Hechos 5

Ri Dios kuq'at tzij pakiwi ri Ananías y ri Safira

1K'o k'u jun achi Ananías rub'i', junam ruk' ri rixoqil Safira xkik'ayij ch'aqap ulew. 2Ek'u rachi k'o xresaj kan che ri rajil rulew, yey junam ruk' ri rixoqil xki'an tzij chikiwach cha' kaki'an raq'ub'al puwi ri rajil rulew. Ek'u ri nik'aj chik che ri rajil xuk'am b'i, xu'ya'a pakiq'ab' ri e taqo'n#5:2 Xuya'o re to'b'al ke ri nib'a'ib'. Hch. 4:35 y xub'i'ij wa' e rajil rulew.

3Ek'u ri Pedro xub'i'ij che:

—Ananías, ¿su'chak xaya luwar che ri Satanás kok pa awanima' cha' jela' ka'an raq'ub'al chwach ri Santowilaj Ruxlab'ixel ri Dios? Ma xab'i'ij xaya ronoje ri rajil rulew, pero k'o xawesaj kan che. 4Echiri' k'amaja' kak'ayij rawulew, ¿na awe'at ta neb'a la'? Y echiri' ak'ayim chik, ¿na paq'ab' ta neb'a k'o wi ka'an ruk' ri rajil sa' ri kawaj? ¿Su'chak k'u ri' xa'an wa'? ¡Na chikiwach ta k'u achijab' a'anom wi raq'ub'al ma e chwach ri Dios! —xcha'.

5Xew k'u xuta wa' wa ch'a'tem, ri Ananías xtzaq pulew y asu xkamik. Ruma k'u wa', xpe jun xi'in ib' pakiwi konoje ri xeb'eta'man re. 6Xek'un k'u lo jujun alab'o, xkipis rucuerpo, xkik'am b'i y xe'kimuqu'.

7Laj oxib' ora rik'owik wa' echiri' xok lo ri Safira ri rixoqil ri Ananías; yey rire na reta'am ta k'u ri' sa' ri xuk'ulumaj ri rachijil.

8Ek'uchiri', xutz'onoj ri Pedro che:

—Chab'i'ij chwe: ¿E rajil wa' rulew xik'ayij? —xcha che.

Rixoq xuk'ul uwach che:

—Are', e rajil la' —xcha'.

9Xub'i'ij k'u ri Pedro che:

—¿Su'chak xi'an tzij chiwach cha' kik'am upa ri Ruxlab'ixel ri Dios Qajawxel? ¡Chawila'! Ralab'o katajin lo kokik che ruchi' ja, e la' xetzelej lo che umuqik rawachijil, yey ek'u wo'ora e katkik'am b'i ri'at —xcha'.

10Na jampatana xtzaq ri Safira chwach ri Pedro y asu xkamik. Ek'uchiri' xeb'ok lo ralab'o, xo'lkiriqa' kaminaq chik. Xkik'am k'u b'i y xe'kimuqu putzal ri rachijil. 11Y xok k'u jun unimal xi'in ib' kuk' konoje ri tinamit re ri Cristo y kuk' konoje ri xeb'eta'man re taq wa'.

Kilitaj uk'iyal milagros y k'utub'al re ruchuq'ab' ri Dios

12Kuma k'u ri e taqo'n re ri Cristo, uk'iyal k'utub'al re ruchuq'ab' ri Dios y nimaq taq chak katajin rilik chikiwach taq ri tikawex. Yey taq ri kikojom rub'i' ri Cristo, lik xa jun kik'u'x kakimol kib' pa ri luwar kab'i'x che “Ruchi' Ja re Salomón”.#5:12 “Ruchi' Ja re Salomón”: Jun corredor uq'ab' ri tapia re ri Rocho Dios.

13E taq k'u ri k'amaja' kakikoj rub'i' ri Cristo, kakixi'ij kib' kakijunimaj kib' kuk', tob' konoje ri tikawex lik kakiyak kiq'ij. 14Y katajin k'u kik'iyarik ri kikojom rub'i' ri Qanimajawal, wa' e uk'iyal achijab' y uk'iyal ixoqib'.

