Mark 10
10
Ta gə́ Jeju ndoo dee wɔji dɔ tḭ-na̰ lə diŋgam gə dené
Mat 19.1-12, Lug 16.18
1Jeju ḭ loo gə́ nee’g aw dɔ naŋg gə́ Jude gir baa gə́ Jurdɛ̰. Boo-dəwje mbo̰ dɔ na̰ rəa’g tɔɓəi ndá yeḛ un kudu ndoo dee ta, to gə́ nérea gə́ yeḛ ra ta-ta ya.
2Parisiḛje rəm pər gə́ rəa’g dəjee ta gə mba kaḭ ne mée pana: See kar diŋgam tuba dené ləa see to né gə́ kəm ra wa.
3Yeḛ tel ila dee keneŋ pana: See godndu Moyis gə́ yeḛ un ar sí lé yeḛ pa banwa.
4Deḛ tel ndigi təa’g pana: Moyis lé un ndia ar dee mba kar dee ndaŋg maktub tḭ-na̰ tuba ne dené#TtG 24.1-4, Mat 5.31.
5Jeju ila dee keneŋ pana: Meendər lə sí ɓa Moyis ndaŋg ne godndu neelé ar sí mba kar sí raje ne togə́bè. 6Nɛ loo gə́ Ala unda naŋg nee kédé gə́ dɔtar lé yeḛ unda diŋgam ləm, gə dené ləm tɔ#Gn 1.27, 5.2. 7Gelee gə́ nee ɓa diŋgam a kya̰ bɔbeeje gə kea̰je mba kar dee-deḛ gə dené ləa d’ɔm na̰’d sad. 8Bèe ɓa deḛ joo bɔr d’a tel to dara gə́ kára ba ɓó d’a to gə́ joo el#Gn 2.24. 9Né gə́ Ala tɔ na̰’d lé maji kar dəw tḭ dee el ŋga.
10Loo gə́ deḛ tel d’aw kəi mba̰ ndá njékwakiláje dəjee ta dɔ ta gə́ yeḛ ula dee’g lé. 11Jeju ula dee pana: Yeḛ gə́ tuba dené ləa taa yeḛ gə́ raŋg ndá yeḛ ndal mɔdkaiya, to majel gə́ yeḛ ra gə dené ləa gə́ yeḛ tubá lé ya, 12əsé ɓó lé dené uba ŋgabeeje yá̰ aw taa ŋgaw gə́ raŋg ndá yeḛ kara ndal mɔdkaiya tɔ#Mat 5.32, 1Kɔr 7.10-11.
Jeju tɔr ndia dɔ ŋganje’g
Mat 19.13-15, Lug 18.15-17
13Deḛ ree gə ŋganje rɔ Jeju’g gə mba karee ila jia dɔ dee’g. Nɛ njékwakiláje d’ḭ gə deḛ gə́ ree gə ŋganje neelé. 14Loo gə́ Jeju oo togə́bè ndá yeḛ oso gə oŋg biriŋ, tɔɓəi ula dee pana: Ya̰je rəw arje ŋganje ree rɔm’g ɓó tuba deeje el, mbata ɓeeko̰ lə Ala lé to mba deḛ gə́ to tana sə dee bèe ya. 15Ma m’ula sí təsərə, nana ɓa gə́ mée taa ɓeeko̰ lə Ala asəna gə mee ŋgon gə́ gɔ bèe el ndá yeḛ a kula dəa keneŋ wɔr nda̰ bèe el#Mat 18.3.
16Yen ɓa yeḛ odo dee turu dee kag jia’g ila ne jia dɔ dee’g tɔr ne ndia dɔ dee’g.
Basa gə́ to gə́ bao
Mat 19.16-30, Lug 18.18-30
17To gə́ Jeju oso rəbə si aw ndá dəw kára aiŋgwɔd aw iŋgá rəm ɔs no̰ kəjee naŋg nea̰’g dəjee pana: Mbai gə́ maji, see ɗi ɓa m’a ra mba si ne gə kəmə gə́ gə no̰ lé wa.
18Jeju ilá keneŋ pana: See ban ɓa i ɓarm dəw gə́ maji wa. Ala kára ba kiao ɓa to dəw gə́ maji ya. 19I gər ta godnduje lai gə́ pana: I a ndal mɔdkaiya el ləm, i a tɔl dəw el ləm, i a ɓogo el ləm, i a təd taŋgɔm kunda ta mari’g el ləma, i a buguru mari el ləm tɔ, tədjekag bɔbije gə kɔinje#Tr 20.12-16, TtG 5.16-21.
20Dəw neelé tel ilá keneŋ pana: Mbai, loo gə́ ma m’nai basa ɓəi lé ya, m’tɔs kəm goo néje gə́ neelé m’ra saar ɓasinè.
