Hechos 19
19
Ri Pablo kak'oji' oxib' junab' pa ri tinamit Éfeso
1Ek'uchiri' k'a k'o ri Apolos pa ri tinamit Corinto, ri Pablo xe'ek pa taq ri tinamit k'o lo chwi taq juyub' y jela' xopon pa ri tinamit Éfeso. Chila' xeb'u'riqa jujun chike ri kikojom rub'i' ri Cristo 2y xutz'onoj k'u chike:
—¿Xk'ul alaq ri Santowilaj Ruxlab'ixel ri Dios echiri' xkoj alaq rub'i' ri Cristo? —xcha chike.
Yey rike xkik'ul uwach:
—¿Sa' ri' wa'? Ma ri'oj na qatom tane k'enoq we k'o Ruxlab'ixel ri Dios —xecha'.
3Ek'u ri Pablo xutz'onoj chike:
—¿Sa' k'u ri bautismo xk'ul alaq? —xcha'.
Rike xkik'ul uwach:
—E ri bautismo re ri Juan —xecha'.
4Xub'i'ij k'u ri Pablo chike:
—Ri bautismo xuya ri Juan e k'utub'al re ri tzeleb'al tzij chwach ri Dios, yey xtzijon chikiwach ri tinamit cha' kakikoj rub'i' ri Jun katajin lo chirij rire;#Mt. 3:11; Hch. 13:24-25 wa' e ri Jesús, ri Cristo —xcha'.
5Echiri' xkita wa', asu xkik'ul ri bautismo pa rub'i' ri Qanimajawal Jesús. 6Ek'uchiri' ri Pablo xuya ruq'ab' pakiwi', ri Santowilaj Ruxlab'ixel ri Dios xqaj pakiwi' y xkijeq k'u ri' kech'a't pa jujun chik ch'a'tem na kimajom taj y kakiq'alajisaj ri tzij uya'om ri Dios chike. 7Chi konoje wa' laj e juna kab'lajuj chi achijab'.
8Xok k'u ri Pablo pa ri sinagoga, yey oxib' ik' k'u ri' xutzijoj ri Utzilaj Tzij y na xuxi'ij ta k'ana rib' che u'anik wa'. K'olik kakichapala' kib' kuk' raj judi'ab' puwi ri kuk'utu y lik xutij uq'ij cha' kukoj pa kijolom ri usuk' puwi rutaqanik ri Dios.
9Pero e k'o jujun chike xki'an lik ko che kib' y na xkaj ta k'u xkikoj rub'i' ri Cristo; xkijeq k'u ri' tzel kech'a't chirij ri K'ak' B'e re ri Utzilaj Tzij e la' chikiwach ruk'iyal winaq. Ek'u ri Pablo xresaj b'i rib' chikixo'l y xeb'uk'am b'i ri kikojom rub'i' ri Cristo. Chujujunal q'ij k'ut, ri Pablo katzijonik y lik kach'a't chwi taq ruk'utunik chikiwach, pa ri luwar pa kak'utun wi jun achi Tirano rub'i'. 10Pa keb' junab' e ri' jela' xu'an ri Pablo, kak'utunik. Ruma k'u la', konoje ri e aj judi'ab' y ri na e ta e aj judi'ab' e k'o pa taq ri luwar re Asia, xkita ri Utzilaj Tzij re ri Qanimajawal Jesús.#19:10 Xtik iglesias pa Colosas, Laodicea, Hierápolis (Col. 4:13) y jujun chik tinamit re Asia (Ap. 2–3).
11Yey ruma k'u ri Pablo, ri Dios xu'an nimaq taq milagros na jinta k'ana ilitajinaq wi. 12Xu'ana ne ri', kak'am b'i su't o k'ul ik'owisam chirij ri Pablo y kaya' chike ri yewa'ib', y jela' kekunutajik yey ri itzel uxlab'ixel keb'el b'i chike tikawex.
13Pero e k'o jujun aj judi'ab' xa eb'ik'owel pa taq tinamit yey e kiwach kekesaj itzel uxlab'ixel chike ri tikawex. Rike xkitij uq'ij kakesaj b'i ritzel taq uxlab'ixel chike ri winaq pa rub'i' ri Qanimajawal Jesús, jewa' kakib'i'ij: «Chupa rub'i' ri Jesús ri kutzijoj ri Pablo, kintaqan piwi' cha' kixel b'i» kecha'.
