Ejekel 18
18
Bo̰ néra nana kara a kɔs təa’g gə goo nérea-rəa
1Njesigənea̰ ulam ta gə rɔtaje nee pana: 2See ban ɓa seḭ paje gosota nee mee ɓee gə́ Israɛl pajena:
Bɔ-ŋganje d’usɔ besere nduú
Ndá tɔl ŋgaŋ ŋganje wa#Jer 31.29.
3Neḛ n’to njesikəmba! Mbaidɔmbaije gə́ Njesigənea̰ pa njaŋg pana: Seḭ a kooje loo pa gosota nee mee ɓee gə́ Israɛl el ŋga. 4Aa ooje, dəwje lai to kamaje, ŋgon əsé bɔ ŋgon kara to kamaje joo bɔr, dəw gə́ ra kaiya lé ya ɓa a kwəi.
5Dəw gə́ njera né gə́ gə dɔ najee ləm, gə ra né gə́ danasur gə́ to gə goo rəbee ləm, 6yeḛ sɔ né dɔ mbalje’g el ləm, yeḛ un kəmee aa ne magəje lə gel-bɔje lə Israɛl gərərə el ləm, yeḛ ula sul dɔ dené’g lə maree el ləm, yeḛ tibi mbɔr dené ndɔ kwɔməs’g ləa el ləm, 7yeḛ buguru dəw kára kara el ləm, yeḛ tel gə nékɔsnaŋ ar njea ləm, yeḛ taa né gə ɓogo el ləm, yeḛ un muru ləa ar dəw gə́ ɓó tɔlee ləm, yeḛ ula kubu rɔ dəw gə́ aw kudee dum’g ləm, 8yeḛ wɔji né dɔ maree’g ɓa ar dee tona gə mba kiŋga manee dɔ’g el ləm, yeḛ ɔg jia dɔ néra gə́ kori-kori’g ləm, yeḛ gaŋgta gə goo rəbee mbuna dəwje gə́ joo’g ləm, 9yeḛ un godnduje lə neḛ lad-lad ləma, yeḛ aa dɔ ndukunje lə neḛ kər-kər ra née gə ŋgonkoji ləm tɔ ndá debee neelé to njera né gə́ gə dɔ najee, yeḛ a si kəmba ya. Mbaidɔmbaije gə́ Njesigənea̰ ɓa pa bèe#Ləb 18.5.
10Ɓó lé ŋgonee gə́ diŋgam to gə́ gayim-dəw gə́ njekila məs əsé ra né gə́ raŋg gə́ as bèe ləm, 11ɓó lé ŋgon neelé ndaji néra bɔbeeje kára kara el ləm, ɓó lé yeḛ sɔ né dɔ mbal’g ləm, ɓó lé yeḛ ula sul dɔ dené’g lə maree ləm, 12ɓó lé yeḛ buguru njenékəmndoo gə njendoo ləm, ɓó lé yeḛ taa né gə ɓogo ləm, ɓó lé yeḛ tel gə nékɔsnaŋ ar njea el ləm, ɓó lé yeḛ un kəmee aa ne magəje gərərə ra ne néje gə́ mina̰ jɔmri-jɔmri ləma, 13ɓó lé yee wɔji né dɔ maree’g ɓa ar dee tona mba kiŋga ne manee dɔ’g ləm tɔ ndá see ŋgon neelé a si kəmba ya wa. Yeḛ a si kəmba el, yeḛ ra néje nee lai gə́ mina̰ ndá maji karee wəi! Maji kar ta məsee wa dəa-yeḛ ya.
14Nɛ ɓó lé dəw oji ŋgon gə́ diŋgam ɓa ŋgon neelé oo kaiya lai gə́ bɔbeeje ra nɛ yeḛ unda rəa ɓad ɓó ra togə́bè el ləm, 15ɓó lé yeḛ sɔ né dɔ mbalje’g el ləm, ɓó lé yeḛ un kəmee aa ne magəje lə gel-bɔje lə Israɛl el ləm, ɓó lé yeḛ ula sul dɔ dené’g lə maree el ləm, 16ɓó lé yeḛ buguru dəw kára kara el ləm, ɓó lé yeḛ taa nékɔsnaŋ el ləm, ɓó lé yeḛ taa né gə ɓogo el ləm, ɓó lé dəw gə́ ɓó tɔlee lé yeḛ aree muru ləm, ɓó lé yeḛ ula kubu rɔ yeḛ gə́ aw gə kudee dum’g ləm, 17ɓó lé yeḛ ɔg jia dɔ néra gə́ kori-kori’g ləm, ɓó lé yeḛ wɔji né dɔ maree’g ɓa ar dee tona mba kiŋga ne manee dɔ’g el ləm, ɓó lé yeḛ aa dɔ torndu neḛje kər-kər ləma, ɓó lé yeḛ un godndu neḛje lad-lad ləm tɔ ndá ŋgon neelé a kwəi mba kaiya ra bɔbeeje el, yeḛ a si kəmba ya. 18Bɔbeeje nja ɓa to njekula kəm dəwje ndòo ləm, gə njetaa né lə njé gə́ raŋg gə ɓogo ləma, yeḛ nja ɓa gə́ nje néra gə́ majel mbuna koso-dəwje’g ləa ləm tɔ ndá yeḛ nja ɓa a kwəi yoo-kaiya ləa.
