Lugu 18

Gosɔta gə́ wɔji dɔ njekəisiŋga gə njegaŋ-rəwta lé

1Jeju un ta ula dee gə gosota tɔji dee gə mba kar dee d’oo, lé riri kara d’a ra tamaji ta Ala’g ta-ta ɓó d’a kar rɔ dee wəi dɔ’g sululu pai godo. 2Yeḛ ula dee pana: Mee ɓee-boo gə́ kára bèe lé njegaŋ-rəwta gə́ si keneŋ ɓəl Ala el ləm, yeḛ ndəb gə mba kəm dəw kára kara el ləm tɔ. 3Mee ɓee’g neelé njekəisiŋga kára gə́ si keneŋ ree rəa’g ulá pana: Ra rəwta ləm ɔs ne njekəmta ləm dɔm’g am. 4Nɛ yeḛ mbad ra rəwta ləa saar ar kuree əw kəŋ. Nɛ yeḛ nja ḭ tel ə̰ji ta mée’g gə dɔrea pana: Lée m’ɓəl Ala el ləm, m’ndəb gə mba kəm dəw kára kara el ləm kara 5m’a ra rəwta lə njekəisiŋga neelé karee mbata yeḛ jɔgm yaa̰ boi, togə́bè ɓa yeḛ a ree rɔm’g ta-ta gə mba kar dɔm riba ne el ŋga.

6Mbaidɔmbaije ila ta keneŋ pana: Maji koo ta gə́ njegaŋ-rəwta gə́ njekwa gam rəa pa lé ya. 7See Ala lé a ra rəwta lə dəwje ləa gə́ yeḛ ɔr dee unda dee gə kəmee gə́ to təa’g pəgə-pəgə dan kàrá gə loondul’g lé bel wa. See yeḛ a tila gə́ tila dɔ dee’g wa. 8Ma m’ula sí təsərə yeḛ a kḭ kalaŋ ra rəwta lə dee gə tɔgee ya. Nɛ see loo gə́ Ŋgon-dəw a gə ree lé see a kiŋga njémeekunje gə́ dɔ naŋg neelé nja to wa.

Gosɔta gə́ wɔji dɔ Parisiḛ gə njetaa lar-gədɓee

9Yeḛ un gosota pa dɔ njé gə́ na̰je gə́ d’wa rɔ dee gə́ njémeekarabasurje nɛ d’oo mar deeje gə́ dəwje gə́ gə mḭdé ba lé tɔ. 10Dəwje joo d’aw kəi-Ala’g gə mba ra tamaji ta Ala’g. Yeḛ gə́ kára to Parisiḛ ləm, yeḛ gə́ raŋg to njetaa lar-gədɓee ləm tɔ. 11Parisiḛ lé ḭ aar tar gə ŋgalee dana ɗigi-ɗigi, pata gə mée pana: Oiyo Ala, ma m’rai oiyo mbata ma m’to asəna gə gar dəwje gə́ raŋg el. Deḛje neelé to gə́ njétɔ kó mar deeje ləm, gə njéra né gə́ gə goo rəbee elje ləm, gə njéndal mɔdkaiyaje ləma, əsé m’to asəna gə njétaa lar-gədɓee neelé el ləm tɔ. 12Mee ndɔje gə́ siri-siri lé ma m’ɔg məəm ɓó keneŋ as gɔl joo-joo ləm, nékiŋgamje lai lé ma m’kai kəmee loo dɔg ndá m’un yee gə́ kára m’ari-i Ala lé ya ləm tɔ. 13Nɛ njetaa lar-gədɓee lé unda rəa ŋgərəŋ, yeḛ ɓəl koo loo kun kəmee tar gə́ dara nɛ yeḛ unda kaaree gə jia rii pana: Wai Ala, ma gə́ m’to gə́ njekaiya lé ar məəi oso lemsé dɔm’g ya kari. 14Ma m’ula sí təsərə, njetaa lar-gədɓee neelé aw gə́ kəi ləa ndá ta godo dəa’g, nɛ yeḛ gə́ raŋg lé ta nai dəa’g ɓəi. Mbata nana ɓa gə́ unda dəa gə́ tar ndá d’a karee ula dəa ya, nɛ nana ɓa gə́ ula dəa ndá d’a karee unda dəa gə́ tar tɔ#Mat 23.12, Lug 14.11.

Ŋganje gə́ nai gɔ-gɔ

Mat 19.13-15, Mar 10.13-16

15Deḛ d’isi ree gə ŋganje gə́ nai gɔ-gɔ rəa’g gə mba karee ila jia dɔ dee’g. Loo gə́ njékwakila Jejuje d’oo togə́bè ndá deḛ d’ḭ gə deḛ gə́ d’isi ree gə ŋganje gə́ rəa’g lé. 16Nɛ Jeju ɓar dee ula dee pana: Ya̰je ŋganje ar deeje ree rɔm’g ɓó ɔg deeje rəw el. Mbata ɓeeko̰ gə́ dara lé to mbata deḛ gə́ to d’asəna sə dee bèe tɔ. 17Ma m’ula sí təsərə, nana ɓa gə́ taa ɓeeko̰ lə Ala lé gə mée asəna gə ŋgon gə́ gɔ lé el ndá yeḛ a kula dəa keneŋ pai godo.

Dəw gə́ to bao lé

Mat 19.16-30, Mar 10.17-31

18Mbai kára bèe dəji Jeju pana: Mbai gə́ maji, see m’a ra ba̰ gə mba si ne gə kəmə gə́ gə no̰ lé wa.

