Hechos 13

Ri Bernabé y ri Saulo kakijeq ri nab'e kib'enam che utzijoxik ri Utzilaj Tzij

1Chila' Antioquía chikixo'lib'al ri kikojom rub'i' ri Cristo, e k'o eq'alajisay runa'oj ri Dios y e k'utunel re Rutzij. Wa' e:

ri Bernabé,

ri Simón ri kab'i'x q'eq che,

ri Lucio aj Cirene,

ri Manaén ri xk'iyisax pa rocho ri Herodes ri rey re Galilea

y ri Saulo.

2K'o k'u jun q'ij echiri' rike kimolom kib' re kakiloq'nimaj uq'ij ri Qanimajawal yey e k'o pa ayuno, ri Santowilaj Ruxlab'ixel ri Dios xub'i'ij chike:

«Cheb'icha'a ri Bernabé y ri Saulo chwe cha' kaki'an ri chak#13:2 Ri chak e ke'kitzijoj ri Utzilaj Tzij re ri Jesucristo pa taq ri kitinamit ri na e ta aj Israel. nuya'om chi lo pakiq'ab'» xcha'.

3Echiri' xkik'is ri oración y ayuno, xkiya ri kiq'ab' pakiwi rike y xekitaq k'u b'i.

Ri Pablo y ri Bernabé keb'opon pa ri isla Chipre

4Ek'u ri Bernabé y ri Saulo e la' etaqom b'i ruma ri Santowilaj Ruxlab'ixel ri Dios, xeb'opon k'u Seleucia. Chiri' xeb'el b'i pa barco y xeb'ek pa ri isla Chipre.#13:4 “Chipre”: E utinamit ri Bernabé. 5Echiri' xeb'opon Salamina, jun tinamit re Chipre, xkijeq utzijoxik Rutzij ri Dios puwi ri Qanimajawal Jesucristo pa taq sinagogas ke raj judi'ab'. Yey k'o ri Juan#13:5 “Juan”: Wa' e Juan Marcos, ri ratz-uchaq' ri Bernabé. Hch. 12:12,25; 13:13; 15:37-38; Col. 4:10 kuk' re kito'b'el.

6Xeb'ik'ow k'u chupa ronoje ri isla Chipre y xeb'opon k'a chupa ri tinamit Pafos. Chiri' xkiriq jun achi e kuk'il raj judi'ab'; rire aj q'ij yey e jun q'alajisanel xa kasokoso'nik. Wa' wa'chi Barjesús#13:6 “Barjesús” ke'elawi “uk'ajol Jesús” o “uk'ajol Josué”. rub'i', yey pa ri ch'a'tem griego “Elimas” kecha che. 7Wa' wa aj q'ij k'o ruk' ri taqanel Sergio Paulo, jun achi lik k'o una'oj. Ri taqanel xeb'usik'ij ri Bernabé y ri Saulo, ma lik kurayij kuta Rutzij ri Dios puwi ri Qanimajawal Jesucristo.

8Pero rachi aj q'ij xutij ri' che keb'uq'atej ri Bernabé y ri Saulo cha' ri taqanel na kukub'a' ta uk'u'x che ri Utzilaj Tzij re ri Jesucristo.

9Ek'u ri Saulo (ri kab'i'x Pablo che) ruk' ruchuq'ab' ri Santowilaj Ruxlab'ixel ri Dios xuch'ikib'a' ruwach puwi ri Elimas, 10y jewa' xub'i'ij che:

«¡Rilal lal nojinaq che ronoje sokoso'nik y che ronoje itz! ¡Lal ralk'o'al ritzel winaq, ri jun aj retzelal k'u'x chirij ronoje ri jusuk'! ¿Su'chak na koq'otaj ta la ri kajech'ij la ri jusuk' b'e re ri Qanimajawal? 11Ek'u wo'ora ruq'ab' ri Qanimajawal kayaktaj chi'ij la y ku'an potz' che'la; xew k'u ri Dios eta'mayom janipa q'ij na kil ta la ri q'ijsaq» xcha'.

Na jampatana k'ut ronoje xu'an q'equ'm chwach y xujeq kamalal pa taq utzal y chirij, kutzukuj china kak'amaw b'i che ruq'ab'.

