Hechos 20

Ri Pablo kik'ow pa taq ri luwar re Macedonia y Grecia

1Echiri' xtani' ri ketukuk ri winaq, ri Pablo xeb'usik'ij ri kikojom rub'i' ri Jesús. Xeb'upixab'aj k'ut y xeb'ulaq'apuj. Echiri' xuk'isb'ej kan uch'a'tem kuk', xel b'i y xe'ela pa taq ri luwar re Macedonia. 2Xik'ow k'u pa taq wa luwar cha' ruk' uk'iyal pixab'anik kunimarisaj kik'u'x ri kikojom rub'i' ri Cristo.

Tek'uchiri', xe'ela pa taq ri luwar re Grecia. 3Oxib' ik' xkanaj kan ri Pablo chiri'. Uch'ob'om chi k'ut ke'ek Siria pa barco; pero raj judi'ab' xki'an tzij chikiwach cha' kaki'an k'ax che echiri' ku'kojo b'i ri barco. Ek'u ri Pablo xreta'maj ri kina'oj na utz taj chirij; ruma k'u ri', xujalk'atij ruch'ob'om cha' katzelej pa taq ri luwar re Macedonia.

4E k'o hermanos xkachb'ilaj b'i k'a pa taq ri luwar re Asia. Wa' e:

ri Sópater aj Berea,

ri Aristarco,

ri Segundo aj Tesalónica,

ri Gayo aj Derbe,

ri Timoteo,

yey ri Tíquico y ri Trófimo, ri e aj Asia.

5Ek'u rike xenab'ej b'i y xojkoy'ej chupa ri tinamit Troas.

6Yey ri'oj,#20:6 “Ri'oj”: Wa' ke'elawi ri Lucas, ri xtz'ib'an re ri libro, k'o tanchi kuk'. echiri' ik'owinaq chi ri nimaq'ij echiri' katij ri pam na jinta levadura che, xojel pa barco chiri' Filipos y pa wo'ob' q'ij xojopon kuk' pa ri tinamit Troas. Chiri' xojkanaj kan wuqub' q'ij.

Ri Pablo keb'uch'a'b'ej kan ri hermanos e k'o Troas

7Ri nab'e q'ij re ri semana xqamol qib' kuk' ri kikojom rub'i' ri Cristo cha' kaqatij ri cena re ri Qanimajawal. Ek'u ri Pablo kak'utun chikiwach konoje. Yey ruma chirajawaxik kel b'i rire chuka'm q'ij, xnajtir che ri k'utunik ku'ano. Xtik'oj k'u ri' raq'ab' y k'a kach'a'tik. 8Yey pa ri qamolom wi qib' e chupa ruroxle' ja chikaj y uk'iyal aq' e tzijitalik.

9K'o k'u jun ala Eutico rub'i' tz'ul chupa ri ventana yey okinaq lo jun uqusil waram che ruma ri lik naj kach'a't ri Pablo. B'enaq k'u ri' ruwaram, xtzaq lo che churox le' ja k'a pulew y kaminaq xe'yakoq.

10Ek'u ri Pablo xqaj loq, xjupi' puwi rala, xulaq'apuj y jek'uwa' xub'i'ij: «Maxi'ij ib' alaq, ma k'aslik» xcha'.

11Tek'uchiri', ri Pablo xaq'an tanchik y xujach ri cena re ri Qanimajawal. Ek'uchiri' utijom chi ri cena, xujeq tanchi kach'a'tik y xuk'isb'ej wa' k'a pa rusaqrib'al. Tek'uchiri', xumaj b'i ub'e. 12Ek'u ri Eutico e la' k'aslik xkik'am b'i chirocho; ruma k'u wa' lik xb'ochi'itaj kik'u'x konoje.

Ri Pablo keb'uch'a'b'ej kan ri hermanos e k'o Mileto

13Ri Pablo xraj ke'ek chiraqan pa ri tinamit Asón. Yey ri'oj xojnab'ej b'i pa barco cha' ke'qak'ama b'i ri Pablo chiri'. Jela' xqa'ano ma e oj kanajinaq kan wi ruk' rire. 14Xqariq k'u qib' ruk' rire pa ri tinamit Asón. Yey junam ruk' rire xoj'ek pa barco y xqamaj b'i qab'e pa ri tinamit Mitilene. 15Xojel k'u b'i chiri' pa barco y chuka'm q'ij xojik'ow chwach ri isla Quío. Che k'u ri jun chik q'ij xojopon Samos, wa' e jun tinamit k'o chuchi' ri mar. Tek'uchiri', xojopon pa ri tinamit Trogilio y chiri' xojuxlanik. Chuka'm q'ij k'u ri' xojopon pa ri tinamit Mileto. 16Jela' xqa'ano, ma ri Pablo uch'ob'om chik na kik'ow ta pa ri tinamit Éfeso cha' na kab'ayitaj ta chila' pa taq ri luwar re Asia. Ri rilim wi e ma karaj we k'a xaqare' ku'maja ri nimaq'ij re Pentecostés chila' Jerusalem.