19Seḭ pajena: See gelee ban ɓa ta néra gə́ kori-kori lə bɔ ŋgonje lé ŋgon a kuba pəree el wa. To mbata ŋgon lé ra né gə́ danasur gə́ gə dɔ najee ləm, mbata yeḛ aa dɔ tornduje lə neḛ lai ra née ləm tɔ, yeḛ a si kəmba ya. 20Dəw gə́ ra kaiya ndá yeḛ nja ɓa a kwəi. Ta néra gə́ kori-kori lə bɔ ŋgonje lé ŋgon a kuba pəree el ləm, ta néra gə́ kori-kori lə ŋgon lé bɔbeeje a kuba pəree el ləm tɔ. Néra gə́ gə dɔ najee lə njera né gə́ gə dɔ najee lé a kwɔji dəa-yeḛ nja ləm, néra meeyèr lə njemeeyèr a kwɔji dəa-yeḛ nja ləm tɔ#TtG 24.16.
Tandəji dəw karee ra né gə́ maji
21Ɓó lə njemeeyèr uba goo kaiyaje lai gə́ yeḛ ra lé ya̰ ləm, ɓó lé yeḛ aa dɔ godnduje lə neḛ lai lé kər-kər mba ra ne né gə́ danasur gə́ gə dɔ najee ləm tɔ ndá yeḛ a si kəmba ya ɓó a kwəi el. 22Nékaltaje lai gə́ yeḛ ra lé n’a kar mee neḛ wəi dɔ’g, yeḛ a si kəmba mbata néra gə́ gə dɔ najee gə́ yeḛ ra lé. 23Kar njemeeyèr wəi lé see to né gə́ wa mee neḛ wa. Mbaidɔmbaije gə́ Njesigənea̰ dəji bèe. See karee tel panjaa ləa raŋg si ne kəmba ɓa gə́ né gə́ wa mee neḛ el wa. 24Ɓó lé njera né gə́ gə dɔ najee uba néra gə́ gə dɔ najee ləa ya̰ ra né gə́ kori-kori ləm, ɓó lé yeḛ ndaji néje gə́ mina̰ lai gə́ njemeeyèr ra ləm tɔ ndá see yeḛ a si kəmba wa. Néreaje gə́ gə dɔ najee lai lé mee neḛ a kwəi dɔ’g mbata yeḛ ya̰ rəa dan néra gə́ kori-kori’g ləm, gə dan kaiya’g ləm tɔ, gelee gə́ nee ɓa yeḛ a kwəi ne gə mbəa ya. 25Seḭ pajena: Rəw lə Mbaidɔmbaije to gə goo rəbee el. Seḭ gel-bɔje lə Israɛl lé maji kar sí ooje ta! See rəw lə neḛ ɓa to gə goo rəbee el wa. See to rəwje lə sí-seḭ ɓa to gə goo rəbee el lé el wa. 26Ɓó lé njera né gə́ gə dɔ najee uba goo nérea gə́ gə dɔ najee ya̰ ra né gə́ kori-kori ɓa wəi gə mbəa ndá yeḛ wəi mba néra gə́ kori-kori gə́ yeḛ ra lé ya. 27Ɓó lé njemeeyèr ya̰ goo meeyèr ləa ra né gə́ danasur ləm, gə né gə́ gə dɔ najee ləm tɔ ndá yeḛ a si ne kəmba ya. 28Ɓó lé kəmee inja dɔ rəa’g aree uba goo kaltaje ləa lai gə́ yeḛ al lé ya̰ ndá yeḛ a si kəmba ya ɓó a kwəi el. 29Gel-bɔje lə Israɛl pana: Rəw lə Mbaidɔmbaije to gə goo rəbee el. Seḭ gel-bɔje lə Israɛl, see rəw lə neḛ ɓa to gə goo rəbee el wa. See to rəwje lə sí-seḭ ɓa gə́ to gə goo rəbee el lé el wa. 30Gelee gə́ nee ɓa seḭ gel-bɔje lə Israɛl lé nana kara n’a gaŋgta dəa’g gə goo nérea-rəa ya. Mbaidɔmbaije gə́ Njesigənea̰ ɓa pa bèe. Ɔsje badm tel reeje, ya̰je goo kaltaje lə sí lai gə mba kar néra kori-korije lə sí tel to gel tuji lə sí el. 31Kaltaje lə sí lai gə́ seḭ raje ne kaiya lé ubaje ya̰je. Maji kar meḛ sí tel to sigi ləm, kar takə̰jije lə sí tel to sigi ləm tɔ. Seḭ gel-bɔje lə Israɛl lé see gelee ban ɓa seḭ ndigi kwəije wa. 32Mbata yeḛ gə́ wəi lé neḛ n’wɔji-kwɔji karee wəi el, Mbaidɔmbaije gə́ Njesigənea̰ ɓa pa bèe. Maji kar sí ɔsje badm telje gə mba síje ne kəmba ya.
Currently Selected:
Ejekel 18: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