21Jeju aa kəmee gərərə undá dan kəmee’g ndá ulá pana: Né kára lali ɓəi. Ɔd aw ndogo néje ləi lai ya̰ laree ar njéndooje ɓa i a kiŋga nébao ləi ɓee gə́ dara ɓəi. Tɔɓəi ɔd ree goom’g.
22Loo gə́ dəw neelé oo ta neelé ndá yeḛ mi mbidi-mbidi, ɔd mbiriŋ, mbata yeḛ to gə́ njenébaoje gə́ tur dɔ loo.
23Jeju aa kəm dee njal ɔr ndá ula njékwakiláje pana: Kar baoje d’aw mee ɓeeko̰’g lə Ala lé a to né gə́ lé a kuba mu el!
24Njékwakiláje lé kaar dee wa dee paḭ dɔ ta gə́ Jeju pa togə́bè. Yeḛ un ta ula dee tɔɓəi pana: Ŋganəmje, deḛ gə́ d’ɔm meḛ dee dɔ nébaoje’g lə dee lé kaw ɓeeko̰’g lə Ala lé lée a kuba mu dɔ dee’g el! 25Kar jambal andə kəmbolè libiri’g teḛ raga lé to né gə́ kədərə el ɓəi, nɛ kar bao andə aw mee ɓeeko̰’g lə Ala lé lée a to kədərə gə́ ndam godo.
26Kaar njékwakiláje lé wa dee paḭ-paḭ unda njé gə́ kédé ndá deḛ dəji na̰ ta wédé-wédé pana: Bèe ŋga see na̰ ɓa askəm kaji wa.
27Jeju aa kəm dee gərərə ndá ula dee pana: Né gə́ bèe lé dəwje ɓa a dum dee ɓó a dum Ala nda̰ bèe el, mbata Ala lé né kára gə́ njedumee godo.
28Piɛrə un ta ulá pana: Aa oo, jeḛ lé j’uba néje lə sí lai j’ya̰, j’un rəw gooi’g.
29Jeju ilá keneŋ pana: Ma m’ula sí təsərə, nana ɓa gə́ uba kəi ləa əsé ŋgakea̰je əsé kɔnaneeje əsé kea̰je əsé gə bɔbeeje əsé ŋganeeje əsé do̰dubaje ləa ya̰ dee gə mbam ləm, gə mba tagə́maji ləm tɔ 30ndá a kiŋga dee tɔl-tɔl gogo wəl nee ləm, a kiŋga kəije gə ŋgakea̰je gə kɔnaneeje gə kea̰je gə ŋganeeje gə do̰dubaje ləa tɔ, nɛ a kiŋga néurti keneŋ ya. Nɛ ləbje gə́ raŋg gə́ d’a gə ree lé yeḛ a si gə kəməgə́ gə no̰. 31Deḛ gə́ bula gə́ to gə́ ŋgaw ta dee kédé lé d’a tel nai gə́ rudu deeje ləm, deḛ gə́ bula gə́ nai gə́ rudu deeje lé d’a tel to gə́ ŋgaw ta deeje kédé ləm tɔ#Mat 20.16, Lug 13.30.
Jeju pata kwəi ləa gə ta kunda loo teḛ ləa
Mat 20.17-19, Lug 18.31-34
32D’un rəw d’isi d’aw gə́ Jerusalem, Jeju ɓa njaa no̰ dee gə́ kédé. Njékwakiláje lé meḛ dee to kərm ar dee d’orè gée gə ɓəl. Jeju ɔr dee dɔg-gir-dee-joo njɔl tɔɓəi aw un ta ula dee ne loo né gə́ a teḛ dəa’g lé pana: 33Aa ooje, j’isi j’aw gə́ Jerusalem ŋga ndá d’a gə kula Ŋgon-dəw lé ji mbai dɔ njékinjanéməsje-je’g gə ji njéndaji-maktubje’g tɔ. D’a kɔr ta yoo kɔm dəa’g ndá d’a kulá ji njépole-magəje’g tɔ. 34Deḛje neelé d’a ndaji ndia kogo ne ləm, d’a tibi yiro kəmee’g ləm, d’a kundá gə ndəi-kɔb ləma, d’a tɔlee karee wəi ləm tɔ. Nɛ ndɔ gə́ njekɔm’g munda ləa lé ndá yeḛ a kunda loo teḛ dan njé gə́ d’wəi’g ya.
Ŋgalə Jebede kwɔi Jeju loo-si dee
Mat 20.20-28
35Yen ŋga, Jak gə Ja̰ gə́ to ŋgalə Jebede lé rəm pər gə́ rɔ Jeju’g d’ulá pana: Mbai, né gə́ j’a gə kwɔii neelé jeḛ ndigi kari ar sí née ya.
36Jeju tel dəji dee pana: See ɗi ɓa seḭ ndigije karmje m’ra m’ar sí wa.
