Hechos 4

Ri Pedro y ri Juan kek'am b'i pa q'atb'al tzij

1K'a kech'a't ne ri Pedro y ri Juan kuk' ri winaq, echiri' xek'un lo raj chakunel re ri Rocho Dios, ri aj wach ke ri e chajinel re ri Rocho Dios y jujun saduceos. 2Rike lik k'o koyowal chikij ri Pedro y ri Juan ma kek'utun chikiwach ri tikawex puwi ruk'astajib'al lo ri Jesús chikixo'l ri ekaminaq,#4:2 Ri saduceos y jujun chike raj chakunel re ri Rocho Dios, na kakikoj taj we ri tikawex kek'astaj tanchi lo chikixo'l ri ekaminaq. jek'uwa' kakib'i'ij: «Ruk'astajib'al ri Jesús e k'utub'al re, chiqawach apanoq ri tikawex kek'astaj lo chikixo'l ri ekaminaq» kecha'.

3Ek'u ri e aj wach re ri Rocho Dios xetaqan che kechap b'i ri Pedro y ri Juan. Yey ruma k'u lik b'enaq q'ij chik, xeb'e'kiya'a pa cárcel cha' kata' kichi' k'a chuka'm q'ij. 4Pero chike ri xetaw re ri xub'i'ij ri Pedro, lik e k'i ri xkub'i' kik'u'x ruk' ri Jesús; yey we keb'ajilax xew ri achijab', laj e wo'ob' mil xekojow re Rire.

5Chuka'm q'ij k'ut xkimol kib' pa ri tinamit Jerusalem raj wach ke raj judi'ab' kuk' ri nimaq winaq re ri tinamit y raj k'utunel re ri tzijpixab'. 6K'o chiri' ri Anás ri kajawal raj chakunel pa Rocho Dios; yey e k'o ri Caifás, ri Juan, ri Alejandro y jujun chik k'o chux chike ri kajawal raj chakunel pa Rocho Dios.#4:6 Konoje wa' e kuk'il ri uchapom wi rib' ri q'atb'al tzij. Kil nota Jn. 18:19 pakiwi ri Anás y ri Caifás. 7Xekiya k'u ri Pedro y ri Juan chikinik'ajal y xkitz'onoj chike:

—¿China xya'w piq'ab' o china pub'i' xi'an ri'ix wa'? —xecha chike.

8Ek'u ri Pedro, ruk' ruchuq'ab' ri Santowilaj Ruxlab'ixel ri Dios, xub'i'ij chike:

—Tape alaq, alaq aj wach re ri tinamit y alaq nimaq winaq re Israel, 9ma e waq'ij kata' qachi' puwi ri utz x'an che wa jun achi yewa' cha' keta'maxik su'anik xkunutajik. 10Ek'u ri' wo'ora kaqaq'alajisaj chiwach onoje alaq y chikiwach konoje ri tinamit Israel: Wa' wa'chi k'o chiwach alaq xkunutaj chupa rub'i' ri Qanimajawal Jesucristo re Nazaret, ri xkamisaj alaq chwa cruz yey ri Dios xuk'astajisaj lo chikixo'l ri ekaminaq.

11»E pacha' ri kub'i'ij Ruch'a'tem ri Dios:

E rab'aj k'aqital kan kuma raj yakal ja,

e ab'aj wa' lik xajawaxik cha' katiki' lo ri ja Sal. 118:22

kacha'.

Ralaq e alaq pacha' wa e aj yakal ja yey ri Jesús e ri Ab'aj. 12Xew k'u ruk' ri Jesús kariqitaj kolob'etajik, ma na jinta chi juna b'i'aj che ruwachulew ya'tal lo chike ri tikawex cha' ruma ri' kojkolob'etajik —xcha'.

13Ek'u raj wach re ri tinamit xkilo ri Pedro y ri Juan na kakixi'ij ta k'ana kib' ketzijon puwi ri Utzilaj Tzij, tob' wa' wa'chijab' na e ta tijotal pacha' rike yey xa ne e kuk'il rachijab' e aj chak re ri tinamit. Lik xkam k'u kanima' ri' chike y xkimaj usuk' e janipa taq ri kaki'ano y ri kimajom ri Pedro y ri Juan, e ruma ri xek'oji' ruk' ri Jesús, ri kitijonel. 14Yey na utz tane k'u ri' kakib'i'ij na kunutajinaq ta ri sik, ma wa' wa'chi tak'al chiri' chikiwach kuk' ri Pedro y ri Juan.

15Ek'u ri xki'ano e xetaqan che cha' ri Pedro y ri Juan keb'el b'i joq'otaj pa ri luwar re ri q'atb'al tzij, y xew k'u xekanaj raj q'atal tzij cha' kech'a't chikiwach. 16Jek'uwa' xkib'i'ij chikiwach: «¿Sa' ri kaqa'an chike wa'chijab'? Ma ri k'utub'al re kunanik 'anatal kuma rike,#Hch. 3:1-10 lik q'alajininaq chikiwach konoje ri ejeqel Jerusalem yey lik na utz taj kaqewaj. 17Ri qa'ana' e qaxib'ij kipa cha' na ketzijon ta chi k'ana chwach junoq chupa rub'i' wa jun achi, y jela' na ke'ek ta chi utzijoxik wa'» xecha'.