Ri Pablo keb'uch'a'b'ej kan ri hermanos e petinaq Éfeso

17Ek'uchiri' oponinaq chi ri Pablo pa ri tinamit Mileto, xutaq kisik'ixik ri e aj wach re riglesia k'o Éfeso. 18Echiri' xek'unik, ri Pablo xub'i'ij chike:

«Ralaq lik ilom alaq sa' ri nub'inik chiwach alaq chwi lo ri nab'e q'ij echiri' xink'un pa taq wa luwar re Asia. 19Xin'an ruchak ri Dios chixo'lib'al alaq ruk' ronoje uch'uti'nal nuk'u'x y na xa ta jub'iq' ruwa'al nuwach elinaq y pa rewi ruk'iyal k'axk'ob'ik nutijom ruma ri itzel kina'oj raj judi'ab' chwij. 20Na ruk' ta k'u ri', na jinta k'o wewam chiwach alaq, ma xinq'alajisaj ronoje ri k'o kutiqoj che ri b'inik silab'ik alaq, yey xink'utun chiwachil y pa taq ocho alaq. 21Chikiwach k'u raj judi'ab' y ri na e ta aj judi'ab', xinq'alajisaj lik chirajawaxik chike kakitzelej kitzij chwach ri Dios y kakub'i' kik'u'x ruk' ri Qanimajawal Jesucristo.

22»Ek'u wo'ora, ri Ruxlab'ixel ri Dios xukoj pa wanima' kin'ek pa ri tinamit Jerusalem tob' k'amaja' weta'am sa' ri kank'ulumaj na chila'; 23xew weta'am ri ub'i'im ri Santowilaj Ruxlab'ixel ri Dios chwe. Ma pa ronoje taq ri tinamit kinik'ow wi, kujikib'a' uwach chwe ri katajin lo panuwi'; wa' e ri kink'am b'i pa taq cárcel y kinya' pa uk'iyal k'axk'ob'ik. 24Pero ri'in na jinta k'ana kub'i'ij nuk'u'x che, na kan'an tane che ri nuk'aslem pacha' lik k'o uwach chinuwach ri'in; xew kuaj kank'is u'anikil ruk' ki'kotemal ri nutaqem pan che ri nuchak, ri xya' chwe ruma ri Qanimajawal Jesús. Wa' e ruq'alajisaxik ri Utzilaj Tzij re ri unimal rutzil uk'u'x ri Dios.

25»Ek'u wo'ora che ralaq ri xta' alaq chi nuchi' puwi rutaqanik ri Dios, lik weta'am na jinta chi junoq karil tanchi nuwach. 26Ek'u uwari'che waq'ij kamb'i'ij chiwach alaq: Lik pawi' alaq k'o wi we k'o junoq che alaq kasachik. 27Ma na jinta k'o wewam chiwach alaq; e janipa ruch'ob'om lo ri Dios kajawax che alaq, nuq'alajisam chi chiwach alaq.

28»E uwari'che, chajij ib' alaq y chechajij alaq janipa ri eya'tal paq'ab' alaq ruma ri Santowilaj Ruxlab'ixel ri Dios. Ma alaq aj k'amal wach re keb'il alaq ri tinamit re ri Qanimajawal, yey wa' wa tinamit e ri xeb'uloq' Rire ruk' rukik'el. 29Weta'am k'ut echiri' ri'in in b'enaq chik, keb'ok lo chixo'lib'al alaq jujun chik pacha' e utiw xew kakaj kakisach kiwach taq ri b'exex. 30Yey chixo'lib'al ne ralaq keyaktaj jujun kakijal ri saqil k'utunik cha' ri kikojom rub'i' ri Cristo kakesaj b'i kib' chupa ri Q'ijsaq y keterej k'u b'i chikij rike. 31E uwari'che, lik k'una saq chiwach ralaq. K'una chik'u'x alaq: E oxib' junab' wa', chipaq'ij chichaq'ab', na in ta uxlaninaq che pixab'axik chijujunal alaq ruk' uwa'al nuwach.

32»Ek'u wo'ora hermanos, kanq'atisaj kan alaq puq'ab' ri Dios cha' Rire kuchajij alaq y katiki' k'u alaq chupa ri Utzilaj Tzij re ri unimal rutzil uk'u'x. Ma xew wa' k'o uchuq'ab' re kuya ri k'iyib'al alaq chwach ri Dios y kuya na janipa ri taqal che alaq, jela' pacha' ri b'i'tisim chike konoje ri kiya'om kib' puq'ab' ri Dios.

33»Ri'in na nurayim ta oro o plata re junoq chik yey na nurayim tane ruq'u' junoq chik. 34E ne ri nu'anom, lik eta'am alaq; ma e janipa ri ajawaxinaq chwe ri'in y chike ri e k'o wuk', wa' lik nuch'akom ruk' wa nuq'ab'. 35Ruk' k'u ronoje ri ilom alaq che ri nub'inik, nuk'utum che alaq ri lik chirajawaxik wi kaqa'ano: Kojchakunik cha' utz keqato' janipa ri k'o kajawax chike. E k'una chiqak'u'x ruch'a'tem ri Qanimajawal Jesús echiri' xub'i'ij: “E más nim uq'ij ralaxik ri jun kasipanik, chwa ri jun xa kuk'ul ri kasipax che”» xcha'.

36Echiri' xub'i'ij taq k'u wa' ri Pablo, xuxukub'a' rib' y xu'an orar kuk' konoje ri e k'o chiri' ruk'.

37Konoje k'u ri' xkijeq keb'oq'ik, xkilaq'apuj ri Pablo y xkitz'ub' uchi'. 38Lik xok unimal b'is chikik'u'x ruma xub'i'ij ri Pablo na kakil ta chi uwach. Jek'ula' xkachb'ilaj b'i y xe'kijacha kan pa k'o wi ri barco.

Currently Selected:

Hechos 20: acrN

Highlight

Copy