37Deḛ tel ndigi təa’g pana: Loo gə́ i a si loo-ronduba’g ləi lé ndá ar sí j’isi səi keneŋ tɔ, dəw kára a si dɔ jikɔli’g ləm, dəw kára a sí dɔ jigeli’g ləm tɔ.
38Jeju tel ila dee keneŋ pana: Né gə́ seḭ kwɔimje lé seḭ gərje rəbee el. See ŋgo-kai-mán gə́ m’a gə kai lé see seḭ asjekəm kaije wa. Esé see batɛm gə́ d’a gə ram lé see seḭ asjekəm kar dee ra sí ya to wa#Lug 12.50.
39Deḛ atel d’ilá keneŋ pana: Jeḛ j’askəm ra togə́bè ya.
Jeju tel ula dee pana: Tɔgərɔ ya, né gə́ mee ŋgo-kai-mán gə́ m’a gə kai lé seḭ a kaije ləm, batɛm gə́ d’a gə ram lé kara d’a ra sí ya ləm tɔ. 40Nɛ ka̰ si dɔ jikɔlm’g gə dɔ jigelm’g ɓa yḛ̀, ma ɓa gə́ njekwɔji rəbee el. Loo neelé d’unda gə kəmee d’wɔji ne dɔ deḛ gə́ d’a gə kiŋga lé ya.
41Mar deeje gə́ dɔg lé loo gə́ deḛ d’oo ta lə Jak gə Ja̰ gə́ dəjee lé ndá meḛ dee ḭ sə dee pu dɔ dee’g. 42Jeju ɓar dee ula dee pana: Seḭ ooje gao, deḛ gə́ d’oo dee gə́ mbai dɔ ginkoji dəwje gə raŋg lé d’o̰ dəwje lə dee d’ula ne kəm dee ndòo ləm, dəwje gə́ boi lé deḛ kara to gə́ dəw dɔ deeje ləm tɔ. 43Seḭ lé maji kar sí raje togə́bè mbuna na̰’d el. Nɛ nana ɓa mbuna sí’g gə́ wa rəa gə dəw gə́ boo lə sí ndá maji karee tel rəa gə́ kura lə sí ɓa#Lug 22.25-26. 44Tɔɓəi nana ɓa gə́ ndigi to gə́ ŋgaw ta sí kédé lé ndá maji karee ra rəa gə́ ɓər lə sí ləm tɔ#Mat 23.11, Mar 9.35, Lug 22.26. 45Mbata Ŋgon-dəw lé ree gə mba kar dəwje ɓa ra né d’aree el nɛ yeḛ ree gə mba ra né kar dee ləm, gə mba kya̰ rəa karee to gə́ nékoga-dɔ-dəwje bula ləm tɔ.
Jeju aji njekəmtɔ gə́ ria lə Bartime
Mat 20.29-34, Lug 18.35-43
46Deḛ teḛ Jeriko. Loo gə́ Jeju unda loo mee ɓee gə́ Jeriko teḛ gə njékwakiláje gə boo-dəwje gə́ bula lam gə́ d’ɔm na̰ gée’g na̰’d lé ndá njekəmtɔ gə́ to ŋgolə Time gə́ ria lə Bartime lé si naŋg mbɔr rəbə sí kwɔi dəwje né gə kəmndoo. 47Loo gə́ yeḛ oo to gə́ Jeju gə́ Najaret ɓa si dəs ndá yeḛ ila boo-ndia naŋg ra ne né wəl pana: Jeju, Ŋgon Dabid, oo kəm lootondoo’g ya kari.
48Njé gə́ na̰je bula d’ḭ səa gə mba karee wa təa. Nɛ yeḛ ila boo-ndia naŋg ra ne né wəl unda njé gə́ kédé pana: Ŋgon Dabid, oo kəm lootondoo’g ya kari.
49Jeju rəm aar naŋg ula dee pana, Maji kar sí ɓareeje.
Yen ŋga, deḛ ɓar njekəmtɔ lé d’ulá pana: Ar məəi oso naŋg po̰ ndá uba naŋg ḭta aw iŋgá mbata yeḛ nja ɓari.
50Njekəmtɔ lé ɔr kubu ləa gə́ boi yul lé ila naŋg ndá uba naŋg ja̰gjaŋ ḭta aw rɔ Jeju’g. 51Jeju un ta dəjee pana: See ɗi ɓa i ndigi karm m’ra m’ari wa. Njekəmtɔ lé tel ndigi təa’g pana: Mbai, m’ndiŋga rɔm gə mba tel koo loo ya.
52Jeju ilá keneŋ pana: Ɔd aw mbata meekun ləi ɓa taa né ari aji ne ya.
Léegəneeya, yeḛ oo loo ndá yeḛ un rəw si njaa goo Jeju’g.
Currently Selected:
Mark 10: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
