Hechos 11

Ri Pedro kutzijoj sa' ri xu'an ri Dios kuk' ri na e ta aj Israel

1Ri e taqo'n re ri Jesús kuk' ri hermanos e k'o Judea xkito e k'o na e ta aj judi'ab' xekojow re Rutzij ri Dios puwi ri Cristo. 2Ruma k'u ri', echiri' xtzelej ri Pedro Jerusalem, ri hermanos e aj judi'ab' lik xkichap pa ch'a'oj, 3jewa' xkib'i'ij che: «¿Su'chak xatok pa kocho ri na e ta aj judi'ab' y xatwa' ne kuk'?»#11:3 Chikiwach raj judi'ab', jun kuch'ulaj rib' chwach ri Dios we kaqib' ruk' junoq na utaqem ta ri kojob'al ki'ke. xecha'.

4Ek'u ri Pedro xujeq utzijoxik chike chuchola'j su'anik xu'ana wa'. Jek'uwa' xub'i'ij chike:

5«E ri'in in k'o pa ri tinamit Jope e ri' kan'an orar echiri' xaqik'ate't xq'alajisax jun k'utub'al re ri Dios chinuwach. Wa' pacha' jun nimalaj k'ul ximital lo che ri kajib' utza'm, xqasax lo chila' chikaj k'a pa la in k'o wi ri'in. 6Echiri' xintzu' chi utz sa' ri k'o chupa wa', xeb'enuwil k'u awaj k'o kajib' kaqan, itzel taq chikop re upa juyub', awaj kecharar pulew, yey ri kexik'ik' che ruwa kaj.

7»Yey xinta k'u jun qulaj, jewa' xub'i'ij chwe: “Chatyaktajoq Pedro; chakamisaj y chatija'” xcha'.

8»Ximb'i'ij k'u ri'in: “Na kan'an ta k'ana ri', Wajawal, ma ri'in na jinta k'ana ch'ul o na taqal taj katijik okinaq pa nuchi'” xincha'.

9»Ek'uchiri', xch'aw tanchi lo ri jun qulaj chila' chikaj, jewa' xub'i'ij chwe: “Ri ujosq'im chi ri Dios, ri'at mab'i'ij ch'ul che” xcha'.

10»Wa' oxlaj xu'ano. Tek'uchiri', ronoje xk'am tanchi ub'i chikaj.

11»Chupa k'u la' la joq'otaj xek'un oxib' achijab' chwa ri ja pa in k'o wi; rike e petinaq Cesarea, etaqom loq cha' kinkitzukuj. 12Ek'u ri Ruxlab'ixel ri Dios xub'i'ij chwe kin'ek kuk' y muxi'ij ne rib' nuk'u'x kin'ek. Xin'ek k'u ri' kuk'; yey wa' wa waqib' hermanos e aj Jope e k'o wara wuk', xojkachb'ilaj b'i.

»Echiri' xojopon Cesarea, xojok chirocho jun achi.#11:12 Wa'chi e Cornelio. 13Yey wa'chi xutzijoj chiqe su'anik xril uwach jun ángel chirocho. Wa' xo'ltak'al chwach rire y jewa' xub'i'ij che: “Cheb'ataqa b'i achijab' pa ri tinamit Jope re ke'kisik'ij jun achi Simón rub'i', ri kab'i'x Pedro che. 14Ek'u rire kolu'b'i'ij chawe su'anik katkolob'etaj ri'at kuk' konoje ri ejeqel pa wocho” xcha ri ángel che.

15»Yey, echiri' ri'in xinjeqo kinch'a't kuk' wa' wa tikawex na e ta aj judi'ab', xqaj ri Santowilaj Ruxlab'ixel ri Dios pakiwi' jela' pacha' xujeqeb'ej loq echiri' xqaj paqawi ri oj aj judi'ab'.

16»Ek'uchiri', xk'un chinuk'u'x rub'i'im kan ri Qanimajawal echiri' xub'i'ij: “Paqatzij wi, ri Juan xuya ri bautismo ruk' ya', no'j ri bautismo kik'ul ri'ix e ruk' ri Santowilaj Ruxlab'ixel ri Dios.”#Hch. 1:5

17»Ek'u uwari'che, we ri Dios xuya chike rike wa sipanik jela' pacha' ri xuya chiqe ri'oj ri kub'ul chi qak'u'x ruk' ri Qanimajawal Jesucristo, ¿in china ri'in cha' kanq'atej ri Dios che u'anikil wa'?» xcha ri Pedro.

