Ejekel 26

Ndərta gə́ gaŋg dɔ Tirje’g

1Ndɔ naḭ gə́ dɔtar mee ləb gə́ njekɔm’g dɔg-giree-kára lé Njesigənea̰ ulam ta gə rɔtaje nee pana#Esa 23.1-18, Joɛ 4.4-8, Amɔ 1.9-10, Jkr 9.1-4, Mat 11.21-22, Lug 10.13-14: 2I ŋgon-dəw lé to gə́ Tirje pata dɔ Jerusalem’g pana: Bèe ya ɓa! Bèe ya ɓa lé, ɓee gə́ to tarəwkəi lə koso-dəwje lé təd ar dəwje tel kəm dee gə́ dɔ síjeḛ’g. Yee ɓa j’a kar néje taa rɔ síjeḛ pəl-pəl mbata yee lé to dɔ nduba! 3Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Aa oo, i ɓee gə́ Tir lé n’aw səi gə ta! N’a gə kar ginkoji dəwje gə raŋg gə́ bula digi-digi d’ḭ mba rɔ səi asəna gə baa-boo-kad gə́ ar paŋgəm manee ḭ ne bèe. 4D’a tɔ ndògo-bɔrɔje gə́ Tir pɔs-pɔs ləm, d’a təd gadloo-kaar-kɔgərɔje ləa gə́ duu dɔ loo kərm-kərm ləm tɔ, n’a kwa lé rəw-rəw ləm, n’a karee tel to asəna gə mbal gə́ to kari péd-péd ləm tɔ. 5Yee a tel to loo-naji-buraje, mbata neḛ nja m’pata, Mbaidɔmbaije gə́ Njesigənea̰ ɓa pa bèe. Yee a tel to nékwa lə ginkoji dəwje gə raŋg ya. 6D’a tɔl ŋganeeje gə́ dené gə kiambas dɔ naŋg’d ləa. Bèe ɓa d’a gər ne to gə́ neḛ n’to Njesigənea̰ ya.

7Mbata Mbaidɔmbaije gə́ Njesigənea̰ pa togə́bè pana: Aa ooje, neḛ n’a kar Nebukadnesar, mbai gə́ Babilɔn gə́ to mbai gə́ ur dɔ mbaije’g lé ḭ par gə́ dɔgel mba kaw rɔ gə Tirje gə kundaje, gə pusu-rɔje, gə njékal kundaje, gə koso-dəwje gə́ bula digi-digi. 8Yeḛ a tɔl ŋganije gə́ dené gə kiambas dɔ naŋg’d ləi, yeḛ a ra kəi-kumje ləm, yeḛ a kuba dɔndalje ləma, yeḛ a kunda dərje mba rɔ ne səi ləm tɔ. 9Yeḛ a tɔs ndògo-bɔrɔje ləi gə njor ləa ləm, yeḛ a tuga gadloo-kaar-kɔgərɔje ləi gə́ duu dɔ loo gə tinaje ləa ləm tɔ. 10Kundaje ləa gə́ bula digi-digi lé d’a tur koor dɔi’g ləm, kaa gɔl njékalkṵdaje gə́ ɓar ləm, gə gɔl pusuje ləma, gə pusu-rɔje ləm tɔ lé a kar ndògo-bɔrɔje ləi lé yə loo gə́ yeḛ a kandə gə tarəwkɔgje ləi to gə́ d’andə ne mee ɓee-boo gə́ dum dəa gə rɔ bèe. 11Yeḛ a pugudu mba̰-rəwje ləi lai gə ŋgo gɔl kundaje ləa pugudu-pugudu ləm, yeḛ a tɔl koso-dəwje ləi gə kiambas ləm tɔ tɔɓəi gaji-ŋgɔ-kag gə́ i ti ne rɔi lé d’a toso naŋg. 12D’a kodo nébaoje ləi ləm, d’a kodo néndogoje ləi ləm, d’a təd ndògo-bɔrɔje ləi ləm, d’a tɔ kəije ləi gə́ maji péd-péd ləma, d’a kɔm kɔri-mbalje ləi gə kagje ləi gə nduji naŋgje ləi dan manje’g ləm tɔ. 13N’a kar ndu paje lə njé’g ləi ɓar el ŋga ləm, d’a koo ndu kṵdu-kagje ləi el ŋga ləm tɔ#LkJ 18.22. 14N’a kari to asəna gə mbal gə́ to kari péd-péd bèe, i a tel to loo-naji-buraje, d’a tel rai gogo el ŋga. Mbata neḛ Njesigənea̰ nja m’pata, Mbaidɔmbaije gə́ Njesigənea̰ ɓa pa bèe.

