Lucas 14

Ri Jesús kukunaj jun achi chupa jun q'ij re uxlanib'al

1E xu'an wa' chupa jun q'ij re uxlanib'al: Ri Jesús xsik'ix ruma jun fariseo lik k'o uwach cha' ke'wo'q chirocho. Y chila' e k'o jujun chike ri fariseos lik kik'ak'alem we ri Jesús kakunan pa ri q'ij re uxlanib'al. 2Ma chiri' chwach Rire k'o jun achi lik yewa', wa'lijinaq rucuerpo.

3Ek'uchiri', ri Jesús xutz'onoj chike ri fariseos y raj k'utunel re ri tzijpixab', jewa' xub'i'ij:

—¿Ub'e nawi ri ka'an kunanik chupa ri q'ij re uxlanib'al o na ub'e taj? —xcha'.

4Pero rike na jinta xkik'ulub'ej uwach.

Ek'u ri Jesús xuya ruq'ab' puwi ri yewa', xukunaj y xub'i'ij che utz ke'ek. 5Tek'uchiri' xub'i'ij chike:

—¿K'o neb'a junoq che alaq, we rukawayu' o rub'oyex katzaq pa siwan, na ke'resala' tuloq tob' chupa jun q'ij re uxlanib'al? ¿China na ka'anaw ta wa'? —xcha'.

6Ek'u rike na xkiriq ta uk'ulik uwach che.

Pixab'anik chike ri kesik'ix pa juna nimaq'ij

7Ek'u ri Jesús xrilo sa' ri kaki'an ri esik'im pa ri wa'im, konoje kakimajala' kib' puwi taq ri tz'ulib'al ke ri lik k'o kiwach. E uwari'che, xub'i'ij wa k'amb'al na'oj chike ri echokom:

8«Echiri' kasik'ix la ruma junoq pa juna nimaq'ij re k'ulanikil, na ub'e taj we ke'tz'ula la chupa ri tz'ulib'al ke ri lik k'o kiwach; ma k'axtaj kak'un lo junoq chokom más k'o uwach chiwach rilal. 9Yey kaqib' k'u ri' ri rajaw ri nimaq'ij uk' la y kub'i'ij che'la: “Ya'a kan la wa tz'ulib'al che wa jun chik” kacha'. Ruma k'u la', kape ri k'ix la y ke'tz'ula lo la k'a chirij.

10»E uwari'che, ri chirajawaxik ka'an la echiri' kasik'ix la pa juna wa'im e wa': We xopon la, me'tz'ula la chupa ri tz'ulib'al ke ri lik k'o kiwach. Jela' echiri' kak'un lo ri sik'iyom e la, jewa' kub'i'ij che'la: “Wamigo, je'tz'ula la más chwach” kacha'. Jek'ula' katak'ab'ax q'ij la chikiwach ri e k'o chwach ri mexa uk' la. 11Ma china ri ku'an lik nim che rib', ri Dios kuqasaj uwa uq'ij; no'j china ri ku'an ch'uti'n che rib', ri Dios kuyak uq'ij» xcha ri Jesús.

Ri na keb'elaj ta che ri sik'ib'al ku'an ri Qaqaw

12Tek'uchiri', xub'i'ij che ri fariseo, ri sik'iyom re pa ri wa'im:

—Echiri' ka'an la juna wa'im, na xew ta kesik'ij la ri amigos la, ri e atz-chaq' la, ri e k'o chux che'la y ri b'eyomab' e k'o lo chi naqaj la. Ma we ka'an la wa', rike kaki'an uk'axel che'la, kakisik'ij la pa juna wa'im y jek'uri'la' asu kak'ul la ri tzeleb'al uwach che ri x'an la.

13»E uwari'che, ri chirajawaxik ka'an la echiri' ka'an la juna nimaq'ij, e cheb'esik'ij la ri nib'a'ib', ri t'um kaqan kiq'ab', ri e sik y ri e potz'. 14Jek'uri'la' nim q'ij alaxik la, ma rike na kakich'ij ta uya'ik uk'axel che'la; pero e kak'ul la ri rajil uk'axel echiri' kek'astaj lo ri lik e jusuk' chwach ri Dios —xcha ri Jesús.

15Echiri' xuta wa' jun chike ri etz'ul chwa ri mexa, jewa' xub'i'ij che: «¡Nim uq'ij ralaxik china ri kawa' pa ri nimalaj nimab'al kuya ri Dios pa rutaqanik!» xcha'.

16Ek'u ri Jesús xub'i'ij che:

«Julaj k'o jun achi xuch'ob'o kuya jun nimalaj nimab'al y lik e k'i ri xeb'usik'ij. 17Ek'uchiri' xopon ru orayil ri nimab'al, xutaq b'i jun raj chak cha' kub'i'ij chike ri echokom chik: “Peta k'u alaq ma yijb'ital chi ronoje” kacha'.

18»No'j chikijujunal xkijeq kakitz'onoj kuyb'al kimak ruma na keb'ek taj. Ri nab'e xub'i'ij: “Xinloq' ko juch'aqap wulew y lik chirajawaxik ki'nwila'. Chab'i'ij ko che rapatrón chukuyu numak ma na kin'ek taj” xcha'.

19»Ri jun chik xub'i'ij: “Xinloq' ko wo'ob' yunta b'oyexab' y ek'u wa' ki'ntija kiq'ij pa chak. Chab'i'ij ko che rapatrón chukuyu numak ma na kin'ek taj” xcha'.