14Jujun chike ri kaki'an wa' e ri wuqub' uk'ajol jun achi Esceva rub'i'. Rire e kuk'il raj judi'ab' yey e kuk'il ri nimaq e aj chakunel pa Rocho Dios.
15K'o k'u jun q'ij, jun itzel uxlab'ixel xuk'ul uwach chike ri wuqub' uk'ajol ri Esceva: «Weta'am uwach ri Jesús y weta'am china ri Pablo; no'j ri'ix, ¿ix chinoq?» xcha'.
16Ek'u rachi, ri k'o puq'ab' ri itzel uxlab'ixel, xuk'aq rib' pakiwi' y ruk' unimal uchuq'ab' xeb'uchapo, yey ek'u ri' rire ri xuch'ij kichuq'ab' y lik xu'an k'ax chike. Jek'uri'la', rike ech'analik xeb'animaj b'i chupa ri ja e k'o wi. 17Y konoje ri ejeqel chupa ri tinamit Éfeso xketa'maj wa'. Ek'u ri e aj judi'ab' y ri na e ta aj judi'ab' lik xkixi'ij kib' che; jek'uri'la', wa' xe'eloq re yakb'al uq'ij rub'i' ri Qanimajawal Jesús.
18Lik k'u e k'i ri' chike ri kikojom rub'i' ri Cristo, xek'unik e la' chiwachil kakiq'alajisaj taq janipa ri na utz taj ki'anom. 19Lik k'u e k'i chike ri eb'u'anom aj itz y aj q'ij, xkik'am taq lo ri kiwuj re majb'al itz y xkiporoj chikiwach konoje. Xajilax k'u ri' janipa ku'ana ri rajil wa' y xu'ana cincuenta mil chi saqil puaq re plata. 20Jek'uri'la' xukich wub'i rib' ri Utzilaj Tzij re ri Qanimajawal y xe'ek uq'alajisaxik ruk' unimal chuq'ab'; yey lik katajin kik'iyarik ri kekojow re.
21Ik'owinaq chi taq wa', ri Pablo xutik pa ranima' ke'ek pa ri tinamit Jerusalem echiri' ik'owinaq chi pa taq ri luwar re Macedonia y re Acaya. Jewa' xub'i'ij: «Echiri' inik'owinaq chi chupa ri tinamit Jerusalem, lik chirajawaxik chwe kinopon pa ri tinamit Roma.» 22Xeb'utaq k'u b'i pa taq ri luwar re Macedonia keb' chike ri keto'w re, wa' e ri Timoteo y ri Erasto. Yey rire xkanaj chi kan jujun q'ij pa taq ri luwar re Asia.
Ketukuk ri winaq e k'o Éfeso
23Chupa taq k'u la' la q'ij, pa ri tinamit Éfeso xkijeq ketukuk ri winaq chirij ri K'ak' B'e re ri Dios y na xa ta jub'iq' ri xki'ano. 24Wa' e ruma jun achi Demetrio rub'i', aj chakunel ruk' ch'ich' re plata. Ruk' wa' wa ch'ich' re plata ku'an raltaq ko ja, uk'axwach ri rocho ri kitiox Diana.#19:24 “Diana”: E ub'i' kakib'i'ij ri e aj Roma che wa jun tiox, no'j ri e aj Grecia “Artemisa” kecha che. Yey chwach wa', na xa ta jub'iq' ri kakich'ak janipa ri kechakun ruk'.
25Ek'u wa'chi xeb'umol wa raj chak, kuk' jujun chik aj chakib' junam ri kichak y xub'i'ij chike:
«Alaq achijab', ralaq eta'am alaq e ruma wa jun chak lik k'o qab'eyomalil. 26Pero ilom k'u alaq y tom alaq ri u'anom lo ri Pablo. Ri ku'ano e kukoj pa kijolom uk'iyal tikawex na e ta dios ri xa e 'anom ruk' kiq'ab' ri tikawex. Yey na xew ta kuk'ut wa' pa ri qatinamit Éfeso, ma ya laj kumaj ronoje pa taq ri luwar re Asia. 27Ruma k'u wa', k'o ne pa saq na kaloq' ta chi ri qak'ay, yey laj ku'ana ne ri' chikiwach ri winaq na jinta chi uq'ij ri rocho ri nimalaj qatiox Diana. Jek'ula', kujeq na jinta chi uwach ri qatiox, ri kaloq'ox uq'ij pa taq ronoje ri luwar re Asia y che ronoje ruwachulew» xcha'.