15Mbaidɔmbaije gə́ Njesigənea̰ pata togə́bè ar ɓee gə́ Tir pana: Kaa koso ləi gə́ ɓar loo gə́ yoo-dəwje to naŋg rib-rib mee ɓee’g lé a kar deḛ gə́ d’isi dɔgoré-looje’g lé ndəb-ndəb pəd-pəd. 16Ŋgan-mbaije lai gə́ njékaa dɔ dəb ɓeeko̰je gə́ d’isi ta baa-boo-kad’g lé d’ḭ dɔ kalimbaije’g lə dee d’ur naŋg. Deḛ tɔr kubuje lə dee gə́ boi yul-yul rɔ dee’g ləm, deḛ tɔr kubuje lə dee gə́ d’ɔs ndaji ta’g ləm tɔ. Deḛ ɓiri rɔ dee gə ɓəl ndá rəm d’isi naŋg. Ɓəl-boo dəb dɔ dee’g gə mee kàrje lai ləm, ɓəl unda dee badə gaŋg dee mbata né gə́ yeḛ aree teḛ dɔi’g ləm tɔ#LkJ 18.9-10.

17Deḛ d’un pa no̰ ndooi d’ulai ne pana:

Ɗi togə́bè wa!

See gelee ban ɓa i tuji pugudu bèe wa.

I gə́ njé gə́ d’aḭ gə́ yo gə́ nee dɔ baa-boo-kad’g ree d’isi rɔi’g ləm,

I gə́ to ɓee-boo gə́ njeriɓar

Gə́ njé gə́ d’isi keneŋ to dəwje gə́ njésiŋgamoŋje dɔ baa-boo-kad’g ləm tɔ.

Ɓee neelé gə dəwje gə́ d’isi keneŋ

Gə́ d’aw d’ɔm ɓəl dɔ dəwje gə́ gugu dɔ deḛ lai lé tuji pugudu.

18Ɓasinè deḛ gə́ d’isi dɔgoré-looje’g

D’unda bala tigi-tigi ndɔ koso’g ləi,

Ɓəl-boo unda deḛ gə́ d’isi dɔgoré-looje gə́ dan baa-boo-kad’g badə gaŋg dee

Mbata tuji gə́ teḛ dɔi’g.

19Mbata Mbaidɔmbaije gə́ Njesigənea̰ pa togə́bè pana: Loo gə́ n’a kari to ɓee-boo gə́ to nduba piu-piu asəna gə ɓee-booje gə́ dəwje godo keneŋ bèe lé, loo gə́ n’a kar ɓul mán ḭ turu dɔi kar manje gə́ boo-boo d’a turu dɔi yal-yal ndá 20n’a kɔsi piriŋ kilai gə deḛ gə́ dubu dee mee bwa’g rɔ koso-dəwje gə́ ləw’g. N’a kari aw si gin naŋg’d naŋg loo gə́ wa ŋgɔ njag-njag gə no̰ rɔ deḛ gə́ dubu dee mee bwa’g mba kar dəw kára kara si ɓee’g ləi el ŋga, ndá n’a kunda rɔnduba kul mbata lə ɓee lə njésikəmbaje. 21N’a kari tel to né gə́ kari ba ndá i a godo. D’a sa̰gi nɛ d’a kiŋgai gogo el ya saar gə no̰, Mbaidɔmbaije gə́ Njesigənea̰ ɓa pa bèe#LkJ 18.21.

Currently Selected:

Ejekel 26: SBA2015

Highlight

Copy

Compare