19Jeju tel ilá keneŋ pana: See ban ɓa i ɓarm dəw gə́ maji wa. Ala kára ba kiao ɓa gə́ dəw gə́ maji ya. 20I gər ta godnduje maji ya. Mbata godndu lé pana: I a ndal mɔdkaiya el ləm, i a tɔl dəw el ləm, i a ɓogoje el ləm, i a təd ta kundaje ta mari’g el ləma, i a tədjekag bɔbije gə kɔinje ləm tɔ#Tr 20.12-16, TtG 5.16-20.

21Dəw neelé tel ilá keneŋ pana: Loo gə́ m’nai basa ɓəi ya, ma m’tɔs kəm goo néje gə́ nee lai m’ra saar ɓasinè.

22Loo gə́ Jeju oo ta ləa togə́bè ndá yeḛ ulá pana: I lal ra né kára ɓəi. Ɔd aw ndogo néje ləi, ya̰ laree kai njéndooje, ɓa i a kiŋga nébao ləi lé mee ɓee gə́ dara ɓəi. Tɔɓəi ɔd ree goom’g tɔ.

23Loo gə́ dəw neelé oo ta nee ndá yeḛ mii mbidi, mbata yeḛ to njenébaoje gə́ tur dɔ loo. 24Jeju aa kəmee gərərə ulá pana: Kar baoje d’aw mee ɓeeko̰’g lə Ala lé to né gə́ a kuba mu el. 25Kar jambal andə kəmbolè libiri’g teḛ raga lé lée moŋg el ɓəi, nɛ kar bao ula dəa mee ɓeeko̰’g lə Ala lé lée a to kədərə yaa̰.

26Deḛ gə́ d’oo ta ləa lé pana: Bèe ŋga see na̰ ŋga ɓa a kiŋga kaji wa.

27Jeju ila dee keneŋ pana: Dəwje ɓa loo né dum dee təs ɓó Ala ɓa yḛ̀, né gə́ njedumee godo.

28Yen ŋga Piɛrə un ta ulá pana: Aa oo, jeḛ ɓa yḛ̀ j’uba néje lə sí lai j’ya̰ j’un rəw gooi’g ya.

29Jeju ila dee keneŋ pana: Ma m’ula sí təsərə, nana ɓa gə́ uba kəi ləa əsé dené ləa əsé ŋgakea̰je əsé njékojeeje əsé ŋganeeje ya̰ dee gə mba ɓeeko̰ lə Ala 30ndá d’a dəaa gə néje neelé rib-rib wəl nee ləm, mee ləb gə́ raŋg gə́ a ree lé ndá a si gə kəməgə́ gə no̰ lé ləm tɔ.

Jeju pata kwəi gə ta teḛ loo-yoo’g ləa gə́ njekɔm’g gɔl munda

Mat 20.17-19, Mar 10.32-34

31Jeju wa deḛ gə́ dɔg-gir-dee-joo lé gə́ rəa’g ula dee pana: Kaw sí gə́ j’isi j’aw gə́ Jerusalem lé néje lai gə́ njéteggintaje ndaŋg taree mee maktub’g d’wɔji ne dɔ Ŋgon-dəw lé d’a ra gə mba karee aw lée’g béréré ya. 32D’a kulá ji njépole-magəje’g ləm, d’a kula sul dəa’g ləm, d’a kundá ləma, d’a tibi yiro kəmee’g ləm tɔ. 33Tɔɓəi loo gə́ d’a kundá gə ndəi-kɔb mba̰ ndá d’a tɔlee ya tɔ, nɛ ndɔ gə́ njekɔm’g munda ləa ndá yeḛ a kunda loo teḛ loo-yoo’g.

34Nɛ ta neelé deḛ gər ginee el. To ta gə́ to loo-kiya’g kəm dee’g ar dee d’oo rəbee gər gəd el nja saar lé.

Jeju ar njekəmtɔ oo loo

Mat 20.29-34, Mar 10.46-52

35Loo gə́ Jeju unda dɔ Jeriko dəb ndá njekəmtɔ kára bèe si dɔ ji rəw’g si kwɔi dəwje né gə kəmndoo. 36Loo gə́ yeḛ oo baŋga boo-dəwje gə́ d’isi dəs ndá yeḛ dəji dee gin baŋga lə dee lé. 37Deḛ d’ulá pana: Jeju gə́ Najaret ɓa si dəs ya. 38Loo gə́ yeḛ oo ndá yeḛ ɔr ndia gə́ tar wəl pana: Jeju, ŋgon Dabid, oo kəm lootondoo’g ya kari.

39Deḛ gə́ d’un rəw kédé lé d’ḭ gə njekəmtɔ lé mba karee wa təa, nɛ yeḛ ila boo-ndia naŋg ra né aree al dɔ loo sula pana: Ŋgon Dabid, oo kəm lootondoo’g ya kari.

40Jeju rəm aar naŋg ndá un ndia ar dee ree səa rəa’g. Loo gə́ njekəmtɔ lé ree pər gə́ rɔ Jeju’g 41ndá Jeju dəjee pana: See ɗi ɓa i ndigi karm m’ra m’ari wa.

Njekəmtɔ lé ndigi təa’g pana: Mbaidɔmbaije, m’ndiŋga rɔm gə mba koo loo ya.

42Jeju tel ilá keneŋ pana: Kəmi inja ari oo loo ɓasinè, meekun ləi taa né ari aji ne ya.

43Léegəneeya yeḛ oo loo ndá yeḛ un rəw si njaa goo Jeju’g ləm, yeḛ pidi Ala ləm tɔ. Koso-dəwje lai neelé loo gə́ deḛ d’oo ndá deḛ pidi ne Ala tɔ.

Currently Selected:

Lugu 18: SBA2015

Highlight

Copy