Hechos 10

Ri xuq'alajisaj ri Dios che ri Cornelio

1Pa ri tinamit Cesarea k'o jun achi Cornelio rub'i'. Rire e capitán ke ri soldados e kuk'il ri kab'i'x chike “E aj Italia”. 2Ri Cornelio lik jusuk' rub'inik usilab'ik y lik k'o xi'in ib' pa ranima' chwach ri Dios junam kuk' konoje ri ralk'o'al. Rire lik kuya puaq re to'b'al ke ri nib'a'ib' e aj judi'ab' y lik ku'an orar chwach ri Dios.

3K'o k'u jun q'ij ri', laj che ri urox ora#10:3 “Ri urox ora”: Kil “hora” pa vocabulario. b'enaq q'ij xq'alajisax jun k'utub'al re ri Dios chwach. Ri xk'ut che, e jun ángel re ri Dios e ri' xok chiri' pa k'o wi rire y jewa' xub'i'ij che:

—¡Cornelio! —xcha che.

4Ri Cornelio lik xutzu' ri ángel y ruk' xi'in ib' xub'i'ij che:

—¿Sa' ri ka'aj la, wajawal? —xcha'.

Ri ángel xuk'ul uwach:

—E taq ra oración y ri to'b'al ke ri nib'a'ib' a'anom ri'at, wa' uk'ulum ri Dios pacha' jun qasa'n chwach Rire. 5Ek'u ri ka'an wo'ora e cheb'ataqa b'i achijab' pa ri tinamit Jope re ke'kisik'ij jun achi Simón rub'i', ri kab'i'x Pedro che. 6Wa' wa'chi jeqel chuchi' ri mar pa rocho ri Simón, jun aj t'isol tz'u'um. Wa' wa Pedro kub'i'ij chawe sa' ri lik chirajawaxik wi ka'ano —xcha'.

7Echiri' xel b'i ri ángel xch'a't ruk', ri Cornelio xeb'usik'ij ka'ib' raj chak y jun soldado lik k'o xi'in ib' pa ranima' chwach ri Dios, wa' e jun chike ri e k'o puq'ab'. 8Xutzijoj na k'u chike ronoje ri xrilo; tek'uchiri', xeb'utaq b'i pa ri tinamit Jope.

Ri xuq'alajisaj ri Dios che ri Pedro

9Chuka'm q'ij k'ut echiri' e k'o pan pa b'e e ri' katajin koponik chunaqaj ri tinamit, ri Pedro xaq'an chwi ri ja cha' ku'ana orar echiri' ya katik'oj ri q'ij.#10:9 “Katik'oj ri q'ij”: Kil “hora” pa vocabulario. 10Xpe k'u jun unimal numik che y lik xraj kawa'ik.

Katajin k'u uyijb'axik ruwa echiri' xaqik'ate't k'o xuk'ut ri Dios chwach. 11Xril ruwa kaj jaqalik. K'o k'u pacha' jun nimalaj k'ul karipipik y ximital lo che ri kajib' utza'm, e ri' kaqasax lo che ruwachulew. 12Chupa wa' wa k'ul e k'o ronoje kiwachlib'al awaj: wa' e ri k'o kajib' kaqan, ri kecharar pulew yey ri kexik'ik' che ruwa kaj.#10:12 Levítico 11 kub'i'ij pachike rawaj utz ketijik y pachike na ketij taj. Rawaj xeril ri Pedro e kuk'il ri na taqal taj ketijik.

13Yey xuta jun qulaj jewa' xub'i'ij:

—Chatyaktajoq Pedro; chakamisaj y chatija' —xcha che.

14Pero ri Pedro xub'i'ij che:

—Na kan'an ta k'ana ri', Wajawal, ma ri'in na jinta k'ana k'o nutijom e la' ch'ul o na taqal taj katijik —xcha'.

15Xch'aw tanchi k'u ri jun qulaj, jewa' xub'i'ij che:

—Ri ujosq'im chi ri Dios, ri'at mab'i'ij ch'ul che —xcha che ri Pedro.

16Wa' oxlaj xu'ano; tek'uchiri', ri nimalaj k'ul xtzelej tanchi chila' chikaj. 17Ek'u ri Pedro katajin che utz'onoxik chirib'il rib' sa' ke'elawi ri xk'ut chwach, echiri' xek'un rachijab' etaqom lo ruma ri Cornelio. Rike kitz'onob'em lo ri rocho ri Simón ri kut'is tz'u'um, yey wo'ora e k'o chwa ri puerta. 18Xech'aw k'u apanoq y xkitz'onoj we chiri' jeqel wi ri Simón, ri kab'i'x Pedro che.

