Ejekel 31

Mbai gə́ Ejiptə to asəna gə kag-sɛdrə bèe

1Mee ndɔ gə́ dɔtar gə́ mee naḭ gə́ njekɔm’g munda mee ləb gə́ njekɔm’g dɔg-giree-kára lé Njesigənea̰ ulam ta gə rɔtaje nee pana: 2I ŋgon-dəw lé, dəji Parao̰, mbai gə́ Ejiptə gə koso-dəwje ləa gə́ bula digi-digi lé pana:

I lé see boo-ronduba ləi to asəna gə ka̰ nawa.

3Aa oo, Asiri to kag-sɛdrə gə́ Liba̰,

Barkəmeeje kura yaa̰ ləm,

Kameeje idi lub-lub ləm,

Kagee ŋgal ləma,

Semee teḛ tar dan barkəmeeje gə́ ndər siŋ-siŋ ləm tɔ.

4Manje d’aree ra tɔg ləm,

Ɓul mán aree ŋgal pur-pur ləm tɔ,

Baa-boo ula gugu dəa loo gə́ mea̰ keneŋ

Ar kəm-rəw-manje d’ula

D’ɔm gel kagje lai gə́ mee ndɔ’g.

5Gelee gə́ nee ɓa kagee ḭ ŋgal

Ur ne dɔ kagje lai gə́ mee ndɔ’g ləm,

Barkəmeeje tɔ ne yéŋgé-yéŋgé d’alé

D’un loo lad-lad ləm tɔ,

Manje gə́ taa loo pəl-pəl ɓa

Aree tɔg ne,

6Yelje lai gə́ pə̰ dara’g

Ra kəije lə dee barkəmeeje’g ləm,

Gel barkəmeeje’g lé

Daje lai gə́ mee wala’g d’oji ŋgan deeje keneŋ ləma,

Ginkoji dəwje gə raŋg gə́ bula digi-digi lai lé

D’isi ndilee’g ləm tɔ.

7Yee kura yaa̰ mbata boi ləa ləm,

Gə barkəmeeje gə́ d’alé lé ləm tɔ.

Mbata ŋgiráje andə dan mán’d gə́ to yaa̰ lé.

8Kag-sɛdrəje gə́ mee ndɔ’g lə Ala maji d’undá el ləm,

Kag-siprɛsje d’as gə barkəmeeje el ləma,

Kag-platanəje kara to to gə́ barkəmeeje el ləm tɔ,

Kag kára kara gə́ mee ndɔ’g lə Ala gə́ kura as səa lé godo#Gn 2.9.

9Neḛ n’aree maji péd-péd

Gə barkəmeeje gə́ tɔ yéŋgé-yéŋgé

Ndá kagje lai gə́ Edḛ mee ndɔ’g lə Ala ra kəmkəḭ dəa’g.

Mbai gə́ Ejiptə a tuji to gə́ kag-sɛdrə gə́ təd kərm-kərm bèe

10Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Mbata kagee ŋgal pur-pur ləm, mbata sémee teḛ tar dan barkəmeeje gə́ ndər siŋ-siŋ ləma, mbata ti gə́ yee ti rəa mbata ŋgal ləa ləm tɔ lé 11ndá neḛ n’ilá ji bao-rɔje lə ginkoji dəwje gə raŋg’g mba kar dee ra səa gə goo meeyèr ləa, neḛ lé n’tubá mba̰. 12Dəw-dɔ-ɓeeje gə́ to njéra nékərm-kərmje kunda mar deeje mbuna ginkoji dəwje gə raŋg’g lé tugá jəg-jəg d’ubá wɔg d’yá̰. Barkəmeeje toso dɔ mbalje’g gə mee wəl-looje’g lai ləm, barkəmeeje gə́ lam-lam lé təd d’ɔm kəm kila-rəw-ma̰je’g lai gə́ mee ɓee’g ləm tɔ ndá koso-dəwje lai gə́ dɔ naŋg nee d’ɔr rɔ dee ndilee’g d’ubá d’yá̰. 13Yelje gə́ pə̰ dara’g ree d’isi dɔ ŋgəbeeje’g ləm, daje lai gə́ mee wala’g ra loo-to dee mbuna barkəmeeje gə́ lam-lam lé ləm tɔ 14mba kar kagje lai gə́ d’aar ta manje’g lé d’a kar dee ŋgal pur-pur el ŋga ləm, mba kar sém dee teḛ tar dan barkəm deeje gə́ ndər siŋ-siŋ’d lé el ŋga ləma, mba kar kag-sɛnəje lai gə́ d’ai mán yaa̰ lé ŋgal dee a to to gə́ kédé el ŋga ləm tɔ. Mbata deḛ lai lé yoo ɓa wɔji dɔ dee kar dee d’aw gin naŋg’d bər mbuna dəwje lai gə́ dubu dee bwa-dɔɓar’g na̰’d.

15Mbaidɔmbaije gə́ Njesigənea̰ pa togə́bè pana: ndɔ gə́ yeḛ aw loo-si njé gə́ d’wəi’g lé neḛ n’ar kwa-ndòo-yoo taa loo pəl-pəl ləm, neḛ n’aḭ ŋgaŋ ɓul mán gə mbata ləa ləma, n’ɔg ne baaje loo kula ləm tɔ. Manje gə́ boo-boo rəm d’aar naŋg ləm neḛ n’ar Liba̰ si dan meeko̰’g gə mbata ləa ləma, kagje lai gə́ mee wala’g tudu kurum-kurum ləm tɔ. 16Kaa tuji ləa gə́ ɓar lé neḛ n’ar ginkoji dəwje gə raŋg d’unda ne bala loo gə́ n’ɔsee n’ilá loo-si njé gə́ d’wəi’g gə njé gə́ dubu dee bwa-dɔɓar’g na̰’d lé, kagje lai gə́ Edḛ gə kura kagje lə Liba̰ gə́ maji d’unda mar deeje gə́ d’ai mán yaa̰ lé meḛ dee to lɔm gin naŋg’d bər. 17Deḛ kara d’aw səa na̰’d loo-si njé gə́ d’wəi’g rɔ njé gə́ d’wəi yoo-kiambas’g, kédé lé deḛ to njégədeeje ləm, deḛ d’isi ndilee’g mbuna ginkoji dəwje gə raŋg’g ləm tɔ.

18See na̰ ɓa rɔnduba ləa gə boo ləa as səi mbuna kagje gə́ Edḛ wa. D’a kɔsi kalaŋ kilai kari aw gin naŋg’d bər gə kagje gə́ Edḛ na̰’d ləm, i a to dan njépole-magəje’g gə deḛ gə́ d’wəi yoo-kiambas ləm tɔ. Yee ɓa gə́ né gə́ a teḛ dɔ Parao̰’g gə dɔ njé’g ləa gə́ bula digi-digi lé! Mbaidɔmbaije gə́ Njesigənea̰ ɓa pa bèe.

Currently Selected:

Ejekel 31: SBA2015

Highlight

Copy

Compare