Lucas 21

Ri qasa'n xuya jun ixoq malka'n

(Mr. 12:41-44)

1Ri Jesús xeb'utzu' pan ri b'eyomab' echiri' kakiya ri kiqasa'n chupa ri kaxa re qasa'n pa ri Rocho Dios. 2Y xril k'u jun ixoq malka'n lik nib'a' echiri' xuya chupa ri kaxa ka'ib' raltaq ko meyo lik na k'i ta rajil. 3Ek'u ri Jesús xub'i'ij:

—Paqatzij wi kamb'i'ij chiwe, chwach ri Dios wa jun ixoq nib'a' y malka'n e ne xuya más chwa ri xkiya konoje. 4Ma konoje xa e xkiya ruwi' ri kipuaq; no'j wi'xoq tob' lik nib'a' e xuya ronoje ri puaq k'o ruk', wa' e re kuloq' ri lik kajawax che —xcha ri Jesús.

Taq ri k'utub'al re ri k'isb'al re ruwachulew

(Mt. 24:1-28; Mr. 13:1-23)

5Chiri' k'u ri' e k'o jujun kech'a't chwi ri Rocho Dios, kakib'i'ij lik chom u'anom ruk' taq ri chomilaj ab'aj y ruk' taq ri chomilaj wiqib'al ya'tal kuma ri tikawex.

Ek'u ri Jesús xub'i'ij chike:

6—Kak'un k'u ri q'ij echiri' ronoje wa kitzutza', kawulixik; jek'ula', na kakanaj ta chi juna ab'aj puwi' jun chik —xcha'.

7Tek'uchiri' xkitz'onoj che ri Jesús, jewa' xkib'i'ij:

—Qajawal, ¿jampa nawi ku'ana taq ri' wa'? ¿Yey sa' ri k'utub'al kilitajik echiri' ku'ana'? —xecha'.

8Ri Jesús xub'i'ij k'u chike:

—Lik chichajij iwib' cha' na kixsokotaj taj; ma e k'i ri kek'unik y xa kakichiq'imaj uwach ri nub'i', jewa' kakib'i'ij: “In ri Cristo, Rucha'o'n lo ri Dios, yey lik xa naqaj chi k'o wi lo ruq'ijol ri nutaqanik,” kecha'. No'j ri'ix mixterej b'i chikij. 9Y echiri' kito k'o ch'a'oj y ketukuk ri winaq che ruwachulew, mixi'ij iwib' che. Ma lik chirajawaxik nab'e na ku'ana na ronoje wa', no'j k'amaja' ne ri' ri k'isb'al re ruwachulew —xcha'.

10Xub'i'ij k'u chike:

«Ek'o tinamit keyaktaj chikij jujun chik tinamit y e k'o taqanelab' keyaktaj chikij jujun chik taqanelab'. 11Ku'an nimaq taq kab'raqan. Che uk'iyal luwar che ruwachulew kape numik y yab'il pakiwi ri tikawex. Yey che ruwa kaj kilitaj nimaq taq k'utub'al xib'ib'al uwach.

12»Pero chwach taq k'u ri' wa', ri'ix kitij na k'ax ruma ikojom ri nub'i', kixchapik y kixternab'ex ruk' k'ax, kixya' pakiq'ab' raj wach re ri sinagogas cha' rike kakiq'at tzij piwi' y kixk'am b'i pa cárcel, kixk'am b'i chikiwach ri reyes y chikiwach ri taqanelab'. 13Jek'uri'la', utz kiq'alajisaj ri Utzilaj Tzij chikiwach. 14Mixok il che sa' ruk'ulik uwach ki'ano echiri' kito' iwib' chikiwach rike; 15ma e ri'in kinya'w ich'a'tem yey ina'oj cha' konoje ri tzel keb'ilow iwe na kakiriq ta chi uk'ulik uwach chiwe.

16»Yey kixya' ne pa q'atb'al tzij kuma richu-iqaw, kuma taq riwatz-ichaq', kuma taq ri k'o chux chiwe y kuma ri iwamigos. Y jujun chiwe keya' pa kamik. 17Lik k'u tzel kixil kuma taq ri winaq ruma ikojom ri nub'i'. 18Na ruk' ta k'u ri', mub'isoj ik'u'x ma ix k'o puq'ab' ri Dios y na jinta ne tob' xa juna iwi' kasachik.#21:18 Tob' ri qacuerpo wara che ruwachulew ka'an k'ax che, wa' xa re joq'otaj; ma ri Dios ub'i'tisim jun k'ak' cuerpo chiqe y wa' na jinta junoq ka'anaw k'ax che. 1 Co. 15:42-44,52-54; 2 Co. 4:14-18; 5:1-30 19Ma we kich'ij uchuq'ab' ronoje, kik'ul na ri kolob'etajik y ri k'aslemal na jinta utaqexik.