18Ek'uchiri' xkita taq wa', na jinta chi xkib'i'ij chirij ri Pedro, e xkijeq kakiyak uq'ij ri Dios, jewa' xkib'i'ij: «¡Uya'om ne ri' ri Dios chike ri na e ta aj judi'ab' kakitzelej kitzij chwach cha' jela' k'o kik'aslemal!» xecha'.

Ri jeqeb'al re riglesia pa ri tinamit Antioquía

19Ruk' rukamik ri Esteban, xjeqer kiternab'exik ruk' k'ax janipa ri kikojom rub'i' ri Cristo. E taq k'u ri' wa' xekich b'i y xeb'opon k'a chupa taq ri tinamit re Fenicia, re Chipre y ri tinamit Antioquía.#11:19 “Antioquía”: E jun tinamit k'o Siria. K'o jun chik tinamit “Antioquía re Pisidia”. Hch. 13:14-52 Yey xew xkitzijoj kan ri Utzilaj Tzij re ri Jesucristo chike ri e aj judi'ab'.

20Chikixo'l k'u wa hermanos e k'o e aj Chipre y e aj Cirene. Ek'u rike echiri' xeb'ok Antioquía, xkijeq kakitzijoj ri Utzilaj Tzij re ri Qanimajawal Jesucristo chike ri na e ta aj judi'ab'. 21Yey ruchuq'ab' ri Qanimajawal lik k'o pakiwi rike. Lik k'u e k'i ri tikawex xkikoj rub'i' ri Cristo y xkijalk'atij ri kib'inik.

22Ri kikojom rub'i' ri Cristo e k'o Jerusalem, echiri' xkita wa', xkitaq b'i ri Bernabé cha' ke'ek k'a chila' Antioquía. 23Echiri' xopon ri Bernabé y xril ri unimal rutzil uk'u'x ri Dios kuk' ri kikojom rub'i' ri Cristo, lik xki'kot che. Y xeb'upixab'aj konoje cha' ruk' ronoje kik'u'x kakichuq'ub'ej kib' chwach ri Qanimajawal.

24Ri Bernabé e jun achi lik utz uk'u'x, ruchuq'ab' ri Santowilaj Ruxlab'ixel ri Dios lik k'o ruk' y lik k'o kub'ulib'al uk'u'x. Ruma k'u ruchak rire, lik e k'i ri tikawex xkikoj rub'i' ri Qanimajawal Jesucristo.

25Tek'uchiri', ri Bernabé xe'ek pa ri tinamit Tarso re ku'tzukuj ri Saulo. Echiri' xuriqo, xuk'am lo Antioquía. 26Xek'oji' k'u kuk' ri tinamit re ri Cristo ronoje ri jun junab', e ri' kek'utun chikiwach uk'iyal winaq. Chiri' k'u ri', nab'e laj xb'i'x “cristianos” chike ri kikojom rub'i' ri Cristo.

27Chupa taq ri' la' la q'ij e k'o jujun eq'alajisay runa'oj ri Dios xeb'el b'i Jerusalem y xeb'opon Antioquía. 28K'o jun chike wa', Ágabo rub'i'. Rire xyaktajik y ruma ri Ruxlab'ixel ri Dios, xuq'alajisaj kape jun unimal numik chwi ronoje ruwachulew pa ejeqel wi ri winaq. (Wa' xu'ana chupa rutaqanik ri Claudio.)#11:28 Ri Claudio xk'oji' nimalaj taqanel pakiwi ri taqanik re Roma chupa ri junab' 41-53 D.C.

29Ruma k'u wa', ri kikojom rub'i' ri Cristo e k'o Antioquía xkiyijb'a' chikiwach cha' kakitaq pan to'b'al chike ri hermanos ejeqel Judea; chikijujunal k'u ri' xkich'ob' raqan janipa ri kakiya'o, wa' e chirij taq ri k'o kuk'. 30Y jela' xki'ano; xkitaq b'i ri kiqasa'n pakiq'ab' ri Bernabé y ri Saulo cha' kakik'am b'i Judea y kakiya chike ri e aj wach re riglesia.

Currently Selected:

Hechos 11: acrN

Highlight

Copy