Ejekel 21
21
Njesigənea̰ ila ta dɔ Israɛlje’g
1Njesigənea̰ ulam ta gə rɔtaje nee pana: 2Ma ŋgon-dəw lé maji kam m’tel kəm gə́ dɔkɔl m’pata m’ila dɔ loo gə́ dɔkɔl’g! M’tegginta m’ila dɔ dəwje gə́ d’isi mee kag-kɔr gə́ to par gə́ dɔkɔl! 3M’a kula kag-kɔr gə́ dɔkɔl pana: Maji kari oo ta lə Njesigənea̰! Mbaidɔmbaije gə́ Njesigənea̰ pa togə́bè pana: N’a gə kila pər dɔi’g ndá a roo kagje lai gə́ to təb gə kagje lai gə́ tudu tɔ. Kṵji pər gə́ teḛ bilim-bilim lé a kwəi nda̰ el ləm, kəm dee-deḛ lai gə́ dɔkɔl saar teḛ dɔgel lé a nəd kurum-kurum ləm tɔ. 4Yen ŋga dəwje lai-lai d’a koo to gə́ neḛ Njesigənea̰ ɓa n’ula pər neelé ndá pər lé a kwəi nda̰ el.
5Ma m’pana: Ǝi Mbaidɔmbaije gə́ Njesigənea̰! Deḛ pata d’ila dɔm’g pana: See ma m’to njepa gosotaje lé el wa.
6Ndá Njesigənea̰ ulam ta gə rɔtaje nee pana: 7I ŋgon-dəw lé maji kari tel kəmi par gə́ Jerusalem pata ila dɔ looje gə́ to gə kəmee! Teg ginta ila dɔ ɓee gə́ Israɛl! 8A kula Israɛlje pana: Njesigənea̰ pata togə́bè pana: Aa ooje, n’aw sə sí gə ta, n’a kɔr kiambas lə neḛ sɔlee’g ndá n’a kar njéra nédanaje gə njémeeyèrje d’udu guduru dan sí’g. 9To gə́ neḛ ndigi kar njéra nédanaje gə njémeeyèrje d’udu guduru mbuna sí’g ndá n’a kɔr kiambas lə neḛ sɔlee’g mba tɔl ne dəwje lai un kudee par gə́ dɔkɔl saar teḛ par gə́ dɔgel. 10Dəwje lai-lai d’a gər to gə́ neḛ Njesigənea̰ n’ɔr kiambas lə neḛ sɔlee’g ndá n’a tel kula keneŋ kari ba el. 11I ŋgon-dəw lé gə́ tuma̰ ŋgururu-ŋgururu ya, ar ɓəri tɔ kɔrəm ləm, tuma̰ ŋgururu-ŋgururu kəm dee’g gə meekad mbag-mbag ləm tɔ. 12Ɓó lé d’a dəji pana: See gelee ban ɓa i tuma̰ ne ŋgururu-ŋgururu bèe wa. Ndá a kila dee keneŋ pana: Mbata oo sorta né gə́ majel. Dɔ ɓəŋgərə dəwje lai a gaŋg mán ləm, ji dəwje lai a kunda ndolé ləm, ndil dəwje lai a kunda bala ləma, no̰ kəji dəwje lai a kunda ndolé ləm tɔ. Aa ooje, ta nee si ree, yee ree mba̰! Mbaidɔmbaije gə́ Njesigənea̰ ɓa pa bèe.
Ndərta gə́ wɔji dɔ kiambas
13Njesigənea̰ ulam ta gə rɔtaje nee pana: 14I ŋgon-dəw lé gə́ tegginta pana: Njesigənea̰ pa togə́bè pana:
Kiambas! Kiambas!
D’ɔl d’aree adə làm-làm ləm,
D’usu d’aree ndɔḭ lèd-lèd ləm tɔ.
15D’ɔlee d’aree adə làm-làm
Mba tɔl ne dəwje mburug-mburug ləm,
D’usu mba karee ndɔḭ lèd-lèd ləm tɔ.