20»Yey jun chik xub'i'ij: “Ri'in lik k'ak' xink'uli'ik; y ruma la' na kin'ek taj” xcha'.

21»Echiri' xtzelej lo raj chak, xub'i'ij ronoje wa' che rupatrón. Ek'u rupatrón lik xpe royowal y xub'i'ij che ri raj chak: “Choq'otan ri', jat pa taq k'ayb'al y pa taq b'e re ri tinamit y cheb'ak'ama lo ri e nib'a'ib', ri t'um kaqan kiq'ab', ri e potz' y ri e sik” xcha'.

22»Xe'ek k'u raj chak. Y echiri' xtzelej loq, xub'i'ij che rupatrón: “Wajaw, ya xin'an ronoje ri xintaq la che; na ruk' ta k'u ri', lik k'a k'o luwar chwa taq ri mexa” xcha'.

23»Xub'i'ij tanchi k'u rachi che ri raj chak: “Chatelub'i tza'm tinamit y jat pa taq nimab'e y pa taq kuxkul b'e. Chamina uwach chike ri winaq cha' kepetik y jela' kanoj uwa taq ri mexa nuyijb'am chik re wa nimab'al. 24Yey paqatzij wi kamb'i'ij chawe: Na jinta junoq chike ri xenusik'ij nab'e, kutij re ri nimab'al nuyijb'am” xcha'.»

Ri k'ax karik'owib'ej ri katerej chirij ri Jesús

25Echiri' ri Jesús k'o chi b'e, uk'iyal winaq eteran chirij. Ek'u Rire xtzu'n chirij y jewa' xub'i'ij chike:

26«We k'o junoq karaj katerej lo chwij, lik chirajawaxik che más k'ax kinuna' ri'in chikiwa konoje, ma we e más k'ax keb'una' ruchu-uqaw, ri rixoqil, ri ralk'o'al, ri ratz-uchaq' y más ne k'ax kuna' rib' rire chinuwa ri'in, ri' na taqal ta che ku'an nutijo'n. 27E uwari'che, china ri na kuya ta ranima' kutij k'ax ruma ri katerej lo chwij,#14:27 Pa ri ch'a'tem griego kub'i'ij “ri na ruk'a'am ta rucruz”. ri' na taqal ta che ku'an nutijo'n.

28»Ma we k'o junoq karaj ku'an nutijo'n, lik chuch'ob'o na raqan we kukuy ri k'axk'ob'ik kape puwi' ruma ri katerej lo chwij.

»E jela' pacha' ri ka'anik echiri' kayak juna nimalaj ja. Ma ¿k'o neb'a junoq che alaq na kuch'ob' ta raqan chi utz nab'e na puwi ri kajawax che cha' kuyak ri ja y karajilaj na k'u ri' janipa ri kumaj b'i cha' kareta'maj we xaqare' kuch'ij uyakik ri ja? 29Ma we na ku'an ta wa', echiri' utikom chi k'u ruparaqan ri ja, kuchaqab'a' u'anikil ruma na jinta chi puaq re kuk'iso; yey konoje k'u ri' ri keb'ilow re, kakijeq kakich'amij, 30kakib'i'ij: “Wa'chi xujeq uyakik wa ja, yey na xuk'is ta chik” kecha'.

31»Jek'ula' ¿sa' nawi ku'an juna rey xa e lajuj mil rusoldados chwa juna chik rey petinaq pa ch'a'oj chirij ruk' veinte mil soldados? Ri ku'ano e nab'e na kuch'ob' na raqan chi utz we xaqare' kuch'ij uchuq'ab' ri jun chik rey e k'o más usoldados. 32Y we kuch'ob'o na kuch'ij taj, ri ku'ano e xaloq' k'a naj k'o wi lo ri jun chik rey, keb'utaq k'u b'i achijab' cha' ke'ki'ana ri utzil chomal ruk'.#14:32 Ri'oj na kaqach'ij ta k'ana ruchuq'ab' ri Dios, e uwari'che qa'ana utzil chomal ruk' Rire wo'ora, xaloq' k'amaja' koje'ela chwach. 33Jek'uri'la', we k'o junoq che alaq karaj katerej lo chwij, lik chirajawaxik che kuya kan ronoje ri k'o ruk';#14:33 Wa' e ke'elawi ronoje ri k'o quk' kaqaya puq'ab' ri Qanimajawal. ma we na ku'an ta wa', na taqal ta che ku'an nutijo'n.

Ri k'amb'al na'oj puwi ratz'am

(Mt. 5:13; Mr. 9:50)

34»E ratz'am lik kajawaxik; no'j we xsach rutzayul, ¿su'anik tanchi ka'an tza che? 35Ma na kuriq ta uchak che rulew y na utz ta ne ka'an abono ruk'. Ek'u ri ka'an che, e katix b'i.#14:34-35 We ratz'am xsach rutzayul, na jinta chi uchak. Jek'ula', na jinta kutiqoj we junoq kub'i'ij e utijo'n ri Jesús yey na kuya ta ranima' karik'owib'ej k'ax ruma Rire. China k'u ri k'o utanib'al che utayik, ¡chuta k'u ri'!» xcha ri Jesús.

Currently Selected:

Lucas 14: acrN

Highlight

Copy