g, ndá seḭ a karje ri dee udu bo̰ dɔ naŋg nee, dəw kára kara a kaar no̰ sí’g mba koma̰ sə sí el saar kar sí tuji deeje ne pugudu. 25Seḭ a rooje néndajije lə dee gə́ deḛ tɔl dee gə́ magəje lə dee lé gə pər. Larnda əsé larlɔr gə́ keneŋ lé seḭ a raje kəmkəḭ dɔ’g el ləm, seḭ a kodo deeje el ləm tɔ, nà banelə néje neelé d’a tel to gə́ gum kwa sí, Njesigənea̰ Ala lə sí oo dee gə́ néje gə́ mina̰ kəmee’g ya. 26Né gə́ mina̰ gə́ rara kara seḭ a reeje ne mee kəi’g lə sí el nà seḭ a tel tujije ne səa na̰’d ya. Seḭ a kə̰jeje bəḭ-bəḭ ləm, a kéeje gə́ né gə́ mina̰ ləm tɔ mbata to né gə́ a gə tuji pugudu ya.
Currently Selected:
Tel tura Godndu 7: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.