See jeḛ j’a kalje ne rɔ sí wa.
Kag-mbai lə ŋgon neḛ ə̰ji kagje gə́ raŋg lai bəḭ-bəḭ.
16Deḛ d’un d’aree
Mba karee usu aree ndɔḭ
Mba kar dəw wa jia’g,
Kiambas lé adə làm-làm ləm,
Ndoḭ lèd-lèd ləm tɔ
Gə mba kula ji njetɔl dəwje mburug-mburug’d.
17I ŋgon-dəw lé gə́ no̰ tuma̰ ŋgururu-ŋgururu
Mbata d’ɔr kiambas neelé
Mba rɔ ne gə koso-dəwje lə neḛ ləm,
Deḛ rɔ gə mbaije lai
Gə́ njéko̰ dəb ɓeeko̰je gə́ Israɛl ləm tɔ,
Deḛ d’ɔm dee ta kiambas’g
Gə koso-dəwje lə neḛ na̰’d.
Bèe ndá, unda dɔ bḭgi ndai-ndai!
18Mbata to nénaa gə́ kədərə yaa̰,
Ɓó lé kag-mbai gə́ ka̰ kḛji loo bəḭ-bəḭ godo ndá
See ɗi ɓa a teḛ wa.
Mbaidɔmbaije gə́ Njesigənea̰ ɓa pa bèe.
19I ŋgon-dəw lé, tegginta ləm,
Kunda ji ləm tɔ!
Maji kar kiambas tuga gɔl joo əsé gɔl munda!
To kiambas gə́ ka̰ tɔl dəwje bula ləm,
To kiambas gə́ ka̰ tɔl dəwje mburug-mburug ləm tɔ
Ɓa a korè goo dee ndəŋ.
20Gə mba kula ne ɓəl meḛ dee’g ləm,
Gə mba kar yoo dee ḭ ne dɔ maree’d gə́ kédé-kédé ləm tɔ lé
N’a tɔji dee kiambas gə́ to tarəwkəije’g lai.
Deḛ d’usee gə mba karee ndɔḭ lèd-lèd ləm,
D’ɔlee d’aree adə làm-làm
Gə mba tɔl ne dəwje mburug-mburug ləm tɔ.
21Unda siŋgai dɔ maree’g
Tel rɔi par gə́ dɔkɔl!
Aar njaŋg tel rɔi par gə́ dɔgel!
Tɔji kiambas ləi gə looje lai
Gə́ tel kəmi gə́ keneŋ.
22Neḛ kara n’a kunda ji neḛ tɔ, n’a kar boo-oŋg lə neḛ aw ne lée’g béréré, to neḛ Njesigənea̰ ɓa m’pata.
Kiambas lə mbai gə́ Babilɔn
23Njesigənea̰ ulam ta gə rɔtaje nee pana: 24I ŋgon-dəw lé, ndaji rəwje joo mba kar mbai gə́ Babilɔn ree ne gə kiambas ləa, rəwje gə́ joo lé d’a kḭ ɓee gə́ kára ba ya. Maji kari ndaji nétɔji kára dɔ tarəw gə́ aw teḛ mee ɓee-boo gə́ kára’g. 25A ndaji rəw kára gə mba kar kiambas teḛ ne Rabat, ɓee-boo’g lə Amo̰je ləm, yee gə́ raŋg karee teḛ Juda mee ɓee-boo gə́ Jerusalem gə́ d’ila ndògo-bɔrɔ gugu ne dəa sub lé ləm tɔ. 26Mbata mbai gə́ Babilɔn aar tɔ-rəwje’g, ta tɔ-rəwje gə́ joo’g lé mba ra né gə́ wɔji dɔ ndo̰ ər, yeḛ yəg ɓandaŋgje ləm, yeḛ dəji magəje ləma, yeḛ tən wur-ndul daje ləm tɔ. 27Né gə́ to asəna gə téḛ bèe gə́ to jikɔlee’g lé wɔji dɔ Jerusalem loo gə́ kəm ra njor ləm, kwɔji loo tɔl dəwje mburug-mburug ləma, gə kur kò-rɔ keneŋ ləm tɔ. D’a ra njor mba tɔs ne tarəwkɔgje ləm, d’a ra kəi-kumje ləma, d’a kuba dɔndalje ləm tɔ. 28Deḛ d’oo né neelé gə́ nékooje gə́ kari ba, deḛ gə́ manrɔ dee mba̰ lé. Nɛ yeḛ lé yeḛ ar mée olé dɔ néra kori-korije’g lə dee ndá d’a kwa dee kaw sə dee ɓee-ɓər’g ya. 29Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: To gə́ seḭ arje meḛ sí olé dɔ néra kori-korije’g lə sí loo gə́ seḭ arje kaltaje lə sí to ne raga ndəgəsə ləm, seḭ arje néra síje lé riba ne dɔ kaiya ra síje pərəg ləm tɔ lé, to gə́ seḭ arje meḛ sí olé dɔ’g ndá yeḛ a kwa sí gə jia peb ya!
