Hechos 9

Ri jalk'atajib'al rub'inik usilab'ik ri Saulo

(Hch. 22:6-16; 26:12-18)

1Ek'u ri Saulo na karoq'otaj taj kuxib'ij kipa ruk' kamik janipa ri kikojom rub'i' ri Qanimajawal. Xe'ek k'u ruk' ri kajawal raj chakunel pa Rocho Dios 2y xutz'onoj b'i uwujil cha' kaya'i' puq'ab' kok pa taq ri sinagogas re ri tinamit Damasco. Jek'ula', we keburiq achijab' o ixoqib' e kuk'il ri kitaqem wa k'ak' B'e, k'o k'u puq'ab' ri' keb'uyut loq y keb'uk'am lo Jerusalem.

3Ek'u ri Saulo e ri' k'o pan chi b'e che u'anik wa', katajin k'u roponik chunaqaj ri tinamit Damasco, echiri' xaqik'ate't ruwonib'al jun aq' xpe chila' chikaj, xwol ka'n puwi' y xusut rij. 4Ri Saulo xtzaq pulew y xuta k'u jun qulaj, jewa' kub'i'ij che:

—Saulo, Saulo, ¿su'chak katch'o'jin chwij? —xcha che.

5Ri Saulo xutz'onoj che:

—¿Lal china rilal, Wajawal? —xcha'.

Jek'uwa' xk'ul uwach che:

—Ri'in in Jesús, ri Jun katch'o'jin chirij. Yey ri'at, atukel nenare' lik ka'an k'ax che awib', jela' pacha' juna b'oyex echiri' kuya aqan che ri puya kach'ik lo che —xuchixik.

6Kab'irb'ot k'u ri Saulo y uxi'im rib', jewa' xub'i'ij che:

—Wajawal, ¿sa' ri ka'aj la kan'ano? —xcha'.

Ri Qanimajawal xuk'ul uwach:

—Chatyaktajoq y jat chupa ri tinamit, ma chiri' kab'i'x wi chawe sa' ri chirajawaxik ka'ano —xcha'.

7Ek'u rachijab' e rachb'i'il ri Saulo lik kixi'im kib' xetak'i'ik; ma xkita ri qulaj, no'j na jinta junoq xkil uwach.

8Ri Saulo xyaktaj chwa rulew y xujaq k'u ruwach, pero na jinta chi k'o karilo ma xkanaj kan potz'. Ewi xa xch'elex b'i che ruq'ab' kuma ri erachb'ilam y xk'am b'i chupa ri tinamit Damasco. 9Xk'oji' k'u chila' oxib' q'ij; e la' na katzu'n taj, na xwa' taj y na jinta ne umiq'ina' xutijo.

10Chila' k'u ri' Damasco k'o jun achi Ananías rub'i'; rire ukojom rub'i' ri Cristo. K'o k'u jun k'utub'al re ri Dios xq'alajisax chwach. Ri xrilo e ri Qanimajawal xuk'ut uwach chwach y jewa' xub'i'ij che:

—¡Ananías! —xcha che.

Rire xuk'ul uwach:

—Ri' in k'olik, Wajawal —xcha'.

11Xub'i'ij k'u ri Qanimajawal che:

—Chatyaktajoq y jat chupa ri b'e kab'i'x “Jusuk'” che. Yey chirocho k'u ri Judas, chatz'onob'ej puwi jun achi aj Tarso, Saulo rub'i'. Rire katajin pa oración 12y q'alajisam chi k'u jun k'utub'al re ri Dios chwach. Chupa wa' xril jun achi Ananías rub'i', e ri' kok b'i y kuya ruq'ab' puwi' cha' jela' katzu'n tanchik —xcha'.

13Xub'i'ij k'u ri Ananías che ri Qanimajawal:

—Wajawal, lik nutom ronoje ri na utz taj u'anom wa' wa'chi chike ri kikojom ri b'i' la chila' Jerusalem. 14Yey ya'tal ne lo puq'ab' kuma ri nimaq e aj chakunel pa Rocho Dios keb'uk'am b'i pa cárcel konoje ri kikojom ri b'i' la —xcha'.