18Xekisik'ij k'u ri Pedro y ri Juan y lik xekitaq che na ketzijon taj y na kek'utun ta chi ne k'ana pa rub'i' ri Jesús.

19Pero ri Pedro y ri Juan xkik'ul uwach:

—Ch'ob'o pe ralaq: ¿Usuk' nawi chwach ri Dios e kaqakoj tzij ralaq chwa ri kaqakoj utzij Rire? 20Ma ri'oj, na utz taj kaqoq'otaj ub'i'xikil janipa ri qilom y ri qatom —xecha'.

21Ek'u ri e aj wach lik xkixib'ij kipa. Tek'uchiri', xekiyolopij b'i ma na xkiriq taj su'anik kekiya pa k'axk'ob'ik ruma kakixi'ij kib' chikiwach ri winaq re ri tinamit. Ma konoje lik kakiyak uq'ij ri Dios ruma ri xkilo. 22Yey lik q'alaj e ruk' ruchuq'ab' ri Dios x'ani' wi ri k'utub'al re kunanik, ma wa'chi xkunutajik, ralaxib'em sik yey ik'owinaq chi pa cuarenta rujunab'.

Ri kikojom rub'i' ri Cristo kakitz'onoj kichuq'ab' che ri Dios

23Echiri' xeyolopix b'i, ri Pedro y ri Juan xeb'ek kuk' ri kachb'i'il y xkitzijoj chike janipa ri b'i'tal b'i chike kuma ri nimaq e aj chakunel pa Rocho Dios y ri nimaq winaq re ri tinamit. 24Echiri' rike xkita wa', konoje xa jun kik'u'x xkijeq kaki'an orar chwach ri Dios, jewa' kakib'i'ij:

«¡Lal Dios Qajawxel, Lal 'anayom la ruwa kaj, ruwachulew, ri mar y ronoje ri k'o che taq wa'! 25Yey ruma ri David ri aj chak la, jewa' xb'i'ij la ojertan:

¿Su'chak lik ketukuk taq ri winaq

yey taq ri tinamit xew kakino'jij ri na jinta uchak?

26Ma xkimol kib' ri taqanelab' y ri e aj wach che ruwachulew,

xki'an k'u xa jun che kib'

y xeb'ek chirij ri Dios Qajawxel

y chirij ri Cristo, Rucha'o'n lo Rire. Sal. 2:1-2

27Wa' lik qatzij, ma chupa wa tinamit oj k'o wi, ri Herodes ruk' ri Poncio Pilato xkimol kib' kuk' ri winaq e aj Israel y kuk' ri na e ta aj Israel; yey junam k'u xeyaktaj chirij ri Jesús, ri Santowilaj Aj Chak la, ri Jun xcha' lo la. 28Jek'ula', e xki'ano janipa ri ch'ob'om lo la ojertan cha' e ku'ana na ri'.

29»Ek'u wo'ora, Qaqaw, kil la ri xib'ib'al kipa raj chakib' la ki'anom; ya'a k'u la ri chuq'ab' la chike rike cha' na kakixi'ij ta k'ana kib' kakitzijoj ri Ch'a'tem la. 30Ya'a ri q'ab' la pakiwi' cha' chupa rub'i' ri Jesús, ri Santowilaj Aj Chak la, kekunutaj ri yewa'ib' y ka'ani' taq k'utub'al re ri chuq'ab' la» xecha'.

31Echiri' xkik'is u'anik orar, ri luwar pa kimolom wi kib' xb'arb'atik y konoje xkik'ul ruchuq'ab' ri Santowilaj Ruxlab'ixel ri Dios y jek'ula' na kakixi'ij ta k'ana kib' kakitzijoj Ruch'a'tem ri Dios chikiwach konoje ri winaq.

Ri kikojom rub'i' ri Cristo kakito' kib' ruk' rub'itaq ke

32Konoje k'u ruk'iyal hermanos, ri xkikoj rub'i' ri Cristo, lik u'anom xa jun kanima' y xa jun kina'oj; y na jinta junoq chike ku'an re che ri k'o ruk', ma rub'itaq ke xu'an re chinima ronoje. 33Jek'ula' ri', ri e taqo'n re ri Cristo ruk' unimal kichuq'ab' ketzijon chwi ruk'astajib'al ri Qanimajawal Jesús, yey ri to'b'al re ri Dios k'o pakiwi konoje rike.

34Na jinta k'u junoq kutij nib'a'il chikixo'l, ma janipa ri k'o taq kulew o k'o taq ja kuk', we k'o xkik'ayij, kakik'am lo ri rajil 35y kakiya k'u pakiq'ab' ri e taqo'n re ri Jesús cha' rike kakijach chikiwach ri hermanos e chirij taq ri kajawax wi chike chikijujunal.

36K'o k'u jun achi José rub'i', yey ri e taqo'n kakib'i'ij Bernabé che. (Wa' wa b'i'aj ke'elawi “b'ochi'inel”.)#4:36 “B'ochi'inel”: Xkoj wa b'i'aj che ri Bernabé, ma rire lik to'b'el che unimarisaxik kik'u'x ri hermanos. Rire aj Chipre y e kuk'il ri ralk'o'al kan ri Leví. 37Wa' wa'chi xuk'ayij ch'aqap rulew; tek'uchiri', xuk'am lo ri rajil y xuya pakiq'ab' ri e taqo'n.

Currently Selected:

Hechos 4: acrN

Highlight

Copy