Lucas 15

Ri k'amb'al na'oj puwi rachi kutzukuj rub'exex sachinaq

(Mt. 18:10-14)

1Konoje raj tz'onol puaq re tojonik#15:1 “Raj tz'onol puaq re tojonik”: Kil “cobrador de impuestos” pa vocabulario. y taq raj makib' keqib' ruk' ri Jesús cha' kakita ruch'a'tem. 2Pero ri fariseos y raj k'utunel re ri tzijpixab' lik kakich'a'tib'ej, jewa' kakib'i'ij: «Wa'chi keb'uk'ul raj makib' y kawa' kuk'» kecha'.

3E uwari'che ri Jesús xutzijoj wa jun k'amb'al na'oj chike, jewa' xub'i'ij:

4«¿Sa' nawi ku'an junoq che alaq we e k'o jun ciento ub'exex yey kasach k'u junoq chike? ¿Na keb'uk'ol ta neb'a kan ri' ri noventa y nueve pa ri kiluwar y ke'ek k'u che utzukuxik ri jun xsach kanoq? Yey na kuxlan ta che utzukuxik k'a echiri' ku'riqa loq. 5Ek'uchiri' kuriqo, lik kaki'kotik kuya lo chirij uqul. 6Y echiri' kopon chirocho, kumol kichi' ri ramigos y ri ratz-uchaq', y jewa' kub'i'ij chike: “Chixki'kota wuk' ma xinriq ri nub'exex sachinaq” kacha'.

7»Kamb'i'ij k'u ri'in che alaq: Más ne k'o ki'kotemal chila' chikaj ruma juna aj mak kutzelej utzij chwach ri Dios, chikiwa noventa y nueve jusuk' e k'olik y na kajawax taj kakuytaj kimak.

Ri k'amb'al na'oj puwi rixoq kutzukuj rusaqil puaq

8»We e la' juna ixoq k'o lajuj saqil puaq ruk' yey kutzaq k'u junoq, ¿sa' ri ku'ano? Kutzij aq' y na'l kumes rupa ja, kutzukuj k'u kok'il yey na kuxlan ta che utzukuxik k'a echiri' ku'riqa loq. 9Y ek'uchiri' uriqom chik, kumol kichi' ri ramigos y ri ratz-uchaq' y kub'i'ij k'u chike: “Chixki'kota wuk' ma xinriq wa saqil puaq nutzaqom” kacha'. 10Kamb'i'ij k'u ri'in che alaq: Jela' ri ki'kotemal ke ri ángeles chwach ri Dios echiri' juna aj mak kutzelej utzij» xcha ri Jesús.

Ri k'amb'al na'oj puwi jun ala sachinaq

11Xutzijoj k'u wa jun k'amb'al na'oj chike, jewa' xub'i'ij:

«K'o jun achi e k'o ka'ib' uk'ajol. 12Jun q'ij ri chaq'ixel xub'i'ij che ruqaw: “Tat, jacha la upa ri b'eyomalil la y asu ya'a la janipa ri taqal chwe ri'in” xcha che ruqaw. Y ruqaw e xu'ano. Xujach k'u rub'eyomalil, xuya ri taqal che ruk'ajol atzixel y ri taqal che ri chaq'ixel.

13»K'amaja' k'u naj ujachik upa, rala chaq'ixel xuk'ayij ronoje ri xya' che, xumol b'i uchi' ri puaq y xe'ek naj chupa jun chik tinamit. Chila' k'u ri' xutz'ila' ronoje rub'eyomalil, ma xu'an ruk' ri puaq ronoje ri xraj rire. 14Ek'uchiri' xuk'is ronoje rurajil, xpe jun nimalaj numik chupa la' la tinamit pa k'o wi. Y xujeq lik kutij k'ax.

15»Xe'ek k'ut che utzukuxik uchak ruk' jun achi aj chila'. Yey rachi xutaq b'i pa juyub' che kichajixik uk'iyal aq. 16Ek'u rala xujeq lik kanumik, kurayij uwach tob' ne e ri kecha' ri aq, pero na jinta junoq kaya'w re che.