Ri tinamit Jerusalem kawulixik

20»Echiri' kiwil ri soldados kakijeq kakisut rij ri tinamit Jerusalem, chiweta'maj k'ut e ri' kopon ri q'ij kawulix ri tinamit. 21Ek'u ri winaq e k'o pa ri luwar re Judea, cheb'animaj ub'i chwa taq juyub'; y ri e k'o chupa ri tinamit Jerusalem cheb'elub'i; yey ri e k'o pa juyub', meb'ok chi lo Jerusalem, 22ma wa' e uq'ijol q'atb'al tzij, echiri' ku'ana' janipa ri tz'ib'ital chupa Rutzij Upixab' ri Dios puwi wa'. 23Chupa taq k'u la' la q'ij, lik toq'o' kiwach ri e yewa' ixoqib' y ri ketz'umtisanik, ma lik sa'ch ri nimaq k'axk'ob'ik kape che ruwachulew ruma ri royowal ri Dios chikij wa' wa tinamit.

24»Lik e k'i ri kekamisax ruk' espada y e k'i kek'am b'i chi presoyil pa jujun chik tinamit che ronoje ruwachulew.#21:20-24 Wa' xu'ana chupa ri junab' 70 D.C. cuarenta junab' chwi rukamik ri Jesús, echiri' ri soldados romanos xe'kiwulij ri tinamit Jerusalem. Konoje ri e aj judi'ab' e k'o Jerusalem, pa nik'aj chike xekamisaxik y pa nik'aj xek'am b'i chi presoyil. Xew xekolob'etaj ri xkikoj sa' ri xub'i'ij kan ri Jesús, ma xeb'el b'i chupa ri tinamit echiri' k'amaja' sutum rij wa' kuma ri soldados. Yey ri tinamit Jerusalem kak'oji' k'u pakiq'ab' ri na e ta aj Israel cha' ketaqan puwi', k'a pa kopon wi ruq'ijol ub'i'im chi ri Dios.

Ruk'unib'al Ralaxel Chikixo'l Tikawex

(Mt. 24:29-35, 42-44; Mr. 13:24-37)

25»Chwa k'u ri' ri kaj kilitaj k'utub'al che ri q'ij, che ri ik' y che taq ri ch'umil; yey taq ri winaq che ruwachulew kasach kina'oj y kakijeq kakixi'ij kib' che ri nimalaj uch'awib'al ri mar y che ri ya' lik kel chikaj chwi ri mar. 26Keq'ocholaj taq ri winaq, ke'ek ri kina'oj y ketzaq pulew ruma xi'in ib' che ri k'axk'ob'ik kape che ruwachulew; ma e taq ri k'o kichuq'ab' che ruwa kaj keyikiyo'xik. 27K'a tek'uchiri' kilitaj Ralaxel Chikixo'l Tikawex kak'un lo pa sutz' ruk' ruchuq'ab' y ruk' runimal uchomalil.#Dn. 7:13; Ap. 1:7 28Ek'uchiri' kujeq kilitaj wa k'utub'al, lik chichuq'ub'ej iwib' che roy'exik ri ikolob'etajik chwa ri k'axk'ob'ik» xcha ri Jesús.

29Ri Jesús xutzijoj k'u wa jun k'amb'al na'oj chike:

«Chiwilape ri che' re higo y ronoje taq ri che'. 30Echiri' kiwilo ketuxik, iweta'am xa naqaj chi k'o wi lo ruq'ijol echiri' kab'ukb'utik y na jinta jab'.#21:30 “Ruq'ijol echiri' kab'ukb'utik y na jinta jab'”: Kil “verano” pa vocabulario. 31Jek'ula' echiri' kiwilo ku'ana ronoje taq wa', chiweta'maj xa naqaj chi k'o wi lo ruq'ijol echiri' ri Dios kataqan puwi ronoje. 32Paqatzij wi kamb'i'ij chiwe: E k'o tikawex re wa' wa q'ij na kekam tana we na xkil tub'i ronoje wa'. 33Ruwa kaj y ruwachulew xa kasach uwach, no'j ri nuch'a'tem na kasach ta uwach.

Chixk'ola jusuk', e chiwoy'ej ruk'unib'al ri Cristo

34»Lik chichajij iwib' cha' na kiya ta iwib' che taq ri rayinik re ri mak, che ri q'ab'arik y che rub'is ik'u'x re ruwachulew, ma k'axtaj kak'un lo ruq'ijol Ralaxel Chikixo'l Tikawex echiri' na iwoye'em taj. 35Ma ruk'unib'al Rire chikiwach ri e k'o che ruwachulew, xaqik'ate't ku'ana', jela' pacha' echiri' juna awaj xaqik'ate't katzaq pa laso re kachapik.

36»Mawar k'u iwach, xaqi e chixch'a't ruk' ri Dios cha' k'o ichuq'ab' chwa wa katajin loq y jela' taqal chiwe kixkolob'etaj chwach ronoje wa', y na kixk'ix ta k'u ri' kixtak'i' chwach Ralaxel Chikixo'l Tikawex echiri' kak'un loq» xcha'.

37Ek'u ri' ri Jesús e taq ri paq'ij kak'utun pa ri Rocho Dios yey e taq ri chaq'ab' kel b'i ke'k'ola chwa ri juyub' Olivos. 38Y konoje ri winaq anim tan keb'opon chupa ri Rocho Dios cha' ke'kita ruch'a'tem ri Jesús.

Currently Selected:

Lucas 21: acrN

Highlight

Copy