19Ek'u ri Pedro k'a katajin ne che uch'ob'ik raqan puwi ri xk'ut chwach, echiri' ri Ruxlab'ixel ri Dios xub'i'ij che: «Chawila', ma le' oxib' achijab' katkitzukuj. 20Chatyaktajoq, chatqajoq y jat kuk'. Muxi'ij rib' ak'u'x kate'ek kuk', ma in ri intaqayom lo ke» xcha che.

21Xqaj k'u lo ri Pedro pa e k'o wi rachijab' etaqom lo ruma ri Cornelio, y xub'i'ij chike:

—Ri' in k'olik, in ri kintzukuj alaq. ¿Sa' ri petinaq wi alaq wuk'? —xcha chike.

22Rike xkib'i'ij che:

—K'o jun capitán#10:22 “Capitán”: Wa' e aj wach ke cien soldados. aj Roma, Cornelio rub'i'. Rire e jun achi lik jusuk', k'o xi'in ib' ruk' chwach ri Dios, yey chom ruch'a'tib'exik ka'an kuma konoje raj judi'ab'. Xb'i'x k'u che rire ruma jun santowilaj ángel re ri Dios, kutaq lo k'amik la re ke'ek la chirocho y jek'ula' kuta ri kab'i'ij la che —xecha'.

23Ek'u ri Pedro xeb'ukoj b'i pa ja y xuya luwar chike kekanaj kan la jun aq'ab' chiri'. Chuka'm q'ij k'ut xe'ek kuk', yey xekachb'ilaj b'i jujun hermanos e aj pa ri tinamit Jope.

24Chuka'm q'ij k'ut xeb'opon pa ri tinamit Cesarea pa eroye'em wi ri Cornelio. Rire umolom chi kichi' ri ratz-uchaq' y ri ramigos ri k'ax kakina' kib' ruk'. 25Echiri' xopon ri Pedro, xel lo ri Cornelio che uk'ulik y xuxukub'a' rib' chwach re kuloq'oj uq'ij.

26Pero ri Pedro xuyako y xub'i'ij che:

—Yaktaja la, ma ri'in xa in jun achi pacha' rilal —xcha'.

27Kach'a't k'u ruk' ri Cornelio, xok b'i y xeb'u'riqa uk'iyal tikawex kimolom kib' chiri'. 28Xub'i'ij k'u ri Pedro chike:

—Lik eta'am ralaq, chiqaxo'l ri oj aj judi'ab' lik na ub'e taj we junoq chiqe kujunimaj rib' o kaqib' ruk' junoq na e ta kuk'il raj judi'ab'. No'j ri Dios xuk'ut chinuwach ri'in na ub'e taj kanch'ob' raqan wa'.#10:28 Chikiwach raj judi'ab', jun kuch'ulaj rib' chwach ri Dios we kaqib' ruk' junoq na utaqem ta ri kojob'al ki'ke. 29E uwari'che, echiri' xine'sik'ixoq, na jampatana ximpetik y na jinta ne xintz'onoj we utz kan'an wa'. Ek'u wo'ora kantz'onoj che alaq, ¿su'chak xtaq alaq nuk'amik? —xcha'.

30Ri Cornelio xuk'ul uwach:

—E ukaj q'ij wa' ik'owinaq je u'orayil wa', ri'in in k'o pa ayuno laj che ri urox ora#10:30 “Ri urox ora”: Kil “hora” pa vocabulario. b'enaq q'ij, yey in k'o pa oración chiwocho echiri' xwinaqir k'u chinuwach jun achi ukojom uq'u' lik kawolq'inik 31y jewa' xub'i'ij chwe: “Cornelio, ri Dios utom ra oración y k'o chuk'u'x janipa ri to'b'al ke ri nib'a'ib' a'anom. 32Chataqa junoq chupa ri tinamit Jope re ku'sik'ij ri Simón ri kab'i'x Pedro che. Rire k'o pa rocho ri Simón, jun achi aj t'isol tz'u'um k'o rocho chuchi' ri mar. Yey echiri' kak'unik, e rire ri kach'a't awuk'” xcha'.

