Hechos 14

Ri Pablo y ri Bernabé keb'opon Iconio

1Chila' k'ut chupa ri tinamit Iconio, ri Pablo y ri Bernabé junam xeb'ok chupa ri sinagoga ke raj judi'ab'. Ruma k'u ri Utzilaj Tzij xkitzijoj, lik e k'i ri e aj judi'ab' y ri na e ta aj judi'ab' xkikoj rub'i' ri Cristo. 2No'j ri e aj judi'ab' ri na kakikoj ta ri Utzilaj Tzij, xkitik oyowal pa kanima' ri na e ta aj judi'ab' yey xekituk wa' wa winaq cha' keyaktaj chikij ri kikojom rub'i' ri Cristo. 3Na ruk' ta k'u ri', lik naj xek'oji' ri Pablo y ri Bernabé chiri' y na kakixi'ij ta k'ana kib' kech'a't chikiwach konoje. Ek'u ri Qanimajawal xujikib'a' uwach ri kich'a'tem chwi ri unimal rutzil uk'u'x, ma xuya chike kaki'an nimaq taq k'utub'al re ruchuq'ab' ri Dios. 4Ek'u ri winaq re ri tinamit kijachom kipa; jujun chike ekiternab'em raj judi'ab' y jujun chik ekiternab'em ri e taqo'n re ri Jesús.

5Ek'u ri e aj judi'ab' junam kuk' ri na e ta aj judi'ab' xki'an tzij chikiwach kuk' ri e aj wach cha' keyaktaj chikij ri Pablo y ri Bernabé re kaki'an k'ax chike y keki'an pa'b'aj. 6Echiri' ri Pablo y ri Bernabé xketa'maj wa', xeb'el b'i chiri' y xeb'ek pa ri luwar re Licaonia pa taq ri tinamit Listra y ri tinamit Derbe y pa taq ri luwar chunaqaj wa keb' tinamit. 7Y chiri' k'u ri' kakitzijoj ri Utzilaj Tzij.

Ri Pablo ka'an pa'b'aj pa ri tinamit Listra

8Chupa wa tinamit Listra k'o jun achi sikirinaq ukab'ichal ri raqan y na b'ininaq ta k'enoq ma ralaxib'em sik. Wa' wa'chi tz'ulik, 9e ri' kutata' ri kub'i'ij ri Pablo.

Ek'uchiri' ri Pablo xuch'ikib'a' ruwach puwi' y xrilo k'o kub'ulib'al uk'u'x cha' kakunutajik, 10lik ko xub'i'ij che:

—¡Chatyaktajoq y chat-tak'ala jusuk' chwi rawaqan! —xcha'.

Ek'u rachi xch'oplin chikaj y xb'inik.

11Ek'u ri winaq echiri' xkilo sa' ri xu'an ri Pablo, xkijeq kesik'in pa kich'a'tem rike, wa' e ri ch'a'tem re Licaonia. Jewa' kakib'i'ij: «¡Wa' e tiox ki'anom lo achijab' che kib' y xeqaj lo wara quk'!» kecha'.

12Che ri Bernabé xkib'i'ij e tiox Júpiter, yey che ri Pablo xkib'i'ij e tiox Mercurio#14:12 “Mercurio”: Chikiwach raj Roma, Mercurio e ri tiox karesaj kichi' ri nik'aj chik tiox. ma e rire ri más kach'awik. 13Ek'u raj chakunel re ri tiox Júpiter, ri k'o rocho pa okib'al lo re ri tinamit, xeb'uk'am lo toro'ib' y kotz'i'j yijb'am re wiqonik chwach taq ri okib'al re ri templo. Yey junam kuk' ruk'iyal winaq xkaj kekikamisaj rawaj re kiqasa'n chikiwach ri Bernabé y ri Pablo.