12Ek'uchiri' ri taqanel xril wa xuk'ulumaj ri Elimas, xukoj rub'i' ri Qanimajawal Jesucristo, y lik kaminaq ranima' che ri k'utunik chwi ri Qanimajawal.

Ri Pablo y ri Bernabé keb'opon Antioquía re Pisidia

13Ri Pablo junam kuk' ri rachb'i'il xeb'el b'i Pafos pa barco y xeb'opon Perge pa ri luwar re Panfilia. Pero ri Juan xresaj kan rib' chikij y xtzelej Jerusalem.

14Ek'u rike xeb'ik'ow Perge y xeb'opon Antioquía pa ri luwar re Pisidia. Chupa k'u jun q'ij re uxlanib'al xeb'ok pa ri sinagoga y xetz'uyi'ik. 15Ek'uchiri' ajilam chi jujun che Rutzij Upixab' ri Dios tz'ib'ital kan ruma ri Moisés y kuma ri q'alajisanelab', raj wach re ri sinagoga xkitaq lo ub'i'xikil chike:

«Alaq qatz-qachaq', we k'o juna ch'a'tem alaq re pixab'anik che ri tinamit, ch'aw alaq» xecha'.

16Xtak'i' k'u ri Pablo y xu'an jun k'utub'al ruk' ruq'ab' cha' na jinta k'o kach'awik y xub'i'ij:

«Alaq achijab' aj Israel y onoje alaq ri k'o xi'in ib' pa anima' alaq chwach ri Dios, tape alaq. 17Ri Dios re wa tinamit Israel xeb'ucha' ri qati'-qamam ojertan y xu'an jun nimalaj tinamit chike echiri' k'a e k'o Egipto, tob' rike na e ta aj chiri'. Ruk' k'u unimal uchuq'ab' ri' xeb'eresaj lo Egipto.

18»Laj juna cuarenta junab' k'u ri' xeb'ukuy ri Dios rutinamit ruk' ri kimakunik pa ri luwar katz'intz'otik. 19Tek'uchiri', xusach kiwach wuqub' nimaq tinamit pa ri luwar re Canaán#Dt. 7:1 y xuya k'u chike ri qati'-qamam kekanaj kan ruk' wa ulew. 20Laj ik'owinaq chi kajib' ciento junab' ruk' nik'aj chwi lo echiri' rutinamit ri Dios xeb'opon Egipto, k'a ek'uchiri' xekanaj kan pa rulew ub'i'tisim lo ri Dios chike.

»Ek'uchiri', ri Dios xeb'uya e aj q'atal tzij re ketaqan pakiwi rutinamit. Jela' u'anom k'a chwa ri q'alajisanel Samuel. 21Chupa k'u rutaqanik ri Samuel, ri tinamit xkitz'onoj che ri Dios kuya juna kirey. Ek'u ri Dios xukoj ri Saúl pakiwi'. Ri Saúl e uk'ajol ri Cis, jun achi upeteb'em chike ri ralk'o'al kan ri Benjamín.#13:21 Ri Benjamín e jun chike ri kab'lajuj uk'ajol ri Jacob. Cuarenta junab' k'u xtaqan pakiwi'. 22Ek'uchiri' ri Dios xresaj ri rey Saúl pakiwi', e xukoj ri David re kataqan puk'axel. Chwi k'u ri David lik chom xch'a't ri Dios, ma jewa' xub'i'ij:

E wilom che ri David ruk'ajol ri Isaí,

rire jun achi lik kaki'kot nuk'u'x ruk'

ma kuya ranima' ku'ano janipa ri kantaq che 1 S. 13:14

xcha'.

23»Ek'u chirij rub'i'tisim lo chike ri e ralk'o'al kan ri David, ri Dios e xuyak ri Jesús re Kolob'enel ke raj Israel. 24Echiri' ri Jesús k'amaja' kujeq ri chak taqom lo che u'anik chikiwach ri winaq, xtzijon ri Juan puwi ri bautismo re tzeleb'al tzij chike konoje ri tinamit Israel. 25Ek'uchiri' ri Juan katajin che uk'isik ruchak, xub'i'ij: “Chiwach ri'ix ¿in china ri'in? Ri'in na in ta ri Kolob'enel oye'em alaq. No'j katajin k'u lo uk'unik Jun chwij, yey ri' na taqal tane chwe ri'in kankir ruxajab' che ri raqan” xcha'.

