Exodo 11
11
Pueyaso numootesacari Egipcio taucuaca jiyapueranuhuari cusonuunutaniya
1Pueyasoori tariucua Moisees sequeno quiriquiaa:
—Faraoon saniitionutaniya socuanijia. Janiyari socua tamonu naquiya miiniu jiyaronutaniya nocuani, puetunu na jiitiasano narta taucuacaacuajaajanio. Jiyacaritij, nojuajaari shusha jiyacariquiya nia cartenutaniya. Majaari saaja na cartenu quiniutianiya niajaniya, nojuajanaa cutaraari niaacua sanenutaniya na jaacanura puetunu niajaniyajanaa, ritia nia quianura nio na jiyajiniji. 2Quiarijiani, puetunu Israelcuajinio caneno pueyajanaa quia numootere, canuu, maajipohuajaajanio. Puetunu nojorijianaa cuaara na shuriucua quiniaa taucuaca mashiniquiniuuria oro, platajiniji shipinijiosano casaa tama nojori casaarajaaja.
3Jiyacaritij, Pueyasoori cuno Egipcio taucuaca tojetequiaari Israelcuajinio caneno pueyara capora nojori quiniuria. Naajuhuaj, puetunu Faraoon jiyaniijianucuara na jiyatesano narta taucuacajanaani, nojoriiri Moisees camarucuaja, puetunu Egipto taucuacajaajanio.
4Moiseesri jiyacari Faraoon sequeree:
—Pueyasoori naa cua sequeree cua numootenura quiarijia quiajaniyatej. Naa quia sequeyari: “Janiya quiarijia nio niucua shiyaqueya puetunu Egipto tiacaacojanaa tajiniutianiyani. 5Naacuatej, puetunu Egipto jiya taucuaca jiyapueranuhuajanaari cusonuunutaniya. Cusonu coteetariquianoori camarnujuanaa Faraoon jiyapueranu. Naajuhuaj, puetunu tiaco poonijiotesano taatujuri maajipohua jiyapueranuhuari cusonuuriquiano, teyonu maajipohuatucuaja trigo riiquiniaara seeratasanocuajani. Naa cusonuuriquianojaariuhuaj puetunu Egipcio seya jiyapueranuhuajanaa. 6Naacuatej, puetunu Egipto jiyajiniajanaa tojishaariquianoori jiyanohua taucuaca sariyocuatunu quera na macaaquionuta. Tariucuacaanu majaari naa jiyano sariyocuanu tojishaanu quijia. Nio nuhuaji majaari socua naa sariyocuatunu tojishaanu quiniutianiya.” 7Quiarijia maninia nia niishiniuria, Faraoonnaa, Pueyasoori seetanujuanaa Israelcuajinio caneno pueya panijia, saniniuujia nia shocoteyarijia. Quiarijia quia niatasureeraj: Cuarta Israel pueyajinijinio cusonuyaquiniuucua, canaa seyajinijiniojuhuaj, sareyari maja quenaaja jaacoonuuriquiano. 8Naacuatej, jiyaniijianucuara quia jiyatesano quiarta taucuacaari cucua nijionutaniya. Jiyacaritij, nojoriiri cucuara na mojoquetaconuta naa cua sequetunutaniya: “¡Tariucuaja sacaj! Niaa puera canaa miitiaacujua. Canaa jiyajiniji ritia quia quiare puetunu quiarta pueyatajanaa.” Nojori jaara naa cua sequeturetej, majaari cua pooniu quiniutianiya juhuanojuaja niiquiji.
Naa Moisees sequenu nuhuaji Faraoontej, jiyanohua na juaaniutia tohuatacuhuari. 9Na nuhuaji, Pueyasoori naa Moisees sequerohuaquij:
—Majaari Faraoon tojiniu quiniutianiya niajaniya. Naajaa, maja pishiniu. Naacuatej, nio Egipto jiyajinia quijiaca taucuacaari cua cumaacata cua miijiosano niquiniutianiya socua.
10Naacuatej, Moisees, tarajanu Aaroonjaajanio, nojoriiri Pueyaso cumaacata miijioquiaari queraatia nocuaji jiuujiatesano casaa, camarnu Faraoon tacoji. Naajaa, majaari Israelcuajinio caneno pueya na cartenu quirii, Pueyaso jiyatenuucua nojuaja juhua tojiyashijiara na quiniuria.
Currently Selected:
Exodo 11: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