14Echiri' xkita wa' ri keb' taqo'n Bernabé y Pablo, xkirich'ij ri kiq'u' y xkimin kib' chikixo'l ruk'iyal winaq; kesik'inik jewa' kakib'i'ij:

15«¡Achijab'!, ¿su'chak ka'an alaq wa'? Ma ri'oj xa oj achijab' junam qawach uk' alaq. Wa Utzilaj Tzij kaqatzijoj che alaq e cha' kaya kan alaq ri na il ta uwach y katzukuj alaq ri Dios k'aslik, ri x'anaw re ruwa kaj, ruwachulew, ri mar y ronoje ri k'o che taq wa'. 16Tob' rojertan ri Dios xuya luwar chike taq ri tinamit keb'in chupa taq ri b'e kakaj rike, 17na ruk' ta k'u ri', ri Dios na roq'otam ta k'ana uq'alajisaxik china Rire ruma taq ri utz ku'ano. Ma kuya lo ri jab' y kuya lo ruq'ijol echiri' lik k'o molonik. E Rire ri ka'anaw re lik k'o kaqatijo y k'o ki'kotemal chupa ri qanima'» kecha'.

18Ri Bernabé y ri Pablo, tob' ketajin che ub'i'xikil wa', lik k'ayew xekiq'atej ruk'iyal winaq cha' na kekikamisaj ta rawaj re qasa'n chikiwach rike.

19Chupa k'u la' la' joq'otaj xek'un lo jujun aj judi'ab' e aj pa ri tinamit Antioquía y ri tinamit Iconio. Rike xkikoj pa kijolom ruk'iyal winaq kaki'an ri Pablo pa'b'aj. Y ek'u xki'ano. Tek'uchiri', xkichararej b'i ri Pablo tza'm tinamit. E chikiwach rike, kaminaq chik. 20Pero echiri' ri kikojom rub'i' ri Cristo xkisut rij ri Pablo, rire xyaktajik y xok tanchi chupa ri tinamit. Chuka'm q'ij xel b'i ruk' ri Bernabé y junam xeb'ek pa ri tinamit Derbe.

21Xkitzijoj k'u ri Utzilaj Tzij chupa wa tinamit y uk'iyal tikawex xkikoj rub'i' ri Cristo. Tek'uchiri', xetzelej tanchi lo chupa ri tinamit Listra, ri tinamit Iconio y ri tinamit Antioquía. 22Xkinimarisaj k'u kan kik'u'x ri hermanos y lik xekipixab'aj cha' katiki' chi utz ri kub'ulib'al kik'u'x ruk' ri Jesús, jewa' kakib'i'ij chike: «Lik chirajawaxik ruk' uk'iyal k'axk'ob'ik kojok chupa rutaqanik ri Dios» kecha'.

23Yey xekikoj kan e aj wach chujujunal taq iglesia. Xki'an k'u orar y ayunar kuk'. Tek'uchiri', xkitz'onoj che ri Qanimajawal keb'uchajij janipa ri lik kub'ul kik'u'x ruk' Rire.

Ri Pablo y ri Bernabé ketzelej tanchi Antioquía re Siria

24Xeb'ik'ow k'u pa taq ri luwar re Pisidia y xeb'opon pa ri luwar re Panfilia. 25Xkitzijoj k'u ri Utzilaj Tzij chupa ri tinamit Perge. Tek'uchiri', xkimaj b'i pa ri tinamit Atalia.

26Chiri' k'u ri' xkimaj b'i pa barco y xetzelej Antioquía.#14:26 K'o keb' Antioquía. Wa jun e Antioquía re Siria, pa xkijeq wub'i ri kib'enam ri Pablo y ri Bernabé. Wa' e ri tinamit pa xtz'onox wub'i ruto'b'al ri Dios pakiwi ri Pablo y ri Bernabé cha' kaki'an ri chak ya'om pakiq'ab',#Hch. 13:1-3 yey wa' wa chak kik'isom chi rike.

27Echiri' xeb'oponik, xekimol kichi' konoje ri kikojom rub'i' ri Cristo y xkitzijoj k'u chike ronoje ri xu'an ri Dios kuk' y su'anik xuya chike ri na e ta aj judi'ab' keb'u'an xa jun kuk' ri kikub'am kik'u'x ruk' ri Qanimajawal Jesucristo. 28Xekanaj k'u kan chiri' uk'iyal q'ij kuk' ri kikojom rub'i' ri Cristo.

Currently Selected:

Hechos 14: acrN

Highlight

Copy