30Ŋga i njekaa dɔ dəb ɓeeko̰ gə́ Israɛl gə́ to njekila ndɔl dɔ loo’g gə njemeeyèr lé kàree gə́ wɔji dɔi teḛ mba̰ kar rudu néra kori-kori ləi un ɗiao ŋga! 31Mbaidɔmbaije gə́ Njesigənea̰ pa togə́bè pana: D’a kɔr jɔg ləm, d’a kɔr dɔgugu ləm tɔ! Néje d’a tel to ɓəd. Yeḛ gə́ d’aree ula dəa lé d’a karee unda dəa tar ləm, yeḛ gə́ d’aree unda dəa tar lé d’a karee ula dəa ləm tɔ. 32Né gə́ tuji, né gə́ tuji, n’a kar Jerusalem tel to né gə́ tuji! Nɛ néje neelé a teḛ el ya saar kar dəw gə́ ta sariya wɔji dəa lé a ree ndá n’a kɔm ta sariya dəa’g.
33I ŋgon-dəw lé, tegginta pana: Mbaidɔmbaije gə́ Njesigənea̰ pa togə́bè wɔji ne dɔ Amo̰je gə dɔ rɔkul-boo lə dee. A pana: Kiambas, kiambas gə́ d’ɔr sɔlee’g, d’usu mba tɔl ne dəwje mburug-mburug ləm, gə mba karee usɔ dee ləma, mba karee ndɔḭ lèd-lèd ləm tɔ#Jer 49.1-6, Ejk 25.1-7, Amɔ 1.3-15, Sop 2.8-11. 34Mbuna némḭdije lə sí gə́ gə mḭdé ba ləm, gə ndərtaje lə sí gə́ to taŋgɔm ləm tɔ lé yeḛ a kar sí osoje ne mbuna nin njémeeyèrje’g, deḛ gə́ kàree gə́ wɔji dɔ dee teḛ mba̰ ləm, rudu néra kori-korije lə dee un ɗiao ləm tɔ. 35Telje gə kiambasje lə sí ulaje sɔl dee’g. N’a gə gaŋg rəwta dɔ sí’g loo gə́ seḭ ḭje keneŋ, mee ɓee-koji sí’g. 36N’a ɓugu oŋg lə neḛ dɔ sí’g ləm, n’a kila kəmə pugudu dɔ sí’g gə boo-oŋg gə́ to asəna gə pər bèe ləma, n’a kuba sí kya̰ sí ji dəwje gə́ njétuji mar deeje gə́ tuji dəwje ɓa gə́ kula ra dee lé. 37Pər a roo sí rug-rug ləm, məs sí a kula dan mee ɓee’g ləma, dəw a kar mée olé dɔ sí’g el ŋga ləm tɔ. Mbata neḛ Njesigənea̰ ɓa m’pa bèe ya.
Currently Selected:
Ejekel 21: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