28Echiri' xkita taq wa', lik xpe koyowal y xkijeq kesik'inik: «¡Nim uq'ij ri tiox Diana ke ri aj Éfeso!» kecha'.
29Xpe k'u jun nimalaj sachib'al na'oj chike konoje ri tinamit. Ketenenik xe'kiya'a kib' pa ri nimalaj estadio pa kakimol wi kib' ri tinamit. Y xekichap k'u ri Gayo y ri Aristarco; rike e aj pa ri luwar re Macedonia y e rachb'i'il ri Pablo.
30Xraj k'u ri Pablo kok pa ri estadio cha' kach'a't chikiwach ruk'iyal winaq, no'j ri kikojom rub'i' ri Cristo xkiq'atej. 31Yey e k'o ne jujun chike ri e aj q'atal tzij re pa taq ri luwar re Asia, e ramigos ri Pablo; rike xkitaq ub'i'xikil che y lik xeb'elaj che cha' na kok tub'i pa ri estadio pa etenel wi ri winaq.
32Ek'u ri winaq etenel chiri' lik xsach kina'oj y xkijeq kesik'inik. Junwi taq ri kakib'i'ij y na katataj ta chi nenare' sa' taq ri kakib'i'ij. Yey lik e k'i chike na keta'am ta nenare' su'chak kimolom kib'.
33E k'o k'u jujun aj judi'ab' xkiminenej b'i chikiwach konoje, jun achi Alejandro rub'i'. Ek'uchiri', jujun chik xe'kijek'a pan chikixo'l ruk'iyal winaq. Ek'u rire xu'an jun k'utub'al ruk' ruq'ab' cha' kaya'i' che kuto'b'ej rib'.
34Pero echiri' ri winaq xketa'maj rire e kuk'il raj judi'ab', konoje xa jun ub'i'xikil kesik'inik, laj keb' ora xkich'ijo kakib'i'ij: «¡Nim uq'ij ri tiox Diana ke ri aj Éfeso!» kecha'.
35Ek'u ri aj tz'ib' re ri tinamit, echiri' xuch'ij kikub'axik ruk'iyal winaq, jewa' xub'i'ij:
«Alaq achijab' aj Éfeso, ¿china ri na eta'mayom ta re we ri tinamit ke ri aj Éfeso e chajal re ri rocho ri nimalaj tiox Diana yey junam ruk' ruk'axwach, ri qajinaq lo chikaj? 36Yey che taq wa', na utz ta k'u ri' k'o junoq kub'i'ij na qatzij taj. E uwari'che lik chirajawaxik kakub'i' alaq. Mak'o ma'an alaq pa ch'u'jilal; nab'e na ch'ob'o alaq raqan chi utz ri ka'an alaq. 37Kamb'i'ij wa', ma ek'amom lo alaq wa' wa'chijab' tob' rike na e tane makuninaq chirij ri templo o chirij ri qatiox.
38»Yey we ri Demetrio kuk' ri rachb'i'il k'o kich'a'oj chirij junoq, ri lik ub'e e kiya'a wa' pa q'atb'al tzij; ma e k'o e aj q'atal tzij ya'tal pakiq'ab' kakita ke ri winaq kakiraq'uj kib' chikiwach. 39Yey we k'a k'o ka'aj alaq katz'onoj alaq chikij, ri lik ub'e e kaya'i' wa' chikiwach konoje ri tinamit y kayijb'ax chi usuk'likil. 40Ma ruma ri x'ani' waq'ij, k'o ne pa saq katz'aq qachi' kojch'o'jin chirij ri q'atb'al tzij y na jinta k'o kel wi we xtz'onox chiqe sa' la kojtukuk wi» xcha'.
41Xew k'u xub'i'ij wa' xuk'isb'ej utza'm ri kimolom wi kib'.
Currently Selected:
Hechos 19: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