26»Alaq qatz-qachaq', alaq ralk'o'al kan ri Abraham y onoje alaq ri k'o xi'in ib' uk' alaq chwach ri Dios, che k'u ralaq taqom wi lo ri Utzilaj Tzij re kolob'etajik. 27Yey ri ejeqel Jerusalem kuk' ri e aj wach ke, na xketa'maj taj ri Jesús e Ucha'o'n lo ri Dios y na xkimaj tane usuk' ri tz'ib'ital kan kuma ri q'alajisanelab' puwi ri Jesús, tob' wa' kakajilaj ronoje q'ij re uxlanib'al. Yey echiri' rike xkitz'onoj rukamik ri Jesús, e xki'an k'u ri tz'ib'ital kan puwi Rire. 28Y tob' na jinta k'o xkiriq chirij ri Jesús re kakamisaxik, xkitz'onoj che ri Pilato kutaq ukamisaxik. 29Echiri' xkik'is u'anik ruk' ri Jesús janipa ri tz'ib'ital kan puwi Rire, xkiqasaj lo chwa ri cruz y xe'kimuqu'.

30»Pero ri Dios xuk'astajisaj lo ri Jesús chikixo'l ri ekaminaq. 31Tek'uchiri', ri Jesús uk'iyal q'ij xuk'ut uwach chikiwach ri xerachb'ilaj chwi echiri' xeb'el lo Galilea y xeb'ek ruk' k'a Jerusalem.#Hch. 1:3 E taq k'u ri' wa' ri ketzijow re ri Jesús chikiwach ri tinamit wo'ora.

32»Jek'ula' ri'oj kaqatzijoj che alaq ri Utzilaj Tzij, ri b'i'tisim lo chike ri qati'-qamam ojertan. 33Yey wa b'i'tisinik ya'om chi chiqe ri'oj ri oj kalk'o'al kan rike. Ma ri Dios xu'an wa' echiri' xuk'astajisaj lo ri Jesús chikixo'l ri ekaminaq, jela' pacha' ri tz'ib'ital chupa ruka'm Salmo:

Ri'at at Nuk'ajol yey Ri'in in Aqaw;

waq'ij k'u ri' kanq'alajisaj wa' Sal. 2:7

kacha'.

34»Yey ri Dios ub'i'im kuk'astajisaj lo ri Jesús chikixo'l ri ekaminaq cha' jela' rucuerpo na kaq'ay taj, ma jewa' xub'i'ij pa Ruch'a'tem puwi wa':

Kank'ut na ri k'axna'b'al nuk'u'x chiwach,

jela' pacha' ri nub'i'tisim lo che ri David. Is. 55:3

35E uwari'che jewa' kub'i'ij pa jun chik Salmo:

Rilal na kaya ta la luwar che kaq'ay rucuerpo

ri Jun lik uya'om rib' paq'ab' la Sal. 16:10

xcha'.

36»Ma paqatzij wi ri David xu'an ri xraj ri Dios ruk' echiri' k'o che ruwachulew, pero xopon ri q'ij xkamik y xmuq pa emuqum wi ruchu-uqaw, y rucuerpo xq'ayik. 37No'j rucuerpo ri Jun ri xuk'astajisaj b'i ri Dios, na xq'ay taj.

38»Cheta'maj k'u alaq wa', alaq watz-nuchaq': Ruma ri xu'an ri Cristo, katzijox che alaq su'anik kariq alaq ri kuyb'al mak chwach ri Dios. 39Ruma k'u ri Cristo, konoje ri kakub'i' kik'u'x ruk' Rire, ka'ani' jusuk' chike. Yey wa' na kariqitaj ta k'ana ruma ri kataqex ri Tzij Pixab' tz'ib'ital kan ruma ri Moisés.