33»Jek'uri'la', xintaqala' k'amik la; y lik utz ri x'an la, ma xpe la. Ek'u wo'ora, qonoje oj k'o wara chwach ri Dios cha' kaqata ronoje ri utaqom wi lo la cha' kab'i'ij la chiqe —xcha'.

Ri Pedro kutzijoj ri Utzilaj Tzij chirocho ri Cornelio

34Ek'uchiri', xujeq kach'a't ri Pedro, jewa' xub'i'ij:

«Paqatzij wi wo'ora kanmaj usuk' ri Dios na kacha'w ta chikixo'l ri tikawex. 35Ma ri ku'ano e lik kuk'ul uk'u'x echiri' ri tikawex pa taq ronoje tinamit k'o xi'in ib' kuk' chwach Rire y kaki'an ri lik jusuk'. 36K'o k'u ri xuq'alajisaj ri Dios chike ri e aj Israel; wa' e ri Utzilaj Tzij, ri kuk'am lo utzil chomal ruma ri Jesucristo ri Qajawal qonoje.

37»Eta'am k'u ralaq sa' taq ri xu'an ri Jesús echiri' ik'owinaq chi ri tzijonik re ri Juan chwi ri bautismo ruk' ya'. Ri tzijonik puwi ri Jesús xujeq lo k'a Galilea y xe'ek utzijoxik che ronoje ri luwar re Judea. 38Xeta'maj k'u ralaq sa' ri xu'an ri Dios; xuya che ri Jesús ri aj Nazaret lik kak'oji' ri Santowilaj Ruxlab'ixel y ruchuq'ab' Rire ruk'. Ek'u ri Jesús xe'ek pa taq luwar re ku'an ri utz y keb'ukunaj konoje ri eya'om pa k'ax ruma ritzel winaq. Xu'an taq k'u wa' ma ri Dios lik k'o ruk'.

39»Ek'u ri'oj lik qeta'am wa' ma xqil ronoje ri xu'an ri Jesús pa taq ri luwar re Judea y chila' Jerusalem. E wa' Rire ri xya'i' chwa cruz y xkamisaxik. 40Pero churox q'ij ri Dios xuk'astajisaj lo ri Jesús chikixo'l ri ekaminaq y xuya che xuk'ut uwach chiqawach. 41Na xuk'ut ta uwach chikiwach konoje ri tinamit, ma xew chikiwach ri eb'ucha'om chi lo ri Dios ojertan; wa' e ri'oj, ri xojwa' junam ruk' y xqatij qamiq'ina' junam ruk' echiri' k'astajinaq chi lo Rire chikixo'l ri ekaminaq.

42»Yey xojutaq k'u che utzijoxik che ri tinamit cha' kaqaq'alajisaj e Rire ri Aj Q'atal Tzij ukojom ri Dios pakiwi ri e k'aslik y ri ekaminaq. 43Puwi ri Jesús xetzijon lo konoje ri q'alajisanelab' ojertan. Rike xkib'i'ij e janipa ri kekojow re Rire, kakik'ul ri kuyb'al kimak ruma kikojom rub'i'» xcha'.

Ri na e ta aj Israel kakik'ul ri Ruxlab'ixel ri Dios

44K'a kach'a't ne ri Pedro kuk' chwi taq wa' echiri' xqaj ri Santowilaj Ruxlab'ixel ri Dios pakiwi konoje ri ketaw re. 45Yey e petinaq ruk' ri Pedro jujun e aj judi'ab' kikojom rub'i' ri Cristo. Wa' lik xkam kanima' che, ma ri Santowilaj Ruxlab'ixel ri Dios xqaj pakiwi ri na e ta aj judi'ab'. 46Kekitata' k'u ri' kech'a't pa jujun chik ch'a'tem ya'tal chike ruma ri Ruxlab'ixel ri Dios y lik kakiyak uq'ij ri Dios.

47Ek'u ri Pedro xub'i'ij: «¿K'o neb'a junoq kaq'aten ke kakik'ul ri bautismo ruk' ya'? Ma rike xkik'ul ri Santowilaj Ruxlab'ixel ri Dios jela' pacha' ri'oj» xcha'.

48Xtaqan k'u che kaya' ri bautismo chike pa rub'i' ri Qanimajawal Jesucristo. Ek'uchiri', xeb'elaj che ri Pedro cha' kakanaj chi keb' oxib' q'ij kuk'.

Currently Selected:

Hechos 10: acrN

Highlight

Copy