15Ek'u ri Qanimajawal xub'i'ij che:

—Jat chila' ruk', ma Ri'in nucha'om rire cha' ku'ana jun waj chak re ke'ek che uq'alajisaxik ri nub'i' chikiwach ri winaq na e ta aj judi'ab', chikiwach ri e taqanelab' y chikiwach ri e aj Israel. 16Yey kank'ut k'u che, janipa ri k'axk'olil chirajawaxik kik'ow wi rire ruma kutzijoj ri nub'i' —xuchix ri Ananías.

17Ri Ananías xe'ek k'ut y xok pa ri ja pa k'o wi ri Saulo. Xuya k'u ruq'ab' puwi' y xub'i'ij che: «Hermano Saulo, ri Qanimajawal Jesucristo, ri xuq'alajisaj rib' chawach chupa ri b'e pa at petinaq wi, inutaqom lo awuk' cha' kat-tzu'n tanchik y kak'ul k'u ri Santowilaj Ruxlab'ixel ri Dios» xcha che.

18Chupa k'u la' la joq'otaj, k'o ri pacha' solo't xtzaq che ruwach ri Saulo y xtzu'n tanchik. Tek'uchiri', xyaktajik y xuk'ul ri bautismo. 19Ek'uchiri' xwa' ri Saulo, xk'oji' tanchi uchuq'ab' y xk'oji' jujun q'ij kuk' ri kikojom rub'i' ri Cristo chila' pa ri tinamit Damasco.

Ri Saulo kutzijoj ri Utzilaj Tzij pa ri tinamit Damasco

20Tek'uchiri', ri Saulo xujeq katzijon puwi ri Cristo chupa taq ri sinagogas, jewa' ri kub'i'ij: «Ri Jesús e Uk'ajol ri Dios» kacha'.

21Konoje ri ketaw re lik kakam kanima' che y kakib'i'ij: «¿Na e ta neb'a achi wa' eb'uternab'em ruk' k'ax ri kikojom rub'i' ri Cristo chila' Jerusalem; yey k'uninaq ne wara re keb'uyut b'i y keb'u'ya'a pakiq'ab' ri nimaq e aj chakunel pa Rocho Dios?» kecha'.

22Pero ri Saulo jalan katajin unimarik ruchuq'ab' puwi ri kutzijoj. Ek'u raj judi'ab' ejeqel chiri' Damasco xsach kina'oj che ma ri Saulo kuq'alajisaj chikiwach: Ri Jesús e ri Cristo, Rucha'o'n lo ri Dios.

Ri Saulo karesaj b'i rib' chikiwach raj judi'ab'

23Ik'owinaq chi k'u uk'iyal q'ij, raj judi'ab' xki'an tzij junam chikiwach re kakikamisaj ri Saulo. 24Pero wa' xreta'maj ri Saulo. Ek'o k'u ri kichajim chipaq'ij chichaq'ab' taq ri okib'al re ri tinamit cha' kakichap ri Saulo y kakikamisaj.

25Ruma k'u ri', ri kikojom rub'i' ri Cristo e la' chaq'ab' xkiqasaj b'i ri Saulo chwi ri tapia chupa jun nimalaj chakach.

Ri Saulo kopon Jerusalem

26Echiri' xopon ri Saulo Jerusalem, lik xraj kaqib' kuk' ri kikojom rub'i' ri Cristo. Pero konoje rike lik kakixi'ij kib' che, ma na kakikoj taj we paqatzij wi ri Saulo ukojom chi rub'i' ri Cristo. 27Ek'u ri Bernabé xuk'am b'i y xu'ya'a chikiwach ri e taqo'n re ri Cristo. Xutzijoj k'u chike su'anik ri Saulo xril uwach ri Qanimajawal pa b'e y xch'a't ruk'. Yey xutzijoj chike puwi ri tzijonik xu'an ri Saulo chupa rub'i' ri Jesús chila' Damasco yey ruk' unimal uchuq'ab' xu'an wa'.

28Ek'u ri Saulo xkanaj kuk' chiri' Jerusalem y xerachb'ilaj pa taq keb'ek wi. 29Lik na kuxi'ij ta rib' katzijon chupa rub'i' ri Qanimajawal. Kach'a't k'u puwi ri Jesús kuk' raj judi'ab' ri kech'a't pa ri ch'a'tem griego;#9:29 Kil nota Hechos 6:1. ruma k'u la', rike kakitzukuj su'anik kakikamisaj. 30Echiri' ri hermanos xketa'maj wa', xkik'am b'i ri Saulo k'a Cesarea y chiri' k'ut xkitaq b'i chupa ri tinamit Tarso.#9:30 Tarso e tinamit pa xalax wi ri Saulo.

