Hechos 6
6
Kecha' wuqub' aj chak re ri Dios
1Chupa taq la' la q'ij lik xek'iyar ri kajlib'al ri kikojom rub'i' ri Cristo. Ek'u ri hermanos e aj judi'ab' ri kech'a't pa ri ch'a'tem griego, xkijeq kech'a'tib'en chikij ri hermanos e aj judi'ab' ri kech'a't pa ri ch'a'tem hebreo.#6:1 Pa riglesia re Jerusalem e k'o hermanos e aj judi'ab' kech'a't pa hebreo y kitaqem ri kojob'al ke kan ri kati'-kimam. Yey e k'o hermanos e aj judi'ab', tob' na kakiriq ta hebreo ma ri kich'a'tem e griego; pero kitaqem jujun che taq ri kojob'al ke raj griego. Ma echiri' ka'an ri jachanik chike ri e nib'a'ib', ri malka'nib' ri kech'a't pa ri ch'a'tem griego na kekajmax ta chi utz ruk' ri to'b'al ke kakik'ul ri jujun q'ij.
2Ek'u ri kab'lajuj taqo'n xkimol kichi' konoje ri kikojom rub'i' ri Cristo y xkib'i'ij chike: «Na usuk' taj we ri'oj kaqatanab'a' utzijoxik Rutzij Upixab' ri Dios cha' kaqaya qib' che ujachik ri kajawax chike ri e nib'a'ib'. 3Ruma k'u la' hermanos, tzukuj alaq wuqub' achijab' chixo'l alaq, chom ri kib'inik kisilab'ik, lik kiya'om kib' puq'ab' ri Ruxlab'ixel ri Dios y lik k'o kina'oj, cha' kaqaya wa chak pakiq'ab'. 4Jek'ula' ri'oj xew kaqaya qib' che kaqa'an orar chwach ri Dios y che rutzijoxik Ruch'a'tem» xecha'.
5Konoje k'u ri hermanos kimolom kib', xuk'ul kik'u'x wa xb'i'x chike. Xkicha' k'u ri Esteban, jun achi lik kub'ul uk'u'x ruk' ri Dios yey lik k'o ri Santowilaj Ruxlab'ixel ri Dios ruk'. Y xekicha' ri Felipe, ri Prócoro, ri Nicanor, ri Timón, ri Parmenas y ri Nicolás, jun achi aj Antioquía xex utaqem lo ri k'utunik ke raj judi'ab'. 6Ewi xekik'am lo chikiwach rutaqo'n ri Jesús. Ek'u wa taqo'n xkiya ri kiq'ab' pakiwi' y xki'an orar kuk'.
7Jek'uri'la' ri Utzilaj Tzij re ri Qanimajawal lik xe'ek utzijoxik y lik katajin kik'iyarik ri kajlib'al ri kikojom rub'i' ri Cristo chiri' Jerusalem. E k'o ne uk'iyal e aj chakunel pa Rocho Dios xkijeq kakitaqej ri Utzilaj Tzij.
Ri Esteban kak'am b'i pa q'atb'al tzij
8Ri Esteban lik k'o ri unimal rutzil uk'u'x y ruchuq'ab' ri Dios ruk'. Ruma k'u ri', ku'an nimaq taq k'utub'al re ruchuq'ab' ri Dios chikiwach ri winaq.
9Ek'uchiri', xeyaktaj jujun re ri sinagoga, ri kab'i'x che “Ri sinagoga ke ri eb'elinaq lo pa ri k'ax”,#6:9 Ri keb'opon pa wa jun sinagoga e taq raj judi'ab' eb'elinaq lo pakiq'ab' ri kajaw y wo'ora kechakun pa ke rike. yey kuk' rike xeyaktaj jujun e aj Cirene, e aj Alejandría, e aj Chipre y e aj Asia. E taq k'u ri' wa' xkijeqo xa pa ch'a'tem kech'o'jin ruk' ri Esteban. 10Yey na kakiriq ta uk'ulik uwach ri kub'i'ij ri Esteban ma rire kach'a't ruk' ri na'oj uya'om ri Ruxlab'ixel ri Dios che. 11Ek'u ri xki'ano e xekipuaqij jujun achijab' cha' kakib'i'ij kitom tzel kach'a't ri Esteban chirij ri Moisés y chirij ri Dios.
12Xa jek'ula' xekich'i' wi taq ri winaq re ri tinamit, ri nimaq winaq e aj wach y raj k'utunel re ri tzijpixab'. Konoje k'u ri' wa' xeb'ek chirij ri Esteban; ruk' oyowal xkichapo, xkik'am b'i y xe'kiya'a chikiwach taq ri uchapom wi rib' ri q'atb'al tzij.
13Xekikoj k'u achijab' e aj kojol raq'ub'al chirij, jewa' kakib'i'ij: «Wa' wa'chi lik xaqi tzel kach'a't chirij wa Santowilaj Luwar re ri Rocho Dios y chirij Rutzij Upixab' ri Dios. 14Ma qatom kub'i'ij, la' la Jesús ri aj Nazaret kuwulij wa luwar y kujalk'atij janipa ri k'utunik y kojob'al ya'tal kan chiqe ruma ri Moisés» kecha'.
15Konoje k'u ri etz'ul pa ri q'atb'al tzij, echiri' xkitzu' uwach ri Esteban, xkil rupalaj e pacha' upalaj juna ángel.
Currently Selected:
Hechos 6: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
