Hechos 3

Jun achi sik kakunutajik

1Xu'ana k'u chupa jun q'ij, ri Pedro y ri Juan junam xeb'ek pa ri Rocho Dios che ri urox ora#3:1 “Ri urox ora”: Kil “hora” pa vocabulario. b'enaq q'ij, ma e ora ri' re oración.

2Ronoje q'ij k'ut kak'am lo jun achi ralaxib'em sik y kaya' chwach ri Rocho Dios pa ri okib'al kab'i'x che “Lik Chom” cha' kutz'onoj ulimoxna chike ri winaq keb'ok b'i. 3Ek'u rachi sik, echiri' xeril ri Pedro y ri Juan e ri' keb'ok b'i chupa ri Rocho Dios, xujeq kelaj chike cha' kakiya kan ulimoxna.

4Ek'u ri Pedro junam ruk' ri Juan lik xkich'ikib'a' ri kiwach puwi rachi, yey ri Pedro xub'i'ij che:

—Chojtzu'u pe la —xcha che.

5Ewi ri sik xeb'utzu'u ma roye'em we k'o kakiya che.

6Pero ri Pedro xub'i'ij che:

—Na jinta saqil puaq wuk' y na jinta ne q'ana puaq wuk'; no'j k'u ri k'o wuk' kanya che'la. Chupa rub'i' ri Qanimajawal Jesucristo ri aj Nazaret, yaktaj la y b'ina la —xcha che.

7Ek'u ri Pedro xuchap che ruq'ab' uwikiq'ab', xuyako y chupa la' la joq'otaj xkowir ri raqan y ruqul raqan. 8Y rachi xch'oplin chikaj, xtak'i'ik y xujeqo kab'inik. Junam k'ut kuk' ri Pedro y ri Juan, xok b'i pa ri Rocho Dios, kab'inik, kach'oplanik y kuyak uq'ij ri Dios.

9Konoje k'u ri winaq re ri tinamit xkilo rachi kab'inik y lik kuyak uq'ij ri Dios. 10Y xketa'maj e achi katz'uyi'ik y kutz'onoj ulimoxna chwach ri Rocho Dios pa ri okib'al kab'i'x che “Lik Chom”. Lik k'u xkam kanima' che ri x'ani' che rachi y na xkimaj ta k'ana usuk' cha'taj xkunutajik.

11Rachi xkunutajik na karesaj ta chi rib' chikij ri Pedro y ri Juan. Yey konoje ri winaq kaminaq kanima' che, xemok ka'n pa ri luwar kab'i'x che “Ruchi' Ja re Salomón”.

12Ek'uchiri' xril wa' ri Pedro, xub'i'ij chike ri tinamit:

«Achijab' alaq aj Israel, ¿su'chak lik kaminaq anima' alaq che wa xil alaq? ¿Yey su'chak e kojtzutza' alaq ri'oj pacha' oj ri xojb'inisan re wa'chi ruk' ri qachuq'ab' o ruma lik oj jusuk' ri'oj chwach ri Dios? Na e ta ri'. 13Ma e ri Dios ke ri qamam ojertan, wa' e ri Abraham, ri Isaac y ri Jacob, ek'u Rire ri lik xuyak uq'ij ri Jesús ri Raj Chak Rire. No'j ralaq xya alaq ri Jesús puq'ab' ri Pilato. Y na xew ta la', ma xk'aq b'i alaq uq'ij chwach ri Pilato y na xya ta alaq luwar che rire kuyolopij b'i ri Jesús echiri' xraj kuyolopij b'i ruma na jinta mak xuriq che. 14Ek'u ri' ralaq na x'aj ta alaq kayolopix b'i wa' wa Jun lik nim uq'ij Santo y Jusuk'; ma e xtz'onoj alaq kayolopix b'i ri jun kamisanel.#Lc. 23:17-20 15Xkamisaj k'u alaq ri' ri aj ya'l k'aslemal, ri Jun xk'astajisax lo chikixo'l ri ekaminaq ruma ri Dios. Puwi k'u ri' wa k'astajib'al kojtzijon wi ri'oj ma lik oj xojilow re.

16»E ruma ri kub'ulib'al k'u'xaj ruk' ri Jesús, xkowir ri raqan wa' wa'chi kil alaq y eta'am ne alaq uwach. Yey ruma wa kub'ulib'al k'u'xaj ruk' ri Jesús xkunutaj wa'chi pa saqil wi jela' pacha' katajin onoje alaq che rilik.

17»Weta'am k'ut, alaq qatz-qachaq', ri x'an alaq e ruma na xmaj ta alaq usuk', y jenela' ri' xki'an raj wach re ri tinamit alaq. 18Pero ruma ri x'an alaq che ri Jesús, ri Dios xu'ana janipa rub'i'im lo ojertan kuma ri q'alajisanelab' echiri' xub'i'ij Rucha'o'n lo Rire kutij k'ax.

19»E uwari'che tzelej tzij alaq chwach ri Dios y ya'a k'u ib' alaq puq'ab' cha' kakuytaj ri mak alaq y cha' ri Qajawal Dios kuya uxlanem y utzil chomal chupa ri anima' alaq. 20Jek'ula' ri Dios kutaq na lo uk' alaq ri Jesús, Rucha'o'n lo Rire, ri b'i'tisim chi lo che alaq ojertan. 21Tob' k'u wo'ora lik chirajawaxik wi ri Jesús k'o chila' chikaj, kopon na ri q'ij echiri' ri Dios ku'an tanchi k'ak' che ronoje jela' pacha' ri xub'i'ij lo ojertan kuma ri q'alajisanelab' ri xetaq lo ruma Rire.

22»Ma ri Moisés xub'i'ij chike ri qati'-qamam ojertan:

E ri Dios Qajawxel kuyak na lo chikixo'lib'al ri qatinamit Israel

jun Q'alajisanel jela' pacha' ri'in.

Ek'u chita janipa ri kub'i'ij Rire chiwe.

23Ek'u ri tikawex na kukoj ta utzij wa jun Q'alajisanel, Dt. 18:15-19

ri' kesax b'i y na jinta chi re kuk' rutinamit ri Dios Lv. 23:29

xcha ri Moisés.

24»Konoje k'u ri q'alajisanelab' kipeteb'em lo chwi ri Samuel, lik etzijoninaq lo chwi taq wa' wa q'ij. 25Alaq k'u ri kak'uluw re ri xub'i'tisij ri Dios kuma ri q'alajisanelab' y ruma ri tzij xu'an kuk' ri qati'-qamam ojertan, echiri' xub'i'ij che ri Abraham:

Ruma k'u Jun chike rawalk'o'al,

keb'enu'an bendecir konoje ruk'iyal kiwach taq ri tikawex che ruwachulew Gn. 12:18

xcha'.

26»Ek'u ri Dios, echiri' xuk'astajisaj lo ri Raj Chak chikixo'l ri ekaminaq, xutaq lo nab'e uk' ralaq re to'b'el e alaq cha' jela' chijujunal alaq kajalk'atitaj ri b'inik silab'ik alaq che ri na utz taj» xcha ri Pedro chike.

Currently Selected:

Hechos 3: acrN

Highlight

Copy