31E taq k'u ri kikojom rub'i' ri Cristo pa ronoje ri luwar re Judea, re Galilea y re Samaria, xekub'i' chi utz ma na jinta chi ri keternab'ex ruk' k'ax. Rike k'o xi'in ib' kuk' chwach ri Qanimajawal. Katajin k'u kik'iyarik yey ya'om kichuq'ab' y nimarisam kik'u'x ruma ri Santowilaj Ruxlab'ixel ri Dios.

Ri Eneas kakunutajik

32Xaloq' k'u ri Pedro katajin rik'owik pa taq riglesias, xopon kuk' ri kikojom rub'i' ri Cristo pa ri tinamit Lida. 33Chila' k'u ri' xu'riqa jun achi Eneas rub'i', yey e wajxaqib' lo junab' ri' k'o chwa uwarab'al ma xu'an sik.

34Ek'u ri Pedro jewa' xub'i'ij che: «Eneas, ri Qanimajawal Jesucristo katukunaj. Chatyaktajoq y chayijb'a' rawarab'al» xcha che.

Chupa k'u la' la joq'otaj ri Eneas xtak'i'ik. 35Konoje k'u ri ejeqel chupa ri tinamit Lida y pa taq ri luwar re Sarón xkilo ri Eneas kunutajinaq chik; y ruma k'u wa', xkiya kib' puq'ab' ri Qanimajawal.

Ri k'astajib'al re ri Dorcas

36Chupa ri tinamit Jope k'o jun ixoq ukojom rub'i' ri Cristo, Tabita rub'i'. (Pa ri ch'a'tem griego “Dorcas” kecha che.) Wa' wi'xoq lik uya'om rib' che u'anik ri utz y lik keb'uto' ri nib'a'ib'.

37Chupa taq la' la q'ij ri Dorcas xuchap yab'il y xkamik. Ek'uchiri' xch'aj rucuerpo, xq'atisax chikaj pa ri kale' ja.

38Ek'u ri hermanos e k'o Lida xkito k'o ri Pedro pa ri tinamit Jope, yey wa' xa naqaj k'o wuloq. Xekitaq k'u b'i ka'ib' achijab' cha' keb'e'elaj che ri Pedro, jewa' kakib'i'ij: «'Ana ko la ri', peta la wara quk' yey mamayin la.»

39Xyaktaj k'u b'i ri Pedro y xe'ek kuk'. Echiri' xoponik, xk'am b'i chikaj pa ri kale' ja. E taq ri e malka'nib' xkisut rij ri Pedro. Konoje wa' keb'oq'ik y kakik'ut taq ri k'ul y ri kiq'u' xu'an ri Dorcas echiri' k'a k'o kuk'. 40Ek'uchiri', ri Pedro xtaqan che konoje keb'el b'i. Xuxukub'a' k'u rib' y xu'an orar. Tek'uchiri', xutzu' ri kaminaq, y jewa' xub'i'ij che: «¡Tabita,#9:40 “Tabita”: Wa' e ub'i' ri Dorcas pa ri ch'a'tem hebreo. Hch. 9:36 chatyaktajoq!» xcha'. Ek'u ri' ri Dorcas xujaq ruwach; y echiri' xrilo k'o ri Pedro chiri', asu xtz'uyi'ik.

41Ek'u ri Pedro xuchap ruq'ab' y xuyako. Tek'uchiri', xeb'usik'ij ri kikojom rub'i' ri Cristo kuk' taq ri hermanas e malka'nib', y xuya k'u chikiwach e la' k'aslik. 42Wa' xeta'max chupa ronoje ri luwar re Jope. Ruma k'u ri', lik e k'i ri xkikoj rub'i' ri Qanimajawal Jesucristo. 43Y ri Pedro xkanaj kan uk'iyal q'ij chupa ri tinamit Jope, chirocho jun achi Simón rub'i', ri kut'is tz'u'um.

Currently Selected:

Hechos 9: acrN

Highlight

Copy