40»Chajij k'u ib' alaq cha' na kape ta pawi' alaq ri ub'i'im lo ri Dios chupa ri tz'ib'ital kan kuma ri q'alajisanelab':

41Chiwilape', ix aj ch'aminel re ri Nutzij,

lik kakam na k'u iwanima' che

y kasach ne iwach ruma wa':

Ri'in kan'an jun chak chupa taq wa q'ij ix k'o wi,

jun chak na kikoj taj,

tob' ne k'o junoq katzijow re chiwe Hab. 1:5

xcha ri Dios.»

Ruk' wa' xuk'isb'ej ri Pablo.

42Ek'uchiri' ri Pablo y ri Bernabé xeb'el b'i pa ri sinagoga, ri e k'o chiri' xeb'elaj chike cha' ri jun chik q'ij re uxlanib'al kech'a't kuk' rike chwi taq wa'. 43Echiri' xeb'el b'i konoje ri kimolom kib' pa ri sinagoga, e k'i xeterej b'i chikij ri Pablo y ri Bernabé. Chikixo'l wa' e k'o raj judi'ab' y jujun chik kitaqem lo ri k'utunik ke raj judi'ab' (tob' na e ta aj judi'ab', pero lik kakiloq'oj uq'ij ri Dios). Ek'u ri Pablo y ri Bernabé lik xekipixab'aj cha' ketiki' chupa ri unimal rutzil uk'u'x ri Dios.

44Chupa k'u ri jun chik q'ij re uxlanib'al, ya laj konoje ri winaq re ri tinamit xkimol kib' cha' kakita Rutzij ri Dios puwi ri Qanimajawal. 45Pero echiri' raj judi'ab' xekil ruk'iyal winaq, xujeq kati'tot kik'u'x chirij ri Pablo. Y xkijeq k'u kakik'ulali'aj uwach ronoje ri kub'i'ij ruk' k'axlaj ch'a'tem.

46Ek'uchiri', ri Pablo y ri Bernabé, ruk' unimal kichuq'ab', xkib'i'ij chike:

—Paqatzij wi lik chirajawaxik nab'e na katzijox che ralaq ri alaq aj judi'ab' Rutzij ri Dios puwi ri Qanimajawal. Pero ruma k'u ri na kak'ul ta alaq, jela' kaq'alajinik na taqal ta ri k'aslemal na jinta utaqexik che alaq. Ruma k'u la' ke'qatzijoj chike ri na e ta aj judi'ab', 47ma jela' ri ojutaqom lo ri Dios Qajawxel che u'anik. E pacha' ri ub'i'im lo Rire echiri' xub'i'ij:

Ri'in atnukojom re Q'ijsaq

chikiwach taq ri tinamit

cha' jela' ku'ana at k'amal b'i re ri kolob'etajik

k'a pa taq ri luwar lik naj che ruwachulew Is. 49:6

—xecha'.

48Echiri' xkita wa' ri na e ta aj judi'ab', lik xeki'kot che y xkijeqo kakiyak uq'ij ri Utzilaj Tzij puwi ri Qanimajawal. Jek'ula' xkikoj rub'i' ri Cristo konoje ri echa'om chi uloq re kak'oji' kik'aslemal na jinta utaqexik. 49Y xe'ek utzijoxik ri Utzilaj Tzij puwi ri Qanimajawal chupa taq ronoje wa luwar.

50No'j raj judi'ab' xkikoj pa kijolom raj wach re ri tinamit y jujun ixoqib' lik k'o kiwach yey kitaqem ri tzijpixab' ke raj judi'ab', cha' kekiternab'ej ruk' k'axk'ob'ik ri Pablo y ri Bernabé. Jek'ula' ri' xeb'ekesaj b'i pa wa tinamit.

51Ek'u ri Pablo y ri Bernabé xkipupa' kan rulew che ri kaqan, k'utub'al re ri na utz taj xki'an ri e aj chila' y xeb'ek k'u pa ri tinamit Iconio. 52Pero ri kikojom rub'i' ri Cristo chila' Antioquía lik k'o ki'kotemal kuk' yey ri Santowilaj Ruxlab'ixel ri Dios lik k'o kuk'.

Currently Selected:

Hechos 13: acrN

Highlight

Copy