15Ruma taq k'u ri k'utub'al re ruchuq'ab' ri Dios kaki'an rutaqo'n ri Jesús, taq ri winaq kekesaj taq ne lo ri e yewa'ib' pa taq ri b'e. Ekiya'om chwa ch'at y chwa pop, cha' we xik'ow ri Pedro, tob' xew lu'mu'j katzaq pakiwi', kekunutaj k'u ri'. 16E k'i ne ri e petinaq pa taq ri tinamit k'o lo chunaqaj Jerusalem. Ekik'amom lo ri yewa'ib' y ri ech'u'jerinaq kuma itzelilaj uxlab'ixel; y konoje k'ut kekunutajik.

Rutaqo'n ri Cristo eternab'em ruk' k'axk'ob'ik

17Ri kajawal raj chakunel pa Rocho Dios y konoje ri e k'o ruk', wa' e ri saduceos, xujeq kati'tot kik'u'x chikij rutaqo'n ri Jesús ruma lik e k'i ri winaq eteran chikij. 18Xekichap k'u b'i rutaqo'n ri Jesús y xeb'e'kiya'a pa ri cárcel re ri tinamit.

19Xopon k'u jun ángel re ri Qanimajawal chaq'ab', xu'jaqa taq ri okib'al re ri cárcel y xeb'eresaj loq. Ek'uchiri', xub'i'ij chike: 20«Jix, jixe'tak'ala pa ri Rocho Dios y chitzijoj chike ri winaq re ri tinamit ronoje puwi ri k'ak' b'e re k'aslemal» xcha'. 21Ruma k'u ri xkita che ri ángel, anim tan xeb'ok pa ri Rocho Dios y xkijeq kek'utunik.

Ek'u ri kajawal raj chakunel pa Rocho Dios yey ri e k'o ruk', k'amaja' kakina'b'ej ri' we rutaqo'n ri Jesús eb'esam chi lo pa ri cárcel. Xkimol k'u kichi' taq ri uchapom wi rib' ri q'atb'al tzij, kuk' konoje ri nimaq winaq ke raj Israel. Xekitaq k'u ri e chajinel re ri Rocho Dios che kik'amik rutaqo'n ri Jesús pa ri cárcel. 22Ek'uchiri' xeb'opon ri e chajinel pa ri cárcel, na xekiriq ta chi rutaqo'n ri Jesús. Xetzelej k'u loq 23y jewa' xo'lkib'i'ij: «Ri cárcel xqariqo lik tz'apil chi utz, yey raj chajinel e k'o ne chwach taq ri okib'al re ri cárcel. Pero echiri' xqajaqo, na jinta chi junoq chike rutaqo'n ri Jesús chupa» xecha'.

24Echiri' xkita wa', xsach kina'oj ri kajawal raj chakunel y raj wach ke ri e chajinel kuk' ri nimaq e aj chakunel re ri Rocho Dios. Konoje xkijeq kech'a't puwi', ma na keta'am taj sa' kuk'isb'ej wi ronoje wa'.

25Ek'uchiri', xk'un lo jun y jewa' xub'i'ij: «E rachijab' xeya' alaq pa cárcel, e k'o pa ri Rocho Dios y na koq'otam ta kek'utun chikiwach ri tinamit» xcha'.

26Ek'u raj wach ke ri e chajinel re ri Rocho Dios xe'ek junam kuk' jujun e aj chajinel y xe'kik'ama lo rutaqo'n ri Jesús. Yey na jinta k'o xki'an chike ma kakixi'ij kib' we kaki'an k'ax chike, laj ke'an pa'b'aj kuma ri tinamit. 27Ek'uchiri' xekik'am loq, xekiya chikiwach ri uchapom wi rib' ri q'atb'al tzij. Ek'u ri kajawal raj chakunel pa Rocho Dios xutz'onoj chike rutaqo'n ri Jesús:

28—¿Na xixqataq ta neb'a che cha' na kixk'utun ta chi chupa rub'i' wa jun achi? Yey wo'ora iwuma ne ri'ix xe'ek utzijoxik wa k'utunik che ronoje Jerusalem; y na xew ta la', ma kiwaj ne kiya qeqlab'al che rukik'el la' la jun achi —xecha'.