17»Tek'uchiri', xk'un runa'oj y chirib'il rib' xuch'ob' raqan: “Chila' chirocho ri nuqaw lik k'o kakitij ruk'iyal mokom; yey ri'in wara kinkam che numik. 18Ek'u wo'ora kintzelej chirocho ri nuqaw y jewa' kamb'i'ij che: Tat, in makuninaq chwach ri Dios y chiwach rilal. 19Na taqal ta chik kab'i'x chwe in k'ajol la. 'Ana la chwe pacha' xa in chi jun mokom la” xcha chirib'il rib'. 20Y ek'u xu'ano. Xumaj b'i ub'e chirocho ruqaw.

»Ek'u ruqaw, echiri' xril pana ruk'ajol chinimanaj, lik xjuch' ka'n pa ranima'. Lik k'u ri' kanik xe'ek y xu'k'ulu apanoq. Xulaq'apuj y xutz'ub' uchi'.

21»Y rala xub'i'ij che ruqaw: “Nuqaw, in makuninaq chwach ri Dios y chiwach rilal. Na taqal ta chik kab'i'x chwe in k'ajol la” xcha'.

22»Pero ruqaw xub'i'ij chike ri raj chakib': “Ji'wesala' lo ri k'ul más chom y chiwiqa'. Chikojo juna mapaq'ab' che ruwi uq'ab' y uxajab' che ri raqan. 23Yey ji'k'ama lo ri meq' lik ti'o'jirisam y chikamisaj. Qatija k'u ri', chojki'kotoq y qa'ana nimaq'ij, 24ma wa nuk'ajol e junam ruk' kaminaq chik yey wo'ora xk'astaj loq. Rire sachinaq chik pero xriqitajik” xcha chike. Y xkijeqo lik keki'kotik.

25»Ek'u ruk'ajol atzixel b'enaq pa juyub'; yey echiri' xk'un lo chunaqaj ri ja, xuta ri música lik kat'iqowik y ri kexajaw pa ri nimaq'ij. 26Xusik'ij k'u pan jun chike raj chakib' y xutz'onoj che sa' ri katajinik.

27»Raj chak xub'i'ij che: “Xk'un ri chaq' la. Ruma k'u la', ri qaw la lik xki'kot che ma utz uwach xk'unik, na jinta k'o xuk'ulumaj. E uwari'che, xutaq ukamisaxik ri meq' ti'o'jirisam cha' kaqa'an nimaq'ij” xcha che.

28»Ek'u ri atzixel lik xpe royowal y na xraj taj kok b'i. Xel na k'u lo ruqaw y lik xelaj che cha' kok b'i. 29No'j rire xuk'ul uwach, jewa' xub'i'ij che ruqaw: “Rilal eta'am la janipa lo junab' wa' in chakuninaq uk' la y na nupalajim ta tzij la julajoq. Na ruk' ta k'u ri', na ya'om tane la chwe tob' xa juna ralko nukaprux cha' kan'an nimaq'ij y kinki'kot kuk' ri wamigos. 30Yey ek'u wo'ora xk'un wa jun k'ajol la, ri xa xu'tz'ila' lo ri puaq la kuk' ixoqib' na chom ta kib'inik; na ruk' ta k'u ri', ruma rire, xtaq la ukamisaxik ri meq' ti'o'jirisam” xcha che.

31»Ek'u ruqaw xub'i'ij che: “Nuk'ajol, ri'at ronoje q'ij at k'o wuk', yey rub'itaq we, ronoje awe'at chik. 32No'j wo'ora lik chirajawaxik wi kaqa'an nimaq'ij y kojki'kotik, ma wa'chaq' e junam ruk' kaminaq chik yey wo'ora xk'astaj loq. Rire sachinaq chik pero xriqitajik” xcha'.»

Currently Selected:

Lucas 15: acrN

Highlight

Copy