29Ri Pedro kuk' ri jujun chik e taqo'n re ri Jesús xkik'ul uwach:

—Lik chirajawaxik wi nab'e na e kaqakoj utzij ri Dios chwach ri kaqakoj kitzij rachijab'. 30Ma ri Dios ke ri qati'-qamam e xk'astajisan lo ri Jesús chikixo'l ri ekaminaq. Yey e ralaq ri xkamisan alaq ma uma ralaq xya'i' ri Jesús chwa ri cruz. 31Pero ri Dios lik xuyak uq'ij ri Jesús, xuya puwikiq'ab' y xu'an Qajawal y Kolob'enel che; cha' ruma ri Jesús, raj Israel kakitzelej kitzij chwach y kakiriq na ri kuyb'al kimak.

32»Ek'u ri'oj, e janipa ri xqilo, e kaqatzijoj. Yey ri Santowilaj Ruxlab'ixel ri Dios, ri Jun ya'tal chike ri kakikoj utzij ri Dios, e kajikib'an uwach wa' —xecha'.

33Echiri' xkita wa' ri e aj wach, lik xpe koyowal chikij rutaqo'n ri Jesús y xkaj kekikamisaj.

34Ek'uchiri', chikixo'l ri e aj q'atal tzij xyaktaj jun fariseo Gamaliel rub'i', aj k'utunel re ri tzijpixab' yey lik yakom uq'ij ruma ri tinamit. Rire xtaqan che keb'esax b'i joq'otaj ri e taqo'n re ri Jesús. 35Tek'uchiri', xub'i'ij:

«Achijab', alaq aj Israel, ch'ob'o na alaq raqan chi utz sa' ri ka'an alaq chike wa'chijab'. 36Ma k'o tan q'ij xyaktaj jun achi Teudas rub'i', yey chirib'il rib' xub'i'ij e jun achi lik k'o uwach. Laj e kajib' ciento rachijab' xeterej chirij. Pero xopon jun q'ij rire xkamisaxik. Y konoje ri xesokotaj ruma rire, xekicher b'i; jek'ula', xsach uwach janipa ri xuno'jij.

37»Chwi k'u ri' wa', xyaktaj jun chik chupa taq ri q'ij echiri' x'an jun ajilanik. Wa' e ri Judas aj Galilea. Yey uk'iyal tikawex xeterej chirij. Pero xopon ruq'ijol echiri' xkamisaxik; y konoje k'u ri xesokotaj ruma rire, xekicher b'i.

38»Kamb'i'ij k'u wo'ora che alaq: Mech'ich'a' chi alaq wa'chijab'; ri 'ana alaq e cheyolopij b'i alaq. Ma we xa kino'jib'al achijab' wa kakik'utu, ri' kasach na uwach. 39No'j we wa' re ri Dios, na kach'ij ta alaq usachik kiwach; y k'ate k'u kana' alaq ri' kach'o'jin alaq ruk' ri Dios» xcha'.

40Konoje xuk'ul kik'u'x ri xub'i'ij ri Gamaliel. Xekisik'ij k'u ri e taqo'n re ri Jesús; tek'uchiri', xjich' kipa ruk' kolob' y xekitaq che na ketzijon ta chi chupa rub'i' ri Jesús y xekiyolopij k'u b'i.

41Xeb'el k'u b'i ri e taqo'n chikiwach raj q'atal tzij. Lik keki'kotik ma xya'taj chike kakitij k'ax ruma kikojom rub'i' ri Jesús. 42Jek'ula', ronoje q'ij na kakoq'otaj taj kek'utunik y kakitzijoj ri Utzilaj Tzij chwi ri Jesucristo chupa ri Rocho Dios y chi' taq ja.

Currently Selected:

Hechos 5: acrN

Highlight

Copy